یوحنا 18

عیسی ویلاخیستِه

1عیسی، اِم گَفون ژِ به دوملَه اِشتَن شاگردونَّه قِدْرونی دَرَ اَوَریرا شَه. اَجگاکا باغی بَه، و عیسی و چَی شاگردن چَی دِلَه دَشینَه. 2یهودا هَه کَسی کن عیساش خَیانَت کَردَ نی اَ جگا آرَزنیَه، اِمی خونه کن عیسی و چَی شاگردِن معمولا اَجگاکا گرد آبین. 3پس یهودا کاولَه ای رومیَه سربازونکا و معبَدی مَامورونکا کن سران کاهینِن و فَریسیون فرغه عالیمون طَرَفیکا بینَه، پِرَگت، و اَجگارا بَشی. اَیِن فانوسَه چرا و مشعل و اسلَحَه نَه اَجگا را آمین. 4عیسی، کن بَموستی چه چَی سَر بومَی، نَرا شَه و اَیِنِش واتَه: «چیکی دوملَه بَگردستیرون؟» 5اَیِن جواب آداشون: «عیسای ناصری دوملَه.» واتِش: «اَزیمَه.» یهودا، چَی تسلیم‌آرَکر نی اَوونَّه پا مَند بَه. 6وَقتی عیسی واتِش: «اَزیمَه،» اَیِن پِشتاکَر شینَه و زَمینی سَر بَرگنستین. 7پس دییَرَ کَرَ را اَوونکا دَپرسستَه: «چیکی دوملَه بَگردِستیرون؟» اَیِن واتِشون: «عیسای ناصری دوملَه.» 8عیسی جواب داشه: «بَه شمَه واتمَه کن اَزیمَه. پس اَگَم چمن دوملَه بَگَردِستیرون، بَرز اِمن بوشون.» 9عیسی اِمی واتِشَه تا اَچیی کن چیمی بَه نَ واتَش به اَنجوم ببو کن: «هیچ‌کم اَیِنیکا کن بَمن آدارَ، ازدَست نِدامَه.»

10اَموقه شَمعون پِطروس اِشتَن شمشیری یالَه کاهنی پاسَری طَرَف دَراکِنیشَه و شَمشیر اَ پاسَری گوشی گِنَه و چَی راسته گوشی آبیردِش. اَ پاسَری نوم مالخوس بَه. 11عیسی پِطروسیش واتَه: «اِشتِه شَمشیری نون آکَه! مَگم نِباید گوله ای کن دَدَ بَمن آدوعَشَه، بنجم؟»

12اَموقه سربازون کاولَه، اِشتَن فَرماندَنه و یَهودیَه مَامورونَّه عیسی ویلاخنیشونه چَی بالی دَبَستشونَه 13اَیِن اَشون اَولیکا حَنّا وَر بَردشون. حنّا قیافا ژن ددَ بَه و قیافا اَ سالیکا یالَه کاهِین بَه. 14قیافا هَیه کن یهودییِنِش واتَه بَه کن بِیتَرَ ایی نَفر قامی خونه بِمِر.

پطروسی عیسی حاشا بَکَی

15شَمعونِ پِطروس و ایله شاگرد نی عیسی دوملَه رَونَه بین. اِمی خاطیر کن اَ شاگرد یاله کاهنی آشِنااونکا بَه عیسی نَه یاله کاهنی کَه صرا، دِلَه دَرمَه. 16ولی پِطروس بَرنگا پشتیکا مَندَ. پس اَ دییَرَ شاگرد کن یاله کاهنی آشنااونکا بَه، بِرِن شَه و اَ جَوانَه کَنیزینَه کن دربان بَه گَف ژِشَه و پِطروسی دِلَه دَروَردِش. 17اَموقه اَ جوانَه کَنیز کن دربان بَه، پطروسیکا دَپرسستَه: «ته کن عیسی شاگردونکا نیشَه، هِستیش؟» پِطروس جواب داشه: «نِه نیمَه.»

18هوا سَرین بَه. پاسَریِن و معبدی مأمورِن آرایی زیالینه کولوستارآکردشون بَه و چَی دووریکا پا مَند بین و اِشتَن گرم آکَرین. پِطرُس نی اَوونَّه پا مَند بَه و اِشتَن گرم آکَری.

19هَه موقه یاله کاهین عیسی کا چَی شاگردون خونه و چَی آموجیکا دَرَپَرسیَه. 20عیسی جواب داشَه: «اَز دِنیا آدَمونرا آشکارا گَف ژَمَه و اوزون عیبادَتگااونکا و معبد یکا کن یَهودیون جَمع آبه جِگا اَ، آموج آدوعَمه. اَز هیچ چیی ایی نونَکه نَواجیمَه. 21چیرا، بَمنکا دَشَپَرسست؟ اَوونکا دَپَرس کن چمن گَفون دَرَستشونَه! اَیِن بَموستین اَیِنِم چِه واتَه یَه.» 22وَقتی عیسی اِم گَفِنِش ژِشَه، ایلَه نیگَبانونکا کن اَجگا کا پا مَند بَه، عیساش سلَّه ژِشَه و واتِش: «اِنتَرکه یاله کاهینی جوابی آشَدا؟» 23عیسی واتش: «اَگَم چیی ایی کن واتِمَه سَف بَه، چمن سَف کَردِ خونه شاهیدی بِدَ؛ اَمّا اَگَم چیی ایی کن واتِمَه راستَه، چیرا بَمن بَژَشَه؟» 24اَموقه حَنّا عیساش هَتَه کن چَی بالِنِشون دَبَستَه بَه، یاله کاهین قیافا وَر عَندِشَه.

25هَه حالیکا کن شَمعون پِطروس پا مَند بَه و اِشتَن گرم اَکَریَه، بَعضیِن اَیکا دَپَرسستین: «تِه کن عیسی ایلَه شاگِردونکا نیشَه، هِستیش؟» پِطروس حاشا ژِشَه و واتِش: «نِه! نیمه.» 26ایلَه یالَه کاهِنی پاسَریونکا کن اَ کَسی کن پِطروس چَی گوشی آبیردَش بَه خیشونکا بَه واتِش: «اَز اِشتَن بَتِه عیسی نَه اَ باغیکا نویندمَه؟» 27پِطروس هَنی حاشا ژِشَه. جخت ایلَه سوک خَندشه.

عیسی محاکیمه پیلاتس والی حِضوریکا

28چَی به دومله اَیِن عیسا شون قیافا وَر فرمانداری کاخیرا بَردشون. سوکه خون به. اَیِن اِشتَن والی کاخی دِلَه دَنِشینَه تا جیفینین آمَبون و بشان عیدَ پِسَخی سوری هَردِ. 29پس پیلاتُس چَوون وَر بِرِنیرا شَه و واتش: «اِم مِردی چه جرمینَه متهم بکَرون؟» 30اَیِن جواب آداشونَه: «اَگَم اِم مِرد شَرَ کار کَردَش نبَه، اَمه اَی بَتِه تسلیم نَکَریمون.» 31پیلاتُس اَیِنِش واتَه: «شمَه اِشتَن اَی بِبرَ وشِمَه شَریعَتی واتَنَه بَی محاکیمه بِکَر.» یهودیِن واتِشون: «اَمه ایجازَ نِدارَم کَسی مَردِرا محکوم بکرم.» 32اِنتَرَ آبَه تا اَ چیی ایی کن عیسی واتَش بَه تا آمونِه کن چِنتَرَ مَرگینَه بَمَردیَه اَنجوم ببو.

33پس پیلاتُس کاخیررا آگردسته و عیساش خِله کَردَ و بَی واتِش: «ته یَهودیون پادیشا ایشَه؟» 34عیسی جواب داشَه: «تِه اِمی اِشتَنکا کایشَه واتِه، یا دیَیرَ آدَمِن اِمی چمن خونِه بَتِه واتَشونَه؟» 35پیلاتُس جواب داشَه: «مَگَم اَز یهودی‌ایمَه؟ اِشتِه قام و سران کاهنِن، تِشون چمن وَر تسلیم کردیَه؛ چِر کَردَ؟» 36عیسی جواب داشَه: «چمن پادیشاهی اِم دِنیا شِن نِیَه. اَگَم چمن پادیشاهی اِم دِنیا شِن بَه، چمن پاسَریِن اَجَنگینَه تا یهودیون بال تَسلیم آمَبوم. ولی چمن پادیشاهی ام دِنیا شِن نیَه.» 37دومله پیلاتُس اَیکَا دَپرسِستَه؟ «پس تِه ایله پادیشاهیشَه؟» عیسی جواب داشَه: «تِه اِشتَن باتیش کن اَز ایله پادیشاهیمه. اَزاِمی خاطر دِنیا آمَه ایمَه و اِم هَدَفی خونه اِم دِنیا دِلَرا آمیمَه تا حییقتی خونه شاهیدی بِدَرم. پس هر کم کن حییقَتی شنهَ چمن سَسی گوش بدَرِ.» 38پیلاتُس دَپرسِستَه: «حییقت چِچیَه؟»

و وَقتی اِمی واتشَه، هَنی یهودیون وَربِرنیرا شَه و اَیِنِش واتَه: «اَز هیچ تقصیری اِم مِردیکا نِمَویند. 39ولی شمه را رسمی هستَه کن اَز پی پِسَخَه عیدیکا ایلَه زیندانی شمَه را آزاد آکَم؛ بَپیرونه یَهودیون پادیشا شِمَرا آزاد بکَم؟» 40اَیِن تَتَّه لَسَّنه واتِشون: «اِم مِردی نِه، بارْاباسی آزاد اَکَن!» ولی باراباس کَسی به کن شَهریکا شورش کَردَش بَه.

Currently Selected:

یوحنا 18: CTB

Highlight

Copy