Markos 11
11
Dimmemát ti Jesus ti Jerusalem
(Mateo 21:1-11; Lukas 19:28-40; Juan 12:12-19)
1Nadid, nikuna adeni dán di Jesus ti Jerusalem ay táttannawán di u banuwan a Betfage sakay Betania a katoy tu digdig nu buked a Olibo. Inutusan ni Jesus u duwwa na a disepulus. 2Kinagi na nide, “Umangay kam tu sumunud a baryo. Kássáddáp moy hod ay ketan moy u essa a bul-o a asno#11:2 Asno: U asno ay essa a kalase ni hayup a kumán a kabayo. a te egut, awan palla iye nasaka-sakayan. Lukasan moy sakay tawidán moy he. 3Ni te magtanung nikam ni bakin a lukasán moy u asno ay kagiyán moy a kailangan nu Panginoon sakay isole la be a agad.”
4Kanya naglakad u duwwa, sakay tehhod ngane hide a netan a asno tu bihebi nu dilan a umáegut tu pintuwan nu essa a bilay. Nikuna a lukasán di dán u asno, 5ay tinanung hide nu tolay hide a mágtaknág hod, “Ánya i gimitán moyay hina? Bakin a lukasán moy i asno we?”
6Kinagi de u ipekagi ni Jesus, kanya pinabayan dán hide nu tolay hide. 7Inyangay de u asno tu kán Jesus, sakay sinapinan de tu alikábkáb de hide u adág nu asno sakay simmakay ti Jesus. 8Sakay makpal a tolay u naglatag tu alikábkáb de tu dilan, sakay u iba be ay nangkáttol ti maduun a pinget ni kayo sakay inlatag de tu dilan. 9U mágdipalongo hide ni Jesus sakay u umunonod hide nikuna ay magpákhaw, “Puriyán u Diyos! Pagpalaán u pademát tu ngahan nu Panginoon! 10Pagpalaán nakwa nu Diyos u mágdadedemát a kahariyan nu ninunu tam a ti David! Puriyán tam u Kataasan a Diyos!”
11Káddemát de ti Jerusalem ay immangay ti Jesus tu Templo.#11:11 U templo ay essa a dakál a bilay a págdasalan sakay pággalayan sakay págsambaan tu Diyos ti Jerusalem, Inileng na ti maayus u atanan a bagay hod. Nikuna a gibi dán ay immangay siya ti Betania kaguman na u sapulo ay ti duwwa a disepulus na.
Sinumpa ni Jesus u Kayo a Igus
(Mateo 21:18-19)
12Tu dimadimang, nikuna a lumakad hide ti Betania a pasole ti Jerusalem ay nagaláp ti Jesus. 13Tu pákkatannaw na tu kayo a igus ay inadeniyan na a inileng ni te bunga. Pero awan siya ti netan nan puro a duun, dipo awan palla págbunga ni igus ti itod. 14Kinagi ni Jesus tu igus, “Sapul nadid ay awan dán ti maennaman u tideya man dipo awan ka dán magbunga-bunga hanggan-hanggan.” Nasaneg itod nu disepulus na hide.
Pinalakad ni Jesus u Tolay hide tu Templo
(Mateo 21:12-17; Lukas 19:45-48; Juan 2:13-22)
15Káddemát de ti Jerusalem ay immangay ti Jesus tu Templo. Pinalayas na u maglako hod hide sakay tu mamale hod hide. Impágpasakáb na u lamisaan nu mágpalit hide ti pilak sakay tu áetnudan nu máglako hide ti kalapate. 16Sakay binawalan na be a magtaleb tu luwas nu Templo u te tawed hide a paninda. 17Káttapos ay tinolduwan na u tolay hod hide, kinagi na, “Awan beman kinagi nu Diyos tu Kasulatan, u bilay ko ay bilay a págdasalan nu atanan a tolay? Pero ginimet moy a bilay nu mágtakaw hide.”
18U ginimet ni Jesus ay nabaheta nu puno hide nu Saserdote sakay tu tagapagtoldu hide tu Kautusan. Kanya nangileng hide ti paraan para bunuwán ti Jesus. Pero manteng hide nikuna dipo hanga u tolay hide tu págtoldu na.
19Nikuna a gibi dán ay limmakad di Jesus ti Jerusalem, kaguman na u disepulus na hide.
U Adal a Gábwat tu Kayo a Igus
(Mateo 21:20-22)
20Nadid, tu dimadimang, nikuna a pasole dán hide ti Jerusalem ay netaleban de u kayo a igus sakay netan de a nalanás dán, hanggan tu gimot na. 21Naalaala ni Pedro u kinagi ni Jesus tu igus. Kanya kinagi na, “Maisto, ilingán mo u kayo a igus a sinumpa mo. Nalanás dán!” 22Kinagi ni Jesus nide, “Sumampalataya kam tu Diyos! 23Tatahoden u kagiyán ko nikam, maare moy a kagiyán ti bukidan iye, ‘Umagton ka tu diget!’ Sakay ni awan kam magduwwa-duwwa ti isip, ay talaga a mangyare u kinagi moy. 24Kanya kagiyán ko nikam, ánya man u agidán moy tu Diyos tu pamamag-itan nu dasal moy ay maniwala kam a matanggap moy dán itod, sakay talaga a matanggap moy ngani itod. 25Sakay ni magdasal kam, patawadán moy pa u nagkasala hide nikam támpara u kasalanan moy be ay patawadán be nu Ama moy a katoy ti langet. 26Dipo ni umád moy a magpatawad ay awan kam be patawadán nu ama moy a katoy ti langet.”
U Awan de Pánniwala ni Jesus
(Mateo 21:23-27; Lukas 20:1-8)
27Nadid, simmáddáp hide a huway ti Jerusalem. Mentras a maglakad ti Jesus tu Templo ay inadeniyan siya nu puno nu Saserdote hide, u tagapagtoldu hide tu Kautusan sakay u puno nu banuwan. 28Tinanung de ti Jesus, “Ánya u karapatan mo a maggimet tu bawat gusto mo a gimitán ti Templuwáy? Ti deya u nangatád niko ti karapatan?”
29Timmábbeg ti Jesus, “Tanungán takam be. Sakay ni tábbegán moy ay kagiyán ko ni hádya a gábwat u kapangyariyan ko tu pággimet ti bagayan iye. 30Kagiyán moy nikán, hádya a gábwat u karapatan ni Juan a magbawtismo, tu Diyos beman oni tu tolay?”
31Namágtanungan hide, “Ni kagiyán tam a gábwat tu Diyos, kagiyán na be, ‘bakin a awan kam naniwala ni Juan.’ 32Pero ni kagiyán tam be a gábwat tu tolay, magingál nikitam u tolay hide.” Manteng hide tu tolay hide dipo maniwala u tolay hide a ti Juan ay prupeta nu Diyos. 33Kanya timmábbeg hide, “Awan mi tukoy.”
Kinagi ni Jesus nide, “Ni konna hod, awan kube kagiyán nikam ni hádya a gábwat u karapatan ko para gimitán iye hide a bagay.”
Currently Selected:
Markos 11: MBJC
Highlight
Share
Copy
Want to have your highlights saved across all your devices? Sign up or sign in
Pahanan Agta New Testament © Philippine Bible Society and Wycliffe Bible Translators, Inc., 2017.
