مَتّی 16

هِستِن نشونَه آسمونی

1شیخَل فرقَه فَریسی ئو صَدّوقی هاتِن اِرَه تک عیسی تاگَه اِنتحو کَنی. وَه ایی نیّتَ اژ اوُ هِست تاگَه نشونه‌ی اژ آسمو نشونو دِ. 2عیسی جوواوا دانی: «باایوارَه، موشینو ”هُوا خوءَ ماو، اَرِیَگه آسمو سوئرَ،“ 3ئو صوزویَ موشینو ”ایمِرو هُوا خِراوَ ماو، اَرِیَگه آسمو سوئر ئو گیریاءَ.“ هُمَه خوءَ مَذانینو چطور نشونَه‌ل آسمو میَنا کِینو، مِنتائای نِمَتونینو نشونَه‌ل زمونَل میَنا کِینو! 4نسِل شرَبار ئو زِنهاکار نشونه‌ئونَ مِ، مِنتائای نشونَه‌ئونون نِمیَن بِخِر اژ نشونَه یونس پِخَمَر.» اَسَه اونَل هُیشتیِ جا ئو اژ اورَه چی.

حمیرتُرش فَریسیَل ئو صدّوقیَل

5حِنی گه شاگردَل چِنَ اَکو دریاچَه، اِویرو چوئی نونَ گَرد ووژو بیَرِن. 6عیسی وِتی‌ئونو: «هوشیار بوئن ئو اژ حمیرتُرش فَریسیَل ئو صدّوقیَل دویرا بِگِرِن.» 7اَسَه شاگردَل وَه‌گَرد یَک بینَ دَمَرَگَ، موئِتو: «وَه‌چوینا گه نونمونَ گَرد ووژمو ناوِردیَ، هُنَ موشی.» 8عیسی یَه فیَمی وِتی‌ئونو: «اِاِ سُس ایمونَل، اَرِه‌چَه اَرسر یَگه نُو نِرینو وَه‌گَرد یَک دَمَرَگَتونَ؟ 9یانی هَنی نِمَفیَمینو؟ مَر اَویرتو نِمای اَ پنج نون ئو پنج هزار نفرَ ئو چَن سَلَه گه جیَمتو دا؟ 10یاگَه اَ هفت نون ئو چوار هزار نفرَ ئو چَن سَلِه‌ی گه جیَمتو دا؟ 11اِسَه اَرِه‌چَه نِمَفیَمینو گه اِبارَه نُو قصَه نِمَهَم؟ بلکِم وِتِم حُواستون اَر حمیرتُرش فَریسیَل ئو صدّوقیَل بو.» 12اَسَه اونَل فیَمین گه اِبارَه تیَلیم فَریسیَل ئو صدّوقیَل هُشتارئون دانَسی، نه اِبارَه حمیرتُرش نُو.

اعتراف پطرس اِبارَه عیسی

13وخدی عیسی رَسیَ هیال قیصریَه فیلیپی، اژ شاگردَل ووژ پِرسیتی: «وَه چیَم مردِما، کُر اِنسو کیَ؟» 14اونَل جوواوُنا دا: «بِری موشِن یحیی تیَمیددهندهءَ. بِری‌تِرَ موشِن ایلیا پِخَمَرَ، ئو بِریشی موشِن اِرمیا یاگَه یَکی اژ پِخَمَرِلَ.» 15عیسی پِرسیتی: «هُمَه چَه موشینو؟ وَه چیَم هُمَه‌آ مِه کیِم؟» 16شَمعونِ پطرس جوواوا داتی: «تو هَراَ مسیحینَ گه باس بای، کُر خداءِ زِنی!» 17عیسی وِتی: «خَوزگالَ تو، اِاِ شَمعون، کُر یونا! اَرِیَگه گوشد ئو خوین ایی حخیختَ اَر تو آشگارا نَهَردیِ، بلکِم باوَه مِه گه ها نوم آسمون‌اِر یَه آشگارا کِردیِ. 18مِن‌یشَ موشِم گه تو پطرسین، یانی کمر، ئو مِه کلیسا ووژِم اَرسر ایی کمرَ ماوژِم ئو دروازَه‌ل جیَنِم فائق نِمانی اَری. 19کِلیلَل پاتِشائی آسمونتَ میَم‌ئون. اَ چیئَه گه اَررُی زَمی بوئنین، اِنوم آسمونَ موئنی، ئو اَ چیئَه گه اَررُی زَمی واز کِین، اِنوم آسمو وازَ ماو.» 20اَسَه عیسی قِدَخَن کِردی اَر شاگردَل ووژ گه نوشِنَ کس گه او مسیحَ.

پیشگوئی عیسی اِبارَه مرگ ئو زِنیابیئِن ووژ

21اژ اَوِءِ دُما عیسی بِنیا ناتی اَر آشگارا کِردِن ایی حخیختَ اَر شاگردَل ووژ گه لازمَ بِچو اَرِه اورشلیم ئو اَر اورَه اژ شیخَل ئو رِئیسَل کاهنَل معبد یهود ئو مَلِمَل تورات عذاو فِرِه بوئینی ئو بِکُشِری ئو اِ روژ سِئِم زِنیا بو. 22مِنتائای پطرس او بِردیِ پِنِه‌ ئو مِنا کِرد ئو وِتی: «دویر اژ گیونِت، اِاِ آقا! خدا نِهِه هُنَ چیئی هرگِس اَرِنِت اتفاق بِکُوءِ.» 23عیسی رُی اِرپِلونی، وِتون: «اژ نوا مِه بِ اِلا، اِاِ شِطو! تو هاین اَرسر رئی مِه، اَرِیَگه فگِرَلِت اِنسونیَ نه خدائی.»

24اَسَه ویر کِردیَ شاگردَلی ئو وِتی: «اَرّ کسی بِیتی باءَ تُرّ مِنا، باس ووژ حاشا کِ، صلیب ووژ بِگِریِ کول ئو باءَ تُرّ مِنا. 25اَرِیَگه هر کی بِیتی گیو ووژ نجاد دِ، اژ دسَ مِیتی؛ مِنتائای هر کی وَه خاطر مِه گیو ووژ اژ دس بِ، اِدوارَه مارِتیَ دس. 26اَرِه اِنسو چه فادَه گه کُل دنیا بیَری، مِنتائای گیو ووژ اِربِنی‌؟ اِنسو اِجال گیو ووژ چَه مَتونی بِ؟

27«اَرِیَگه کُر اِنسو وَه‌گَرد فریشدَه‌لیا اِنوم جِلال باوَه ووژَ مای، اَ موقَع وَه هر کی مِطابق کارَلی، اَجِرَ مِ. 28حخیختاً، موشِم‌ئونتو، بِری هوسیانَس اَر ایرَه گه تا کُر اِنسو نوئینِن گه اِنوم پاتِشائی ووژَ مای، طُم مرگ نِمَهَن.»

Currently Selected:

مَتّی 16: LBT

Highlight

Copy