مَتّی 23
23
هِرّو اَرِه هُمَه اِاِ شیخَل دین
1اَسَه عیسی وِتیَ مردِم ئو شاگردَل ووژ: 2«مَلِمَل تورات ئو شیخَل فرقَه فَریسی نیشتِنَس اَر جاگا موسی. 3اِسَه اَ چیئَه گه موشِن‌ئونتو، گوش بِگِرِن ئو اَنجوم دَن؛ مِنتائای نه کارَلی گه مَهَن! اَرِیَگه اَ چیئَه گه تیَلیمَ میَن، ووژو نِمارِنَ جا. 4بارَل گِرونی گه کیشیاینو سخدَ، موئنِن ئو مَنِن اَر کول مردِم، مِنتائای ووژو حاضر نیِن اَرِه جاواز کِردِن اونَل جُ‌جُ کِلِکو شَک دَن. 5هر کاری مَهَن اَرِه یَسَ گه مردِم بوئینِنو: کیف دوعا اَر بال ووژو کَلِنگتِر ئو دامو چوخالو پیَنتِرا مَهَن. 6دوس دیرِن اِنوم مِمونیَل بِنیشِن اَر بِلِنگ مِجِلیس ئو اِنوم عَبادتگال بیتِرین جائو داشدوئی، 7ئو مردِم اِنوم کویچه ئو بازار سِلامو کَن ئو وَه ’استاد‘ هِنائو کَن. 8مِنتائای نِیلِن هُمَه هِنا کَنَ ’استاد‘، اَرِیَگه فَخَد یِه استاد دیرینو، ئو کُل هُمَه بِراینو. 9هُیچ کس‌یش اَررُی زَمی هِنا نَهَنَ ’باوَه‘، اَرِیَگه فَخَد یِه باوَه دیرینو گه ها نوم آسمون‌اِر. 10ئو هَمیش نِیلِن هِناتو کَنَ ’مَلِم‘، اَرِیَگه فَخَد یِه مَلِم دیرینو گه مسیحَ. 11اَوَه گه اِنوم هُمَه اژ کُل کَلِنگتِرَ، ماوَ خِلمتکار هُمَه. 12اَرِیَگه هر کی ووژ بیَریِ رُ، خوارَ ماو ئو هر کی ووژ فِروتنا کِ، سربِلِنگا ماو.
13«مِنتائای هِرّو اَرِنتو اِاِ مَلِمَل تورات ئو شیخَل فرقَه فَریسی، اِاِ ریاکارَل! اَرِیَگه هُمَه در پاتِشائی آسمون اَررُی مردِمَ موئنینو؛ نه ووژتونَ مَچینون اِنوم ئو نه مِیلینو کسَلی گه میا بان، بِچِن اِنوم.
14[«هِرّو اَرِنتو اِاِ مَلِمَل تورات ئو شیخَل فرقَه فَریسی، اِاِ ریاکارَل! اَرِیَگه هُمَه اژ یِه لا مال بیوَه ژِنَل خارَتَ مِهِینو ئو اژ یِه لاتِر، اَرِه رِشالَتی دوعا ووژتو دِریژا مِهِینو. وَه ایی خاطرَ مِکافاتِتو فِرَه سخدتِرَ ماو.]
15«هِرّو اَرِنتو اِاِ مَلِمَل تورات ئو شیخَل فرقَه فَریسی، اِاِ ریاکارَل! اَرِیَگه هُمَه دریا ئو حشگیَ مَگیردینو تاگَه یَکی بِهِینونَ مِرید ووژتو ئو وخدی هُنَتونَ کِرد، دو بِرُوَر گَنتِر اژ ووژتو، اوءَ مِهِینونَ آویل جیَنِم.
16«هِرّو اَرِنتو اِاِ رَنِمال کور، گه موشینو: ”اَرّ کسی قسمَ معبد خدا بیری، عِوی نِری، مِنتائای اَرّ قسمَ طِلا معبد بیری، باس بوسی اَرسر قسم ووژ.“ 17اِاِ نایونَل کور! کُماین کَلِنگتِرَ؟ طِلا یاگَه معبدی گه طِلا مقدّسَ مِهِه؟ 18هَمیش موشینو: ”اَرّ کسی قسمَ قُرونی‌گا بیری، عِوی نِری، مِنتائای اَرّ قسمَ پیشکَشی‌ای گه هایتی اَرسر بیری، باس بوسی اَرسر قسم ووژ.“ 19اِاِ کورَل! کُماین کَلِنگتِرَ؟ پیشکَشی یاگَه قُرونی‌گای گه پیشکَشی تقدیسَ مِهِه؟ 20اِسَه، کسی گه قسمَ قُرونی‌گاءَ میری، هم قسمَ قُرونی‌گا هُاردیِ ئو هَمیش وَه اَ چیئَه گه هایتی اَرسر. 21ئو هر کی قسمَ معبدَ میری، قسم هُاردیَسیَ معبد ئو اَ خدای گه لیز گِرتیَس اِنوم. 22ئو هر کی قسمَ آسمونَ میری، قسم هُاردیَسیَ تخت خدا ئو اَوَه گه نیشتیَسی اَرسر.
23«هِرّو اَرِنتو اِاِ مَلِمَل تورات ئو شیخَل فرقَه فَریسی، اِاِ ریاکارَل! اَرِیَگه هُمَه اژ پینَه ئو شویت ئو زیرَه دیَه‌یَکَ مِینو، مِنتائای فِربونَل مِهمتِر شریعت گه عدالت ئو ریَمَت ئو اَمونتداریَ، وَه نِئیَ مَگِرینو. یوئنَتونَ باس ماوِردَ جا ئو اونِ‌یشتونَ نِئیَ نِمَگِرت. 24اِاِ رَنِمال کور! هُمَه پَشخَه مَپالِنینو، مِنتائای شتِر قویت اِرامِینو!
25«هِرّو اَرِنتو اِاِ مَلِمَل تورات ئو شیخَل فرقَه فَریسی، اِاِ ریاکارَل! اَرِیَگه هُمَه رُی جُم ئو دُوری پاکا مِهِینو، مِنتائای نومو پِر اژ طَما ئو ووژتیمارکِردِنَ. 26اِاِ فَریسی کور، اول‌بار نوم جُم ئو دُوریِهَه پاکا کَ گه رُیِهِه‌یشی پاکا ماو.
27«هِرّو اَرِنتو اِاِ مَلِمَل تورات ئو شیخَل فرقَه فَریسی، اِاِ ریاکارَل! اَرِیَگه هُمَه اِجور قورَلی کینو گه اِسبی‌کاری بینَ گه اژ دِرا رنگینَ چیَما مان، مِنتائای اِنوما پِر اژ سِخونَل مِردیَل ئو کُلِ جور چیئَل نِجسِن! 28هَرِ ایی جورَ، هُمِه‌یش ووژتو صالح نِشو مردِمَ مِینو، مِنتائای اِ دَرینا پِر اژ ریاکاری ئو شرَبارینو.
29«هِرّو اَرِنتو اِاِ مَلِمَل تورات ئو شیخَل فرقَه فَریسی، اِاِ ریاکارَل! اَرِیَگه هُمَه اَرِه پِخَمَرَل لَحَکَ ماوژینو ئو لَحَک آمَل صالح مَرازِنینون‌اِر، 30ئو موشینو: ”اَرّ اِ روژگار باوَه‌ل ووژمو بوئیایمو، هرگِس اِ کُشتِن پِخَمَرَل هُم‌دَسو نِموئیایمو.“ 31هَراَ ایی جورَ، اَرضد ووژتو شاتیَ مِینو، گه آیلَل کسَلی کینو گه پِخَمَرَلو کُشت. 32اِسگَه گه هُنَسَ، اِسَه کیلَه باوَه‌لتو نِقُ‌نِق پِرا کَن! 33اِاِ مارَل! اِاِ حَفی‌زائَل! چطور اژ مِکافات جیَنِمَ مِحواینو؟ 34اَرِیَگه مِه، پِخَمَرَل ئو مَلِمَل ئو کسَلی گه حکمت دیرِن کِلَ‌مَهَم اِرَه تک هُمَه ئو هُمَه بِرونی مَکُشینون ئو مَکیشینون اَر صلیب ئو بِریشی اِنوم عَبادتگال ووژتو شلاخَ مِینو ئو شیَر اَر شیَر مَکُوئینون اَر دُمون ئو عذاوُنَ مِینو. 35اِسَه، کُل خوین آمَل صالح گه رِشیاس اَر زَمی، ها مِل هُمِه‌اِر، اژ خوین هابیل صالح بِگِر تاگَه خوین زکریا کُر بَرَخیا، گه اوتون اِ بِن محراب ئو قُرونی‌گا کُشت. 36حخیختاً، موشِم‌ئونتو، کُل ایی گنائِلَ هار مِل ایی نسِلَ.
37«اِاِ اورشلیم، اِاِ اورشلیم، اِاِ خوینی پِخَمَرَل، اِاِ سنگسارکَر رسولَلی گه کِلَ‌موئن اِرَه تَکِت! چَن گِل هِستِم چُی مِرخی گه جویجِکَلی جیَمَ مِهِئِه ژیر بال ووژ، آیلَلِت جیَم دَمَ دور یَکا، مِنتائای نِهِستِت! 38اِسگَه مال هُمَه چولَ مَمینی اَرِه ووژتو. 39اَرِیَگه موشِم‌ئونتو گه اَژیرِ دُما مِه نِموئینینو تا روژی گه بوشینو: ”بِمارِکَ اَوَه گه وَه نُم خداونَ مای.“»
Currently Selected:
مَتّی 23: LBT
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
