YASFADOCI LOKU 11

1Chena ini biamikvtwi, yasi pami mvmrtumaci nr-nakuti tvsi, yasi ina tfwi-lvweci, nakuti u kvgahgimrfhi, Dabalamiwatv, kvgahgimi-nrga wvhsi mvmrtuma-yrga, datapilvhi yasi Jrne nahfrpi kvgahgimrci u kvgahgimrfhi, u tagoli. 2Macimi Ina mvmrtumr-yaqa, Ufimv, Gisrciwi cahi gi wefowa. Gi u gimr-wewa biaiv. 3Meli-nrga tfana grsagigi ni tvkuwhrna-manv tfana wrpvgi. 4Chena pvgfalatvmvwi-nrga ni mvjelafewa-nanv; xvga nahfrpi nelvwa ni pvgfalatvmv-wrpa jrgi wiyafv ma-mosinawhiv-matv. Chena tagi myrsi-vshadewa-nagi si biasi-nrga, iuku u talvhi.

5Chena u talvhi nihi, Nafvwa gelvwv wah bonrli wihgrni-mrli, macimi nili wa hawv lrwi tapahgiga, chena Wihgrnimv, hvuhilu nfwi wapsqadawvli; 6xvga brmrmewa ni uci utfaqv nihgrnv, macimi mvtv-wiahi ni bonv ya-lvhfvmeci wvhsi pvgfanvmv-wvgi, wa hilrli; 7macimi nili betiga wa huci rpvfsali, Tagi patfvghilu : ini sqrta uwa gibhota, macimi nit vpaluhfa-mvki tfvnagi ni wihbama-goki; mvtv yaciwi nitv hunskv macimi melala? wa hiwvli. 8Gi talapwv nelv, Waghi inv mvtv wa hunskv macimi melrli nili xvga wihgrnvli, wakv wa hunskv inv xvga yagcigrdewa-nilici uci, macimi wah melrli tfwi ya-grwrtv-malici nili. 9Chena gi talapwv nelv, Nvtutvmuku, macimi gah melagopwv ini; nvtunahigaku, macimi ga mkvhfu-pwv; detuwvthvmuku, macimi gah tvwanv-mrgopwv ini. 10Xvga jrgi wiyafv na-tutvkv utvtaniga; chena inv na-tunahvkv mkvhfu; macimi inv da-tuwvt-hvkv wah tvwanv-mrqi ini. 11Chena nafvwa gelvwv wa-ufimr-witv u qihfvli wah nvtutv-mali wapsqadagi, macimi sekunvli u melrli nili? walr nvmahfvli, macimi mvnadoli u nvmahfiwi melrli nili? 12Walr qahqi nili owrwi wah nvtutv-mali, hv inv ga-kvhkvsrpi-lajalici wah melrli nili? 13Qahqi gelvwv waciganvhi, waghi ki mvjelafipwv, ki wrkudrnrwv wvhsi melaqa uwasi daphadewanv kit vpaluhfam-wrki, drniwa laghi si vlikv ufapi k’Uhfwv wah si melvhi nili Ufapi Ucvjrlvhqvli nihi na-tutvmrkuci?

14Chena bami luhfa-pvgilrci wvninahfeli ga-gapituna-lici. Macimi ini biamikvtwi, iah luhfrlici nili wvninahfeli inv gagapi-lani kvlvwi; macimi nihki mahsalagiki qvqahdrni tahaki. 15Pvyaqv nrlatv nihki, Pialsepvleli nili ugimr-osrkvn-wrli nihki wvninahfeki uci kvtvwi luhfa-pvgilvhi wvninahfihi, iwvki. 16Chena kutvkhi, u pami kucihakuhi, u nvtunamr-kuhi wafapvh-kvmigigi uci giginolowa. 17Pvyaqv inv, wrkutv-mwv u tasi tahawa-nilici, Jrgi ugimrwewa pvhfanadeiv lekvtvh-kvmigifewa-nagi si biadota; macimi wegiwv wegiwr-pagi si pvhfahkv rgicifaiv, utalvhi nihi. 18Chena qahqi Satane nahfrpi pvhfana-tita weiv, nahiwa wahsi nepvweiv u gimrwewa? xvga ki taiupwv gelvwv yasi nelv Pialsepvle uci kvtvwi luhfa-pvgilvki wvninah-feki. 19Chena qahqi nelv Pialsepvle uci kvtvwi luhfa-pvgilvga wvninahfeki, nafvliwa ki qihfwrki uci kvtvwi luhfa-pvgilr-wvhi nihi? waciganvhi nihgeni ga hu dapvhkuwa-mipwv. 20Wakv qahqi nelv nili u lajali Mvnatu uci kvtvwi luhfa-pvgilvga wvninahfeki, huwa galv ini u gimrwi-drmkumi Mvnatu usgici gelvwv si biaiv. 21Hinv wesigi-lani iah uqrwi si u mtaqrpici u gcitvwvhtu nahvlwrkv ya-tvsiwaci, u nvwicikv grmrni vdali : 22Pvyaqv ina vlikv wrsikvtu-wilici notv welv wah bialudr-goli, macimi ut vlisgrgoli, u mvmrgoli nili malsga u mtaqrbewa ma-mfalatvgi, chena pvpvh-fanv-mali u seqitvhfowa. 23Hinv ba-bur weje-mitv ni ppahta-naqv; macimi inv ba-bur weci mrwvtuniga-mitv lfwaniga. 24Hinv wivgilahfi ia hinv luhfrci nili ilaneli uci, srpwi pamfa tvivh bur lrqvsi napiwigi, u pami nvtunahv vlwrkvhsewa, macimi mvtv Irqv u mkv, Patagi nah si kutaqi ya-driv wegiwv waci luhfriv, yr-iwvpi. 25Chena iah bird, u mkv ini jekvdhota macimi wrwasihdota. 26Hina uwa nhawv inv, macimi u mvmvhi weyrgi neswvhfwi kutvkhi ilafewanhi vlikv mvjelafihi notv welv; chena nihki becfaki macimi ’n’tvsi daki : chena ini jaiahqi u ta lafewa inv ilani vlikv mvjrfi notv ini wasgi.

27Chena ini biamikvtwi, yasi iuci yolumv wiahi, nrnakuti iqawv nili mahsa-lalici uci upvhotvmwv, chena, Gisrciwi cahi ini Irmvdrkv ba-pvhkvsanaku-ivni, macimi nihki ulanyaki nanona-ivni, u tagoli. 28Pvyaqv, Hvnkv grjekv, gisrciweki nihki na-notvgiki ini u kvlvwewa Mvnatu macimi u gjetunr-nrwv ini, isiwa.

29Chena nihi mahsa-lalici iah pami rnrwvtusgr-makuci, vlami iwv, Yomv inugi sqewa mvjrfi sqelanvwawewa : giginolowa si nvtunahi-gaiv; chena mvtv giginolowa ini wah si meliwapi ini Jonv u giginolowa wakv. 30Xvga datapilvhi yasi Jonv gi-ginolowa-fihtv-wrci nihi Nanifvhi, yone nahfrpi wah si inv u Qihfvl ilani ilafihtvgi inugi yomv sqelanvwawewa. 31Hinv ugimrwi-iqa ini yalrwvhqagi wa huci pvfaqi ini jaiahqvh-kuwawa-nagi gilagi nihi yomv inugi sqelanvwawewa uci ’lanihi, macimi inv nihi wah myrlvhkuwr-lvhi : xvga inv ini yaqvhkvmi-gigi ini vsisgi-drmqa uci biawv wvhsi notvgi ini u laburwa Svlvmvne; macimi wrpvmahku, vlikv mselafi notv Svlvmvne utvsi vpiwv. 32Nihki Nanifv uci ’laneki wah pvfaqeki ini jaiahqvh-kuwawa-nagi gilagi yomv inugi sqelanvwawewa, macimi wah myrlvh-kuwrdr-hrwv ini : xvga nihki mvtveni si tahaki ini tvh pami nvnvhimi-walici Jonvli; chena wrpvmahku, vlikv mselafi notv Jonv utvsi vpiwv.

33Mvtv ilani iah mahci fvgfwrci netvwrkvnvli, Irmvhgigr-nagi u tasi bonrli nili, walr mvtv Irmagi ini pusili, ini usgici tvh nepvwilici wakv, wvhsi nihki ba-becfrcki manvwvh’ namu-wrci ini wvivhfayrgi. 34Hu netvwrkvni geiv ini gi sgesaqi : ia hufabirgi gi sgesaqi, nahfrpi malsga geiv uqihfanwi wvivhfayrgi; wakv ini iah mvjrfigi, nahfrpi uqihfanwi geiv bapagijrgi. 35Wrpvtvnu waciganvhi qahqi tuga ini wvivhfayrgi geyrgi ya-dagi mvtv bapagijrgi inwi. 36Qahqi waciganvhi malsga geiv uqihfaga wvivhfayrgi, bonvma mvtv mrlaghi papagicv, inv wah mafhega uqihfanwi wvivhfayrgi, brsi inv netwrkv u pami wvhfa-figawa melahgi geiv wvivhfayrgi.

37Huwa yasi kvlvwici, Palaseli u kuci-magoli wvhsi wih-pumakuci : chena becfa, macimi lamvtvpi wvhsi wihfanici. 38Chena inv Palase qvqahdrni taha iah namagi ini, yasi bur nhihtv nili mahci ulalwelici wihsi-bur wihfanilici. 39Macimi inv Dabalamiwatv, Huwa gelvwv nihki Palaseki ki fvfvyrghrwv ini frgici wiyatvhqa inv taphikv chena ini saswilrkv; wakv Irmagi laghi gelvwv uqihfanwi seqidowafewa macimi wvnrtafewa, u talrli nili. 40Gelvwv wvnihsvgrki, mvkhv mvtv inv mviacdotv ini frgici wiyatvhqa nahfrpi ustu ini betiga wiyatvhqa? 41Wakv gitaminrqi meliwaku nala wiahi betiga ya-daki; macimi wrpvtv-muku, jrivhki wiahi fvfvyrgiv gelvwv si.

42Pvyaqv mvci-labwrwa cahi gelvwv Palaseki ! xvga ki dax-hrnrwv msawa-wvsqi chena luwvsqi macimi jrgi menkv-wvsqi, chena kit vlwihgrdr-nrwv dapvsvugi macimi ini ut vhqalamiwawa Mvnatu : wakv yoloni qelvhi-iu inwi wvhsi naiahkv mahci lutv-maqa, macimi tagi nvkvtvmuku ini kutvgi mvtv mahci ludota. 43Mvci-labwrwa cahi gelvwv Palaseki ! xvga ki manwaladr-nrwv nili vliwesi vhpvbewanv betiga nili msi-kvmiku, macimi nili usilvwrladewanv betiga nili yrtvh wewedgegi. 44Mvci-labwrwa cahi gelvwv ! xvga brsi nili nabowr-lvku gelvwv ya-lafi-yaqa mvtv tapi-nrqvtu nili, macimi nihki ilaneki ya-lwihgrtvgiki nili mvtv u wrkudr-nrwv ini.

45Chena nakuti nihki lvivki pami rpvfsa, Ga-gahgimiwa, yomv bami iuivni gi mvci-mipa nahfrpi, u tagoli. 46Macimi Mvci-labwrwa cahi gelvwv lvivki nahfrpi ! xvga ki wewvshr-wrki ilaneki wewvsewanv vhqvtu wvhsi nvyodaki, macimi gelvwv mvtv nahvlwrkv nakuti ki lajafwv ki tv huci pahsanr-nrwv nili wewvsewanv, isiwa. 47Mvci-labwrwa cahi gelvwv ! xvga gelvwv ki ustvwr-wrki nabowr-lvku nihki mrmosigesqacki, macimi k’uhfwrki u nfrwvhi nihi. 48Jrlvini gelvwv dabwawanvki macimi ki nkudr-nrwv nili u pakvtafewa-nwv k’uhfwrki : xvga nihki u nfrwvhi nihi, macimi gelvwv ki ustvwr-wrki u nabowr-lvku-mwv. 49Waciganvhi iyoiv nahfrpi ini u laburwa Mvnatu, Ni nah laskvmv-wrki mrmosigesqalici macimi apvstvlihi; chena nrlatv nihi wa nfrwvhi nihki macimi wah nrnuhgrchr-wvhi; 50wvhsi ini u mskumwv jrivhki nihki mrmosigesqacki, fa-feghodagi ina vlamvhgah-fanwi ini ya-lakuqvh-kvmigigi uci, manvwvh brbiaci lalatvmv-waci yrmv inugi sqelanvwa; 51ini u mskumi Apvle uci brlu’ hini u mskumi Sakulriv, ya-iqinatv lvlvqi ini botafvmrcikv chena ini ufapi-kvmiqi : hvnkv, gi talapwv nelv, ini brbiaci wah lalatv-mrqi yrmv inugi sqelanvwa. 52Mvci-labwrwa cahi gelvwv lvivki ! xvga kid rmwado-nrwv laburwawi tvwana-hikv : mvtv ki becfrpwv gelvwv, macimi k’utvmhr-wrki nihki bami becfrcki.

53Chena ini ia huci biaci luhfrci, nihi yr-ivwigalici chena nihi Palasihi ut vlami wivkuwawi fvgigahgr-kuhi, wesv gisfakuhi wvhsi maci wiahi si kvlvwici; 54u pami vhkunahu-kuhi, wvhsi pathvdrkuci wiahi u donagi uci.

Currently Selected:

YASFADOCI LOKU 11: SJW

Highlight

Copy