مَرقُس 5

شِفا پیا مِلاکَت‌دار

1اونَ چِنِ اَکو دریاچَه، وَه هیال جِراسیان. 2وخدی عیسی اژ قائِق هاتَ هُار، هِرازِه پیای گه کَتوئیِ گیر روحِ گَن، اژ قورِسو هاتَ دِریر ئو هاتَ وَرپیری عیسی‌آ. 3اَ پیا اِنوم قورِسو زِنِه‌یَ مَهَردی ئو دیَر هُیچ‌کس بَن اِرنِماهاتی گه جُ‌جُ وَه زنجیر بوئنتی. 4اَرِیَگه هر گِلی اوُ وَه زنجیر ئو زالِنَه بَسدوئیا، زنجیرَل بِروئیتی ئو زالِنَه‌ل اِشکونوئیتی. هُیچ‌کس بَن رُم کِردِن اِرنِماهاتی. 5شو ئو روژ اَرسر قورَل ئو اَررُی تپَه‌ل مَقارونی ئو وَه کُچِک ووژ زیَم‌‌دارَ مَهَردی. 6وخدی اژ دویر عیسی دیتی، ناءِ دو هات ئو رُی نا اَر زَمی، 7وَه دَنگ کَلِنگ قارونی: «عیسی، کُر خداءِ متعال، اِ مِنِت چا؟ قسمتَ میَمَ خدا گه عذاوِم نِین!» 8اَرِیَگه عیسی وِتوئیَ بی: «اِاِ روحِ گَن، اژ ایی پیا بوریَ دِریر!» 9اَسَه عیسی اَژی پِرسی: «کی نُمتَ؟» جوواو داتی: «نُمِم قُشونَ، اَرِیَگه فِرِه‌یمو.» 10ئو فِرَه لالکیَ عیسی گه اژ اَ هیالَ نِهِه‌ئونَ دِریر. 11اِ هِناس اَ تپه‌لَ، ریئَن کَلِنگی خنزیل داشدو خوراکونَ مَهُارد. 12روحَلِ گَن لالکینَ عیسی، وِتو: «ایمَه کِل‌کَ اَرِه نوم خنزیلَل؛ بیلا بِچیم اِنوم اونَل.» 13عیسی هُیشتی بِچِن. اَسَه روحَلِ گَن هاتِنَ دِریر ئو چِن اِنوم خنزیلَل. ریئَنی گه نزیک دو هزار خنزیل بین، اژ سِرالیژی تپَه رَمینَ هُار ئو کَتِن اِنوم دریاچَه ئو اِنوم آو خفَه بین.

14کسَلی گه مِتیَه‌جی خنزیلَل بین حِیواین ئو ایی اتفاقونَ اِنوم شیَر ئو آبادی تیَریف کِرد، هُنَ گه مردِم هاتِنَ دِریر تاگَه اَ چیئَه گه اتفاق کَتوئی، بوئینِن. 15اونَل هاتِن اَرِه تک عیسی ئو وخدی دییو اَ پیا مِلاکَت‌دارَ گه وِرِکار کَتوئیِ گیر قُشون، اِسگَه جِنِکی کِردیَسِ وَر ئو عاخل نیشتیَس اَر اورَه، زِلَ‌تِراقا بین. 16کسَلی گه ایی اتفاقونَ وَه چیَم دوئی، اَ چیئَه گه اَر سر پیا مِلاکَت‌دار ئو خنزیلَل هاتوئی، اَرِه مردِمو تیَریف کِرد. 17اَسَه مردِم لالکیانَ عیسی گه وِلات اونَ بِیلی‌َ جا ئو بِچو.

18وخدی عیسی سُوار قائِقَ موئیا، پیای گه وِرِکار مِلاکَت‌دار بی، لالکیتیَ بی تاگَه بِیلی وَه‌گَرد بوتی. 19مِنتائای عیسی صِلا ناتی ئو وِتی: «بِچُ اَرِه مال، اَرِه تک رِقیفَلِت ئو بوشَ بینو گه خداون اَرِه تو چه کارَلی کِردیَسی ئو چطور ریَم کِردینیَسی‌ اَری.» 20اَسَه اَ پیا چی ئو اِ وِلات دِکاپولیس، بِنیا نا اَر اِلوم کِردِن کارَلی گه عیسی اَرِه کِردوئی ئو مردِم کُل بِلُجوئیونَ ماهات.

شِفا یِه ژَن ئو دِت یایروس

21وخدی گه عیسی یِگِلی‌تِر وَه قائِق چیِ اَکو دریاچَه، جیَمیَت فِرِه‌ی اژ مردِم جیَم بینی اَر دور. ئو عیسی اِلو دریاچَه بی. 22اَسَه یَکی اژ رِئیسَل عَبادتگا یهود گه نُم یایروس بیتی، هات اَرِه اورَه ئو وخدی عیسی دیتی کَت اَررُی پال 23ئو لالکیتیَ بی، وِتی: «دِت گُجَرِم دیری مَمِری. خواهشدَ مَهَم باین، دس بِنینی‌ اَر قِ تاگَه شِفا بِگِری ئو زِنی بِمینی.» 24اَسَه عیسی چِتیَ گَرد.

جیَمیَت فِرِه‌یشی وَه دُم عیسی‌آ کَتن‌ِ رئی. اونَ اژ ایلا ئو اَلا زورونَ ماوِرد اَری. 25اِنوم اونَل، ژَنی بی گه دوازَه سال خوین قائده‌ی آنِموسیاتی. 26او اَرِه حِلاج چوئی اَرِه تک حکیمَل فِرِه‌ی ئو عذاو فِرِه کیشوئیتی ئو هرچی گه دارِندار بیتی خرج کِردوئیتی؛ مِنتائای اِجال یَگه بیتِرا بو، بَتِرا بوئی. 27او اِبارَه عیسی شنَفتوئتیی، اَرِه یَه اِنوم جیَمیَت هاتَ پِشت سر عیسی‌آ ئو دس نا اَر پر چوخا. 28اَرِیَگه وَه وَر ووژا وِتوئیتی: «اَرّ جُ‌جُ دَسِم بیری اَر پر چوخای، شِفا مَگِرِم.» 29هِرازِه خوین آهوسیاتی ئو اِ دَرین ووژ فیَمی گه اژ اَ بِلا شِفا گِرتیَسی. 30عیسی هِرازِه فیَمی گه قویَتی اَژی هاتیَ دِریر. اَسَه اژ نوم جیَمیَت کِلاداتیِ دُما ئو پِرسیتی: «یَه کی بی دس نا اَر چوخام؟» 31شاگردَلی جوواوُ دا: «دیرین موئینین گه مردِم کُل زورَ مارِن اَرینِت؛ اَسَه مَپِرسین، ”کی دس نا اَر قِم؟“» 32مِنتائای عیسی ایلا ئو اَلا ووژ سِیلَ مَهَردی تاگَه بوئینی کی ایی کارَ کِردیَسی. 33اَسَه اَ ژِنَ گه مَذِناسدی چَه اَرسر هاتیَسی، هَرهُنَ گه مَرِکیا، هِراسو هات، ئو کَت اَررُی پال عیسی ئو تموم حخیخت وِتَ بی. 34عیسی وِتَ بی: «اِاِ دِت، ایمونِت شِفات داسی. بِچُ مِزِلِت خِر ئو اژ ایی بِلا شِفا بِگِر!»

35عیسی هَنی داشدی قصَه مَهَردی گه بِری اژ مال یایروس، رِئیس عَبادتگا، هاتِن ئو وِتو: «دِتَهَت مِرد! دیَر اَرِه‌چَه استادَ ماوژینِ زیَمَت؟» 36مِنتائای عیسی وخدی قصَه‌لو شنَفتی وِتیَ رِئیس عَبادتگا: «زِلَت نَچو! فَخَد ایمونِت داشدوئی.» 37ئو نِئیشتی بِخِر اژ پطرس ئو یعقوب ئو یوحنا، بِرا یعقوب، کسی‌تِر وَه دُما بِچوتی. 38وخدی رَسینَ اَر مال رِئیس عَبادتگا، عیسی دیتی گه مردِم قیژ ئو وِلِنگونَ ئو بِری مُووَ مارِن ئو شوینَ مَهَن. 39وخدی چی اِنوم وِتیَ بینو: «ایی قیژ ئو وِلِنگ ئو شوین کِردِنتونَ چیَ؟ دِتَهَه نَمِردیَ، بلکِم ها خاواِر.» 40اونَل خَنینیَ بی. مِنتائای دُما یَگه کُل اونَ کِردیَ دِریر، باوِه ئو دا دِتَهَه ئو هَمیش شاگردَلی گه وَه‌گَرد بینی، وَه‌گَرد ووژ بِردی اَرِه جای گه دِتَهَه بیتی. 41اَسَه دس دِتَهَه گِرتی ئو وِتَ بی: «تالیتا کوم!» یانی: «اِاِ دِتَ گُجِرَ، موشِمَ بینِت هیزگِر!» 42او هِرازِه هیزگِرتی ئو بِنیا ناتی اَر اَرئیا چیئین. دِتَهَه دوازَه سالون بی. اونَ اژ ایی گپَ فِرَه بِلُجوئیو هات. 43عیسی قِدَخَن کِردِنی گه نِیلِن کسی اژ ایی گپَ خَوَردارا بو، ئو وِتیَ بینو چیئی بیَنَ اَ دِتَ تاگَه بیری.

Currently Selected:

مَرقُس 5: LBT

Highlight

Copy