YASFADOCI LOKU 8

1Chena ini biamikvtwi palocihi mviuhqrci, yasi srpwi brmfaci gryrukv udawanv macimi udawanafv, pami nvnvhi-miwa macimi pami biatvwiwa nili uwasi-biadrcimowanv ini Mvnatu ugimrwi-drmkumi uci, chena weci nili nihki matvhfwi-gita-neswi, 2chena nr-nakuti iqaki mviahci gegaho-fucki mvci-lahfihi uci macimi kvtunawanv : Male, Magitalenv yr-lofu, nileni uci mahci luhfaki neswvhfwi wvninah-feki, 3chena Joanv nili wewvli Kusrse u nosrcikvnvli Halade, chena Sosyanv, chena maci kutvkvki, nihgeni u wiahe-mwv uci gisrcihr-wvhi nihi.

4Chena ina maci mahsa-lagiki iah tapatwi bir-wrci, macimi nihki jrgi udawa uci udo-dfr-wrli nili, kvlvwi inv pamrtuwawa uci : 5Hinv ya-vhcigatv via wapf a wvhsi vhdoci u menkv : chena yasi inv vhdoci nrlatv ini pvkvcikvnv si panfanwi; macimi ini kvgalgota Irmagi ufici, chena nihki manqvtwi uci wisgi-luhfvki u jrkvdr-nrwv ini. 6Chena nrlatv usgici nili sekunvli si panfanwi; macimi yasi kulv ini frgigi, via svhta ini, xvga mvtv bonv-maiv ma-lamvwrgi. 7Chena nrlatv alaghi nihi grwihi si panfanwi; macimi nihki grweki weci sqinegeki ini, macimi u napwvsqahdo-nrwv ini. 8Chena nrlatv ini uwasi vsisgegi si panfanwi, chena sqineginwi, macimi ini neginwi mvwifowa tabawa-tfwaginwi, isiwa. Yasi yolumv wiahi iuci, ulrmuwa, Hinv ba-bonvkv utvwvgr-wvli wvhsi nodr-gaci, welrni inv nodrgata, isiwa.

9Chena u nvtuhdr-kuhi u kvgahgimrfhi yomv pamrtuwawa manvwvhi yagi. 10Macimi isiwa, Gelvwv si meliwapi wvhsi wrkutv-maqa nili girjelafewanv ini Mvnatu ugimrwi-drm-kumi uci : wakv nihki mvisi nrlatv pamrtuwawanv isi; wvhsi nihki pami naga-wrta manvwvhi bur namu-wrci, macimi pami nodrga-wrta nihki manvwvhi bur nanuhsa-wrci. 11Huwa ini pamrtuwawa vlv-yomv inwi : Hini menkv u kvlvwewa Mvnatu ini. 12Chena nalana ini pvkvckvnv nihgeni nihki mviahci nodrgacki; hina uwa biawv inv mvci-mvnatu, macimi u mvma ini kvlvwewa u tahi-wrgi uci, wvhsi nihki manvwvh’ bur da-pwahsa-wrci macimi wrpvnsi-wrci. 13Chena nala usgici nili sekunvli nihgeni nihki, iah mahci nodrga-wrci, utvhpanr-nrwv ini kvlvwewa weci uwasi-labwrwa; macimi iuhgoni mvtv u bonr-nrwv ujapkvhvtwi, nihki mr-lrqvsi dapwahsaki, macimi kulr lrqv myrsi-vshadewa-nagi via rgicfaki. 14Chena ini alagenv nihi gr-wihi yasi panfagi, iuhgoni nihki mviahci nodrgacki, macimi yala lfawrci yahr-wrci u gihgi-tuna-sgrku-nr-wv utvmafewanv chena pvwawanv chena wejagi-lvwewanv yomv lanvwawewa uci, macimi mvtv u tah biado-nr-wv mvwifowa mafafewa-nagi. 15Chena ini ini uwasi-vsisgegi, iuhgoni ya-laficki brsi dapvsvwigi macimi uwasi-tahawa-nagi u pami machi nodr-nrwv ini kvlvwewa, ud ryetvtanr-nrwv ini, macimi u biado-nrwv mvwifowa weci besi-tahawa.

16Chena mvtv ilani, iah mahci fvgifwrci netvwrkvnvli, u patvkwhrli nili bonvhfacikv, walr Irmitvhfv tfvni u tah bonrli nili; wakv usgici tvh nepvwilici u tah bonrli nili, wvhsi nihki ba-becfrcki manvwvh’ namu-wrci ini wvivhfayrgi. 17Xvga mvtv wiahi gigidota, wah bur ini tapinrqi-fanwi; walr mvtv wiahi gir-ciwi, wah bur ini pami wrkudota macimi wvivhfayrgi si biaiv. 18Gcitvwrfeku waciganvhi yasi nodrga-yaqa : xvga goqa-nafv-grci u bonv, henv wah melofu; macimi goqa-nafv-grci mvtv u bonv, henv wa huci mvmota datapilvhi ini inv ni bonv yasi tahaci.

19Chena ’n’tvsi utfakuhi u gali chena u janinvhi, macimi ud rlwi nvhekv si bialudr-kuhi xvga inv ya-fusgrtv uci. 20Macimi ini wetvmrqi, Gi giv macimi gi janinrki frgici nepvweki, ki pami mrtvwi nvugoki. 21Pvyaqv rpvfsa, luhkumv nihki ni giv macimi ni janinrki na-notvgiki ini u kvlvwewa Mvnatu, macimi ini si lvweki, u talvhi nihi.

22Huwa ini biamikvtwi nala tvh nakuti grsagiki, wvhsi ini ulvga-lagi lkvgi, welv macimi u kvgahgimrfhi; Hini grmagi wvyatvhqa ini msgaqi hrdrku, u talvhi nihi : macimi ini Ihuqeki nihki. 23Pvyaqv yala Ihuqi-wrci nabawv welv : chena ’n’tvsi biaiv msrwi mahsigikvgi usgi-tapia ini msgaqi; macimi nihki bami uqikvmilici napi, chena nvnvskvci ilafeki. 24Chena nihki u bialutvwr-wrli nili, macimi ut vmvchr-wrli, Mas tala, mastala, kit iqenvmipa cahi, isiwaki. Macimi inv vmvmu, chena u kutatv ini mahsigikvgi macimi ini bami gidawvfah-grgi ini napi : macimi nvgaskv nili, chena msi grmahkvwvnwi ’n’tvsi. 25Macimi Drniwa ki dapwahsawa-nwv? u talvhi. Chena dawvhi grwilvwaki nihki qvqahdrni-tahaki, Nafvwa uwa yrmv, yasi tabrtvgi weginrqi nili mah-sigikvki macimi ini napi chena u malunahdr-kunv nili? pami ideki nihki.

26Macimi nvhekv biathuqeki ini ut vsisge-mwv nihki Girlasenvki, grmagi ini Galalegi. 27Chena iah biaci vqvhsigi ini vsisgegi, utfagoli ’n’tvsi nr-nakuti ini udawa-nagi uci ’laneli, ba-bonrtv wvninahfihi; macimi sahkvmikv uci inv mvtv beta-niga betanikvnv, chena mvtv wegiwr-pagi dawv, betiga wakv nili nabowr-lvku. 28Chena inv iah nawrci Jesiseli, wivkvhotv-mwv, macimi svhgigi sfa ya-lvhfv-melici, chena ulrmi kvlvwa-wihsimu, Nahiwa ni bonv wvhsi Ivwe-malv, Jesise, gelv u Qihfvli inv Gci Mospi Mvnatu? gi nvnvhbrci-mala, tagi mvmyanrnhilu, isiwa. 29Xvga inv bami tapimrci nili wivgilahfeli wvhsi nili ilaneli uci biaci luhfr-lici. Xvga inv mosvgi-lrqv u mr-mvwinvcha-goli nili : chena gcitvwvhofu, macimi gjepifu uqrnhi chena fvgifida-pifowanv; macimi u pami pginrnv nili gjepifowanv, u ta lasgrgoli nili wv-ninahfeli ini Ir pvpsqvhgi. 30Chena Jesise u nvtuhtv-wrli, Na-hiwa gi tasifu? Mahsa-lakv, isiwa inv; xvga maci wvninahfihi udwrla-kuhi. 31Macimi niheni u nvnvhbrci-makuhi wvhsi bur tapimrci wvhsi ini wrsrlvqi buryr vhdagi ya-qrlvgigi si srwalici. 32Huwa ’n’tvsi vbeki na-kudwa-lagiki maci kusgoki bami wihfani-wrci wahsatagi ini maqvhgigi; macimi u nvnvhbrci-mrwrli nihki wvhsi welrni si melaku-wrci wvhsi udfrlr-wrci nihi kuskuhi. Macimi u melvhi welrni. 33Macimi nihki wvninahfeki nili ilaneli uci biaci luhfaki, chena udfr-wvhi nihi kuskuhi : macimi inv na-kudwa-lakv ini sahbrlvgigi ini msgaqi si brlvciptu, macimi nap-huqeki. 34Chena nihki ya-svmrcki nihi iah namu-wrci ini mviahci biamikvgi, usimoki, chena ini ud rtudr-nrwv ini udawa-nagi chena ini belasgi. 35Chena nihki luhfaki u mv’ wrpvdr-nrwv ini mviahci biamikvgi; chena udfr-wrli Jesiseli, macimi u mkvwr-wrli nili ilaneli, nihki wvninahfeki waci luhfr-wrci, bami lamvtvpi-lici, betanigali macimi u mvyrwi mamagini-tahrkv-neli nvhekv u fitvli Jesise : chena grwilvwaki jrivhki. 36Chena nihki na-na-magiki ini u wetvmvwr-wvhi nihi yasi inv ba-bonrtv wvninahfihi wrpvnasho-fuci. 37Macimi jrivhki nihki lanvwaki ini ut vsisge-mwrgi nihki Girlasenvki gryrukv uci u kucima-kuhi wvhsi nihi uci srwaci; xvga nihki u pami foginaku-nrwv msi grwilvwawa : chena ulvga-lagi lkvmwv, macimi patagi hawv. 38Wakv nili ilaneli waci luhfr-wrci nihki wvninahfeki u mvmrtuma-goli wvhsi manvwvhga weje-makuci : pvyaqv ud rmaskv-wrli. 39Patagi hrla ya-drivni wegiwv, macimi lfwrtutvnu yasi ini msi wiahi mahci ludolahgi Mvnatu, u talrli. Macimi inv wapfa ya-hrci u pami Ifwanv ini srpwi ini mafhega udawa yasi msi wiahi mahci ludrkuci Jesiseli.

40Chena yasi patagi birci Jesise, husilvwrla-kuhi nihi mahsa-lalici; xvga jrivhki nihki bami vhkvwrpvmr-wrci nili. 41Macimi wrpvmahku, ’n’tvsi biawv ilani Jarlvs’ sifu, macimi dabalacigatv inv ini msi-kvmikugi : chena svhgigi sfa nvhekv u fitvli Jesise, macimi u nvnvhbrci-mrli nili wvhsi becfrlici yadrci wegiwv; 42xvga u bonrli nakude-mahi u drnahfvli, nvwitu matvhfwi-gita-neswi tfwi gikvdo-weli, macimi inv bami napagi. Pvyaqv yasi inv nhrci nihi mahsa-lalici u gipusgr-kuhi.

43Chena iqawv bami bonvgi mskuwi-lugawa matvhfwi-gita-neswi gikvtu, naiahkv inv u mahci jrivhgi pvgita mahfalatvgi nr-nvtvuci-galici si, macimi ud rlwi gegaha-goli wiyafvli, 44biawv udrnrgi nili, chena u tah pahsanv ini tv npaniqrdagi u betanikv-nilici : macimi walanv ini u mskuwi-lugawa nvgikvhdo-dali. 45Chena Jesise Nafvwa inv ni pahsanaqv? isiwa. Macimi iah jrivhki girci-mulici, Betv, chena nihi ba-pvh wedfa-makuci, Mastala, cah nihki mahsa-lagiki gi fvgigahgr-goki macimi gi na-pusgr-goki, u talrli. 46Pvyaqv Jesise, Wiyafv svpkvhi ni pah-sanaqv; xvga ni mostu yasi wrsikvgi mahci neiv uci wapfa-yrgi, isiwa. 47Chena inv iqawv iah namagi yasi bur gigifuci, biawv pami pvpvwaskv, macimi pami svhgigi sfa ya-lvhfv-melici nili muhgrcimu ini ya-lvhfv-melici nihi jrivhki lanvwahi ini waci pahsanrci nili, macimi yasi walanv gegahofuci. 48Macimi, Udrn-fimv, gi dapwahsawa gi mahci mafafi-haku; nhrla grmrnelafewa-nagi, u talrli nili.

49Iahaiahi gawvgi kvlvwici, ’n’tvsi biali nakuti ya-drci wegiwv uci inv dabalacigatv ini msikvmikugi, Hinv gi drnahfv uwa vsanwv; tagi patfvghi inv Ga-gahgimiwa, isiwali. 50Pvyaqv Jesise pami nodrga ini, ud rpvftv-wrli nili, Tagi cihfafilu : da-pwahsalu pahi, macimi inv wah mafafihofu. 51Macimi ini wegiwv iah si birci, mvtv welrni si taha wvhsi nahcipa’ hilaneli weci becfr-makuci, waciwaphi Betvli, chena Jrneli, chena Jamseli, chena nili u fvli inv iqafv macimi u gali. 52Macimi bami wih-fvqa-wrci jrivhki, chena bami mvwimr-wrci nili : pvyaqv, Tagi wihfvqaku; xvga mvtv inv napwv, nabawv wakv, isiwa. 53Macimi u wivmasqi wrpvla-lamakuhi nihi, wrkutv-mahi yasi napalici nili. 54Pvyaqv welv u tah fvgilaja-nrli nili, wihkugamu, Iqafv, un-sgrlu isiwa. 55Macimi inv u cvjrlvhqvli patagi biali, chena unskv walanv : macimi tapigamu wvhsi wiahi wvh mecilici melofulici nili. 56Macimi inv iqafv u gahgirmhi qvqahdrni-tahahi : pvyaqv Jesise u tapimvhi nihi wvhsi tagi wetvmvwr-wrci ilaneli ini mviahci si lvwegi.

Currently Selected:

YASFADOCI LOKU 8: SJW

Highlight

Copy