Gimet 21

Immangay ti Pablo ti Jerusalem

1Nadid, káttapos me a nagpaalam nide ay nággabeng kami dán a patamo ti Cos. Tu kadimadimangan ay dimmemát kame ti Rodas sakay sapul hod ay nagdiretso kame dán ti Patara. 2Dinemáttan mi hod u essa a barko a patamo ti Fenicia, kanya immagton kami hod a simmakay. 3Dimmemát kame tu tapat nu Cyprus a matannaw tu banda ti kawihe. Nagdire-diretso kame hanggan ti Siria pero pimmundu kame ti Tiro dipo magawas ti karga u abeng. 4Inehyok mi hod u disepulus hide a katoy hod, sakay náktulos kami nide ti pitto a aldew. Tu tulung nu Banal a Ispirito ay kinagi de ni Pablo a diyan siya tumulos ti Jerusalem. 5Nikuna a dumemát dán u aldew a kállakad me ay nagtulos-tulos kame dán tu págbiyahe me. Intugán di kame a atanan hanggan tu luwas nu banuwan, kaguman de u kákkabanga de sakay u anak de hide. Káddemát me tu bihebi nu diget ay limmuhud kame sakay nagdasal. 6Káttapos me a nagpaalam ay simmakay kame dán tu barko, sakay nagsole dámbe hide tu bila-bilay de.

7Sapul ti Tiro ay nagtulos-tulos kame a nagbiyahe hanggan makademát kame ti Tolemaida. Nákpagketa kame tu mánnampalataya hide sakay he kame hod a saldew. 8Tu kadimadimangan ay nagdiretso kame ti Cesarea sakay náktulos tu bilay ni Felipe a essa be a mangngaral tu Maganda a Baheta. Essa siya tu pitto a lállake a napile ti Jerusalem tu itod.#21:8 Basaán tu Gimet 6:5, Gimet 8:5.

9Tehhod siya a áppat a anak a mámmadiket a prupeta. 10Kállipas nu sangan a aldew a págyan mi hod ay dimmemát u essa a prupeta a ti Agabo a gábwat ti Judea.#21:10 Basaán tu Gimet 11:28. 11Sakay immangay siya nikame, inalap na u sinturon ni Pablo sakay inigutan na u kamát na sakay u tikád na. “Saiye u kinagi nu Banal a Ispirito: Konna he a igutan nu Judio hide ti Jerusalem u makákkao ti sinturonáy, sakay ipadakáp de siya tu Hentil hide.” 12Tu pákkasaneg mi he ay impákkekagbi me sakay tu taga hod hide a diyan dán siya angay ti Jerusalem. 13Pero timmábbeg siya, “Bakin magsanget kam? Diyan moy panghinaán isip kuwáy! Dipo nakahandaák a papungo maski matayák pa ti Jerusalem ni kailangan, alang-alang tu ngahan nu Panginoon Jesus.” 14Nikuna awan me siya mapugád ay timmahimik kami dán. Sakay kinagi mi dálla a, “Masunud u kagustuwan nu Panginoon.”

15Kállipas nu sangan a aldew ay naghektat kame dán a paangay ti Jerusalem. 16Sakay nákkuyog nikame u sangan a mánnampalataya a taga-Cesarea sakay inyangay de kame tu bilay ni Manason a taga-Cyprus sakay hed kame hod a náktulos. Nalay dán siya a mánnampalataya.

Binisita ni Pablo ti Santiago

17Nikuna makademát kame dán ti Jerusalem ay masaya kame a tinanggap nu mánnampalataya hod hide. 18Tu kadimadimangan na ay bimmisita kame ay di Pablo tu kán Santiago. Katoy bi hod u pupuno hide nu mánnampalataya hide. 19Káttapos na hide a kumustaán ay essa-essa na a kinagi u bagay hide a ginimet nu Diyos tu Hentil hide tu pamamag-itan nu págserbi na.

20Nikuna masaneg di iye ay nagpure hide tu Diyos. Sakay kinagi de ni Pablo, “Tukoy mo kapátkákka, tehhod dán a sangan a libu a Judio u summampalataya ni Jesus pero atanan de ay masigasig pade a sumunud tu Kautusan ni Moises. 21Sakay nabaheta de a itáttoldu mu kan tu Judio hide a mámmágyan tu banuwan nu Hentil hide a awan di dán kailangan a sumunud tu Kautusan ni Moises. Kinagi mo kam pa a diyan di dán turiyán u anak di hide oni diyan di dán sunudán u kaugaliyan tam a Judio hide. 22Ánya nadid i dapat tamay a gimitán? Siguradu a mabaheta de a dimmemát ka. 23Kanya konna he u gimitán mo: tehhod he a áppat a lállake a nagpananto tu Diyos. 24Ikuyog mo hide sakay gimitán moy u páglinis sigun tu Kautusan. Hiko dán u bahala tu magastus, tánni mapagappás di dán u buuk de. Tán matukuyan nu atanan a awan tatahoden u baheta tungkul niko nan sássunudán mo u Kautusan ni Moises.#21:23-24 Basaán tu Bilang 6:13-21. 25Pero tu mánnampalataya hide a Hentil, insulat mi dán nide u disisyon me a diyan hide kuman tu ányaman a nealay tu diyos-diyosan, pate u dige sakay u hayup a natay a awan napadigiyan, sakay diyan mangibábbey oni mangilállake.”#21:25 Basaán tu Gimet 15:29. 26Tu kadimadimangan na ay kinuyog ngane ni Pablo u lállake hide sakay tinupad de u pananto de u páglinis. Káttapos ay immangay siya tu templo sakay impakapospos na ni nikan a matapos u takda a panahun nu páglinis tánni mealay u alay para tu balang essa.

U Pángdakáp di ni Pablo

27Nikuna adene dán a matapos u netakda a pitto a aldew ay hed ti Pablo tu Templo. Netan siya hod nu Judio hide a taga-Asia. Kaya sinusutan de u makpal a tolay tu Templo a dakáppán de ti Pablo.#21:10-27 Basaán tu Gimet 11:28. 28Ipáppákhaw de, “Kalugaran me hide, tulungan moy kame! Iye a tolay u mágtatolduwán ti kontara tu bansa a Israel, kontara tu Kautusan ni Moises, sakay kontara tu templo, maskin hádya siya a dumemát. Nangkuyog pa siya ti Griego hide tu templo; dinangáttan na iye a banal a lugar.” 29(Konna hod u kinagi de dipo netan de a kaguman ni Pablo tu banuwan ti Trofimo a taga-Efeso. Inisip de a kinuyog siya ni Pablo tu disalad nu templo.) #21:29 Basaán tu Gimet 20:4. 30Kanya nagkagulo u tolay hide tu buo a Jerusalem, sakay bigla dálla a nagdemáttan u tolay hide tu templo para dakáppán de ti Pablo. Pákkadakáp de nikuna ay ginuyod de siya a paluwas sakay insiradu de a pagdaka u pintuwan nu templo. 31Bunuwán di dán nakwa ti Pablo, pero nabaheta nu pinuno nu sundalo nu Romano hide a nagkagulo ti buo a Jerusalem. 32Nangkuyog siya a agad ti sundalo sakay tu kapitan de hide, sakay gummággenan hide a paangay tu páppágyanan nu tolay hide. Pákketa de tu puno sakay tu sundalo hide ay inyemang de u págbabálbág de ni Pablo. 33Immadene u pinuno sakay dinakáp na ti Pablo, sakay pinapungo na ti duwwa a kadena. Sakay tinanung na u tolay hide, “Deya i tolayan iye? Ánya ginimet naay?” 34Pero awan pare-pareho u ipáppákhaw nu katolayan. Dipo magulo kaya awan maintendiyan nu pinuno ni ánya nangyariyay, kanya inpeangay na ti Pablo tu kampo. 35Sakay káddemát de tu agdenan ay inágkat dán nu sundalo hide ti Pablo dipo lalo dán a nagkagulo u tolay hide. 36Dipo umusoseg hide a magpapákhawán ti konna he, “Bunuwán siya!”

Inpagtanggul ni Pablo u Sadile na

37Nikuna isáddáp di dán ti Pablo tu kampo ay nákkekakagbi siya tu pinuno, “Maare taka a makauhon? Malalake kabál a magupos ti Griego!” Tábbeg nu pinuno.

38“Kagi ko ni hiko itod u Egipcio a nángdipalongo tu págribeldi sakay immangay hide tu kaparangan, kaguman na u áppat a libu a lállake.” 39Timmábbeg ti Pablo, “Essaák a Judio, dimmakállák ti Tarso nu Cilicia, tagahodák ti banuwanan itod a tanyag. Mákkekagbiyák niko a payaginák moy a makapagupos ti tolaye hide.” 40Pinakultaden be siya nu pinuno, kanya timmaknág ti Pablo sakay gimmemmak tu balitang nu agdenan sakay sininyasan na u tolay hide a tumahimik. Nikuna tahimik dán hide a atanan ay nagupos ti Pablo ti upos a Hebreo.

Currently Selected:

Gimet 21: MBJC

Highlight

Copy