مَتّی 25

متل دیَه دِت اوزا

1«اِ، اَ روژَ، پاتِشائی آسمو چُی دیَه دِت اوزاءَ مَمینی گه رِقیفَل بُئی بین، گه چراخَل ووژو هیزو دا، ئو چِنَ دِریر اِ نوا ذُما. 2پنجون اَژی نایو بین ئو پنجی‌تِر دونا. 3دِتَل اوزا نایو چراخَل ووژو هیزدا، مِنتائای روینونَ گَرد ووژو نوئرد. 4مِنتائای دونائِلِهَه، حاجَتَل پِر اژ روین‌یشونَ گَرد چراخَل ووژو بِرد. 5وَه‌چوینا گه هاتِن ذُما طویل کیشیتی، کُل چیَمَلو سنگینا بی، خاوا بِردِن. 6نِصمِ شو، دَنگ کَلِنگی هات گه موئِتی: ”ذُما دیری مای! بورنیِ نوا!“ 7اَسَه کُل اَ دِتَل اوزاءَ بینَ خَوَر ئو چراخَل ووژو حاضرو کِرد. 8دِتَل نایو وِتونَ دِتَل دونا: ”قِیلی اژ روین ووژتو بیَنَ ایمَه، اَرِیَگه چراخَل ایمَه دیرِن کورا موئن.“ 9مِنتائای دِتَل دونا جوواوُ دا: ”وَه‌چوینا روین بس ایمَه ئو هُمَه نیَ، بِچِن ئو اژ کسَلی گه روینَ مَفِروشِن اَرِه ووژتو بِخِرِن.“ 10مِنتائای وخدی گه اونَل چِن روین بِخِرِن، ذُما رَسی ئو دِتَلی گه حاضر بین، وَه‌گَرد چِنی اِنوم جَشت داوات ئو دِرَهَه آبوئنیا. 11دُما یَه، دِتَلِ‌تِرِک‌یش رَسین ئو وِتو: ”اِاِ آقا، اِاِ آقا، در اَرِه ایمَه واز کَ!“ 12مِنتائای او وِتی‌ئونو: ”حخیختاً، موشِم‌ئونتو، مِه نِمَشتاسِمتو.“ 13اِسَه حُواستو بو اَرِیَگه نه اژ اَ روژَ خَوَر دِرینو ئو نه اژ اَ ساتَ.

متل قَنطارَل

14«هَمیش پاتِشائی آسمو چُی پیای کَ گه مِهِستی بِچوءَ سفر. او خِلمتکارَل ووژ هِنا کِردی ئو دارایی ووژ داتی‌ئونو؛ 15وَه یَکی پنج قَنطار داتی گه هر قَنطار چَن بیس سال مِزدَس یِه کارگر بی، وَه یَکی دو وَه یَکی‌تِر یِه قَنطار. وَه هر کُم چَن قویَه‌ئو. اَسَه چیَ سفر. 16اَوَه گه پنج قَنطار گِرتوئیتی، هِرازِه چی ئو مامِلَه‌ئون کِرد ئو پنج قَنطار هَنی فادَه کِردی. 17هَرِ ایی جورَ، اَوَه گه دو قَنطار داشدی، دو قَنطارِتِریش فادَه کِردی. 18مِنتائای اَوَه گه یِه قَنطار گِرتوئیتی، چی ئو زَمی کَنی ئو پیل اَرباو ووژ شاردیا.

19«دُما مِدت فِرِه، اَرباو اَ خِلمتکارِلَ گِلاهُاردیِ دُما ئو اَژینو حساوکتاو هِستی. 20اَوَه گه پنج قَنطار گِرتوئیتی، پنج قَنطارِتِریش وَه‌گَرد ووژ آوِردی ئو وِتی: ”اَرباو، پنج قَنطارِت دائیَ مِه، یوئیشَ پنج قَنطارِتِر گه فادَه‌م کِردیَ.“ 21اَرباوِهِه جوواو داتی: ”آفِری، اِاِ خِلمتکار خو ئو اَمونتدار! اِ چیئَل کم اَمونتدار بین، اِسَه چیئَل فِرَه‌تی میَمَ دَسا. بوری بوءَ هُم‌بیَر خَوشی اَرباو ووژِت!“ 22خِلمَتکاریشی گه دو قَنطار گِرتوئیتی هاتِ وَر ئو وِتی: ”اَرباو، دو قَنطارِت دائیَ مِه، یوئیشَ دو قَنطارِتِر گه فادَه‌م کِردیَ.“ 23اَرباوِهِه جوواوا داتی: ”آفِری، اِاِ خِلمتکار خو ئو اَمونتدار! اِ چیئَل کم اَمونتدار بین، اِسَه چیئَل فِرَه‌تی میَمَ دَسا. بوری بوءَ هُم‌بیَر خَوشی اَرباو ووژِت!“ 24اَسَه خِلمتکاری گه یِه قَنطار گِرتوئیتی، هاتِ وَر ئو وِتی: ”اَرباو، اَرِیَگه مَذِناسدِم پیا سخدگیری کین، ئو اژ جای گه کشتِت نَهَردیَ دروءَ مِهِین ئو اژ جای گه تُئمِت ناآشدیَ جیَمَ مِهِین، 25اِسَه زِلَم چی ئو پیلِهَم اِنوم زَمی شاردینا. یوئیشَ پیلِهَت!“ 26مِنتائای اَرباوِهِه جوواو داتی: ”اِاِ خِلمتکار شرَبار ئو تَمَل! تو گه مَذِناسدِت اژ جای گه کِشتِم نَهَردیَ، دروءَ مَهَم ئو اژ جای گه تُئمِم ناآشدیَ، جیَمَ مَهَم، 27اِسَه تو باس پیل مِنتَ میاءَ صرافَل، تاگَه حِنی گه اژ سفر گِلامیرِم، پیلِهَمَ گَرد فادَه‌م اَژینَ مَسَنین؟ 28اَ قَنطارَ اژ او بِگِرِن ئو بیَنَ اَوَه گه دیَه قَنطار دیری. 29اَرِیَگه وَه هر کی گه دیری، ویشتِرَ میَن تاگَه فِرَه‌تِر داشدوئیتی؛ مِنتائای اَوَه گه نِری، هَر اَویشَ گه دیری اَژینَ مَسینِنی. 30ایی خِلمتکار بی‌خِرَ باوژِن اِنوم تیَریکی دِریر، جای گه گیری ئو دِنوریچَه هَس.“

روژ داوری

31«وخدی گه کُر اِنسون اِنوم جِلال ووژ وَه‌گَرد کُل فریشدَه‌ل بای، اَ موقَع مَنیشی اَرسر تخت پِرجِلال ووژ. 32کُل ملتَل جیَمَ موئنی اَرتَک، ئو او مردِم اژ یَک جیاآ مِهِه، هَر چُی شوئونی گه کاوِرَل اژ بِزَل جیاآ مِهِه؛ 33کاوِرِلَ مَنی اَر لا راس ئو بِزَل اَر لا چپ ووژا. 34اَسَه پاتِشا موشیَ اونَلی گه هانیِ لا راسا: ”بورِن، اِاِ کسَلی گه اژ باوَه مِه بِرَکتتو گِرتیَ، اَ پاتِشائیَ بیَرنَ میرات گه اژ بِنیا دنیا اَرِه هُمَه آمادَه بیَ. 35اَرِیَگه وِرسِنی بیم خوراکتو دائِنِم؛ تینی بیم آوتو دائِنِم؛ خَریو بیم جاتو دائِنِم. 36لُت بیم، جِنِکتو کِردِ وَرِم؛ مریض بیم، هاتینونَ سَرکَشیم؛ اِنوم زندو بیم سرتو دا اَرینِم.“ 37اَسَه آمَل صالح جوواوَ میَن: ”اِاِ خداون، کِ تونمونَ وِرسِنی دی ئو خوراکمو دائونِت، یاگَه تینیمو دین، آومو دائونِت؟ 38کِ تونمونَ خَریو دی ئو جامو دائونِت ئو یاگَه لُتمو دین، جِنِکمو کِردِ وَرِت؟ 39کِ تونمونَ مریض ئو یاگَه اِنوم زندو دی گه هاتیمَ سَرکَشیت؟“ 40پاتِشا جوواو اونِلا مِ، موشی: ”حخیختاً، موشِم‌ئونتو، اَ چیئَه گه اَرِه یَکی اژ گُجَرتِرین بِرالِم کِردتو، اِراسی اَرِه مِنتو کِردیَ.“ 41اَسَه موشیَ اونَلی گه هانیِ لا چپا: ”اِاِ لیَنَت‌بیَل، اژ مِه دویرا بِگِرِن ئو بِچِن اِنوم آگِر ابدی‌ای گه اَرِه شِطون ئو فریشدَه‌ل او آمادَه بیَ، 42اَرِیَگه وِرسِنی بیم، خوراکتون‌ئون نام؛ تینی بیم، آوتون‌ئون نام؛ 43خَریو بیم، جاتون‌ئون نام؛ لُت بیم، چیتونی نَهَردِ وَرِم؛ مریض ئو زندونی بیم، ناهاتینونَ سَرکَشیم.“ 44اونَل جوواوا میَن: ”اِاِ خداون، کِ تونمونَ وِرسِنی ئو تینی ئو خَریو ئو لُت ئو مریض ئو اِنوم زندو دی ئو خِلمَتمون اَژی نَهَردین؟“ 45اِ جوواوُنا موشی: ”حخیختاً، موشِم‌ئونتو، اَ چیئَه گه اَرِه یَکی اژ ایی گُجَرتِرینَلتونَ نَهَرد، اِراسی اَرِه مِنتو نَهَرد.“ 46اِسَه یوئنَ مَچِنَ نوم عذاو ابدیا، مِنتائای آمَل صالحَ مَچِنَ نوم ژییاین ابدیا.»

Currently Selected:

مَتّی 25: LBT

Highlight

Copy