Jon 19

1Paelet mali Jisas bi mweleli ram riji. 2Soldia ni ram leli kawa niah rowon tedi bi ram ma bwesani li bujun Jisas, bi ram mali bwelakte niah tei tememe bi ram goro vanokon. 3Ram dok nepma Ben bi ra bep nuhu, “Kabihni meres nam Subu nan Jiusni.” Rat tok nembep tedapmak bi ram reba.

4Paelet ban mwetak bi bep mini tarutni nuhu, “Karu gita, nam mwatkae mapma bemi metan goah kama kita goah nat ba wutdihi apma tekapmwa nga ah te leli.” 5Jisas ban wop, tekoro kawa nokon bujun niah rowon tedi, bi mo goro bwelakte tememe niah tei tekeni bwelan subu ni. Paelet bep mini ni nuhu, “Karu gita! Aji nge ahe!” 6Entorah aji salean le valin God bi aji nan sesepan ni rat kita ni ram ngaa ra bep nuhu, “Nemat nokon kawolwol!” Paelet bep mini ni nuhu, “Karuli ban bi ka ban nembwah bata vanokon kawolwol, gonani nat ba wutdihi apma tekapmwa nga niah nema ihan uru.” 7Jiusni ra balu ini ra bep nuhu, “Noma temwat tedok, bi li noma temwat nanong ba aji ah te dapmak ah man mat rada nae. Gonani mwegam bep nuhu ni Nujun God.”

8Entorah Paelet te rongo goah rat vep vehuran nong ba temtaji tokol ini. 9Mwe samul mwetak le val mini Jisas, mu neleli ini nuhu, “Kot tepma ibeh?” Ba Jisas teba walu tenga. 10Paelet bep mini nuhu, “U apma ba kot ba doptop nga mini nana? Kot baililngi nga nuhu rowok tedok u goah nan ling gabarani kik, bi rowok tedok u goah nan leli ba ran nehi kik nokon kawolwol?” 11Jisas balu ini bep nuhu, “Rowom tedok vali nana gonani rowokte nanong ba God teskani mini kik. Ba u aji ah maskani nana mini kik ba non kapmwaan kawu lengleng.” 12Entorah Paelet te rongo vehuran nong ba tedoni nuhu bat ling gabarani Jisas. Ba Jiusni ram ngaa, ra bep nuhu, “Tigoah kon ling gabarani ba mwe sesra nuhu kot baite walun mweran nga non Sisa. Gonani aji ah bep nuhu ni namai ni subu ba bibi iwel non Sisa.” 13Entorah Paelet te rongo vehuran nong bi mali Jisas ban wop bi ban mwe sadok li bwelaka niah tei utnen aji ah te leli sasaran. Li dalen at Isrel ni ba rat tehu i Gabata.

14Te van sasari lolok nan ren nanong niah batei matjubung nan ba bi taron sasabisi nan Pasova. Paelet bep mini Jiusni nuhu, “Nomi subu nge ahe.” 15Ram ngaan, ra bep nuhu, “Nemat! Nemat! Ko wah bata vanokon kawolwol.” Paelet mu uhleli i ni nuhu, “Kam doni nuhu nama wah bata nomi subu vanokon kawolwol?” Aji salean le valin God ran balu ini ra bep nuhu, “Noma subu go tebulong ba Sisa nanate.” 16Paelet maskani Jisas ban mini ni bi ran ban nem bwah bata vanokon kawolwol.

Rat wah bata Jisas vanokon kawolwol

Ram mali Jisas ban. 17Ram mwatkae Jisas ban ram leli mwe selkak bamula non kawolwol. Rat tetkae ban ut ah rat tebu i Sun Bujun Mete. Li dalen at Isrel ba rat tehu i Golgota. 18Rat van iginan bi ra bwah bata vanokon kawolwol. Ratmu bwah bata aji karu nokon kawolwol go maun Jisas. 19Paelet te ulu vehuran bi mwe dakrani nokon kawolwol non Jisas. Vehuran ah te ulu ba te vep nuhu, “Jisas aji at Nasaret niah Subu nan Jiusni”. 20Jiusni halkawu lengleng ah rat wulki vehuran non, gonani ut ah Jisas tetka nokon kawolwol iginan ba tei tebaite nawut nga dini vini. Bi ratmu ulu vehuran nong li dalen at Isrel, bi li dalen at Rom, bi li dalen at Gris. 21Jiusni, niah rat tei aji salean le valin God ra bep mini Paelet nuhu, “Ko ba uluan nuhu, ‘Ni Subu nan Jiusni’, ba koma ulu nuhu, ‘Aji ahe te vep nuhu, Nana nambi Subu nan Jiusni.’ ” 22Paelet balu ini bep nuhu, “Apma ah nat teulu ba mwidi rada nae, tebamdi nga nuhu man mu ul lih an.”

23Limalen goah soldia ni rat wah bata Jisas vanokon kawolwol, bi ram mali bwelan bi ra bahtani mase. Ram muli bwelan go, niah malen go tei tebulong ah rat teslo. 24Soldia ni ra bep mini datngi ni nuhu, “Tan ba sebwerawera tean, ba tabohni dais uru, Metan goah tan gita nuhu, manei itan ah man neli rei kidi.” Tega rop bwiswis nanong na ululan at mwate niah te vep nuhu,

“Rat vahtani bwelak mase,

Bi rat walwalule u bwelak niah tei bwaleh.”

Soldia ni rat lel luhmwi na tepmak goah rat vep mwate.

25Goah rat ti sasari kawolwol non Jisas ba tei dajin Jisas bi kisan dajin Jisas. Bi Meri niah tei atleiman Klopas bi Meri niah tei aji havin at Magdala. 26Jisas te kita dajin bi datngin non tarut niah temwegololo ini niah ratrudi, bi bep mini nuhu, “Aji havin, kon git gololo li nujum.” 27Bi bep mini datngin non tarut niah temwegololo ini nuhu, “Dajim ahe kon git gololo lin.” Tei le to nanong ba datngin tarut non Jisas nong mwatkae dajin bi ra ban nedok li vin nan.

Jisas Temat

28Jisas tei teililngi goah leut sera tedi na li mulngan nong, bi bat rop bwiswis na ululan at mwate bi bep nuhu, “Nam mamdi.” 29Tangin waen tekaka nong bi ram maskani mwe sak vawan bongon Jisas, nokon waka. 30Jisas teli waen bi bep nuhu, “Leut sera tenok nanong.” Bujun mwatka sebe, non bi mat.

Rat vena le mwarin Jisas

31Jiusni ram uhleli i Paelet nuhu nemamko i aji nan lasan nuru ba rama das rotvi wokoru, bi ram lep gabarani nuru dini kawolwol. Rat leli tapmak gonani tei ren kalim, bi rat varik goah mamjiru bat tetka rada nokon kawolwol le ren ah Sabat, gonani ren ah Sabat ba tei ren sanbak mini ni. 32Soldia ni raban nedas rotvi wokon ajinan lasan nuru nong, niah rat tehi nuru mini Jisas. 33Ba rat gamupma ben Jisas ba temat masi. Bi rat bam das rotvi wokon nga. 34Aji rei soldia ni mambena le mwarin Jisas. Tei vil bwaleh ba da bi sileng baut le bwaren ut ah te vena. 35Aji tei ah te kita apma nong bi tevep seresere. Bi ni maililngi nuhu tevep mwetaknga. Bi ni maililngi nuhu tevep mwetaknga metan goah kabat vihni mwetaknga nan. 36Apma nong tekap gonani bat rop bwiswis na ululan at mwate niah te vep nuhu, “Datngin sun bwaleh man ba mut tenga.” 37Bi ululan goah niah temu bep nuhu, “Tarutni ran git vali aji ah rat vena le mwarin.”

Rat titmi Jisas

38Tei limalen ba Josep niah ni aji at Aramatia ban mu uhleli i Paelet nuhu nema li mamjin Jisas. Josep nong ba tei ni datngin tarut non Jisas, ba teba dahkuru luhmwi tenga gonani temtani Jiusni nge. Paelet temko rini bi Josep mapma bi mali mamjin Jisas ban. 39Nikodimas niah tepma ben Jisas mwate ban jukun Josep. Ratru ruju wura hal karu, tei han go ah mir bi han go ah los. Wura i hal karu nong, ba tei ratrumres pon. 40Josep nuru Nikodimas ramru li mamjin Jisas bi ramru lubwa le sereul, mini wura. Ratru leli tapmak gonani tei halan go nanong ah Jiusni rat lubwa mete. 41Leko tetpo ut ah rat tehi Jisas iginan, bi muu tetpo na iginan niah tei terabwa nge, rat bado lingte aji nga lelen. 42Ramru ban nelngi Jisas le muu nong, gonani tei tetpo nge sasari, bi ren ah Sabat u Jiusni ba tei ni nge matjubung nan.

Currently Selected:

Jon 19: APMA

Highlight

Copy