یوحنا 3

تو باس اژ نوو زاندَه بوئین

1پیای بی اژ شیخَل فرقَه فَریسی، نیقودیموس نُم اژ کَلِنگَل یهود. 2او یِه شو یِهات اَرِه تک عیسی ئو وِتَ بی: «استاد، مَذانیم تو مَلِمی کین گه اژ جونِم خدا هاتینَ، اَرِیَگه هُیچ‌کس نِمَتونی ایی مُجِزَه‌ل ئو نشونَه‌لی گه تو اَنجومَ مِین اَنجوم دِ، مَر یَگه خدا وَه‌گَرد بوتی.» 3عیسی جوواو داتی: «حخیختاً، موشِمَ بینِت، تا کسی اژ نوو زاندَه ناو، نِمَتونی پاتِشائی خدا بوئینی.» 4نیقودیموس وِتَ بی: «کسی گه پیرَ، چطورَ مَتونی زاندَه بو؟ یانی مَتونی اِدوارَه گِلابیریِ لَم دای ئو باءَ دی؟» 5عیسی جوواو داتی: «حخیختاً، موشِمَ بینِت تا کسی اژ آو ئو روحِ خدا زاندَه ناو، نِمَتونی با اِنوم پاتِشائی خدا. 6اَ چیئَه گه اژ جسم زاندَه بو، جسمونیَ؛ ئو اَ چیئَه گه اژ روحِ خدا زاندَه بو، روحانیَ. 7بِلُجوئیِت نای گه وِتِم باس اژ نوو زاندَه بوئینو! 8وا هر جا بِیتی مَچو؛ دَنگَ مَشتوئینی، مِنتائای نِمَذانین اژ کوءَ مای ئو ویرِ کوءَ مَچو. هر کسی‌شی گه اژ روحِ خدا زاندَه بو، هُنَسَ.» 9نیقودیموس اژ عیسی پِرسیتی: «هُنَ چیئی چطورَ ماو؟» 10عیسی جوواو داتی: «تو مَلِم اسرائیلین ئو ایی چیئِلَ نِمَفیَمین؟ 11حخیختاً، موشِمَ بینِت گه ایمَه اژ اَ چیئَه گه مَذانیم قصَه مِهِیم ئو اَر اَ چیئَه گه دیمونَ شاتیَ مِیم، مِنتائای هُمَه شاتی ایمَه قبول نِمِهِینو. 12اَرّ وخدی گه اِبارَه چیئَل زمینی وَه‌گَرد هُمَه‌م قصَه کِرد باوارتو نَهَرد، چطور اَرّ اژ چیئَل آسمونی اَرِنتو بوشِم باوارَ مِهِینو؟ 13هُیچ‌کس ویرِ آسمو نَچیَسِ بِلِنگ، مَر اَوَه گه اژ آسمو هاتیَسَ هُار، یانی کُر اِنسو [گه ها نوم آسمون‌اِر]. 14هَرهُنَ گه موسی اَ مار برنجیَ اِنوم بیاوو کوئیتی اَر تُک چوآ ئو علم کِردی کُر اِنسون‌یش باس علم بو، 15تا هر کی ایمو باری اَر او، ژییاین ابدی داشدوئیتی.

16«اَرِیَگه خدا اَخَ مِحبت کِردی اَر دنیا گه کُر یَکونَه ووژ داتی تا هر کی ایمو باری اَر او نابود ناو، بلکِم ژییاین ابدی داشدوئیتی. 17اَرِیَگه خدا کُر ووژ کِل‌نَهَردی‌ اَرِه دنیا تا دنیا مَکوم کِ، بلکِم کِل‌کِردی تاگَه دنیا وَه‌سونگَ او نجاد بِگِری. 18هر کی ایمونَ بی دیرِتی مَکوم نِماو، مِنتائای هر کی ایمونَ بی نِرتی، هَراِسگَه مَکوم بیَ، اَرِیَگه ایمو ناوِردیَسی اَر نُم کُر یَکونَه خدا. 19ئو حکِم یَسَ گه نُیر هات اِنوم دنیا، مِنتائای مردِم تیَریکیو ویشتِر اژ نُیر دوس داشد، اَرِیَگه کارَلو گَنَ. 20اَرِیَگه هر کی گه کارَل گَنَ مِهِه اژ نُیر بیزارَ ئو نِمای اَرِه تک نُیر، تاناخواد کارَل آشگار بوتی ئو رُسبا بو. 21مِنتائای اَوَه گه اَ چیئَه گه دُریسَ اَنجومَ مِ، ما اَرِه تک نُیر تاگَه آشگار بو گه کارَلی وَه یاری خدا اَنجوم بیَ.»

آخِرین شاتی یحیی تیَمیددهندَه اِبارَه عیسی

22دُما اَوَه، عیسی ئو شاگردَلی چِن اَرِه آبادیَل هیال یهودیَه. او مِدتی وَه‌گَرد اونَل مَن اَر اورَه ئو مردِم خُسِل تیَمیدَ ماتی. 23یحییِ پِخَمَریش اِ آبادی عِیْنون، هِناس شیَر سالیم، تیَمیدَ ماتی، اَرِیَگه اَر اورَه آو فِرَه بی ئو مردِمَ ماهاتِن، تیَمیدونَ مَگِرت. 24یَه وِر اژ اَوَه بیَ گه یحیی بِکُوءِ زندو. 25اِسگَه، اَر سر آداو پاک کِردِن چیئَل نِجس بَثی کَت اِنوم شاگردَل یحیی ئو یِه یهودی. 26اَسَه هاتن اَرِه تک یحیی، وِتونَ بی: «استاد، اَوَه گه اِ اَکو روو اُردن وَه‌گَردِت بی، ئو تو اَر او شاتیِت دا، اِسگَه ووژ تیَمیدَ مِ ئو کُلَ مَچِنی اَرِه تک.» 27یحیی جوواو داتی: «هُیچ‌کس نِمَتونی چیئی باریَ دس، بِخِر اژ اَ چیئَه گه خدا بوئَشخِنتیَ بی. 28هُمَه ووژتو شاتینو گه مِه وِتِم مسیحی گه باس بای نیِم، بلکِم وِر اژ او کِل‌بیمَ. 29بُئی هِن ذُماءَ، مِنتائای رِقیف ذُما گه هوسیاءَ دَنگ اوءَ مَشتوئی، اژ شِنَفتِن دَنگ ذُما خَوشالی فِرِه‌ی مِهِه. اِسَه خَوشی مِن‌یش هُنَ کامل بیَ. 30او باس کَلِنگا بو ئو مِه باس گُجِرا بوئم.

31«اَوَه گه اژ بِلِنگَ مای، هار بِلِنگ کُل چی، مِنتائای اَوَه گه اژ زمینَ، زمینیَ ئو اژ چیئَل زمینی قصَه مِهِه. اَوَه گه اژ آسمونَ مای، هار بِلِنگ کُل چی. 32او اَر هر چیئی گه دیَسی ئو شنَفتیَسی شاتیَ مِ، مِنتائای هُیچ‌کس نِمَچوءِ گِرد شاتی او. 33اَوَه گه مَچوءِ گِرد شاتی او، میر تاییدَ مِ اَر یَگه خدا حخیختَ. 34اَرِیَگه اَ کسَ گه خدا کِل‌کِردیَ، کلوم خداءَ موشی، اَرِیَگه خدا روحِ ووژ بی‌حدَ موئَشخِنِتیَ بی. 35باوَه آسمونی، کُر دوس دیری ئو کُل چی سپارتیَسیَ دس اوآ. 36اَوَه گه ایمو دیری اَر کُر، ژییاین ابدی دیری؛ مِنتائای اَوَه گه فِربون اژ کُر نِمیَری، ژییاین نِموئینی، بلکِم خَضو خدا مَمینِتی اَررُی.»

Currently Selected:

یوحنا 3: LBT

Highlight

Copy