YA-SFADOCI JRNE 14

1Tagi welrni ki tahiwv wih patfvgifeiv : dapwahsaku Mvna-tu, dapwahsaku nahfrpi nelv. 2Betiga u wegiwrpagi n’ Uhfv vhdawv maci yrdrki; qahqi bur yone iga ini, naiahkv gih wetv-molapwv; xvga ni nitv gi mvwi tvsi nvnvhi-lutvmolapwv gelvwv. 3Macimi qahqi nhriv chena nvnvhi-lutvmolvku tvsi, nah bir nuhgi, macimi nelv gah si utvhpanalapwv; wvhsi tv hvpiv nelv, ntvsi manvwv’ hvpiyaqa nahfrpi. 4Chena iahriv, ki wrkudrnrwv gelvwv ini wvyaci. 5Dabalamiwatv, mvtv ni wrkudrpa iahrivni; nahiwa ni tasi wrkudrpa ini wvyaci? u talrli Drmuse. 6Neiv ini wvyaci, chena ini dabwawa, macimi ini lanvwawewa : mvtv wiyafv nili Ufimrli si biawv, wakv srpwi nelv, u talrli Jesise. 7Qahqi gelvwv naiahkv wrkumiyaqa nelv, naiahkv kih wrkumrwv n’ Uhfv nahfrpi : yoci inugi ki wrkumrwv inv, macimi ki mahci nawrwv. 8Dabalamiwatv, wrpvtasinrga inv Ufimv, macimi ini nah dabalamupa, u talrli Filvbe. 9Hv yone si sahkvmikv gi mahci weci vbemalapwv, chena hv mvtv gi wrkumi, Filvbe? inv mviahci nawitv u mahci nawrli nili Ufimrli; nahiwa gi tasi, Wrpvtasinrga inv Ufimv? iu, u talrli Jesise. 10Hv mvtv gelv gi dapwahsa yasi inv Ufimv weyrgi vpiv, macimi inv Ufimv neyrgi? nili kvlvwewa-nv ya-lalvku gelvwv mvtv ni kvlvwi neiv uci : wakv inv Ufimv bami vpici neyrgi u pakvtafewanv silvwi. 11Dapwahtvwilu yasi nelv inv Ufimv weyrgi vpiv, macimi inv Ufimv neyrgi : walr ga dapwahtvwilu kvpahi muhci nili tapilo pakvtafewanv uci. 12Tapilo, tapilo, gi talapwv nelv, Inv da-dapwahsatv nelv, nili pakvtafewanv ya-silvweiv wah silvwi nahfrpi; macimi vlikvsi pakvtafewanv notv yolumv wah silvwi; xvga nelv inv Ufimv nitv.

13Chena goqa-nahi-grci gab nvtudrnrwv ni wefowa-nagi, ini wah silvweiv, wvhsi inv Ufimv manvwvhi wvhfrci-makufihofuci weyrgi inv Uqihfimv. 14Qahqi gelvwv gah nvtudrnrwv wiahi ni wefowa-nagi, ini wah silvweiv. 15Qahqi gelvwv vhqalamiyaqa, ga gjetunrnrwv ni tapigamowanv. 16Chena nah kucimv inv Ufimv macimi inv gah melakuwv nuhgi nakuti Manwitahadewan-vli, wvhsi manvwv’ hinv weci vbemalwrqa goqa-lrqvsi, 17data-pilv’ hinv dabwawa si Ucvjrlvhqv : yrlwi utvhpanrci inv yala-kuqvh-kvmigigi; xvga mvtv inv u wrkumrli : gelvwv ki wrkumr-wv inv; xvga inv ki weci vbemakuwv gelvwv, macimi wa hvpiwv geyrwrgi. 18Mvtv nvndrgi gah si nvkvlalapwv : gah bialudolapwv nelv. 19Gawvgi frbemahi, macimi inv yalakuqvh-kvmigigi ni talrpvmaqv mvtv gidani; gelvwv wakv ki talrpvmipwv : xvga ni ta lanvwawi, macimi nahfrpi gelvwv gah lanvwawipwv. 20Hina ini grsagigi gah wrkudrnrwv yasi nelv weyrgi n’ Uhfv vpiv, macimi gelvwv neyrgi, chena nelv geyrwrgi. 21Hinv ba-bonvkv ni tapigamowanv, macimi u gjetunrnv nili, hinv inv ya-vhqalamitv : chena inv ya-vhqalamitv wa hvhqalama-goli n’ Uhfvli, macimi nelv na hvhqalamv inv, macimi nah tapinvukufatvwv neiv inv. 22Dabalamiwatv, nahiwa biamikvtwi wvhsi geiv tapinvukufatv-wi-yrga nelvwa, chena mvtv inv yalakuqvh-kvmigigi? u talrli Jotvse (mvtv Isgalade). 23Hrpvfsa Jesise macimi, Qahqi ilani vhqalamita, wa gjetunv ni kvlvwewa : macimi n’ Uhfv wa hvhqa-lamrli nili, chena nelvwa nah bialutvwrpa inv, macimi na husdopa ya-dryrga gilagi inv. 24Hinv ba-bur vhqalamitv mvtv u gjetunr-nv ni kvlvwewanv : chena ini kvlvwewa na-notvmaqa gelvwv mvtv nelv ini, wakv inv Ufimv welv wa-wrwenaskvwitv, u talrli.

25Gi mahci kvlolalapwv yolumv wiahi, iahaiahi gawvgi weciwiv gelvwv. 26Wakv inv Manwitahadewanv, datapilv’ hinv Ufapi Ucvjrlvhqv, nileni inv Ufimv wah wrwenaskvwrli ni wefowa-nagi, gah kvgahgimakuwv inv jrivhki wiahi, macimi ki mkvwasitahawa-nwvgi gah si biadrkuwv jrivhki ya-lalvku nelv. 27Grmrnelafewa gi nvkvtvmolapwv; ni grmrnelafewa gi melala-pwv : mvtv inv yalakuqvh-kvmigigi yasi meliwaci gi tasi melala-pwv. Tagi welrni ki tahiwv wih patfvgifeiv, tagi nuhgi welrni ini kupanaiv. 28Ki nodrnrwv ya-lalvku, Nih wapfa, macimi gah bialudolapwv. Qahqi vhqalamiyaqa, naiahkv ki husvsilabwrpwv, xvga inv Ufimv nitv : xvga inv Ufimv vlikv ilafi notv nelv. 29Chena uwa gi mahci wetvmolapwv wihsi-bur ini biamikvgi, wvhsi, ina ini biarnikvga, manvwvhi gelvwv dapwahsayaqa. 30Mvtv gidani macilaghi gah si kvlolalapwv, xvga inv ini yalakuqvh-kvmigigi ugimv-udosrkv biawv : macimi inv mvtv-wiahi u bonv neyrgi; 31wakv wvhsi inv yalakuqvh-kvmigigi manvwvhi wrku-tvgi yasi nelv vhqalamvgi inv Ufimv, macimi yasi inv Ufimv melici tapigamowa, datapilvhi yone ni ta silvwi. Pvfaqedrku, welrni yoci wapfadrku.

Currently Selected:

YA-SFADOCI JRNE 14: SJW

Highlight

Copy