YASFADOCI LOKU 21

1Chena spamagi Irpi, macimi u nawvhi nihi pvwawi ’lanihi bami ini munigr-nagi si becfa pvgitv-malici u daphadewa-nwv. 2Macimi u nawrli nr-nakuti gitamrfvli sekvwi-iqali bami npvgitv-malici neswi mrcqrfi-muni. 3Macimi, Dabwawa gi talapwv, Yrmv gitamrfv sekvwi-iqa vlikv laghi utah becfa-pvgitv notv nihki : 4xvga iuhkumv jrivhki ud rmafewa-nwv utah becfa-pvgidr-nrwv nili daphadewanv; wakv inv ut vgrwrfewa u becfa-pvgitv jrivhki ini waci lanvwawici ba-bonvgi, iwv.

5Chena yasi nrlatv rtutv-muwrci ini mvmrtumawi-kvmiqi, yasi ini wrwasihkvdodagi uwasi sekunhi macimi daphiwawa, 6Wakv vlv-nili wiahi na-nama-yaqv, nili grsagiki wah biaiv, ina mvtv wa cikunofu utvsi nakuti sekunv usgici kutvkvli, wvh bur svhgigi ipvgilofutv, isiwa. 7Chena u nvtuhdr-kuhi nihi, Ga-gahgimiwa, drniwa Irqv waciganvhi yolumv wiahi wa vhdawv? macimi nahiwa wa hinwi ini giginolowa ina yolumv wiahi uwa wesv biamikvga? u takuhi. 8Macimi, Gcitvwrfeku wvhsi bur gelvwv bemi-walofu-yaqv : xvga maci wah biaki ni wefowa-nagi, Nelv inv; macimi, Ini lrqv uwa nrnami biaiv, wa hiwvki : tagi nrwvlwi hrku nihki. 9Macimi ina gah nodrgapwv nochadewanv chena tvtvwrfewanv, tagi cihfafiku : xvga yolumv wiahi qelvhi wacitv biamikvtu nhihtv; pvyaqv ini jaiahqi mvtv walanv-wvkv-twi, isiwa.

10Huwa ina, Nakudwa-lanv si lanvwa wah pvfaqicfvtv-wrli nakudwa-lanv si lanvwali, macimi ugmrwi-drmqa u mvwinvctu ugimrwi-drmqa : 11chena ’n’tvsi wa vhdawv mvgi vsisgi-nomasgr-wvli, chena cvjapi tvsi sqrlvwrfewanv macimi matanadewa-ipan-awanv; macimi kupanawanv wa vhdawv chena mvgi giginolowa-nv wafapvh-kvmigigi uci. 12Pvyaqv wihsi-bur jrivhki yolumv wiahi igi, gah masana-kuwrki nihki, macimi gah nrnuhgrcha-kuwrki, nili msi-kvmiku chena giphudewi-grnv gah si pvgfana-kuwrki, yalvhfvmelici mvgi ugimvhi macimi kvpanvlihi gah si biala-kuwrki xvga ni wefowa uci. 13Gelvwv ini wah si kutaqi luhfaiv wvhsi dabwawani-yaqa. 14Macfadoku waciganv’ hini ki tahiwrgi wvhsi bur kvisv mamagini-taha-yaqa wvhisi rpvfsa-yaqa : 15xvga gah melalapwv udoni macimi laburwa, wv hrlwi ilafihtv-muwrci jrivhki ki mvdaladewa-nwrki walr nvnvhkutv-muwrci. 16Wakv gah masdruhakuwrki weginrqi gahgirmvki, chena ujaninrki, chena nhvlwaladewanvki, chena wihgrnimrki; macimi nrlatv nihi gelvwv wvhsi nabowa-nagi si bonofulici wa ipanvlrwvhi nihki. 17Chena gah segalamakufipwv gelvwv yacsiwrci jrivhki ilaneki xvga ni wefowa uci. 18Macimi mvtv nakuti gelahfwv wa iqinaiv. 19Ki besi-tahawa-nwrgi ga huci vnhiwapwv kita lanvwawewa-nwv.

20Pvyaqv ina gelvwv namayaqa Culosalame gipuskvmu-wrta svmrkvnvki, ina uwa wrkutv-muku yasi u seqvhkvmigifewa nrnami biayrgi. 21Huwa ina welrni nihki Cudiagi yapicki nili maqvhgiki lasimuwrta; macimi nihki ini alagenv nili yapicki welrni luhfrwrta; macimi nihki ini belasgi drmqa yapicki tagi welrni becfrwrta ’n’tvsi. 22Xvga yolumv-iu vlutvmowa si grsagiki, wvhsi jrivhki wiahi yalvwigaki manvwvhi uqrufado-dagi, 23Mvci-labwrwa-neki cahi nihki la-lrmudrkucki vpaluhfa-fvli macimi nihki nanonhiwacki nala grsagiki ! xvga ini usgi-drmqa wa vhdawi msi qelvhsi-tahawa, macimi gisfaqewa yrmv lanvwa si. 24Chena nihki ini waci kvsqagi ini gisghikv wa huci rgicfaki, macimi nihi jrivhki tfwalanv si lanvwahi wah si gegani-kvni fvginrbirlofoki nihki : macimi Culosalame svhgigi wah si kvgalgrnrwv nihki Nvnvhkvwi-laneki, brluhi uta lrqrfewanwv nihki Nvnvhkvwi-laneki wa uqrufadota.

25Chena ’n’tvsi wa vhdawv giginolowanv gesagi-gesfugi chena tapahgi-gesfugi macimi vlrkugi; macimi ini usgi-drmqa u qelvhsi tahawa-nwv jrgisi lanvwaki, wvnfunawafi xvga ini bami nana-qrnwigi ini msi-napi macimi nili ma-mvgi-bokvki : 26ilane-ki pku-nrpvtv-moki kupanawa, xvga macimi vhkvwrfeki nili wiahi bami biayrki ini yalakuqvh-kvmigigi : xvga nili manqvtu uci wrsikvki wah nomanota. 27Macimi ina uwa nihki wah nawr-wrli nili u Qihfvli ilani brfqvhgegi pami biali gilagi wrsikvgi macimi msi wvhfrci-makufewa. 28Pvyaqv ina yolumv wiahi vlami biamikvga, lamvtqalaku, macimi spamagi lrpiku; xvga ki patagi-nofowa-nwv nrnami biaiv, u talvhi nihi.

29Chena u kvlolvhi nihi pamrtuwawa : Wrpvtvmuku ini gicimesi, macimi jrivhki nili mtaku : 30ina nili uwa ia huluwiki, ki namanrwv ini macimi ki wrkudrnrwv nahvlwrkv gelvwv yasi ini balrwigi uwa mrlrqrmafeyrgi. 31Datapilvhi yone nahfrpi gelvwv, ina namayaqa yolumv wiahi pami biamikvga, wrkutvmu-ku yasi ini ugimrwi-drmkumi Mvnatu uwa mrlrqrmafeyrgi. 32Tapilo gi talapwv nelv, yrmv inugi sqelanvwa mvtv wa hvsanwv, brluhi wah jaiahqi macdota jrivhki wiahi. 33Manqvtu macimi vsisgi wa hvsanu : wakv ni kvlvwewanv mvtv wa hvsanu.

34Pvyaqv gcitvwrfeku geyrwrgi, belapa ki tahiwv ufrmi-lrqeiv ufrmgrqewa, chena wvnafowa macimi yomv lanvwawewa si utvmafewa, macimi gikvmoci brsi nvqrkv k’utfakunrwv vlvina grsagigi : 35xvga ini yone wah si utfakuwrci nihki jrivhki ini usgi-drmqa yadrcki mafhega ini vsisgi. 36Wakv gcitvwrpvtv-muku jrgi bami Irqawanigi, usdoku nvnvhbrcigamowa, wvhsi manvwvhi gelvwv kvtvwasitv-maqa yolumv jrivhki wiahi wvh biamikvki, macimi wvhsi nepvwi-yaqa yalvhfvmeci inv u Qihfvli ilani, hvvpi.

37Chena tfana grsagigi pami kvgahgimiwa ini mvmrtuma-wi-kvmikugi : macimi tfana tapahgigi lr-luhfa chena ini yrsi gigahsi maqvhgigi Vlifiat sidota. 38Macimi jrivhki nihi lanvwahi ini yakulvhwhrpvgi u wv-utfakuhi ini mvmrtumawi-kvmikugi, wvhsi no-drkuci.

Currently Selected:

YASFADOCI LOKU 21: SJW

Highlight

Copy