مَتّی 12

صائای روژ شَمَه مقدّس

1هَراَ حِنَ، عیسی اِ روژ شَمَه مقدّس اِنومجا زمینَل گَنِم کِلَ موئیا. شاگردَلی وِرسِنیو بی ئو بِنیائو ناءَ چِنین گُلَل گَنِم ئو هُاردِنو. 2شیخَل فرقَه فَریسی، وخدی یِئونَ دی وِتون‌ئون: «سِیل کَ، شاگردَل تو کاری مَهَن گه اَنجوم دائِنی اِ روژ شَمَه مقدّس صِلا نِرِنی.» 3عیسی جوواوُنا داتی: «مَر اِنوم نُسَخ مقدّس نَحیوَنتونَ گه داوود چَه کِردی، حِنی گه ووژ ئو کسَلی گه وَه‌گَرد بینی وِرسِنی بین؟ 4چطور چی اِنوم مال خدا ئو نُو پیشکَشی هُاردی، وَه‌یاآگه داوود ئو کسَلی گه وَه‌گَرد بینی صِلائو ناآشد اَ نونَ بیرِن، ئو فَخَد کاهنَل صِلائو داشد. 5یاگَه مَر اِنوم تورات نَحیوَنتونَ گه اِ روژَل شَمَه، کاهنَل نوم معبد خدا، حرمت روژ شَمَه نِرِن، وَه ایی حالا، بی‌گنان؟ 6موشِم‌ئونتو، چیئی هار ایرَه گه کَلِنگتِر اژ معبد خداءَ! 7اَرّ میَنا ایی قصَه‌تونَ مَفیَمیا گه: ”مِه ریَممَ مِ نه قُرونی“ دیَر بی‌گنائَلتو مَکوم نِمَهَرد. 8اَرِیَگه کُر اِنسو صائای روژ شَمِه‌یش هَس.»

شِفا پیای گه دس حُشگا بوئیتی

9اَسَه عیسی اورَه هُیشتی ئو چی اِنوم عَبادتگا اونَل. 10اِنوم عَبادتگا یهود، پیای بی گه یِه دس حُشگا بوئیتی. اونَل اژ عیسی‌ئو پِرسی: «آیا شِفا دائِن اِ روژ شَمَه جائزَه؟» یِئونَ وِت تاگَه دَسپیچی اَرِه مَکوم کِردِنی بِهَنَ دی. 11عیسی وِتی‌ئونو: «اَرّ یَکی اژ هُمَه کاوِری داشدوئیتی ئو اَ کاوِرَ اِ روژ شَمَه بِکُوءِ اِنوم چای، یانی نِمَگِرتی ئو اژ نوم چا اِرنِمارِتی؟ 12اِسَه، اِنسو چَنی اَرزشددارتِر اژ کاوِرَ! اِسَه خوئی کِردِن اِ روژ شَمَه جائزَ.» 13اَسَه وِتیَ اَ پیا: «دسِت دِریژاِرا کَ!» او دَسی دِریژاِرا کِردی ئو اَ دَسَ، چُی اَ دَسِهِه‌ی آزاآ بی. 14مِنتائای فَریسیَل چِنَ دِریر ئو وَه‌گَرد یَک نیشتِنَ شور گه چطور بِکُشِنی.

خادم دیاری‌بیئی خدا

15عیسی گه اژ یَه باخَوَرا بی، اژ اورَه چی. مِنتائای فِرَه کسَل چِنَ دُم اوآ ئو او کُل شِفا دانی 16ئو قِدَخَن کِردِنی نوشِنَ کسَلی‌تِر گه او کیَ. 17یَه بی تاگَه قصَه اِشعیا پِخَمَر اَنجوم بِگِری گه:

18«یَسَ خادمِ مِه گه دیاریِم کِردیَ

عزیزگرامی مِه گه گیونِم خَوشی اَرِنَ مِهِیتی.

روحِ ووژمَ مَنِم اَررُی او

ئو او عدالت اِلومَ مِهِه اَر قومَلی‌تِر.

19جنگ نِمِهِه یاگَه نِمَقارِنی؛

ئو کس دَنگ اِنوم کویچَه‌ل نِمَشتوئیتی.

20زَلی گه تِرَک بِردیِ نِمَشکِنی

ئو پِلیتَ نیم‌سوز کورا نِمِهِه،

تاگَه عدالتَ پیروزی برَسِنی.

21نُم اوءَ ماوَ امید اَرِه قومَلی‌تِر.»

عیسی ئو بِعِلزِبول

22اَسَه پیا مِلاکَت‌دارونی آوِرد اِرَه تک گه کور ئو لال بی ئو عیسی او شِفا داتی، هُنَ گه تونستی قصَه بِهِه ئو بوئینی. 23ئو اَ مردِمَ کُل بِلُجوئیو هات ئو وِتو: «ناخواد ایی پیا هَر اَ کُر داوودَ بوءَ؟» 24مِنتائای وخدی فَریسیَل یِئونَ شنَفت، وِتو: «وَه یاری بِعِلزِبول، رِئیس مِلاکَتِلَ گه مِلاکَتِلَ مِهِئَه دِریر ئو بس!» 25عیسی گه فگِرَلونَ مَذِناسدی، وِتی‌ئونو: «هر مملکتی گه اَرضد ووژ کُت‌کُت بو، نابودَ ماو، ئو هر شیَر یاگَه مالی گه اَرضد ووژ کُت‌کُت بو، پایار نِمَمینی. 26اَرّ شِطو، شِطو بِهِئَه دِریر، ووژ کُت‌کُتا کِردیَسی؛ اِسَه چطور سِلطنت پایارَ مَمینِتی؟ 27ئو اَرّ مِه وَه یاری بِعِلزِبول مِلاکَتِلَ مَهَمَ دِریر، شاگردَل هُمَه وَه یاری کی اونِلَ مَهَنَ دِریر؟ اِسَه اونَل ووژو قاضیَل هُمَه موئن. 28مِنتائای اَرّ مِه وَه‌سونگَ روحِ خدا مِلاکَتِلَ مَهَمَ دِریر، اِسَه پاتِشائی خدا هاتیَس اَر هُمَه. 29هَمیش، چطور کسی مَتونی بِچو اِنوم مال پیا زورداری ئو مالِ‌منال خارَت کِیتی، مَر یَگه اول‌بار اَ پیاءَ آبوئنی. اَسَه مَتونی مال خارَت کِیتی. 30هر کی وَه‌گَرد مِه نیَ، اَرضد مِنَ، ئو هر کی وَه‌گَرد مِه جیَم نِ، اژ یَکَ مَچویچِنی. 31اِسَه موشِم‌ئونتو هر گنا ئو کِفِری گه اِنسو بوشی، بَشخیا ماو، مِنتائای کِفِر کِردِنَ روح‌القدس بَشخیا نِماو. 32هر کی قصه‌ی اَرضد کُر اِنسو بوشی، بَشخیا ماو مِنتائای هر کی اَرضد روح‌القدس قصَه بِهِه، بَشخیا نِماو، نه اِ ایی زمونَ ئو نه اِ زمونی گه میا بای. 33«دار خو ثمر خوءَ ماری ئو دار گَن ثمر گَن، هر داری اژ ثمرَ مَشتاسِنی. 34اِاِ حَفی‌زائَل، هُمَه گه شرَبارینو، چطورَ مَتونینو قصَه خو بوشینو؟ اَرِیَگه زوئون اژ اَ چیئَه گه دل اَژی پِرِ، قصَه مِهِه. 35آم خو، اژ خزینَه خو دل ووژ خوئیَ ماریَ عمل ئو آم گَن، اژ خزینَه گَن دل ووژ گَنیَ ماریَ عمل. 36مِنتائای موشِم‌ئونتو گه اِ روژ داوری مردِم اَرِه هر چِنَه مِفتی گه بارِنَ زوئو، حساوَ میَنِ دُما. 37اَرِیَگه وَه قصَه‌ل ووژتو بی‌گنا موئینو ئو وَه قصَه‌ل ووژتو مَکومَ موئینو.»

نشونَه یونس

38اَسَه بِری اژ مَلِمَل تورات ئو فَریسیَل وِتون‌ئون: «استاد، مِمو نشونَه‌‌تی اَژی بوئینیم.» 39عیسی جوواوُنا داتی وِتی: «نسِل شرَبار ئو زِنهاکار مِنِی نشونَه مَهَن! مِنتائای نشونه‌ئو‌نیون نِمیَم، بِخِر اژ نشونَه یونس پِخَمَر. 40اَرِیَگه هَراَ جورَ گه یونس سه شو ئو سه روژ اِنوم لَم مای کَلِنگی بی، کُر اِنسون‌یش سه شو ئو سه روژَ مَمینی اِنوم دل زَمی. 41مردِم شیَر نینوا اِ روژ داوری وَه‌گَرد ایی نسِلَ زِنیا موئن ئو مَکومونَ مَهَن، اَرِیَگه اُوُ وَه موعظَه یونس توئه‌ئو کِرد، سِیل کَن، کسی کَلِنگتِر اژ یونس هار ایرَه. 42ملکَه جنوب اِ روژ داوری وَه‌گَرد ایی نسِلَ زِنیا ماو ئو مَکومونَ مِهِه، اَرِیَگه او اژ اَ پر دنیا هات تاگَه حکمت سلیمان بشتوئی، سِیل کَن، کسی کَلِنگتِر اژ سلیمان هار ایرَه. 43«وخدی گه روحِ گَن اژ کسی ماءَ دِریر، مَچو اِرَه جال حُشگ ئو بی‌آوْ تاگَه پَلاماری بِهِئَه دی، مِنتائای نِمِهِئَه دی. 44اَسَه موشی ”گِلامیرِم اِرَه مالی گه اژ اورَه هاتِمَ.“ مِنتائای وخدی مَرَسی اَر اورَه ئو مالِهَه چول ئو تَمیس ئو جاروکَریا موئینی، 45اَسَه مَچو ئو هفت روح گَنتِر اژ ووژیشَ ماری ئو کُلَ مان اِنوم ئو لیزَ مَگِرِن اَر اورَه. دُماخِرِ، عاقویَت اَ آمَ گَنتِر اژ اول‌بارَ ماوتی. عاقویَت ایی نسِل شَرَباریشَ هُنَ ماو.»

دا ئو بِرال عیسی

46هُنَ گه عیسی قصَئَه گَرد مردِمَ مَهَردی، دا ئو بِرالی هوسیائینَ دِریر ئو مِهِستو قصَئَه گَرد بِهَنی. 47اَسَه یَکی خَوَر دائون گه: «دا ئو بِرالِت هوسیانَسَ دِریر، ئو میا قصَه‌تَ گَرد بِهَن.» 48عیسی جوواو اَ پیا داتیا وِتی: «دا مِه کیَ؟ ئو بِرالِم کیِن؟» 49اَسَه وَه دس ووژ هَشارَه کِردی ویرِ شاگردَلی ئو وِتی: «دا ئو بِرال مِه یوئنَنَ! 50اَرِیَگه هر کی خواس باوَه مِه گه ها نوم آسمون‌اِر، باریَ جا، بِرا ئو خُیَه ئو دا مِنَ.»

Currently Selected:

مَتّی 12: LBT

Highlight

Copy