شُله رسولا 3

شفا گِرتِنا خازُگَگه شِل

1رُژَگه پِطرُس و یوحنا سَعَت سِیه پاش نیورو گو وقته دعا گِرِنه بو، چُنَ معبده. 2هَ وه وقتیدا، هِندَ مِرُوا، مِرُوَگ گو شِل هاته بو دُنیایه تینان. اَوان اَو مِرُوه شِل همو رُژه دِدانانَ بَر وه دَروازا معبده گو ناوه وه ’دَروازا جِندی‘ بو، گو ژه وان مِرُوه گو دِچُنَ ناو معبده صدقه بِخازیت. 3وقته اَوه مِرُوه شِل، پِطرُس و یوحنا دیتِن گو دِخاستِن بِچِنَ ناو معبده، ژه وان صدقَ خاست. 4پِطرُسی چاوه خو کُتا وی مِرُوی، یوحنا ژی هَ وِسا؛ پِطرُس گُتَ وی: «بَرخودَ مَ!» 5بَجا اَوی مِرُوی بَرخودا وان و هِویا هِنده بو اَو دِشدَگه بِدَنَ وی.

6بله پِطرُس گُتَ وی: «مِن چه زِر و زیو چِنینَ، بله اَو دِشدا گو مِن هَیَ اَز دِدَمَ تَ! بِ ناوه عیسی مسیحه ناصِری رابَ و ره هَرَ!» 7پاشه پِطرُس دَسته وی مِرُوی یه راسته گِرت و اَو بِلند گِر. هَ وه دَمه پِیه وی و قُزینگه پِیه وی قاوَت گِرتِن. 8اَوه مِرُوی خو هَلاوِت، سَر پِیه خو راوَستا و ره چو. اَوی خو دِهَلاوِت و ره دِچو و حمد و ثنایا خدا دِگُت و گَل واندا چو ناو معبده. 9خلقه همویا دیتِن گو اَو ره دِچیت و حمد و ثنایا خدا دِبِژیت، 10و زانین اَوَ هَمَن اَو مِرُوَ گو پِشتا بُ گِرتِنا صدقه بَر وه دَروازا معبده گو دَروازا جِندی دِهاتَ گاز گِرِن دِرونِشت؛ بَجا، خلق ژه وه دِشدا گو سَر وی قَوِمی بو، صِفَت گِرتی بِبون و مابونَ حَیر. 11هَ وه حالیدا گو اَو مِرُوه شِل زَلِقی بو پِطرُس و یوحنا و گَل واندا دِچو، خلق گَل یِگودو صِفَت گِرتی ’اِیوانا سلیمان‘ دا بَزینَ بُ آلیه وان. 12وقته پِطرُس اَوَ دیت، گُتَ خلقه: «گَلی بنی اسرائیله، اون بُچی ژه وه شُله صِفَت گِرتی نَ؟ بُچی وَ وِسا چاوه خو کُتایَ مَ گو مِرُو دِبِژیت مَ بِ قُدرَت و دینداریا خو شُلَگ گِریَ گو اَو مِرُوَ ره بِچیت؟ 13خدایه ابراهیم، خدایه اسحاق و خدایه یعقوب، خدایه باوانه مَ، شُکوه و جلال دا خِذمَتکاره خو عیسی، هَمَن اَو عیسی گو وَ اَو تسلیم گِر و وَ اَو حُضورا پیلاتُس دا حاشا گِر، بِ وه حالی گو پیلاتُس تصمیم گِرته بو اَوی آزاد گَت. 14بله وَ اَوه مُقدس و صالِح، حاشا گِر و وَ خاست قاتلَگ بُ وَ بِتَ آزاد گِرِن. 15وَ کانیا ژیانه گُشت، هَمَن اَوه گو خدا اَو ژه ناو مِریادا راگِر. اَم شاهِده وه یگِنَ. 16اَو دِشدا گو قُدرَته دِدَتَ وی مِرُوی گو اون دِبینِن و ناس دِگَن، ناوه عیسی و ایمان بِ ناوه ویَ. اَو ایمانا گو بِ واسِطا عیسایَ، بَر چاوه وَ همویا سِلامتیا کامِل دایَ وی مِرُوی.

17«نَهَ، گَلی بِرایا، اَز دِزانِم گو وَ بِ نَزانی رِفتار گِر، هَ وِسا گو حاکِمِت وَ رِفتار گِرِن. 18بله خدا گو زَجر کِشانا مسیحْ پِشتِر بِ اَزمانه تواوی پِیغَمبَرا گُته بو، اَو قِسا خو وِسا اینا جی. 19بَجا تَوبَ گَن و بِزُورِنَ بُ آلیه خدا گو گُنَهه وَ بِنَ خِشت گِرِن. 20گو رُژه تازَ بونه، ژه حُضورا خاده بِگَهَشِن و خدا، مسیحْ گو پِشتا بُ وَ دَست نیشان گِره بو رِگَت، آنی عیسی، 21گو دِبی اَسمانی دا بِمینیت، حَتا وقته گو همو دِشد تازَ بیت، وِسا گو خدا ژه زَمانه بَرِوَ بِ اَزمانه پِیغَمبَرِت خو یه مُقدس گُتیَ. 22موسی پِیغَمبَر گُت: ”خاده خدا، ناو بِرایِت وَدا پِیغَمبَرَگه بینا مِن دیه بُ وَ رِگَت. اون دِبی گوهه خو بِدَنَ هَچی دِشدا گو اَو دِبِژیتَ وَ. 23هَچی کَسه گوهه نَدَتَ وی پِیغَمبَری، ژه ناو قَومی دا دیه بَین بِچیت.“

24«سموئیل پِیغَمبَر و پِیغَمبَره گو پاشه وی ژی هاتنَ، همویا راستا وان رُژانَ دا پِشگُتن گِرِنَ. 25اون زارویه پِیغَمبَرانَ و اون وَرَثه وه عَهده نَ گو خدا گَل باوانه وَدا گِردا. خدا گُتَ ابراهیم: ”بِ واسِطا نَسلا تَ تواوی طایفه دُنیایه دیه بَرکته بِگِرِن.“ 26وقته گو خدا خِذمَتکاره خو عیسی ژه ناو مِریادا راگِر، اَوِلی اَو رِگِرَ لاره وَ گو هَریگه وَ ژه شُله وَ یه پیس بِزُورنیت و وِسا بَرکته بِدَتَ وَ.»

Currently Selected:

شُله رسولا 3: SKB

Highlight

Copy