یوحنا 12

مریم بِ گُلاوه عیسی بِهن خوش دِگَت

1شَش رُژا پِش عَیدا پِسَخه، عیسی هاتَ بِیت‌عَنْیایه، اَو جیه گو ایلعازَر دِژیا، هَمَن اَوه گو عیسی اَو ناو مِریادا راگِره بو. 2وِدَره بَر خاطره عیسی شیو دان. مارتایه خِذمَت دِگِر و ایلعازَر ژه وان مِرُوا بو گو گَل عیسی سَر سِرفِگه رونِشته بو. 3وه ناوه دا، مریمه گُلاوَگه بُها ژه گُلا یاقوته شینَ خالص گو نِیزوکه لِترَگه بو راگِر و پِیِت عیسی بِ وه بِهن خوش گِرِن و بِ گَزیِت خو پِیِت وی هِشک گِرِن، وِسا گو مال تِژی بِهنا گُلاوه بو. 4بله یهودایه اَسخَریوطی، یگ ژه شاگِردِت عیسی، گو قَصدا هِنده هَبو عیسی تسلیمی دُژمِن بِگَت، گُت: 5«بُچی اَو گُلاوَ سِصَد دینارا نَهاتَ فِرُتِن گو دِراوه وی بِدَنَ فقیر و ژارا؟» 6اَوی اَو قِسَیَ نه بَر خاطره هِنده گو دله وی بُ فقیر و ژارا دِشَوِتی گُت، بَلگو اَو قِسَیَ بَر خاطره هِنده گُت چون گو دِز بو؛ کیسگه دِراوه گو عیسی و شاگِردِت وی خَرج دِگِرِن دَسته ویدا بو و ژه دِراوه گو دِدانانَ لاره وی، بوخو دِراگِر. 7عیسی گُت: «چه شُلا وَ مریم نَکَته بیت! چون گو اَوی اَو گُلاوَ بُ رُژا چال گِرِنا مِن خُدان گِره بو. 8فقیر و ژار همو جاره گَل وَدانَ، بله اَز همو جاره گَل وَدا نینِم.»

9وقته جَماعَـتَگه عَظیم ژه یهودیا، بیهیستِن عیسی وِدَره یَ، هاتِن گو نه تِنه عیسی، بَلگو ایلعازَره ژی گو عیسی اَو ناو مِریادا راگِره بو، بِبینِن. 10بَجا، سَرُکِت کاهینا نَقشَ کِشان گو ایلعازَره ژی بُگُژِن، 11چون گو بَر خاطره وی گَلَک یهودیا رویه خو وان زُوِرانده بون و ایمان اینا بونَ عیسی.

عیسی دِچیتَ ناو اورشلیمه

12رُژا دی، جَماعَتَگه عَظیم گو هاته بونَ عَیده، بیهیستِن عیسی تِتَ اورشلیمه، 13بَجا اَوان چِقِلِت داره خُرمه راگِرِن و چُنَ پِشیا عیسی. اَوان بِ دَنگا بِلند دِگُتن:

««نجاته بِدَ!

مبارَکَ اَو کَسه گو

بِ ناوه خاده تِت،

مبارَکَ پاشایه اسرائیله!»

14ایجا عیسی جاشِگَگ پَیدا گِر و له سیوار بو؛ وِسا گو کِتِبا زکریایه پِیغَمبَردا هاتیَ نِویساندِن گو:

15«نَتِرسَ! اَی گِجا صَهیون،

بَرخوده، پاشایه تَ تِت،

سیوار سَر جاشِگا کَرَگه!»

16شاگِردِت وی اَوِلی اَو دِشدَنَ فام نَگِرِن، بله وقته گو عیسی پاشه مِرِنه رابو، اَوان اینانَ بیراخو گو اَونَ همو راستا ویدا ناو نِویسارِت مُقدس دا هاته بونَ نِویساندِن و بُ وی قَوِمی بون.

17اَو جَماعَتا گو وقته گاز گِرِنا ایلعازَر ژه مَزاره و راگِرِنا وی ژه ناو مِریادا گَل عیسی دا بون، سَر وه دِشدا گو قَوِمی بو شَهادَت دِدان. 18جَماعَت بَر خاطره هِنده چو بونَ پِشیا عیسی، چون گو بیهیسته بون اَوی نیشانَگه وِسا نیشان دایَ. 19ایجا فَریسیا گُتنَ یِگودو: «اون دِبینِن گو ایدی چه شُل دَسته وَ نایِت. بَرخودَنه، تواوی دُنیا دوو ویرا چویَ.»

یونانی دِخازِن عیسی بِبینِن

20ناو مِرُوِت گو بُ عِبادَت گِرِنه هاته بونَ عَیده، هِندَ یونانی هَبون. 21اَو هاتنَ لاره فیلیپُس، گو اَهله شَهره بِیت‌صِیْدایا حَریما جلیله بو و گُتنَ وی: «آغایه مَ، اَم دِخازِن عیسی بِبینِن.» 22فیلیپُس چو و گُتَ آندریاس، و اَو هر دوگ چُن و گُتنَ عیسی. 23عیسی گُتَ وان: «وقته مِرِن و دیسا رابونا گوره انسان گَهَشتیَ. 24بَراستی، بَراستی، اَز بُ وَ دِبِژِم، هَگو دِندِگا گَنِمی نَکَویتَ ناو آخه و نَمِریت، تِنه دِمینیت؛ بله هَگو بِمِریت گَلَک حاصِله تینیت. 25هَچی کَسه گو هَژَ جانه خو بِگَت، دیه اَوه ژه دَست بِدَت. بله هَچی کَسه گو ناو وه دُنیایه دا هَژَ جانه خو نَگَت، دیه اَوه بُ ژیانا اَبَدی خُدان گَت. 26هَچی کَسه بُ مِن خِذمَته بِگَت، دِبی دوو مِدا بِت؛ و اَو جیه گو اَز وِدَره بِم، خِذمَتکاره مِن ژی دیه وِدَره بیت. اَو کَسه گو بُ مِن خِذمَته بِگَت، بابو دیه اَوی سَربِلند گَت.

عیسی باسه مِرِنا خو دِگَت

27«نَهَ جانه مِن پَرِشَیَ. اَز چه بِژِم؟ ما بِژِم: ”بابو! مِن ژه وه سَعَتا زحمت خَلاص گَ“؟ بله اَز بَر خاطره وِنَ گَهَشتِمَ وه سَعَته. 28بابو، شُکوه و جلاله بِدَ ناوه خو!» هِنگه دَنگَک ژه اَسمانی هات گو: «مِن شُکوه و جلال داییه دا و اَزه دیسا شُکوه و جلاله بِدَمه.» 29اَو جَماعَتا گو وِدَره راوَستا بون و اَوَ بیهیستِن، گُتن: «بروسگ بو.» اَونه دی گُتن: «میلیاکَتَگه گَل ویدا قِسَ گِر.» 30عیسی گُت: «اَو دَنگَ بُ وَ بو، نه بُ مِن. 31نَهَ وقته قضاوت گِرِن سَر وه دُنیایه یَ؛ نَهَ سَرُکه وه دُنیایه دیه بُ دَروَ بِتَ هاوِتِن. 32و وقته اَز خاچِوَ بِمَ وَگِرِن، اَزه همو کَسه بِکِشِمَ بُ آلیه خو.» 33اَوی بِ وه قِسه، نیشان دا گو چاون قِرارَ بِمِریت. 34جَماعَته گُتَ وی:«مَ تَوراته دا بیهیستیَ گو مسیحْ حَتا اَبَده دیه بِمینیت، ایجا اَو چاونَ گو تِ دِبِژی گوره انسان دِبی خاچِوَ وَبیت؟ کِیَ اَو گوره انسان؟» 35عیسی گُتَ وان: «نور حَتا مدَتَگه گِم گَل وَدایَ. بَهنده حَتا وقته گو وَ نور هَیَ، ره هَرِن، وِسا له نَیِت تاریتی سَر وَ مسلط بیت. اَوه گو ناو تاریتیه دا ره دِچیت، نِزانیت کِوَ دِچیت. 36حَتا وقته گو وَ نور هَیَ، ایمانه بیننَ نوره گو اون بِبِنَ زارویه نوره.»

وقته عیسی اَو قِسَنَ گُتن، ژه وِدَره چو و خو ژه جَماعَته وَشارت. 37دوزَ گو عیسی گَلَک نیشان لاره وان نیشان دابون، بله دیسا ژی اَوان ایمان نَینانَ وی. 38وِسا قِسا اِشعیایه پِیغَمبَر هاتَ جی گو گُته بو:

«اَی خاده، که اَو پیاما گو ژه مَ بیهیستیَ باوار گِریَ،

و قُدرَتا خاده سَر که آشگَرا بویَ؟»

39جَماعَته نَگارین ایمانه بینِن، چون هَ وِسا گو اِشعیایه پِیغَمبَر جیَگه دیتِردا گُته بو:

40«اَوی چاوه وان گُورَ،

و دله وان گِریَ بَر،

نَگو بِ چاوه خو بِبینِن،

و بِ دله خو فام گَن،

و بِزُورِن و اَز شفایه بِدَمَ وان.»

41اِشعیا بَر خاطره هِنده اَو دِشدَنَ گُتن چون گو شُکوه و جلالا وی دیت و راستا ویدا قِسَ گِر.

42بِ وه حالی، حتا گَلَک مَزِنِت قَومی ژی ایمان اینانَ عیسی، بله تِرسا فَریسیادا، ایمانا خو نَتینانَ سَر اَزمان، گو وِسا له نَیِت گو اَوان دیره دا دَرخینِن. 43چون گو اَوان گَلَکتِر هَژَ هِنده دِگِرِن گو خلق مَحتا وان بِگَت حَتا هِنده گو خدا مَحتا وان بِگَت.

44هِنگه عیسی بِ دَنگا بِلند گُت: «هَچی کَسه ایمانه بینیتَ مِن، تِنه ایمانه ناینیتَ مِن، بَلگو ایمانه تینیتَ اَوه گو اَز رِگِرِمَ. 45هَچی کَسه مِن بِبینیت، اَوه گو اَز رِگِرِمَ دِبینیت. 46اَز بینا نورَگه هاتِمَ ناو وه دُنیایه گو هَچی کَسه ایمانه بینیتَ مِن، ناو تاریتیه دا نَمینیتَ. 47هَگو کَسَگ قِسه مِن بِبیهیسیت، بله ژه وان اطاعته نَگَت، اَز سَر وی قضاوته ناگَم؛ چون گو اَز نَهاتِمَ گو سَر دُنیایه قضاوته بِگَم، بَلگو اَز هاتِمَ گو دُنیایه نجات دَم. 48بُ اَو کَسه گو مِن رَد دِگَت و قِسه مِن قَبول ناگَت، قاضیَگه دی هَیَ؛ اَو قِسه گو مِن گُتن، رُژا قیامَته دیه سَر وی قضاوته بِگَن. 49چون گو مِن بَخودا قِسَ نَگِریَ، بَلگو اَو بابه گو اَز رِگِرِم اَوی بوخو بُ مِن اَمِر گِریَ گو اَز چه بِژِم و باسه چه بِگَم. 50و اَز دِزانِم گو اَمره وی ژیانا اَبَدیَ. بَهنده اَو دِشدا گو اَز دِبِژِم دوز اَو دِشدَ گو بابو گُتیَ مِن گو اَز بِژِم.»

Currently Selected:

یوحنا 12: SKB

Highlight

Copy