Gimet 5

Di Ananias ay ti Safira

1Nadid tehhod a magkabanga a naglako be ti luta; u ngahan nu lállake ay ti Ananias sakay u kabanga na ay ti Safira. 2Pero bagu a inyatád ni Ananias u naglakuwan na tu apostol hide ay nagkupit siya tu naglakuwan na, tukoy itod nu kabanga na. 3Kanya kinagi ni Pedro, “Ananias, bakin nagpadaig ka ni Satanas sakay nagbule-bule ka tu Banal a Ispirito? Bakin binawasan mo u naglakuwan mo tu luta? 4Nikuna awan palla nelako u luta, awan beman kao mo itod? Sakay nikuna melaku dán, awan beman kao mo? Bakin naisipan mo pa a gimitán itod? Awan ka nagbule-bule tu tolay nan tu Diyos ka a nagbule-bule!”#5:3-4 Basaán tu Mateo 12:31-32, Markos 3:29, Hebreo 6:4-6. 5Nikuna masaneg iye ni Ananias ay patay siya a natumba. Sakay atanan nu nakasaneg tu nangyare ay neántingan hide a tahod. 6Timmaknág u áolito hide sakay binalutan de u bangkay sakay inlábbáng.

7Kállipas nu manga tállo a odas ay dimmemát u kabanga na, a awan ti katuko-tukoy tu nangyare. 8Pagdaka siya a tinanung ni Pedro, “Kagiyán mu ped nikán u tatahoden, sabemalla iye u pinaglakuwan moy tu luta?” “On, sala ngane itona,” kagi na. 9Kanya kinagi nikuna ni Pedro, “Bakin pinagkaessaan moy a purbaan u Ispirito nu Panginoon? Ilingan mo! Katoy dán ti pintuwane u naglábbáng hide tu kabanga mo, hiko dámman nadid isunud diyay a ilábbáng!” 10Pagdaka a natumba ti Safira tu atubang ni Pedro sakay natay. Kássáddáp nu áolito hide ay netan de a patay dán siya; kanya angay di siya inlábbáng tu sadát nu kabanga na. 11Tunay u ánteng nu mánnampalataya hide sakay atanan a nakasaneg ti itod a nangyare.

12Nadid, makpal a ginimet u apostol hide a makataka-taka a bagay a netan nu tolay hide. Atanan nu mánnampalataya hide ay napisan-pisan tu Sássiduman ni Solomon. 13Pero manteng a mákkuyog u awan hide mánnampalataya maski ni tehhod hide a respeto nide. 14Pero mágkakakáppal u lállake hide sakay u bábbey hide a summampalataya tu Panginoon.#5:14 Basaán tu Gimet 4:4, Gimet 6:7, 1 Pedro 2:2. 15Inyangay nu tolay hide tu karsada u te saket hide sakay pinágkatdug de hide tu katre sakay u agum ay ti abák, tánni tu káttaleb ni Pedro ay malenduman hide nu anino na. 16Sakay dimmemát be u makpal a tolay a gábwat tu iba-iba a banuwan a adene ti Jerusalem, tawed de u te saket hide sakay tu hinayup hide; kaya nagpiyya hide a atanan.#5:16 Basaán tu Markos 9:20, Lukas 8:2, Gimet 8:7.

17Pero u pinakapuno nu saserdote hide sakay u sakup na hide a Saduseo ay tunay u pánnaghile de kanya namágkaessa hide a pahirapan de hide. 18Dinakáp de u apostol hide sakay ingkulung de hide. 19Pero nikuna gibi dán ay binukasan nu anghel nu Panginoon u kulungan sakay inluwas na u apostol hide. Kinagi na nide, 20“Angay kam tu templo sakay ipangaral moy tu tolay hide u tungkul tu bigu a kákkabiyag.” 21Nikuna kaldiwan dán ay simmáddáp hide tu templo sakay nangaral tu tolay hide.

Nagipun-ipun be u pinakapuno nu saserdote hide sakay tu kaguman na hide. Dinulaw de u ama-amaan hide nu lahe hide ni Israel a kákkagiyán a Sanedrin, sakay impaalap de tu kulungan u apostol hide. 22Pero káddemát hod nu guwardiya hide ay awan dán u apostol hide. Kanya nagsole hide tu pággipun-ipunan de sakay konna he u imbaheta de, 23“Netan me a nakakandadu ti mapiyya u kulungan sakay katoy labi hod a mágtaknág u guwardiya hide. Pero nikuna bukasan me ay awan kame ti netan a tolay tu disalad!” 24Nadid tunay u balisa nu puno nu saserdote hide sakay u kapitan nu guwardiya hide tu templo nikuna mabaheta de iye, sakay awan de sukat a maisip ni ánya u nangyare tu apostol hide. 25Pero tehhod a dimmemát a nagbaheta nide, “U lállake hide a ingkulung moy ay katoy hide tu templo sakay mangaral tu tolay hide.” 26Kanya immangay u puno nu guwardiya hide tu templo, kaguman na u sundalo na hide. Ingkuyog de u apostol hide, pero awan de hide pinuwersa dipo manteng hide a budasán hide nu tolay hide.

27Sakay inyatubang de u apostol hide tu Sanedrin sakay tinanung hide nu pinakapuno nu saserdote hide. 28Kinagi na, “Awan beman binawalan mikam a mangaral tu ngahan ni Jesus? Pero ilingán moy ginimet moye! Kimmalat dán tu intero a Jerusalem i itáttoldu moye, sakay gusto moy kami pa a pakasalananán tu kákkatay ni tolayan itod!” 29Pero timmábbeg ti Pedro sakay u agum hide a apostol, “U Diyos u dapat me a sunudán, bakán a u tolay. 30U Diyos nu nuno tam hide u nangbiyag a huway ni Jesus a binuno moy nikuna impepako moy tu kudus.#5:30 Basaán tu Deuteronomio 21:22-23. 31Inyangay siya nu Diyos ti langet sakay inatádden ti kataasan a katungkulan a makaguman na a maghare ti langet. Siya u Mangsakup sakay Mángligtas nikitam. Ginimet itod nu Diyos tánni magkahod ti págkakataun u lahe hide ni Israel a magsise sakay mangaged ti tawad tu kasalanan de hide tánni mapatawad hide.#5:30-31 Basaán tu Mateo 1:21, Gimet 4:12, Gimet 17:3.

32Hikame i mangpatunayay ti bagayan iye pati u Banal a Ispirito a impagkaluub nu Diyos tu atanan a sumássunud nikuna.” 33Nikuna nasaneg de u kinagi ni Pedro ay tunay u iyamut nu miyembro nu Sanedrin, sakay gusto de a ipabuno u apostol hide. 34Pero timmaknág u essa a Pariseo a ti Gamaliel u ngahan na, tagapagtoldu siya nu Kautusan sakay igággalang nu intero a banuwan. Inyutus na a iluwas di pala u apostol hide. 35Sakay kinagi na nide, “Kabanuwan ko hide, isipan moy pa ti mapiyya u gimitán moy ti iye hide a tolay. 36Sakay awan beman awan palla nalay a limmitaw ti Teudas a nagkunware a essa a dakila a puno, sakay naakit na u áppat a datos a tolay a nák-agum nikuna. Pero namághiwewalay u tauhan na hide nikuna nabuno siya kaya nabaliawan u gurupo de. 37Káttapos ay limmitaw be ti Judas a taga-Galilea tu panahun nu págsensus tu tolay sakay nakaakit be siya ti makpal a tolay. Nikuna mabuno siya ay namághiwewalay be u sakup na hide. 38Kanya kagiyán ko nikam: diyan moy pák alaman iye hide a tolay; pabayan moy la hide. Ni gággimitán diyan itona ay gábwat la tu tolay ay awan itona ti abután. 39Pero ni gábwat tu Diyos ay awan moy itona mapugáddan sakay lumitaw la a lumaban kam tu Diyos!” Nikuna masaneg de u payo ni Gamaliel ay simmunud hide nikuna.#5:33-39 Basaán tu Juan 19:38-42, Gimet 23:6-9.

40Pinadulaw de a huway u apostol hide sakay káttapos de hide a impabálbág sakay binawalan a mangaral tu ngahan ni Jesus ay pinalakad di dán hide. 41Tunay ti saya a limmakad u apostol hide tu atubang nu Sanedrin dipo pinagustuwan nu Diyos a magdanas hide ti págseste alang-alang ni Jesus.#5:40-41 Basaán tu Mateo 5:11-12, Juan 15:18-21, Gimet 7:54. 42Kanya kada aldew ay angay hide tu templo sakay tu iba-iba a bilay sakay hed hod hide a mangaral tungkul ni Jesus, a siya u Cristo.

Currently Selected:

Gimet 5: MBJC

Highlight

Copy