یوحنا 1

اِنسو بیئِن کلوم

1اژ اَ اولَ کلوم بی ئو کلوم وَه‌گَرد خدا بی ئو کلوم، خدا بی؛ 2هَر اژ اَ اولَ وَه‌گَرد خدا بی. 3کُل چیئَل وَه‌سونگَ او خَلک بین، ئو اژ هر چیئی گه خَلک بی، هُیچی بی او خَلک نوئی.

4اِنوم او ژییاین بی، ئو اَ ژییاینَ، نُیر آمَل بی. 5ایی نُیرَ اِ تیَریکی بِریقَه مِ ئو تیَریکی حریف اَوَه نوئیَ.

6پیای هات گه اژ جونِم خدا کِل‌‌بوئی؛ نُم او یحیی بی. 7او هات تاگَه شات بو، اَرِه شاتی دائِن اَر اَ نُیرَ، تاگَه وَه‌سونگَ او کُل ایمو بارِن. 8او ووژ اَ نُیرَ نوئی، بلکِم هات تاگَه اَر اَ نُیرَ شاتی بِ. 9اَ نُیر حخیخیَ گه روشتائیَ موئَشخیَ هر کس، اِراسی ماهات‌ اِنوم ایی دنیا.

10او اِنوم دنیا بی، ئو دنیا وَه‌سونگَ او خَلک بی؛ وَه ایی حالا دنیا او نشتاسیتی. 11او هات اِنوم مِلکِ‌مِحل ووژ، مِنتائای قوم ووژ نَچِنیِ گِرد. 12مِنتائای وَه کُل کسَلی گه چِنیِ گِرد، ایی حخَ داتی گه بوئنَ آیلَل خدا، یانی وَه هر کی گه ایمو باری اَر نُم او؛ 13اونَلی گه نه اژ خوین، نه اژ هِستِن جسم ئو نه اژ هِستِن یِه اِنسو، بلکِم اژ خدا زاندَه بینَ.

14ئو کلوم، بیَ اِنسو ئو لیز گِرت اِنوم ایمَه. ایمَه جِلال اومو دیَ، جِلالی لائق اَ یَکونَه کُرَ گه اژ جونِم باوَه آسمونی هات، پِر اژ فیض ئو حخیخت. 15یحیی اَر او شاتیَ ماتی ئو دایَ ماتی گه «یَسَ کسی گه اِبارَه اوئِم وِت: ”اَوَه گه دُما مِنَ مای ئو سرتِر اژ مِنَ، اَرِیَگه وِر اژ مِه بیَسی.“» 16اژ پِری او کُل ایمَه بیَرَه‌مو بِردیَ، فیض اَر رُی فیض. 17اَرِیَگه شریعت وَه‌سونگَ موسی بَشخیاسَ بینمو؛ فیض ئو حخیخت وَه‌سونگَ عیسی مسیح هات. 18هُیچ‌کس هرگِس خدا نِئیَسی. مِنتائای اَ یَکونَه کُر خدا گه ها باووش باوِه‌اِر، هَراَ کسَ، خدا شناسونی اَر ایمَه.

شاتی یحیی

19یَسَ شاتی یحیی وخدی گه کَلِنگَل یهود، کاهنَل معبد ئو لاویَل گه خادمَل معبدِن، اژ شیَر اورشلیم کِلوکِرد‌ِن‌ اَرِه تک تاگَه اَژی بِپِرسِنی گه «تو کیئین؟» 20او اعتراف کِردی ئو حاشا نَهَردی، بلکِم اعتراف کِردی گه «مِه مسیحی گه باس بای، نیِم.» 21اَسَه اَژینو پِرسی: «اَنی کیئین؟ آیا ایلیا پِخَمَرین؟» جوواو داتی: «نیِم.» پِرسیو: «آیا تو اَ پِخَمَرینَ گه موسی پیشگوئی کِردوئیتی؟» او جوواو داتی: «نه!» 22اَسَه وِتونَ بی: «اَنی کیئین؟ بوش اَرِه کسَلی گه ایمَه‌ئو کِل‌کِردیَ، چَه جوواو بیَریم؟ اِبارَه ووژِت چَه موشین؟» 23یحیی مِطابق اَ چیئَه گه اِشعیا پِخَمَر وِتوئیتی، وِتی:

«مِه دَنگ اَ هِناکَرَ اِنوم بیاوونِم گه موشی،

”رئی خداون راس کَن.“»

24اَسَه بِری اَژینو گه شیخَل فرقَه فَریسی کِلوکِردوئین، 25اژ یحیی‌ئو پِرسی: «اَرّ تو نه اَ مسیحینَ گه باس بای، نه ایلیا، ئو نه اَ پِخَمَرَ، اَرِه‌چَه خُسِل تیَمیدَ مِین؟» 26یحیی جوواو داءَ بینو: «مِه وَه آو تیَمیدَ میَم، مِنتائای اِنوم هُمَه کسی هوسیاءَ گه هُمَه او نِمَشتاسینو، 27هَر اَوَه گه دُما مِنَ مای ئو مِه لائق واز کِردِن بَن کِلاشَلی نیِم.»

28یوئنَ کُل اِ آبادی بِیت‌‌عَنیا اَکو روو اُردن اتفاق کَت، اَر اورَه گه یحیی تیَمیدَ ماتی.

وَرک قُرونی خدا

29وَه صوایکا، یحیی وخدی عیسی دیتی گه ماهاتی اَرِه تک، وِتی: «یَسَ وَرک قُرونی خدا گه گنا اژ دنیا هیزَمِ! 30یَسَ اَ کسَ گه اِبارَه اوئِم وِت ”دُما مِه پیای مای گه سرتِر اژ مِنَ، اَرِیَگه وِر اژ مِه بیَسی.“ 31مِن‌یش ووژِم اوئِم نِمَشتاسیا، مِنتائای اَرِه یَه هاتِمَ ئو وَه آو تیَمیدِم داءَ تاگَه او ظاهر بو اَر قوم اسرائیل.» 32اَسَه یحیی شاتی داتی، وِتی: «روحِ خدام دی گه اِجور کموتری اژ آسمو هاتَ هُار ئو نیشت اَر رُی او. 33مِن‌یش ووژِم اوئِم نِمَشتاسیا، مِنتائای هَراَوَه گه مِه کِل‌کِردی تاگَه وَه آو تیَمید دَم، وِتیَ بینِم: ”هر وخد دیت روحِ خدا باءَ هُار ئو بنیشی اَررُی کسی ئو بِمینی اَررُی او، بِذان هَراَوَه‌سَ گه وَه روح‌القدس تیَمیدَ مِ.“ 34ئو مِه دیمَ ئو شاتیَ میَم گه یَسَ کُر خدا.»

اوّلین شاگردَل عیسی

35وَه صوایکا، اِدوارَه یحیی وَه‌گَرد دو نفر اژ شاگردَلی هوسیائی. 36او سِیل کِردی اَر عیسی گه داشدی ردَ موئیا، ئو وِتی: «یَسَ وَرک قُرونی خدا!» 37وخدی اَ دو شاگردَ ایی قصه‌ئونَ شنَفت، وَه دُم عیسی‌آ کَتِنِ رئی. 38عیسی کِلاداتی ئو دیتی گه اونَل دیرِن وَه دُم سِرا مانی. وِتیَ بینو: «چَتونَ مِ؟» وِتو: «استاد، مالِت هار کو؟» 39عیسی جوواو داتی: «بورِن ئو بوئینِن.» اَسَه چِن ئو دییو مال هایتی اَر کو ئو اَ روژَ مَنِنی اَرتَک. اَ وخدَ، سات چوار دُما نیمَرو بی.

40یَکی اژ اَ دو نفرَ گه دُما شِنَفتِن قصَه یحیی چوئی‌َ تُرّ عیسی‌آ، آندریاس، بِرا شَمعونِ پطرس بی. 41او اول‌بار، بِرا ووژ شَمعون کِردیَ دی ئو وِتَ بی: «ایمَه ماشیَح هَراَ مسیحَ گه باس بای، کِردِمونَس‌َ دی.» 42اَسَه او بِردی اَرِه تک عیسی. عیسی سِیلی اَژی کِرد ئو وِتی: «تو شَمعونْ کُر یونائین، مِنتائای اَژیرِ دُما موشِنَ بینِت ”کیفا“ (گه یانی بَرد).»

دَوَت عیسی اژ فیلیپُس ئو نَتَنائیل

43روژ دُماین، عیسی قَص کِردی بِچو اَرِه هیال جلیل. او فیلیپُس کِردیَ دی ئو وِتَ بی: «وَه تُرّ مِنا بوری!» 44فیلیپُس اَل بِیت‌صِیْدا بی، گه شیَر آندریاس ئو پطرس بی. 45فیلیپُس، نَتَنائیل کِردیَ دی ئو وِتَ بی: «اَ کسَ گه موسی اِنوم تورات هَشارَه کِردیَسَ بی، ئو پِخَمَرَل‌یش اِبارَه اوُ نُیسونیَ، کِردِمونَس‌َ دی! او عیسی ناصری، کُر یوسفَ!» 46نَتَنائیل وِتَ بی: «مَر ماو اژ ناصرِه‌یش چی خوئی باءَ دِریر؟» فیلیپُس جوواو داتی: «بوری سِیل کَ.»

47وخدی عیسی نَتَنائیل دیتی گه مایتی اَرِه تک، اِبارَه او وِتی: «اِراسی گه ایی پیا اسرائیلی کَ، گه هُیچ رِنگَری اِنوم نیِ!» 48نَتَنائیل وِتیَ عیسی: «تو اژ کو مِنَ مَشتاسین؟» عیسی جوواو داتی: «وِر اژ یَگه فیلیپُس هِنات کِ، وخدی گه هَنی اِ ژیر اَ دار انجیرَ بینَ، تونِم دی.» 49نَتَنائیل جوواو داتی: «استاد، تو کُر خدائین! تو پاتِشا اسرائیلین!» 50عیسی جوواو داتی: «یانی هَر وَه خاطر یَگه وِتِم اِ ژیر اَ دار انجیرَ تونِم دی، ایمونَ مارین؟ اَژیرِ دُما چیئَل کَلِنگتِری موئینین.» 51دُماخِرِ وِتی: «حخیختاً، موشِمَ بینتو، هُمَه موئینینو گه آسمو تاق بیَ ئو فریشدَه‌ل خدا دیرِن اَر کُر اِنسو مَچِنِ رُ ئو مانَ هُار.»

Currently Selected:

یوحنا 1: LBT

Highlight

Copy