مَتّی 14

کُشتِن یحیی تیَمیددهندَه

1اِ، اَ زمونَ اِبارَه عیسی خَوَر رَسیَ گوش هیرودیسِ حکِمرو، 2ئو او وِتیَ خادمَل ووژ: «یَه یحیی تیَمیددهندهءَ، گه اژ مِردیَل زِنیا بیَ، اَژونَسَ ایی قدرتِلَ گه مُجِزَه‌گَرِن اژ او آشگارا ماو.»

3اَرِیَگه هیرودیس وَه خاطر هیرودیا گه وِرِکار ژَن بِرای فیلیپُس بی، یحیی گِرتوئیتی ئو بَسدوئی ئو آوشدوئی اِنوم زندو. 4اَرِیَگه یحیی موئِت‌ئون: «شرعاً دُریس نیَ تو ایی ژِنَ بُوازین.» 5هیرودیس وَه‌یاآگه مِهِستی یحیی بِکُشی، مِنتائای زِلَه اژ مردِمَ مَچیاتی، اَرِیَگه مردِم یحیی‌ئونَ پِخَمَرَ مَذِناسد.

6مِنتائای اِ روژ جَشت وَه‌دی‌هاتِن هیرودیس، دِت هیرودیا اِنوم مِجِلیس بازی کِردی ئو هُنَ هیرودیس خَوشالا کِردی 7گه قسم هُاردی هر چی بِیتی، بِیتی‌ئون. 8دا نیشتِ ژیر پا دِتِهِه ئو دِتَهَه وِتی: «سر یحیی تیَمیددهندَه هَر اَر ایرَه اِنوم مَجمَه‌‌میَ بی دَ.» 9پاتِشا پَژارا بی، مِنتائای وَه خاطر قسم ووژ ئو حرمت مِمونَلی، فِربو داتی تاگَه بیَنی‌ئون، 10ئو کسَلی کِل‌کِردی، ئو سر یحیی اِنوم زندو بِریتیا، 11ئو سرون اِنوم مَجمه‌ی آوِرد، ئو دائونَ دِتَهَه ئو اویش بِرد اِرَه تک دای. 12شاگردَل یحیی هاتِن ئو لَش اوُ بِرد، خاکو کِرد ئو اَسَه چِن ئو خَوَرو داءَ عیسی.

خوراک دائِن وَه پنج هزار نفر

13وخدی عیسی یَه شنَفتی، سُوار قائِقا بی، اژ اورَه چی اَرِه جا چَفتی. مِنتائای مردِم باخَوَرا بین، اژ شیَرَل ووژو، وَه پا پیا چِنیَ دُما. 14هر یَگه عیسی اژ قائِق هاتَ هُار، جیَمیَت فِرِه دیتی ئو دل سُتی اَرِنو، مریضَلو شِفا داتی.

15باایوارَه، شاگردَل عیسی هاتِنی اِرَه تک ئو وِتو: «ایرَه جا چَفتی کَ، ئو دیروخدیشَ. مردِم رِ کَ تاگَه بِچِن اِرَه آبادیَل ایی هِناسَ ئو خوراکی اَرِه ووژو بِخِرِن.» 16مِنتائای عیسی وِتی‌ئونو: «نِمِیتی مردِم بِچِن. هُمَه ووژتو خوراک بیَن‌ئونو.» 17شاگردَل وِتو: «چیئی بِخِر اژ پنج نون ئو دو مای اَر ایرَه نِریمو.» 18عیسی وِتی: «اونِلَ بارن اِرَه تک مِه.» 19اَسَه وِتیَ مردِم تاگَه بِنیشِن اَرسر مَرِنَل. اَسَه پنج نون ئو دو مایِهَه گِرتی ئو سِیل کِردی اَر آسمو، بِرَکت دانی. اَسَه نونِلِهَه کُت کِردی ئو داءَ شاگردَل ئو اُوُن‌یش دائونَ مردِم. 20کُل هُاردون ئو سیرا بین ئو اژ حُیردَه نونَلی گه مَنوئیا، دوازَه سَلَه پِرو جیَم دا. 21کسَلی گه هُاردو، بِخِر اژ ژِنَل ئو آیلَل، پنج هزار پیا بین.

عیسی اَررُی آوا مَچوءَ رئیا

22عیسی هِرازِه وِتیَ شاگردَل تاگَه ووژ مردِم مِرخصَ مِهِه، سُوار قائِقا بوئن ئو وِر اژ او بِچِنِ اَکو دریاچَه. 23دُما مِرخص کِردِن مردِم، ووژ چی اِرَه کوی تاگَه وَه تَنیا دوعا بِهِه. بیَ شو ئو عیسی اَر اورَه تَنیا بی. 24اِ ایی حِنَ، قائِقِهَه فِرَه اژ حشگی دویرا بوئی ئو تافِلَ ماوِنتِنی اَری، اَرِیَگه وا برعسکَ ماهات. 25نزیک سات سه نِصمِ شو، عیسی هُنَ گه اَررُی آوا مَچیاءَ رئیا هات اِرَه تَکو. 26وخدی شاگردَل اوُ دی گه دیری وَه رُی آوا مَچوءَ رئیا، زِلَ‌تِراقا بین، ئو قارونو، وِتو: «یَه روحی کَ». 27مِنتائای عیسی هِرازِه وِتی‌ئونو: «دلِ‌دَرینتو داشدوئی. مِنِم، زِلَتو نَچو!»

28پطرس جوواو داتی: «اِاِ آقا، اَرّ تونین، فِربو بِ‌ئونِم تاگَه وَه رُی آوا بام اِرَه تک تو.» 29عیسی وِتی: «بوری!» اَسَه پطرس اژ قائِق هاتَ دِریر ئو وَه رُی آوا چی ویرِ عیسی. 30مِنتائای وخدی هوفَه وا دیتی، زِلَه چِتی ئو حِنی گه داشدی غرخَ موئیا، قارونی: «اِاِ آقا، نجادِم دَ!» 31عیسی هِرازِه دس ووژ دِریژاِرا کِردی ئو او گِرتی ئو وِتی: «اِاِ کم‌ایمو، اَرّا چِرچِت بِردِ دل؟» 32وخدی هاتِن اِنوم قائِق، وا آهوسیا. 33ئو کسَلی گه اِنوم قائِق بین عیسی‌ئو پِرَسی، وِتو: «اِراسی گه تو کُر خداین!»

شِفا مریضَل اِنوم جِنیسارِت

34اَسَه وخدی رَسین اَر اَکو آو، چِن اِنوم وِلات جِنیسارِت. 35مردِم اورَه عیسی‌ئو شناسی ئو کسَلونی کِل‌کِرد اَرِه کُل اَ وِلاتَ، ئو مریضَلو آوِرد اِرَه تک. 36اونَل مَلالکیانَ عیسی گه صِلا بِ تاگَه فَخَد دس بِنِن اَر پر چوخای، ئو هر کی دَسَ مَنیا اَر قِ، شِفاءَ مَگِرتی.

Currently Selected:

مَتّی 14: LBT

Highlight

Copy