مَرقُس 8

خوراک دائِن وَه چوار هزار نفر

1اِ اَ روژِلَ، اِدوارَه جیَمیَت فِرِه‌ی جیَم بین ئو اَرِیَگه چیئونی اَرِه هُاردِن ناآشد، عیسی شاگردَلی هِنا کِردی ئو وِتیَ بینو: 2«دلم اَرِه ایی مردِمَ مَسُزی، اَرِیَگه اِسگَه سه روژَ گه هانَ گَرد مِه ئو چیئی اَرِه هُاردِن نِرِن. 3اَرّ وِرسِنی رِئو کَم تاگَه بِچِن اَرِه مال ووژو، اِنوم رئی اژ حالَ مَچِن، اَرِیَگه بِری اَژینو اژ رئی دویر هاتِنَ.» 4شاگردَل جوواوُ داءَ بی: «نوم ایی بیاوونَ اژ کو کسی مَتونی نُو اَرِه سیر کِردِنو گیر باری؟» 5عیسی پِرسیتی: «چَن گِلَه نُو دیرینو؟» وِتو: «هفت گِلَه نُو.» 6اَسَه فِربو داءَ مردِم تاگَه بِنیشِن اَر زَمی. اَسَه هفت گِلَه نونِهَه گِرتی ئو دُما شگِر کِردِن، کُت کِردی ئو داءَ شاگردَلی تاگَه بِنِن اَر وَر مردِم؛ شاگردَل‌یش هُنِئونَ کِرد. 7چَن گِلَه ماهی گُجَریشو داشد. اَسَه عیسی اونَل بِرَکت داتی ئو وِتی: بِنِن اَر وَر مردِم. 8کُل هُاردون ئو سیر بین ئو هفت سَلَه پِر اژ حُیردَه نونَلی گه مَنوئی جیَمو کِرد. 9اَر اورَه نزیک اَر چوار هزار نفر بین. اَسَه عیسی مردِم مِرخص کِردی 10ئو هِرازِه وَه‌گَرد شاگردَل سُوار قائِق بی ئو چی اَرِه هیال دَلمانوتَه.

هِستِن نشونَه آسمونی

11شیخَل فرقَه فَریسی هاتِن اَرِه تک عیسی ئو بِنیائو نا اَر دَمَرَگَ کِردِن وَه‌گَرد او. اونَل اَرِه اِنتحو کِردِنی، یِه نشونَه آسمونیونی اَژی هِست. 12مِنتائای عیسی اژ تیَه دلا هِناسی سردی کیشیتی ئو وِتی: «اَرِه‌چَه ایی نسِلَ نشونه‌ئونَ مِ؟ حخیختاً، موشِمَ بینتو، هُیچ نشونه‌ی نِمیَنَ بینو.» 13اَسَه وِل کِردِنی ئو اِدوارَه سُوار قائِق بی، ئو چی ویرِ اَکو دریاچَه.

حمیرتُرش فَریسیَل ئو هیرودیس

14شاگردَل اِ ویرو چوئی نونَ گَرد ووژو هیزدَن، ئو اِنوم قائِق یِه نُو ویشتِرو ناآشد. 15عیسی هُشتار داتیَ بینو ئو وِتی: «حُواستو بو ئو اژ حمیرتُرش فَریسیَل ئو اژ حمیرتُرش هیرودیس دویرا بِگِرِن.» 16شاگردَل اِبارَه یَگه نُو نِرِن بِنیائو نا اَر دَمَرَگَ کِردِن وَه‌گَرد یَک. 17عیسی گه یَه فیَمی، وِتیَ بینو: «اَرِه‌چَه اَر سر یَگه نُو نِرینو وَه‌گَرد یَک دَمَرَگَتونَ؟ مَر هَنی نِمَذانینو ئو نِمَفیَمینو؟ مَر هَنی دلتو بَردَ؟ 18یانی چیَم دیرینو ئو نِموئینینو ئو گوش دیرینو ئو نِمَشتوئینو؟ یانی وَه ویرتو نِمای؟ 19وخدی پنج گِلَه نونم اَرِه پنج هزار نفر کُت کِرد، چَن سَلَه پِر اژ حُیردَه نونَل دُما سِفِرَه‌تو جیَم کِرد؟» وِتو: «دوازَه سَلَه.» 20«ئو وخدی گه هفت گِلَه نونم اَرِه چوار هزار نفر کُت کِرد، چَن سَلَه پِر اژ حُیردَه نونَل دُما سِفِرَه‌تو جیَم کِرد؟» وِتو: «هفت سَلَه.» 21اَسَه عیسی وِتیَ بینو: «یانی هَنی نِمَفیَمینو؟»

شِفا پیا کور اِ آبادی بِیت‌صِیْدا

22وخدی گه رَسین اَر آبادی بِیت‌صِیْدا، بِری، پیا کورونی آوِرد اَرِه تک عیسی، لالکینیَ بی گه دس بِنتی اَر قِ. 23عیسی دس اَ پیا کورَ گِرتی ئو، اژ آبادی بِردیَ دِریر. اَسَه آو دَم آوشدی اَررُی چیَمَل اَ پیا ئو دَسَل ووژ نا اَررُی چیَمَل، ئو پِرسیتی: «چیئی موئینین؟» 24اَ پیا سر هیزداتی ئو وِتی: «مردِم اِجور دارَلی موئینِم گه مَچِنَ رئیا.» 25ایلَهَه عیسی یِگِلی‌تِر دَسَل ووژ نا اَررُی چیَمَل. اَسَه چیَمَل واز بیتی، اِدوارَه مَتونِستی بوئینی، ئو کُل چی خوءَ موئینیاتی. 26عیسی او کِل‌کِردی اَرِه مال ئو وِتی: «دیَر گِلانیر اَرِه آبادی.»

اعتراف پطرس اِبارَه عیسی

27عیسی وَه‌گَرد شاگردَلی چی اَرِه نوم آبادیَل هِناس قیصریَه فیلیپی. اَرنوم رئی اژ شاگردَلی پِرسیتی: «وَه چیَم مردِم مِه کیِم؟» 28اونَل جوواوُ داءَ بی: «بِری موشِن یحیی تیَمیددهنده‌ین، بِری موشِن ایلیا پِخَمَرین ئو بِریشی موشِن یَکی اژ پِخَمَرَلین.» 29عیسی پِرسیتی اَژینو: «مِنتائای هُمَه چَه موشینو؟ وَه چیَم هُمَه مِه کیِم؟» پطرس جوواو داتی: «تو هَراَ مسیحینَ گه باس بای.» 30عیسی قِدَخَن کِردِنی گه اِبارَه او وَه کسی چیئی نوشِن.

پیشگوئی عیسی اِبارَه مِردِن ئو زِنیابیئِن ووژ

31اَسَه عیسی بِنیا نا اَر تیَلیم دائِن اونَل گه باس کُر اِنسو عذاو فِرِه‌ی بِکیشی ئو شیخَل ئو رِئیسَل کاهنَل ئو مَلِمَل تورات رد کَنی ئو بِکُشِنی ئو دُما سه روژ زِنیا بو. 32وخدی عیسی یَه آشگارا اِلوم کِردی، پطرس او بِردیِ پِنِه‌ ئو بِنیا نا اَر مِنا کِردِنی. 33مِنتائای عیسی کِلاداتی، سِیل کِردی اَر شاگردَلی ئو تُنا بی اَر پطرس ئو وِتی: «اژ نوا مِه بِ اِلا، اِاِ شِطو! اَرِیَگه فگِرَلِت اِنسونیَ، نه خدایی.»

34اَسَه هِنا کِردی اَر مردِم ئو شاگردَلی ئو وِتیَ بینو: «اَرّ کسی بِیتی وَه تُرّ مِنا بای، باس ووژ حاشا کِ ئو صلیب ووژ بِگِریِ کول ئو وَه تُرّ مِنا بای. 35اَرِیَگه هر کی بِیتی گیو ووژ نجاد بِ، اَوَه اژ دَسَ مِ؛ مِنتائای هر کی وَه خاطر مِه ئو وَه خاطر انجیل گیو ووژ اژ دس بِ، اَوَه نجادَ مِ. 36اَرِه آم چه فادِه‌ی دیری گه کُل دنیا باریَ دس مِنتائای گیو ووژ اژ دس بِ؟ 37اَرِیَگه آم چَه مَتونی بِ اِجال گیو ووژ؟ 38اَرِیَگه هر کی اِنوم ایی نسِل زِنهاکار ئو گناکارَ اژ مِه ئو قصَه‌لِم عار بایتی، کُر اِنسون‌یش اَسَه گه اِنوم جِلال باوَه ووژ وَه‌گَرد فریشدَه‌ل مقدّس بای، اژ او عارَ مایتی.»

Currently Selected:

مَرقُس 8: LBT

Highlight

Copy