Jon 5
5
Jisas te vamwesa aji wan muru sileng
1Tei limalen ba Jiusni ram leli kanleutan tapmak goah rat tok na ngate neleli, bi Jisas mwe sak Jerusalem. 2Sileng tetpo Jerusalem, sasari matgali niah rat tehu i Matgali nan Sipsip. Val tetpo iginan niah matbongorin tei kalim. Li dalen Jiusni ba rat tehui Betsata. 3Hal kawu lengleng nan rasanni rat van nedi wan murun sileng nong bovani goah lelen bat vitivitki. Goah rat tei matbi bi gagaan, bi goah ngudu rat mat, ratti sera na iginan. 4Tedok nei le go ba enjil non Subu tedok nesipma nebitvitki i lelen sileng nong. Bi aji ah tesip bawo limalen goah lelen sileng tevitvitki ba non rasan te van dini rasan apma nan nga ah te ras ini. 5Aji tesadok iginan ah teras, sika ngawul kajil vepnan telapjil. 6Jisas tekita goah tetpo, bi teililngi nuhu teraste i viuk lengleng bi bep mini nuhu, “Kom doni nuhu nom rasan nema nok?” 7Aji nong balu ini bep nuhu, “Nam doni, Subu, ba aji tebulong ah nemat kae nana mwisip entorah lelen sileng bitvitki. Nam gamdok neleli nuhu nama sip entorah lelen sileng bitvitki ba aji go watnende tesipte.” 8Jisas bep mini nuhu, “Ko dumere bi kom apko bujubwenan bi muhural.” 9Tei vilbwaleh ba mamjin aji nong mwegabis bi mweapko bujubwenan bi muhural ban.
Jisas tevamwesa aji non le ren ah Sabat. 10Jiusni rabep mini aji nong nuhu, “Komak gavak i bujubwenam, gonani ren ahe ba Sabat bi teba woswos nga mini noma Temwat nuhu kon leli tepmak.” 11Aji nong balu ini bep nuhu, “Aji ah te vamwesa nana ba te vep nuhu, ‘Ko apko bujubwenam bi kom hural.’ ” 12Ra bep mini nuhu, “Itan nanong ni te vep mini kik nong, ‘Ko apko bujubwenam bi kom hural’?” 13Aji nong ba tebamu ililngi aji nga ah te vamwesa Jisas temlu masi dini ni gonani tarutni rat tei hal kawu basla.
14Tei limalen ba Jisas butdihi aji nong le koron valin God, bi bep mini nuhu, “Ko kita kot mas nanong ba kon bamu lel mwetakte kapmwaan an gonani apma kawungate bamu gap vanokom.” 15Aji nong mamlu bi ban bep mini Jiusni nuhu tei Jisas niah teite vamwesa. 16Tei le to nanong ba Jiusni ra bawo negit riani Jisas u gonani tega vamwesa aji nong le ren ah tei Sabat.
17Jisas bep bamula mini, “Tadat ba mum rasras nge bi nana nanmu um natapmak.” 18Entorah rat rongo go nong ba rat toni go ngate ah ra bat ih bamte tei tebaite ni nga nante u goah te lel rotvi temwat nan no ren an Sabat ba tei u gonani tegam bep nuhu Teman ah God. Bi tegam leli ba ramru sabwaleh nuru God.
Rowok tegol non Nujun God
19Jisas balu ini bep nuhu, “Mwetaknga letlet nam bep mini gimi nana niah nambi Nujun God ba nan ba lel bwiri apma nga li nok vihnian goma. Uman ah Tadat mweleli ba nam leli apma nananong. Apmanan ah Tadat mweleli ba nana niah nambi Nujun ba nam leli apma nge nanong. 20Tadat mwegaji bamte nana niah nambi Nujun. Bi mwesesra sera leutnae mini nana niah mweleli. Man mu sesra apma kawu lengleng ngate mini nana vali goah, niah kan netkotkoh ini. 21Tapmak goah Tadat mwe leli goah rat mat ram dumre bamul dini mete bi neskani masen mini ni bi nana niah bambi Nujun nan neskani masan mini goah nam doni nan leli mini ni tapmak. 22Tadat teba veveik nga i aji ba mwiling sera halan vevikan u kapmwaan mini nana niah nambi Nujun. 23Metan goah aji nisera ran bihni ran bihni meres nak niah nambi Nujun God tapmak goah ra bihni meres nan Tadat. Aji ah teba vihni meres nak nga niah nambi Nujun God ba teba vihni meres nan Tadat nga niah tesro nana.
24“Mwetaknga letlet nam bep mini gimi aji nan ah bihni mwetaknga nan dalek, bi aji ah tesro nana, ba man mas i masradaan. Man bamdi nga le veveikan u gonani te vante dini mete vale masan. 25Mwetaknga letlet nam bep mini gimi to mannepma bi tepmate niah goah rat mat ran rongo dalek niah nambi Nujun God. Bi goah ran rongo bi rammas. 26Tadat bibi bujun masan. Bi te skani mini nana, niah nambi Nujun nuhu nanei bujun masan tapmak ni. 27Bi teskani woswos nan mini nana niah nambi Nujun u goah nan veveik i tarutni. Gonani nana nante niah nambi Nujun Aji. 28Tebaite apma nga niah kan netkotkoh ini gonani to mapma niah goah rat tipmian ba ran, rongo dalen. 29Bi ran dumere bamul dini ut le muru, goah rat leli uman tekabis ba ran dumre bamul bi ra ban le utnen masan. Ba goah rat leli uman tekapmwa ba ran dumre bamul bi ra ban le utnen sasaran.”
Rat vep rorop i Jisas
30“Nan ba lel bwiri apma nga li rowok. Nam leli veveikan nante tapmak goah God bep mini nana, bi nok veveikan ba tewoswos. Gonani nat ba lel dopmi tenga nuhu nama lelte nok tonian, ba nam leli tonian non aji ah tesro nana.
31“Tigoah nam bat toptop bamul ma nokok ba nok toptowan ba bat baite mwetaknga nga. 32Ba aji watnede mwi di ah mo doptop nokok uman, bi nam maililngi nuhu toptowan ah bep u nana ba mwetaknga. 33Kat tesro atnan nomi kasoso vaben Jon, bi tedoptop nokon apma ah mwetaknga. 34Tebaite ni nga nuhu ra bat toptop ngate nokok, ba nam bep mini gimi metan goah ka bat vamwesa an. 35Jon tei tekeni hee niah map bi mamban modok, bi rongnan nokomi tei tekabis i non hee, ba tei tebaite viuk nga. 36Ba aji tedok ah mo doptop nokok niah non toptowan tesasviri Jon ngate. Topnan nok uman niah Tadat telngi mini nana noh nan leli. Uman ni nanong ba ram doptop nokok, bi ram sesra nuhu, Tadat tesro nana. 37Bi Tadat nanong ba bep seresere nana, bi kat bado rongte non vehuran nga bi kat bado gitate lemtan nga. 38Gimi, ba dalen teba vaim nga le gimi, u gonani katba vihni mwetaknga nak nga nana niah tesro nana. 39Kam huhu nokon ululan at mwate gonani ka bihni nuhu kan butdihi masradaan lelen. Ba ululan ni nanong ba ram doptop nge nokok! 40Ba nan nga ba kat ba ga doni nga nuhu kam mapma bek metan goah ka bat wutdihi masradaan.
41“Nat ba donite nga nuhu tarutni rama gerite nana. 42Nam maililngi luhmwi gimi, bi nam maililngi nuhu nomi mwegololoan u God ba tebulong le jinemi. 43Nat sipma mini rowok tegol non Tadat ba kat ba lep gogote nana nga. Ba aji watnende mwe gamupma ma le han ba kamlep gololo. 44Kam geri gimi nge ah kabi aji. Ba nanga ba kat baga lep gogo God nga nuhu rongnan nokomi bat kabis ini. Man gai gavak nagoah kan bihni mwetaknga? 45Kan ba vihni tean nuhu maneite nana niah nan bep sirsisirite gimi mini Tadat, ba manei Moses niah nomi vihnian mwi di nokon niah man bep sirisiri gimi. 46Tigoah kabat vihni mwetaknga nan Moses ba kabat vihni mwetaknga nak u gonani Moses ba teulu toptop nak. 47Kat ba vihni mwetaknga nan apma nga ah tevep, ba man gai gavak na goah kan bihni mwetaknga nan apma ah nam bep?”
Currently Selected:
Jon 5: APMA
Highlight
Share
Copy
Want to have your highlights saved across all your devices? Sign up or sign in
Published by the Bible Society of the South Pacific in 1977.
