یوحنا 10
10
مِنِم اَ شوئو خوءَ
1«حخیختاً، موشِمَ بینتو، اَ کسَ گه اژ دِراخِل کُرِنگ نَچو اِنوم، بلکِم اژ رئی‌ای‌تِرا بِچو اِسَر، اَوَه دُز ئو مِلَه‌بگیرَ. 2مِنتائای اَوَه گه اژ دِراخِل بِچو اِنوم، شوئو کاوِرِلَ. 3دَربو، دِراخِل اِ رُی او وازَ مِهِه ئو کاوِرَل گوشَ مَگِرِنَ دَنگ او؛ او کاوِرَل ووژ وَه نُم هِنا مِهِه، ئو اونِلَ میَریِ دِریر. 4وخدی کُل کاوِرَل ووژ بیَریِ دِریر، اِ نوا اُوُنَ مَچوءَ رئیا ئو کاوِرَل‌یش مَچِنیَ دُما، اَرِیَگه دَنگَ مَشتاسِنی. 5اونَل وَه دُم بیگونِه‌آ نِمَچِن، بلکِم اَژینَ مِحوانی، اَرِیَگه دَنگ بیگونَه نِمَشتاسِن.»
6عیسی ایی متلَ اَرِنو تیَریف کِردی، مِنتائای اُوُ نَفیَمین چِئونَ بینَ موشی.
7اَسَه یِگِلی‌تِر وِتیَ بینو: «حخیختاً، موشِمَ بینتو، مِه اَرِه کاوِرَل،’دِراخِلِم‘؛ 8اونَلی گه وِر اژ مِه هاتِن، کُل دُز ئو مِلَه‌بگیرِن، مِنتائای کاوِرَل گوشونَ بی نان. 9مِنِم اَ ’دِراخِلَ‘؛ اَرّ کسی اژ رئی مِه با اِنوم، نجادَ مَگِری، ئو راحتَ ما اِنوم ئو مَچوءَ دِریر ئو کُرِخَ مِهِئَه دی. 10دُز نِمای مَر اَرِیَگه دُزی بِهِه ئو بِکُشی ئو نابود بِهِه؛ مِه هاتِمَ تاگَه اونَل ژییاینو داشدوئی ئو چَل‌چَل اَژینو داشدوئی.
11«مِنِم اَ شوئو خوءَ. شوئو خو گیو ووژَ مِهِئَه خِر کاوِرَلی. 12کسی گه اَرِه پیل کارَ مِهِه، اِجور شوئو نیَ ئو کاوِرَل هِن او نیِن، وخدی گه بوئینی گرگَ مای، کاوِرَل وِلَ مِهِه ئو مِحوای ئو گرگ اِریشتَ ماری اَرینو ئو اونَل اِرَمَراقِنی ئو اژ یَکونَه مَچویچِنی. 13اوءَ مِحوای، اَرِیَگه اَرِه پیل کارَ مِهِه ئو دَروَن کاوِرَل نیَ. 14مِنِم اَ شوئو خوءَ. مِه کاوِرَل ووژمَ مَشتاسِم ئو کاوِرَل‌یش مِنَ مَشتاسِن، 15هُنَ گه باوَه مِنَ مَشتاسی ئو مِه باوَه مَشتاسِم. مِه گیون ووژمَ مَهَمَ خِر کاوِرَلِم. 16کاوِرَل‌تِریشی دیرِم گه اژ ایی کُرِنگَ نیِن. باس اون‌یشَ بارِم ئو اون‌یش گوشَ مَگِرِنَ دَنگ مِه. اَسَه موئنَ یِه ریئَن وَه‌گَرد یِه شوئو. 17اَژونَسَ، باوَه مِه دوس دیری اَرِیَگه مِه گیون ووژمَ میَم تاگَه اِدوارَه بِسینمی. 18هُیچ‌کس گیون مِه نِمَسینی، بلکِم مِه وَه دل ووژِم گیونمَ میَم. قدِرت‌واختیار دیرِم اَوَه بیَم ئو قدِرت‌واختیار دیرِم بِسینمیا. ایی حکمَ اژ باوَه‌م گِرتِمَ.»
19وَه خاطر ایی قصه‌لَ، یِگِلی‌تِر یهودیَل بینَ دو دسَه. 20ویشتِر اونَل وِتو: «او مِلاکَت دیری ئو لیوِهءَ؛ اَرِه‌چَه گوشَ مَگِرینونیَ بی؟» 21مِنتائای کسَلی‌تِر وِتو: «یوئنَ قصَه‌ل آم مِلاکَت‌دار نیَ. مَر مِلاکَتَ مَتونی چیَمَل کور واز کِ؟»
مِن ئو باوَه یَکی کیم
22اَ موقَع اِنوم شیَر اورشلیم، عِد وَخم معبد یهود بی. زِمِسو بی 23ئو عیسی اِنوم قِلا معبد، اِنوم طارِمی سلیمان مَچیاءَ رئیا. 24یهودیَل دورو گِرت ئو وِتو: «تا کِ مِ ایمَه بِیلین‌ِ چِرچ؟ اَرّ اَ مسیحینَ گه باس بای، آشگارا بوشَ بینمو.» 25عیسی جوواو داتی: «مِه وِتمَ بینتو، مِنتائای باوار نِمِهِینو. کارَلی گه مِه وَه نُم باوَه ووژمَ مَهَم، اَر مِه شاتیَ میَن. 26مِنتائای هُمَه باوار نِمِهِینو، اَرِیَگه اژ کاوِرَل مِه نیئینو. 27کاوِرَل مِه گوشَ مَگِرِنَ دَنگ مِه، مِه اونِلَ مَشتاسِم ئو اونَل مانَ تُرّ مِنا. 28مِه ژییاین ابدیَ موئَشخِمَ بینو، ئو هرگِس نابود نِموئن. هُیچ‌کس نِمَتونی اونَل اژ دس مِن اِربِراقِنی. 29باوَه‌م گه اونِلَ بَشخیَسیَ بینِم اژ کُل کَلِنگتِرَ، ئو هُیچ‌کس نِمَتونی اونَل اژ دس باوَه‌م اِربِراقِنی. 30مِن ئو باوَه‌م یَکی کیم.»
31اَسَه یِگِلی‌تِر یهودیَل کُچِکو هیزدا تا سنگسار کَنی. 32عیسی وِتیَ بینو: «کارَل خو فِرِه‌ی اژ جونِم باوَه ووژِم نشونَ هُمَه‌م داءَ. اَرِه کُمین اژ اونَل مِه سنگسارِم کِینو؟» 33یهودیَل جوواوُ دا: «وَه خاطر کار خو سنگسارِت نِمِهِیم، بلکِم اَرِه کِفِر کِردِنِت، اَرِیَگه اِنسونی کین ئو ووژتَ خدا حساوَ مِهِین.» 34عیسی جوواو داءَ بینو: «مَر اِنوم شریعت هُمَه نَنُیسیاءَ گه ”وِتِم، هُمَه خدائَلینو“؟ 35اَرّ اونَلی گه کلوم خدا رَسیَسَ بینو، - ’خدائَل‘ هِناءَ موئن -ئو هُیچ جا اژ نُسَخ مقدّس بی اِتِبار نِماو- 36چطورَ مَتونینو وَه کسی گه باوَه وَخم کِردیَ ئو کِل‌کِردیَس اَرِه دنیا، بوشینو ”کِفِرَ موشین،“ فَخَد اَرِیَگه وِتِم کُر خدام؟ 37اَرّ کارَل باوَه‌م نِمارِم‌َ جا، ایمونمَ بی نارِن. 38مِنتائای اَرّ اونِلَ مارِمَ جا، جُ‌جُ اَرّ ایمونمَ بی نِمارینو، دسِ‌کم ایمو بارِنَ اَ کارِلَ، تاگَه بِذانینو ئو ایمونتو داشدوئی گه باوَه ها نوم مِن‌اِر ئو مِه هام اِنوم باوَه.» 39اَسَه هِستو یِگِلی‌تِر بِگِرِنی، مِنتائای عیسی اژ دس اونَل اِرچی.
40اَسَه هَنی چی اَرِه اَکو روو اُردن، اَر اورَه گه یحییِ پِخَمَر وِرِکار خُسِل تیَمیدَ ماتی، ئو مَن اَر اورَه. 41فِرَه کسَل هاتن اَرِه تک عیسی. اونَل موئِتو: «وَه‌یاآگه یحیی هُیچ نشونَه ئو مُجِزِه‌ی نَهَردی، مِنتائای هر چی گه یحیی اِبارَه ایی آمَ وِتی، راس بی.» 42ئو فِرَه کسَل اَر اورَه ایمونو آوِرد اَر عیسی.
Currently Selected:
یوحنا 10: LBT
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
