کارَل رسولَل 2

اِ روژ پِنتیکاست روح‌القدسَ ماءَ هُار

1وخدی بیَ روژ پِنتیکاست، اونَل کُل یِه‌دل جیَم بین اَر یِه جا 2گه وَه‌یِگِل دَنگی چُی هوفَه وا اژ آسمو هات ئو مالی گه اِنوم نیشتوئینی، سِرُسَر پِرا کِردی. 3اَسَه، بِلاچَه‌لی اِجور بِلاچَه‌ل آگِر دیارا داتی گه اژ یَک جیاآ بین ئو نیشت اَررُی هر کُم اژ اونَل. 4کُل اونَل پِرا بین اژ روح‌القدس ئو هُنَ گه روحِ خدا قدِرت قصَه کِردِنَ مائونو، بِنیائو نا اَر قصَه کِردِن وَه زوئونَلی‌تِر.

5اِ اَ روژِلَ، یهودیَل دیندار، اژ کُل ملتَل ژیر آسمو، هاتوئین اِنوم شیَر اورشلیم. 6وخدی گه ایی دَنگَ هیزگِرتی، ازداحام فِرِه جیَم بین، بِلُجوئیو هات، اَرِیَگه هَر کُم اَژینو مَشتَفتی گه اونَل دیرِن وَه زوئو ووژیا، قصَه مَهَن. 7اِسَه هُنَ بِلُجوئیو هاتوئی گه واقونِ دَما پَروئی ئو وِتو: «مَر کُل یوئنَ گه دیرِن قصَه مَهَن جلیلی نیِن؟ 8اَنی چطورَ گه هرکُممو وَه زوئو وِلات ووژمونَ مَشتوئیم؟ 9اژ پارتَل ئو مادَل ئو عیلامیَل گِرتیِ، تاگَه مردِمَل هیال بین‌النهرین ئو یهودیَه، ئو کاپادوکیَه ئو پونتوس ئو هیال آسیائی امپراطوری روم 10ئو فْریجیَه ئو پامفیلیَه ئو مصر، ئو هیال لیبی گه هِن قیرَوانَ ئو هَمیش زاوارَل رومی 11(چه یهودی ئو چه اونَلی گه بینَسَ یهودی)؛ ئو هَمیش مردِمَل کْرِت ئو عِرَب -کُلمو دیریم مَشتوئیم گه یوئنَ دیرِن وَه زوئو ایمَه اژ کارَل پِرقدِرت خدا قصَه مَهَن.» 12اَسَه کُلو هَرهُنَ گه واقونِ دَم پَروئی ئو تَپون اَری شویائی اژ یَکتِریونَ مَپِرسیا: «یَه یانی چَه؟»

13مِنتائای قِری اَژینو وَه خَنَه‌خَنَ موئِتو: «یوئنَ مَس شِراو تازَه‌ن!»

پِغوم پطرس

14اَسَه پطرس وَه‌گَرد اَ یازَه نفرَ هیزگِرتی ئو دَنگ اِرآوِردی، ویر کِردی اَرینو ئو وِتی: «اِاِ پیال یهودیَه ئو مردِمَلی گه هاینونِ اورشلیم، یَه بِذانِن ئو خو گوش بِگِرنَ چیئی گه موشِم! 15اَرِیَگه برعسک اَ چیئَه گه هُمَه گُمونَ مِهِینو، یوئنَ مَس نیِن، اَرِیَگه هَنی سات نُه صوءَ! 16بلکِم یَه هَر اَوَه‌‌سَ گه یوئیل پِخَمَر اِبارِه‌ی هُنَ وِتوئیتی:

17«”خدا فرمائشتَ مِهِه: اِ روژَل آخِر،

اژ روحِ ووژمَ مَرِشِنِم اَررُی کُل بشراِرا.

کُرَل ئو دِتَلتو نبوّتَ مَهَن،

جِهالَلتو رویائَلَ موئینِن

ئو پیرَلتو خاوَل.

18ئو هَمیش اِ، اَ روژِلَ،

جُ‌جُ اژ روحِ ووژمَ مَرِشِنِم

اَررُی خُلُمَل ئو کنیژَلم‌اِرا،

ئو اونَل نبوّتَ مَهَن.

19ئو اژ بِلِنگ، اِنوم آسمونَل،

چیئَل بِلُجوئی،

ئو اژ هُارا، وَه رُی زَمی،

نشونَه‌لی آشگارا مَهَم،

یانی خوین ئو آگِر ئو کَرِّدوی.

20وِر اژ یَگه روژ کَلِنگ ئو،

باشکوه خداون برَسی،

هویَرَ ماوَ ظلمات ئو مُنگَ

ماوَ خوین.

21هُنَ ماوَ گه هر کی نُم خداون هِنا بِهِه،

نجادَ مَگِری.“

22«اِاِ پیال اسرائیل، یَه بشتوئِن: عیسیِ ناصری، پیای بی گه خدا وَه مُجِزَه‌ل ئو کارَل بِلُجوئی ئو نشونَه‌لی گه وَه دس او اِنوم هُمَه اَنجوم داتی، شاتی داتی اَر حَخ بیئین ووژ، هَرهُنَ گه ووژتو خوءَ مَذانینو 23ایی عیسیَ مِطابق اَ نشقَه ئو اَ چیئَه گه خدا وِرِکار مَذِناسدی، تسِلیم هُمَه بی، ئو هُمَه وَه دس آمَل کافِر کیشیتون اَر صلیب ئو کُشتِتو. 24مِنتائای خدا او اژ عذاوَل مرگ آزاد کِردی، ئو زِنیا کِردی، اَرِیَگه مِحال بی مرگ بتونی او بِگِری اِنوم قَپ ووژ. 25اَرِیَگه داوود پِخَمَر اِبارَه او وِتی:

”خداونِم هَر اَر وَر رُی ووژِم دیَ،

اَرِیَگه او ها دس راسما تاگَه مِه نامَ رِکَه.

26اَرِه یَسَ گه دلِم خَوشالیَ مِهِه،

ئو زوئونِم شائیَ مِهِه؛

لاریشِم لیزَ مَگِری اِنوم امید.

27اَرِیَگه گیونم اِنوم دنیا مِردیَل،

وِل نِمِهِین،

ئو نِمِیلین قدوس ووژِت کِرمِژِنا بو.

28تو رئیَل ژییاینتَ مِه یاء داءَ،

ئو وَه حضورِت مِه پِر اژ شائیا مِهِین.“

29«اِاِ بِرال، مَتونِم وَه اطمینون اِبارَه باوَه‌جدمو داوود بوشم‌ئونتو گه او مِرد ئو نیریاءِ قور ئو لِحَکِهِه‌یشی تاگَه ایمِرو ها نوم ایمِه‌اِر. 30اِسَه اَرِیَگه او پِخَمَر بی ئو مَذِناسدی خدا اَرِه قسم هُاردیَ گه یَکی اژ نسِل اوءَ مَنیشِنی اَر تخت سِلطنتیا، 31او وِرِکار آیندَه دیتی ئو اِبارَه زِنیابیئِن مسیحی گه باس بای، وِتی گه گیون وِل نِماوتی اِنوم دنیا مِردیَل، ئو جنازه‌یشی کِرمِژِنا نِماو. 32خدا هَر ایی عیسیَ زِنیا کِردی ئو ایمَه کُل شاتیمی. 33او ویرِ بِلِنگ بَریاءَ دس راس خداآ ئو روح‌القدسی گه باوَه آسمونی وَدَه دائیتی، گِرتیِ، ئو رِشونیَس اَر هُاراِرا، هَر یَگه اِسگَه موئینینون ئو مَشتوئینو. 34اَرِیَگه داوودِ پاتِشا ووژ وَه آسمو نَچیِ بِلِنگ، مِنتائای ووژَ موشی:

”خداون وِتیَ خداون مِه:

’بِنیش اَر دس راس مِنا

35تاگَه دشمنَلِت باوژمِ ژیر پائلِت.“‘

36«اِسَه کُل قوم اسرائیل، وَه زَقین بِذانِن گه خدا ایی عیسی‌ی گه هُمَه کیشیتون اَر صلیب، کِردیَسیَ خداون ئو اَ مسیحَ گه باس بای.»

37اونَل وخدی یِئونَ شنَفت، بَن دِلو بِریا، وِتونَ پطرس ئو رسولَلی‌تِر: «اِاِ بِرال، چَه بِهِیم؟»

38پطرس وِتی‌ئونو: «توئَه کَن ئو هرکُم اَژینتو وَه نُم عیسی مسیح اَرِه بشخِش گنائَلتو خُسِل تیَمید بِگِرِن گه روح‌القدسی گه عطا خداءَ مَگِرینو. 39اَرِیَگه ایی وَدَه اَرِه هُمَه ئو آیلَلتون ئو کُل کسَلی کَ گه دویرِن، یانی هر کی گه خداون خداءِ ایمَه، هِنا مِهِیتی اِرَه تک ووژ.»

40پطرس وَه قصَه‌ل فِرِه‌ی‌تِر شاتی داتی ئو تشویقو کِردی، وِتی: «ووژتون اژ ایی نسِل اَژرئی‌اِرهاتیَ نجاد دَن!» 41اِسَه اونَل چِنِ گِرد پِغوم او، ئو تیَمیدو گِرت. اِ اَ روژَ نزیک اَر سه هزار نفر اضافَه‌آ بین اَرینو.

ایمودارَل وَه‌گَرد یَک زِنِه‌یَ مَهَن

42اونَل هَر ووژو وَخمِ تیَلیم گِرتِن اژ رسولَل ئو رِقیفی ئو کُت کِردِن نون ئو دوعا کِردِنونَ مَهَرد. 43ترس کُل اِراگِرتِنی، ئو نشونَه‌ل ئو مُجِزَه‌ل فِرِه وَه دس رسولَل اَنجومَ موئیا. 44اونَلی گه ایمونو آوِردوئی کُل وَه‌گَرد یَک بین ئو اِ کُل چی هُم‌بیَر بین. 45مالِ‌منال ووژونَ مَفِروتو ئو پیلو وَه اَخَ گه اِ کَل هر کس بی، اِنوم ووژو بیَرونا مَهَرد. 46اونَل کُلِ روژی یِه دل اِنوم معبد جیَمَ موئیان اَر دور یَکا ئو اِنوم مالَلو نونو کُتا مَهَرد، ئو وَه خَوشی ئو دسِ‌دلوازی وَه‌گَرد یَک خوراکونَ مَهُارد 47ئو اونَل شگِر خدائونَ مَهَرد. کُل مردِم عزّتون اَرینَ مَنیان؛ ئو خداون روژَ روژ کسَلی گه نجادونَ مَگِرت اضافَه‌آ مَهَردی اَر جَرخَه‌ئو.

Currently Selected:

کارَل رسولَل 2: LBT

Highlight

Copy