انجیل لوقا 20

عیسی زاکین

1اییی روج وقتی کن عیسی معبدی دِلَکا مردومی آموج دَری و خدا پادیشایی خَشَه خَبری اَوونرا اییلام اَکری، سران کاهینِن و توراتی موعَلیمِن، ایسبیَه ریشونَّه، عیسی وَر آمین 2و واتِشون: «اَمهَ بواج، چه زاکینی نَه اِم کارون بَکَشَه؟ کی اِم زاکینی بَتِه آدوعَشَه؟» 3عیسی جواب داشَه: «اَز نی شِمَکا سوالی دارِم؛ بَمن بواجهَ، 4غسل تعمیدی کن یحیی اَدَریَه خدا طَرفیکا بَه یا اینسانی طَرَفیکا؟» 5اَیِن یَندِنه گَفَه ژَنِه کَردِشونه و واتِشون: «اَگَم بِواجَم ”خدا طَرَفیکا بَه“، عیسی باتیَه، ”پس چیرا بَی ایمان نِوَردِرون؟“ 6ولی اَگَم بِواجَم ”اینسانی طَرَفیکا بَه“، مردوم گِرد اَمه سَنگساربَکَنه، اِمی خاطِرکن اَیِن قانِع آبینَه یحیی ایلَه پَیغَمبر بَه.» 7پس واتشون: ”«اَمه نِزنَم کن چیکی طَرفیکا اَ.» 8عیسی اَیِنِش واتَه: «اَز نی بَه شمَه نِمَوات چِه زاکینینَه اِم کارون بَکَم.»

آوشَرَ باغَوونون مَثَل

9عیسی مردومیرا اِم مَثَلی وَردشَه و واتش: «مِردی اَنگرَ باغی گَتشَه و اَی چَنگِلَه باغه وونی ایجارَ داشَه و وِرَ زَمانیرا دییَرَ وِلَتیرا شَه. 10اَنگِر چییِه فصل کن آرَستَه، باغَه صاحیب ایلَه پاسَری باغَه وونون وَر عَندِشَه تا تیکَلیی اَنگِرَ باغی میوَکا بَی بِدَرن. ولی باغَه وونِن اَی ژِشونَه و تَیَه بال آگاردنِستِشون. 11باغَه صاحییب دیَرَ پاسَریی عَندِشَه، اَمّا باغَه وونِن اَی نی ژِشونَه و بَینَه بد رفتاری کَردِشون، وبَی تَیه بال عَندِشون. 12پس سوّمین کَرَ دیَرَ پاسَریی عَندِشَه. ولی اَیِن اِمیلَه نی یَرَ آکَردَشون، و باغیکا بِرِن بَرکَردِشون. 13«پس باغَه صاحیب واتِش: ”پی چِبکَرم؟ اِشتَن خاجَتیَه زوعَه رَونَه آمَکرد؛ شاید چَی حُرمتی غَم بَرن.“ 14ولی باغَه وونِن وَقتی کن زوعَه ویندِشونَه، یَندِنَه واتِشون:”اِم وارثَه بِرَ اَی بِکشَم تا میراث اَمه آرَسِه.“ 15پس اَ زوعَشون اَنگِرَ باغیکا بِرِن بَرَفندشونَه و کِشتِشون.

«ایسَه انگرَ باغی صاحیب اَوونَّه چِه بَکَیَه؟ 16اَ بومَیَه و اَ باغَه وونون نیفیت آرَکَرد، و انگرَ باغی دیَرَ کَسون دَست آرَدا.» وَقتی کن مردوم اِمِشون دَرَستَه واتِشون: «خدا نِکَر!» 17اَمّا عیسی اَوونکا چَم دَشتِشَه و واتِش: «پس موقدسَه نوشتَه اون اِم قِسمَتی معنی چِه چییَه کن باتی:

”سِه ای کن اِستا اِن رد کَردِشونَه،

ایسَه ساختمانی اَصلیَه سِه آبَیه؟

18هَر کم اَ سِه سَر بَرگنهِ، خِرد آرَبن، و هروَقت اَ سِه کَسی سَربَرگنهِ اَی لِرت آرَکَرد.» 19توراتی موعَلیمِن و سَران کاهینن راهی دوملَه بینَه تا هَه لَحظَکا عیسی ویلاخِنِن، اِمی خاطِر کن سَر آگِنَه بینَه عیسی مَنظور اِم مَثَلیکا اَیِن بین، ولی مردومیکا اَترسینَه.

مالیات دوعِه بَه ایمپراطور

20پس عیساشون زیر نَظر گَتَه و جاسوسِنی چَی وَر عَندِشون، کن بَشتَن صادیق نِمود اَدَرین، تا عیسی واتَه گَفونکا رِقی پَیدا بکن و اَی والی مَحکَمَرا دَراکِنِن. 21پس جاسوسِن عیسی کا دَپرسستین: «اِستا، بَموستیمون کن اِشتِه گَفِن و آموجِن دِرِستینَه، و هیچ کَسی طَرَفی نیشَگَت، بَلکَم خدا راه دِرستینَه آموج بَداش. 22خراج دوعِه بَه رومی ایمپراطورشَرعا اَمرا دِرِسته یا نِه؟» 23ولی عیسی چَوون حیلَه کا سَر آگِنَه و اَیِنِش واتَه: 24«ایلَه دینار بَمن آمونَه. اِم سِکَه سَری شِکل و نوم چیکی شِنَه؟» جواب داشون: «قیصری شِنَه.» 25عیسی اَیِنِش واتَه: «پس قیصری مالی قیصری آدَر و خدا مالی خدا بدَرَ!» 26اِنتَرکهِ، اَیِن نِشتاستِشون مَردومی وَریکا عیسی چَی واتَه گَفونَّه دوم دَرَفَنن، بَسکم هَته کن عیسی جَوابیکا حَیرون بینَ، دَمِریستین.

مَردَاون زِندَ آبِه

27چندنفر صَدوقیِن فِرقَه عالیمِن چَی وَر آمین. صَدوقیِن مَردَاون زِندَ آبِه قِبول نِدارین. 28اَیِن عیسی کا ایلَه سوال دَپَرسِستین کن: «اِستا، موسی چَمَرا نِوِشتَشَه کن اَگَم مِردی برا بِمِرِ، و اَ مَردَ ژِن بدارِ ولی خِردَن مَدارِ، اَ مِرد پی اَ ویوَ ژِنی بِبَرِ تا نَتاجی اِشتَن برا را بِنَر. 29ایسَه هَف گِلَه برا بین. اَوَلین برا ژنی گَتِشَه و بی خِردَن مَردَ. 30چَی بَه دوملَه دِوّمین برا 31و سوّمی برا اَژِنی گَتِشَه و هن تَرکهِ هر هف برا بی‌ام کن خردَنی بدارن مَردینه. 32آخیر بَسَر اَ ژِن نی مَردَ. 33ایسَه روجیکا کن مَردَاِن زِندَ آبون، اَ ژِن کِرَم گلَه ژِن بَبیه؟ اِمی خونه کن هَر هَف گِلَه برا اَ ژِنی بَردَشون بَه.»

34عیسی اَیِنِش جواب داشه: «اِم دِنیا آدَمِن ژِن بَگَتینَه و شو بَشین. 35اَمّا اَیِنی کن بِه اَ دِنیا آرَستِه و مَردِ بَه دوملَه زِندَ آبِه لَیاقَتی دارن، نِه ژِن بَگَتینَه و نه شو بَشین. 36اِمی خونه کن اَیِن دِ نینَّشا مَردِ، اِمی خاطر کن اَیِن فرشتَه اونَّه بَرابرینَه. اَیِن خدا خِردِنِه اینیَه، اِمی خونه کن قَیامَتی خِردَنینَه. 37ولی مَردَ اون زِندَ آبِه حَقیقَت، گَفیَه کن حتی موسی نی آرا گَتَه چِغی ماجیرا جیگیر کردِ موقه اَی دیار آرَکَرد. اَ جِگاکا کن خداوندی، اِبراهیمی خدا و ایسحاقی خدا و یعقوبی خدا خِلِه بَکَی. 38خدا، مَردَ اون خدا نیَه، بَلکَم زِندَ اون خِدایَه؛ اِمی خاطر کن چَی وَریکا گرد زندَاینهَ.» 39اَموقه بعضی توراتی مُعَلیمن واتِشون: «اِستا، چاک واتِرَ!» 40و دِ هیچ‌ کَم جُرئَت نِکَردِشون سوالی عیساکا دَپَرسِن.

مسیح چیکی زوعَه یَه

41چَی به دوملَه عیسی اَیِنِش واتَه: «چِنتَرَ کن باتینَه وعدَ آدوعَه مسیح، داوودِ پادیشا زوعَه یَه؟ 42اِمی خاطر کن داوود پادیشا اِشتَن، کیتاوِ زَبوریکا باتیَه:

”خداوند چمِن خداوندیش واتَه:

چِمِن راستَه بالی طَرَفیکا بِنِش

43تا اَ هَنگوم کن اِشتِه غَنیمون اِشتِه لِنگون بنیکا بَرَفَنِم.“

44اَگَم، داوود پادیشا اَی”خداوند“ خِلِه بَکَی، پس چِنتَر بَبیَه کن وَعدَ آدوعَه مسیح داوودِ پادیشا زوعَه ببو؟»

توراتی مُعَلیمونکا بَرحَذَر بِبَه

45هَتَه کن مردوم گِرد گوش اَدَرین، عیسی اِشتَن شاگردِنِش واتَه: 46«توراتی مُعَلیمونکا برحذَر بِبَه. اَیِن دِرازَ غَبا اون دِلَکا گَل ژِ رَی بَداشتین، اَیِن رَی بَداشتینه مَردوم کوچَه بازاریکا اَوون سَلام بواجِن، عیبادَتگا اون دِلَکا بِیتَرین جِگاکا بِدارن و مِیمانیونکا نی سَرَنگاکا بِنِشِن. 47اَیِن ایی وَریکا ویوَ ژِنون کَه پِنَّتارِست و دییَرَ وَریکا اِمی خاطر کن بَشتَن چاک نمود بِدَن اِشتَن دِوا طول بَدان. چَوون جَزا خَیلی چَتین تر بَبیَه.»

Currently Selected:

انجیل لوقا 20: CTB

Highlight

Copy