مَرقُس 10

تیَلیم اِبارَه طِلاخ گِرتِن

1عیسی اورَه وِل کِردی ئو چی اَرِه هیال یهودیَه ئو اَکو روو اُردن. یِگِلی‌تِر جیَمیَت فِرِه‌ی جیَم بینی اَرتَک، ئو اِجور هَرواری تیَلیمَ مانی.

2شیخَل فرقَه فَریسی هاتِنی اَرِه تک ئو اَرِه اِنتحو کِردِنی اَژینو پِرسی: «شرعاً دُریسَ گه پیا ژَن ووژ طِلاخ بِ؟» 3عیسی جوواو داتی: «موسیِ پِخَمَر چه حکمی داسیَ هُمَه؟» 4وِتو: «موسی صِلا داسیَ پیا گه طِلاخ‌نُامچِه‌ی بِنُیسِنی ئو ژَن ووژ وِل کِ.» 5عیسی وِتیَ بینو: «موسی وَه خاطر سنگدلی هُمَه ایی حکمَ اَرِنتو نُیسونی. 6مِنتائای اژ اَ اولَ، خدا ”اونَ ژَن ئو پیا خَلک کِردی.“ 7ئو ”اَژونَسَ، پیا اژ باوَه ئو دا ووژ جیا ماو ئو مَچسبیَ ژَن ووژا، 8ئو اَ دوءَ موئنَ یِه لار.“ اَسَه، اژ اَوِءِ دُما دیَر اونَل دو نیِن بلکِم یِه لارِن. 9اِسَه اَ چیئَه گه خدا ناءَ قِ یَکا، اِنسو نَباس جیا بِهِه.»

10وخدی گه عیسی ئو شاگردَل اِ مال بین، شاگردَل یِگِلی‌تِر اِبارَه ایی گپَ اژ عیسی‌ئو پِرسی. 11عیسی وِتی: «هر کی ژَن ووژ طِلاخ دِ ئو ژَنی‌تِر بُوازی، اَر حخ ژَن ووژ زِنها کِردیَسی. 12ئو اَرّ ژَنی اژ میردَه ووژ طِلاخ بِگِری ئو شوی بِهِئَه یَکی‌تِر، زِنها کِردیَسی.»

عیسی ئو آیلَل

13مردِم آیلَلو آوِردون‌ اَرِه تک عیسی تاگَه دس بِنی اَررُی سرو. مِنتائای شاگردَل اَرِه ایی کارَ مردِمو مِنا کِرد. 14مِنتائای عیسی وخدی یَه دیتی، آگِر اژ سر چِتی ئو وِتیَ شاگردَلی: «بِیلِن آیلَل بان اَرِه تَکِم؛ نوائو نَگِرِن، اَرِیَگه پاتِشائی خدا اَرِه هُنَ کسَلی کَ. 15حخیختاً، موشِمَ بینتو، هر کی پاتِشائی خدا اِجور آویلی قبول نِهِه، نِمَچوتی اِنوم.» 16اَسَه آیلَل گِرتیَ باووش، ئو دس کیشیتی اَر نوم سرو، ئو اونَل بِرَکت داتی.

جِهال ثرودمن

17وخدی عیسی کَتِ رئی، پیای هَراَ دو هات، اَر وَر پالی زُنی داتی ئو پِرسیتی: «استادِ خو، چَه بِهَم تاگَه ژییاین ابدی بیَرمَ میرات؟» 18عیسی جوواو داتی: «اَرِه‌چَه موشینَ بینِم خو؟ هُیچ‌کس خو نیَ مَر تَنیا خدا. 19حکمِلَ مَذانین: ”آم نَکُش، زِنها نِهَه، دُزی نِهَه، شاتی دِرو نیَ، رِنگَری نِهَه، عزّت بِن اَر باوَه ئو دات.“» 20اَ پیا جوواو داتی: «استاد، کُل یوئنَمَ هَر اژ آویلی آوِردیَسَ جا.» 21عیسی سِیلی اَژی کِرد، وَه مِحبت وِتَ بی: «تو یِه چی کَم دیرین؛ بِچُ اَ چیئَه گه دیرین بفِروش ئو پیل بِیتیَ ژارَل گه اِ آسمو گَنجتی داشدوئی. اَسَه بوریَ تُرّ مِنا.» 22پیا اژ ایی قصَه ناامید بی ئو پَژار اژ اورَه چی، اَرِیَگه مِلکِ‌مِحل فِرِه‌ی داشدی.

23عیسی سِیلی کِردی اَر ایلا ئو اَلا ووژ، وِتیَ شاگردَلی: «چَنی سخدَ گه ثرودمنَل بِچِن اِنوم پاتِشائی خدا!» 24شاگردَل اژ قصَه‌ل عیسی بِلُجوئیو هات. مِنتائای عیسی یِگِلی‌تِر وِتیَ بینو: «اِاِ رولَه‌ل، اِنوم پاتِشائی خدا چیئین، چَنی سخدَ! 25رد بیئِن شتِر اژ کُنا دَرزِن آسُتِر اژ یَسَ گه آم ثرودمنی بِچو اِنوم پاتِشائی خدا.» 26شاگردَل گه فِرَه بِلُجوئیو هاتوئی موئِتونَ یَکتِری: «اَنی کیَ مَتونی نجاد بِگِری؟» 27عیسی سِیلی اَژی کِردِنی ئو وِتی: «اَرِه آم نِماو، مِنتائای اَرِه خدا هُنَ نیَ؛ اَرِیَگه کُل چی اَرِه خداءَ ماو.»

28اَسَه پطرس بِنیا نا اَر قصَه کِردِن ئو وِتی: «اِسگَه ایمَه کُل چیئَلمو وِل کِردیَ ئو هاتیمونَسَ تُرّ تونا.» 29عیسی وِتی: «حخیختاً، موشِمَ بینتو، کسی نیَ گه وَه خاطر مِه ئو وَه خاطر انجیل، مال، بِرال، خُیَه‌ل، دا، باوَه، آیلَل یاگَه مِلکِ‌مِحل ووژ وِل کِردوئیتی، 30ئو اِنوم ایی زمونَ صد بِرُوَر ویشتِر مالَل، بِرال، خُیَه‌ل، دال، آیلَل ئو مِلکِ‌مِحل -وَه جُور- وَه دس ناری، ئو اِنوم زمونی گه دیری مای اِ ژییاین ابدی بیَردارا ناو. 31مِنتائای ویشتِر کسَلی گه اولِن، موئنَ آخِری، ئو کسَلی گه آخِریِن، موئنَ اولی!»

عیسی اَرِه گِل سِئِم مِردِن ئو زِنیابیئِن ووژ پیشگوئیَ مِهِه

32اونَل اَرنوم رئی شیَر اورشلیم بین ئو عیسی اِ نوا اُوُ مَچیاءَ رئیا. شاگردَل واقونِ دَم پَروئی ئو کسَلی گه وَه دُمونا مَچیان هِراسو بین. عیسی یِگِلی‌تِر اَ دوازَه نفرَ بِردیَ لای ئو بِنیا ناتی اژ اَ چیئَه گه باس وَه سر بایتی، اَرِنو قصَه کِردی. 33وِتی: «اِسگَه مَچِم اَرِه اورشلیم. اَر اورَه کُر اِنسونَ ماوژِنِ گیر رِئیسَل کاهنَل ئو مَلِمَل تورات. اُوُ مَکومَ مَهَنی اَر مِردِن ئو میَنیَ دس کسَلی گه یهودی نیِن. 34اونَ تیزمَتَلَ مَهَنی، ئو تِفَ ماوژِنی اَر نوم‌رُی، ئو وَه شلاخَ میَنی اَری، ئو مَکُشِنی. دُما سه روژ زِنیا ماو.»

خواس یعقوب ئو یوحنا

35یعقوب ئو یوحنا کُرَل زِبِدی هاتِن اَرِه تک عیسی ئو وِتو: «استاد، مَلالکیمَ بینِت اَ چیئَه گه اژ تونمونَ مِ، اَرِه ایمَه اَنجوم دِین!» 36عیسی وِتیَ بینو: «چَتونَ مِ تاگَه اَرِنتو بِهَم؟» 37وِتو: «بِیل گه اِنوم جِلالِت، یَکی اَر دس راسِت ئو یَکی‌تِر اَر دس چپِت بنیشیم.» 38عیسی وِتیَ بینو: «هُمَه نِمَذانینو چَتونَ مِ. یانی مَتونینو اژ جُمی گه مِه خُرَّ میَم، خُرّ بِینو ئو خُسِل تیَمیدی گه مِنَ مَگِرِم، بِگِرینو؟» 39وِتو: «اَاَ، مَتونیمو.» عیسی وِتی: «چِرچی نیَ گه اژ جُمی گه مِه خُرَّ میَم، خُرَّ مِینو ئو اَ تیَمیدَ گه مِنَ مَگِرِم، هُمِه‌یشَ مَگِرینو. 40مِنتائای بِذانِن گه نیشتِن اَر دس راس ئو چپ مِه، اِ اختیار مِه نیَ تاگَه اَوَه بیَمَ کسی. ایی جاگا هِن کسَلی کَ گه تیارِکون اَرِه دانَ.»

41وخدی دیَه شاگردی‌تِر اژ ایی گپَ خَوَردارا بین، اژ دس یعقوب ئو یوحنا آگِر اژ سرو چی. 42عیسی هِنا کِردی‌اِرو ئو وِتی: «هُمَه مَذانینو اونَلی گه حاکمَل قومَلی‌تِرِن، اَر اونَ آقاییَ مَهَن ئو کَلِنگَلو فِربونونَ میَنَ بی. 43مِنتائای اِنوم هُمَه نَباس هُنَ بو. هر کی مِیتی اِنوم هُمَه کَلِنگ بو، باس خادم هُمَه بو. 44ئو هر کی مِیتی اِنوم هُمَه اول بو، باس خُلُم کُلتو بو. 45هُنَ گه کُر اِنسون‌یش نِهات تاگَه خِلمت اَری بِهَنی، بلکِم هات تاگَه خِلمت کِ ئو گیونی اِجور خیمت آزادی اَرِه آمَل فِرِه‌ی بِ.»

شِفا بارتیمائوسِ کور

46اَسَه اونَ هاتِن اَرِه شیَر اَریحا. ئو وخدی عیسی وَه‌گَرد شاگردَلی ئو جیَمیَت فِرِه‌ی اژ اَریحا مَچیاءَ دِریر، حُاسکَر کوری وَه نُم بارتیمائوس گه کُر تیمائوس بی نیشتوئی اَر لا جَدَه. 47وخدی او شنَفتی گه عیسیِ ناصریَ، قارونی: «اِاِ عیسی، کُر داوودِ پاتِشا، ریَم کَ اَر مِه!» 48فِرَه کسَل اژ مردِم خِضو کِرد اَری گه دَنگی باوژی، مِنتائای او ویشتِرَ مَقارونی: «اِاِ کُر داوودِ پاتِشا، ریَم کَ اَر مِه!» 49عیسی هوسیاآ، ئو وِتی: «هِنا کَنی‌اِر.» اَسَه اَ پیا کورونَ هِنا کِرد، وِتونَ بی: «بیلا دل ئو دَرینِت داشدوئی! هیزگِر؛ گه هِنات‌اِرَ مِهِه.» 50او هِرازِه چوخا ووژ هُوَ داتیِ لای، اژ جا ووژ اِرپَری ئو هات اَرِه تک عیسی. 51عیسی اَژی پِرسی: «چَتَ مِ اَرِنِت بِهَم؟» پیا کورِهَه جوواو داتی: «استاد مِم گه چیَمَلِم بوئینی.» 52عیسی وِتَ بی: «بِچُ گه ایمونِت شِفات داسی.» اَ پیا، هِرازِه چیَمَل بیناآ بیتی ئو وَه دُم عیسی‌آ کَتِ رئی چی.

Currently Selected:

مَرقُس 10: LBT

Highlight

Copy