مَرقُس 12

متل باخِبونَل شر

1اَسَه عیسی بِنیا ناتی وَه متلَل قصَه کِردیَ گَردو ئو وِتی: «پیای، باخ انگویری آوشدی ئو تیخَه کیشیتیِ دورا ئو حوض گُجِرِه اَرِه تِلیقونِن انگویر ئو شِراو گِرتِن اِنوم کَن ئو بِرجَکی اَرِه نگبونی‌ آوشدی. اَسَه باخ انگویرِهَه داتیَ کِرا وَه چَن باخِبو ئو ووژ چی اَرِه مملکتی‌تِر. 2مُسِم انگویر چِنین، او خُلُمی کِل‌کِردی اَرِه تک باخِبونَل تاگَه بیَری اژ ثمر باخ انگویر اَژینو بِگِری. 3اونَل خُلُمو گِرت، داون اَری ئو دس پَتی کِلوکِردَ دُما. 4اَسَه صائای باخِهَه خُلُمی‌تِر کِل‌کِردی اَرِه تَکو، مِنتائای باخِبونَل سرو اِشکو ئو افتضائو آوشد. 5اِدوارَه خُلُمی‌تِر کِل‌کِردی، مِنتائای اوئیشو کُشت. ئو هَرهُنَئونَ کسَلی‌تِریش کِرد؛ بِرونی اَژی کُتَل‌کو کِردِن ئو بِرونی کُشت. 6او هَنی یَکی‌تِر داشدی گه کِل‌کِ، اَوَه کُر عزیزگرامی بیتی. آخِرسر او کِل‌کِردی ئو وَه لا ووژا وِتی: ”عزّتَ مَنِن اَر کُرِم.“ 7مِنتائای باخِبونَل وِتونَ یَکتِری: ”یَه صائای میراتَ؛ بورِن بِکُشیمی تا میرات بوتیَ هِن ایمَه.“ 8اَسَه اوُ گِرت، کُشتو ئو اژ باخ آوشدونَ دِریر. 9اِسگَه، صائای باخِهَه چَه مِهِه؟ اوءَ مای ئو باخِبونَل مَکُشی، باخ انگویرَ مِئَه دس کسَلی‌تِرا. 10مَر اِنوم نُسَخ مقدّس نَحیوَنِتونَ:

«”بَردی گه مِمارَل رَدو کِرد

بیَ بَرد بِنچین ساخدِمو؛

11یَه کار خداون بیَ

ئو وَه چیَم ایمَه بِلُجوئیا مای“؟»

12اُوُ مِهِستو عیسی بِگِرِن، اَرِیَگه فیَمین گه ایی متلَ اِبارَه اونَ وِتیَسی، مِنتائای اژ جیَمیَت زِلِئونَ مَچیا؛ اَسَه اوُ وِل کِرد ئو چِن.

خِراج دائِن وَه امپراطور

13اَسَه بِری اژ شیخَل فرقَه فَریسی ئو بِری اژ کسَلی گه لا هیرودیسو داشد، کِلوکِردِن اَرِه تک عیسی تاگَه وَه قصَه‌ل ووژی او باوژِنِ تِلَه. 14اونَل هاتِن اَرِه تک عیسی ئو وِتو: «استاد، مَذانیم پیا راس‌وَشی کین ئو عخیدَه کسی اَر رُی عخیدَه تو اثری نِری، اَرِیَگه چیَمِت اَر ظاهر کسی نیَ، بلکِم رئی خدا وَه دُریسی تیَلیمَ مِین. آیا خِراج دائِن وَه امپراطور روم دُریسَ یا نه؟ 15یانی باس خِراج بِیم یا نه؟» مِنتائای عیسی ریاکاری اونَل فیَمی ئو وِتی: «اَرِه‌چَه مِتو اِنتحونِم کِینو؟ سکه‌ی بارنَ اَرِه مِه تاگَه بوئینمی.» 16سکَه‌ئونی آوِرد. اَژینو پِرسیتی: «نَشق ئو نُم کی هار رُی ایی سکَه؟» جوواوُ دا: «نَشق ئو نُم امپراطور روم.» 17عیسی وِتیَ بینو: «اِسَه هِن امپراطور بیَنَ امپراطور ئو هِن خدا بیَنَ خدا.» اونَ اژ قصَه‌لی واقِ دَمو پَری.

سؤال اِبارَه زِنیابیئِن مِردیَل

18اَسَه شیخَل فرقَه صَدّوقی گه موئِتو مِردیَل زِنیا نِموئن، هاتِن اَرِه تک عیسی ئو پِرسیون اَژی، وِتو: 19«استاد، موسیِ پِخَمَر اَرِه ایمَه نُیسونیِ گه اَرّ بِرا پیای بِمِری ئو ژِنِهِه آویلی ناآشدوئیتی، اَ پیا باس اَ ژِنَ بُوازی تاگَه نسِلی اَرِه بِرا ووژ بِیلی اَر جا. 20اِسگَه، هفت بِرا بین. بِرا اولیِهَه ژَنی حُاستی، ئو بی‌اولاد مِرد. 21اَسَه بِرا دوئِمیِهَه اَ بیوَه حُاستی، مِنتائای اویش بی‌اولاد مِرد. بِرا سِئِمیِهِه‌یش هُنَ بی. 22هَرِ ایی جورَ، هُیچ‌کُم اژ اَ هفت بِرا آویلونی نِئیشت اَر جا. آخِرسر، اَ ژَن‌یشَ مِرد. 23اِسگَه، اِ قیومت گه مِردیَل زِنیا موئن، اَ ژِنَ، ماوَ ژَن کُمیو، اَرِیَگه هر هفت بِرا اَ ژَنونَ حُاستوئی؟»

24عیسی وِتیَ بینو: «هَرایی قصَه ووژ نِشو نِمِ گه هُمَه اژ رئی اِرهاتینونَ، اَرِیَگه نه اژ نُسَخ مقدّس چیئی مَذانینو ئو نه اژ قدِرت خدا؟ 25اَرِیَگه وخدی گه مِردیَل زِنیا بوئن، نه ژَنَ مُوازِن ئو نه شویَ مَهَن؛ بلکِم موئن اِجور فریشدَه‌ل آسمو. 26مِنتائای اِبارَه زِنیابیئِن مِردیَل، مَر اِنوم تورات موسی نَحیوَنِتونَ گه اِنوم پاچا بوتِک آگِر، چطور خدا وِتَ بی: ”مِنِم خداءِ ابراهیم ئو خداءِ اسحاق ئو خداءِ یعقوب“؟ 27خدا خداءِ مِردیَل نیَ بلکِم خداءِ زِنیِلَ. هُمَه سِرَن‌تاپا اژ رئی اِرهاتینونَ!»

کَلِنگتِرین حکِم

28یَکی اژ مَلِمَل تورات هاتِ نزیک ئو شنَفتی گه دیرِن وَه‌گَرد یَک دَمَرَگَ مَهَن. وخدی دیتی گه عیسی جوواو خوئی داءَ بینو، اَژی پِرسی: «اژ حکمَل شریعت، کُمین اژ کُلو مِهمتِر؟» 29عیسی وِتَ بی: «مِهمتِرین حکِم یَسَ: ”گوش بِگِر اِ قومِ اسرائیل، خداون خداءِ ایمَه، خداونِ یکتاءَ. 30اَر خداون خداءِ ووژِت وَه تمومِ دل ئو وَه تمومِ گیو ئو وَه تمومِ فگِر ئو وَه تمومِ قویَت ووژِت مِحبت کَ.“ 31دوئِمین حکِم یَسَ: ”اَر هُمسات اِجور ووژِت مِحبت کَ.“ کَلِنگتِر اژ ایی دوءَ، حکمی نیَ.» 32اَ مَلِم توراتَ وِتَ بی: «خوئِت وِت، استاد! حخیختاً گه خدا یَکی کَ ئو بِخِر اژ او خدای نیَ، 33ئو خدا وَه تمومِ دل ئو وَه تمومِ عَخِل ئو وَه تمومِ قویَت ووژ مِحبت کِردِن ئو هُمسات اِجور ووژِت مِحبت کِردِن، اژ کُل پیشکَشیَل تموم‌سوز ئو کُل قُرونیَل، مِهمتِر.» 34وخدی عیسی دیتی گه اژ رُی عَخِل جوواو داتی، وِتَ بی: «اژ پاتِشائی خدا دویر نیئین.» اژ اَوِءِ دُما دیَر هُیچ‌کس زِلَه نَهَردی چیئی اَژی بِپِرستی.

مسیح کُر کیَ؟

35وخدی عیسی اِنوم معبد تیَلیمَ ماتی، پِرسیتی: «چطور گه مَلِمَل توراتَ موشِن مسیحی گه باس بای کُر داوودِ پاتِشاءَ؟ 36داوود، ووژ وَه هدائَت روح‌القدس اِنوم کِتاو زبور وِتیَسی:

”خداون وَه خداونِ مِه وِتی:

«بِنیش اَر دس راس مِه

تاگَه دشمنَلِت باوژمِ ژیر پائلِت.»“

37اَرّ داوود ووژی، اوءَ خداون هِنا مِهِه، او چطورَ مَتونی کُر داوود بو؟» کُل جیَمیَت وَه خَوشی گوشونَ ماءَ قصَه‌لی.

هُشتار اِبارَه مَلِمَل تورات

38اَسَه اِ تیَلیم ووژ وِتی: «اژ مَلِمَل تورات دویرا بِگِرِن گه دوس دیرِن وَه چوخا بِلِنگ بِچِنَ رئیا ئو مردِم، اِ کویچه ئو بازار سِلامو کَن، 39ئو اِ عَبادتگائَل بیتِرین جائو داشدوئی ئو اِ مِمونیَل بِنیشِن اَر بِلِنگ مِجِلیس. 40اژ ایی لا مالَل بیوَه‌ژِنَل خارَتَ مَهَن ئو اژ اَ لا، اَرِه هوفَلی کِردِن، دوعا ووژو طویلَ میَن. مِکافات یوئنَ فِرَه سخدتِرَ ماو.»

پیشکَشی بیوَه‌ژَن ژار

41عیسی نیشتوئی اَر رویِرُی صَنُق بِیت‌المال معبد، سِیل مردِمی مَهَردی گه پیلونَ ماوشد اِنوم صَنُق. ویشتِر ثرودمنَل پیلَل فِرِه‌ئونی ماوشد. 42اَسَه بیوَه‌ژَن ژاری هات ئو دو قَرو آوشدی اِنوم صَنُق. 43اَسَه عیسی هِنا کِردی اَر شاگردَلی ئو وِتیَ بینو: «حخیختاً، موشِمَ بینتو، ایی بیوَه‌ژَن ژارَ ویشتِر اژ کُل کسَلی گه پیلو آوشدِ نوم صَنُق، پیشکَش کِردی. 44اَرِیَگه اونَل کُل اژ زیاکی مالِ‌منال ووژو دائو، مِنتائای ایی ژِنَ وَه ژاری ووژا هرچی گه داشدی داتی، یانی کُل رِسخ ئو روژی ووژ.»

Currently Selected:

مَرقُس 12: LBT

Highlight

Copy