YASFADOCI LOKU 14

1Chena ini biamikvtwi, ini iah si becfrci wegiwv yadrci nakuti nihki dabalamrcki nihi Palasihi tv hvlwrkvhsi gesagigi wvhsi mecici tvkuwhv, yasi nihki bami gcitv-wrpvmr-wrci. 2Chena wrpvmahku, ’n’tvsi yalvhfvmeci vbeli nr-nakuti ilaneli ba-bonvmalici napiwi-lugawa. 3Chena bami rpvfsaci Jesise macimi u kvlolvhi nihi lvivhi chena Palasihi, Hv mvyrwvtwi ini kutala-dewa-nagi wvhsi gegahiwagi ini tv hvlwrkvhsi gesagigi, walr tuga mvtv? bami iuci. 4Pvyaqv mvtv wia’ hiwvki nihki. Chena utvh-panrli nili, macimi u gegahrli, chena u pvgfanrli. 5Macimi, Drnvwa inv gelvwv wah bonrli jagefvli walr rxineli tgikvme-wr-lvkugi si pansinoli, chena mvtv walanv wa kuqitvpilrli nili tv hvlwrkvhsi gesagigi? u talvhi nihi. 6Chena nuhgi nihki ud rlwi rpvfdr-nrwv yolumv wiahi.

7Chena u kvlolvhi pamrtuwawa naha ya-lanofulici, iah gci-yasi nihi maginv-malici nili vliwi yaki vpvbewanv; bami ilrci nihi, 8Hina gelv wiyafv ilani wechadewi wihfancigawa si vlanah-ga, tagi lamvtvpilu ini vliwi yagi vpvbewa-nagi; belaba qanv vlikv utvgalamaqi ’laneli notv gelv ut vlanrli inv, 9macimi inv ya-lanahkv gelv chena nili wah biaki macimi, Meli yrmv ilani mrtvsi, ga hiqv; chena ina uwa gelv ga hvlami-lvwi gilagi wiv-nrdewa wvhsi mvmaivni ini gci-mrlaspihi tvsi. 10Wakv ma gelv vlano-fuivna, nhrla macimi lamvtvpilu ini gci-mrlaspihi tvsi : wvhsi ina inv mviahci vlanahkv birta, Wihgrnimv, vlikv lspi hrla, manvwv’ hilahgi : hina uwa gelv gah bonv wvhfrci-makufewa ini ut vbe-wanwrgi jrivhki wa-wetvbemahkv tvh wihfanigi. 11Xvga jrgi wiyafv ma-mosba-lamaqidotv weiv wah nvnvhbrci-maqhofu; macimi inv na-nvnvhbrci-maqdotv weiv wah mosba-lamaqhofu.

12Chena u talrli nili nahfrpi mviahci vlanakuci, Hina gelv usdoivna tanvlewa walr svbrwa, tagi utvhpimi gihgrnvki, walr gi janinrki, walr gi nhvlwalacikvni-laneki, walr pvwawi mr-biaci-grladewanvki; belaba nayola nahfrpi nihki ki hvlanagogi rsuwa, macimi patagfadwrdewa ga husdrgopi. 13Wakv ina gelv usdo-ivna wihfancigawa vlani inv gitamrfv, inv ma-myrlvkvtuwitv, inv mvmyrlvgigrtv, inv gagabeqatv : 14macimi gah gisrda-lamakufi gelv; xvga nihki mvtv u bonr-nrwv wvhuci jajasi patagfatvwahgi gelv : xvga gah patagfadr-gopi gelv ina ini ud rpafewi-unsgrwa-nagi inv da-pvsvwelafitv.

15Chena ina nakuti nihi wa-wetvbe-makuci tvh wihfanigi u nodrnv yolumv wiahi, Gisrda-lamakufi ca hinv wvh-mecitv tvku-whv betiga ugimrwi-drmkumi Mvnatu, u tagoli nili. 16Hu talrli pvyaqv, Nr-nakuti ilani u mactu msi svbrwa; chena maci ut vla-nvhi : 17chena u talaskv-wrli ut vlolrkvnvli tvh svbrwigi Irqv wvhsi Birku; xvga uwa jrivhki wiahi macfanwi, ilrci nihi ya-lanofulici. 18Macimi nihki jrivhki nakudwasi ut vlami usdo-nrwv pvgfanofowa. Nili nhihtv, Ni mahci tapanv gtikv, macimi ni qelrlafi ni nahv macimi nama ini; gi mvmrtuma-la nah pvgfanagopi, u tagoli. 19Chena nuhgi kutvkvli, Ni mahci tapanrki nyrlvnwi fvgiqahikv rxineki, macimi ni nahv wvhsi nvkvci-lutv-wvki; gi mvmrtumala nah pvgfana-gopi, iwvli. 20Chena nuhgi kutvkvli, Ni mahci usilatv wewv, macimi waciganvhi na hrlwi bir, hiwvli. 21Chena inv vlolrkv biawv, macimi u wetvmv-wrli yolumv wiahi dabalamakuci. Hina uwa inv ini wegiwv uci mastala, dawvhi wivkuwa, Nili si luhfrlu wawatapi udawani-myawanv macimi myawa-nafv ini udawa-nagi, chena utvhfv si biasi inv gitamrfv chena ma-myrlvkvtuwitv chena gagabeqatv chena mvmyrlvgigrtv, u talrli ut vlolrkvnvli. 22Ma-cimi inv vlolrkv, Dabalamiwatv, mahci ludota ini da-pigamuivni, macimi gawvgi tvwrwi ’n’tvsi, iwv. 23Chena inv dabalamiwatv, Nili si luhfrlu mvgi-myawvli macimi vpvsi-wvghowanv, chena mvmelowih-kvwi wvhsi biaci becfrwrci, wvhsi yadriv wegiwv uqihfado-dagi, u talrli nili vlolrkv-nvli. 24Xvga gi talapwv nelv, mvtv nakuti nahga ya-lanofucki ilaneki wah pahsvtv ni svbrwa.

25Huwa ’n’tvsi u wedamakuhi maci mahsalalici : chena kugewv, macimi u talvhi nihi, 26Qahqi wiyafv ilani bialutvwita, macimi mvtv u segalamrli nahvhvrkv u fvli chena u gali, chena wewvli, chena ut vpaluhfamhi, chena u janinvhi, chena u tiqamhi, hvnkv, macimi nahvlwrkv u ta lanvwawewa nahfrpi, mvtv-yaciwi inv nitv hu kvgahgimrfimi. 27Goqa-nafv-grci mvtv upvh nema nahvlwrkv ud rsitahfagemi, macimi ni biaci nakvlaqv, mvtv-yaciwi nitv hu kvgahgimrfimi. 28Xvga drnvwa inv gelvwv, bami mrtvwi upvta-nvgi tvwada-wikv, mvtv nhihtv iv lamvtvpiwv macimi ut vgitv ini ya-lalamakugi, qahqituga u bonv wv huci macdoci ini? 29Belaba nayola ina mahtvh-gahfadota vhpvnvh-gahfacikv, macimi ud rlwi mahci-lutv, jrivhki ya-lrpvcigacki ut vlami wrpvlalamr-wrli nili, 30Yrmv lani vlami upvtaniga, macimi ud rlwi mahci-lutv, iwvki. 31Walr drnvwa msi-ugimv, yasi inv mvwinawhrci kutvkvli msi-ugimrli nochadewa-nagi, hv mvtv nhihtv wah lamvtvpi macimi u mvma tapuwawa qahqituga dabe-lafi inv weci matvhfana-matvhfana tabawa wvhsi nvxgrde-mrci nili ma-winahukuci gilagi neswrpitvgi-tfana matvhfana tabawa? 32Walrga, haiahi gawvgi paluwi vpilici, u tasfvtu macici-gam-owa, macimi nvtutv-mrga wv sfadofuci grmrnelafewa. 33Yone yagi waciganvhi inv goqa-nafv-grci vpiwv gelvwv buryr pvgida-latvkv jrivhgi ini ba-bonvgi, mvtv-yaciwi inv nitv hu kvgahgimr-fimi. 34Napipami waciganvhi uwasv : pvyaqv qahqi weginrqi ini napipami vsaga ya-puqvgi, drniwa wa huci ini ipuqvnwih-dota? 35Mvtv ini vsisgegi si uwasv ini mvtv nuhgi ini yr-qvdagi-mowi : ilaneki u pvgidr-nrwv ini. Hinv ba-bonvkv u tvwvgrwvli wvhsi nodrgaci, welrni inv nodrgata.

Currently Selected:

YASFADOCI LOKU 14: SJW

Highlight

Copy