Jon 17

Jisas te dangro u non tarutni

1Limalen goah Jisas te doptop, bi mwi git vamere bi bep nuhu, “Tadat, to tepma nanong. Ko skani nom meresan mini Nujun metan goah Nujun man neskani meresan mini kik. 2U gonani kot teskani mini, sasviri tarutni sera nae, metan goah man neskani masradaan mini taruni niah kom maskani ni mini nana. 3Bi masradaan nahe, niah tarutni rabat teililngi nuhu kik nante niah kobi mamjin God, bi neililngi Jisas Kraes niah kot tesro. 4Nat sesra nom meresan li uruu, bi nat nok i uman niah kot teskani mini nana nuhu nan leli. 5Nanong Tadat! Ko skani meresan nanong mini nana le nom ut. Mersan niah tei nok entorah nat tok bem bawo ba uruu mwega lelan.

6“Nat vep seresere kik mini tarutni niah kot te skani ni mini nana dini ut li uruu. Bawo ba rat tei nom ba kot teskani ni mini nana. Bi ram mamko li nom dalek. 7Bi nanong ba ra maililngi nuhu leutsera ah kot teskani mini nana ba tesipma bem. 8Ugonani nat teskani dalem mini ni niah kot teskani mini nana bi rat lep gogo. Bi ram maililngi mwetaknga nan nuhu nat sipma bem, bi ra bihni mwetaknga nan nuhu kot tesro nan.

9“Nam dangro u ni. Nat ba dangro tenga u li uruu ba nam dangro u tarutni niah kot teskani ni mini nana, gonani rabi nom. 10Leut sera ah nok ba nom. Bi leut sera ah nom ba bi nok. Bi nok meresan man sasaraan li ni. 11Nanong nam mapma bem nat bamdi nga temrap li uruu, ba ni randi li uruu. Tadat niah kobi sangbakan, ko rarei ni li rowok tetkol ah le ham, le ih ah kot teskani mini nana. Metan goah rabat tei bwaleh tedapmak goah tamrui bwaleh. 12Entorah nat tok bee ba nat rarei ni li rowok tegol nan ham, le ih niah kot teskani mini nana. Nat tidingi ni, ba aji le ni tebaslal tenga tei aji nante ah tedi u goah bat teslal, tei go nante nong niah nat vasla. Tei tedapmak metan goah ululan at mwate bat rop bwiswis. 13Nanong nam mapma bem bi nam bep goahe li uruu matan goah nok rongnan nokokte tekabis bat wewelip le jine. 14Nat teskani nom vehuran mini ni, ba tarut atli uruu rat kit riani ni gonani rat baite non ut li uruu nga, tedapmak goah nana nat baite non ut li uruu nga. 15Nat ba uhleli tenga i kik nuhu koma lep gabarakte ni dini ut li uruu. Ba nam uhleli i kik nuhu kon rarei ni dini halan Aji nan Kapmwaan. 16Tadapmak goah nat baite non ut li uruu nga bi ni bi rat baite non ut li uruu nga tedmak. 17Ko leli ni ba rai sangbak li halan mwetaknga, gonani dalem ba bi mwetaknga. 18Nat tesro ni ban li uruu tedapmak goah kot tesro nana vali uruu. 19Bi tei u ni ba nat teskani mamjik mini kik metan goah rabat tei mamjin nom aji.

20“Nat ba dangro tenga nante u ni ba namu bihni lenga aji ni niah ra bihni mwetaknga nan nom vehuran. 21Nam dangro nuhu ni sera ra bat tei bwaleh. Tadat! Tekabis nuhu rat dok le kiduru, tedapmak goah kom dok le nana bi nana nam dok li kik. Tekabis nuhu ran nei bwaleh metan goah tarut at li uruu ran bihni mwetaknga nan nuhu kot tesro nana. 22Nat teskani meresan nge mini ni niah kot teskani mini nana, metan goah ra bat tei bwaleh tedapmak goah tarui bwaleh. 23Nan dok le ni bi kon dok le nana, metan goah ran nei bwaleh lunluhmwi. Metan goah tarut at li uruu ran neililngi nuhu kot tesro nana bi kom mwegololo i ni tedapmak goah kom mwegololo i nana.

24“Tadat! Kot teskani ni te mini nana, bi namu doni nuhu rabat tok ut ah nambat tok iginan, metan goah ran gita nok meresan niah kot teskani mini nana, gonani kot kaji bamte nana bawo ba uruu mwega lelan. 25Tadat niah kobi woswosan! Tarut at li uruu rat baililngi kik nga, ba goni rahe ram maililngi nuhu kot tesro nana. 26Nat leli ba rat teililngi kik, bi nan lel rasras ini tedapmak, metan goah mwegololoan niah kot teskani u niah kot teskani u niah kot teskani u nana ba man gam di le ni, bi nana nan gam dok le ni.”

Currently Selected:

Jon 17: APMA

Highlight

Copy