YA-SFADOCI JRNE 11

1Huwa nr-nakuti ilani vhqiluga, Lasulase Pafana uci, ini u dodawa-nahi Male macimi u janinrli Mrfali. 2Chena inv Male inv la-lumgonrtv nili Dabalamiwalici lumgowa, macimi u kvfhv-mvwrli u ficiwilici, weiahfv, henv u sgemvli Lasulaseli vhqilugali. 3Nihki wajaninrticki iqaki waciganvhi nili si wrwengaki, Da-balamiwatv, wrpvmi, inv ivhqalamvtv vhqiluga, isiwaki. 4Pvyaqv iah notvgi ini Jesise, Mvtv yomv vhqilugawa iqinvmowa-nagi iqvtwi, wakv Mvnatu wi hini u wvhfrci-makufewanici uci, wvhsi ini uci u Qihfvli Mvnatu wvhfrci-makufihaci, iwv. 5Huwa Jesise ut vhqalamrli Mrfali, macimi u janinrli Mrfa, chena Lasulaseli. 6Hina waciganvhi iah nodrgaci yasi nili vhqilugalici, ina lrqv nesu-ku vpiwv ini tv hvpilici nili. 7Hina uwa vhkuwihi yomv, Nuhgi Cudiagi hrdrku, u talvhi nihi kvgahgimrfhi. 8Labrye, nihki Josvki pvyaqv uwa bami nvtunahigawrci wvhsi sekunhuhgi; macimi hv nuhgi gesv nhv? u talrwrli nihki kvgahgimrfvki. 9Hrpvfsa Jesise, Hv mvtv vhdawi matvhfwi-gita-neswi yrtafvki ini nakuti gesqa? Qahqi ilani brmfata ini gesagi, mvtv utvgikvh-sinwv inv, xvga inv u nama ini yomv uci wvivhfryrgi yalakuqvh-kvmigigi. 10Wakv qahqi ilani brmfa ini tapahgi, utvgikvhsinwv inv, xvga ini wvivhfayrgi mvtv-lrqv u weyrgi. 11Yone wiahi kvlvwi inv : macimi vhkuwihi yomv, Kihgrnanv Lasulase gepa-qrmwv; pvyaqv ni nahv, wvhsi manvwvhi nabrwa uci vmvchvgi, u talvhi nihi. 12Nihki kvgahgimrfvki waciganhi, Dabalamiwatv, qahqi inv gepa-qrmaga, wah patagi uwasi-lrsvmvmu, u talrwrli nili. 13Huwa ut iqinvmowa-nilici ud rtutv Jesise : wakv yasi vlwrkvhsiwi nabrlici inv ud rtutv si tahaki nihki. 14Hina uwa Jesise u tapinvlaqi-mvhi nihi wacigan’hi, Napwv Lasulase. 15Ma-cimi ni uwasilapwv yasi bur ntvsi vpiv gelvwv uci, wvhisi ini-igi manvwvhi gelvwv dapwahsayaqa; pvyaqv nhrdrku inv, u talvhi. 16Waciganvhi Drmuse, Titimvs yr-lofutv, Nhrdrku nahfrpi wvhsi manvwvhi wetpana-mvqa, u talvhi u weci kvgahgimrfhi.

17Waciganvhi ina iah birci Jesise, u mkv yasi naiahkv nyaku vpilici nili ini nabowrlvkugi. 18Huwa Pafana mrlrqvhi vhdawi Culosalame si, nvwitu neswi mveli Irqv; 19chena maci nihki Josvki naiahkv utfrwvhi Mrfali chena Maleli, wvhsi gilv-kvkvwrwrci nihi usgemwrli si. 20Mrfa waciganvhi, iah nodrgaci yasi bami birlici Jesiseli, wapfa macimi u nvxkvwrli nili : wakv Male ivskv lamvtvpiwv betiga ini wegiwv. 21Mrfa waciganvhi, Dabalamiwatv, qahqi gelv naiahkv utvsi vpivna, n’usgemv mvtv naiahkv ivh napwv. 22Macimi weginrqi inugi ni wrkutv ini, goqa-nahi-grci gah nvtutvmvwv Mvnatu, gah melaqv Mvnatu, u talrli Jesiseli. 23G’ usgemv wa hunskv nuhgi, u talrli Jesise. 24Ni wrkutv wvhsi inv nuhgi unsgrci ini rpafewi-unsgrwa-nagi tv hini jaiahqi gesagigi, u talrli Mrfa. 25Neiv ini rpafewi-unsgrwa, macimi ini lanvwawewa : inv dadapwahsatv neiv, waghi inv na-pwv, gawvgi wah lanvwawi inv; 26chena goqa-nafwgrci lanvwa-wi macimi dapwahsa neiv mvtv-lrqvsi wah napwv. Hv gi da-pwahsa yomv? u talrli Jesise. 27Hvnkv, Dabalamiwatv; naiahkv ni dapwahsa yasi geiv-wivni inv Klvisde, nili u Qihfvli Mvnatu, datapilvhi inv ba-birtv ini yalakuqvh-kvmigigi, u talrli Mrfa. 28Chena iah mah-tuwaci yomv, via wapfa, macimi u gemi wih-kumrli u janinrli, Hinv Ga-gahgimiwa vpiwv utvsi, macimi gi nvtumaqv, isiwa. 29Macimi inv, iah notvgi ini, qvqi pvfaqi, che-na wapfa nili hawv. 30(huwa Jesise mvtv gawvgi ini udawa-nafagi si biawv, wakv ivskv ini tvsi vpiwv Mrfa tvh nvxkvwrci nili.) 31Nihki Josvki ina wa-weci vpicki nili betiga ini wegiwv, macimi bami gilvgikvwrcki nili, iah nawrwrci Maleli, yasi inv qvqi pvfaqeci macimi luhfrci, u nakvlrwrli nili, yasi galv tuga ini nabowrlvkugi hrlici mvwi ntvsi wihfvqalici, si tahaki nihki. 32Male waciganvhi iah birci tv hvpilici Jesiseli, macimi u nawrli nili, svhgigi mrlrqvhi ya-huficiwilici si rgicifa, Dabalamiwatv, qahqi gelv naiahkv utvsi vpivna, ni usgemv mvtv naiahkv ivh napwv, u talrli nili. 33Hina waciganvhi Jesise u nawrli nili bami wihfvqalici, macimi nihki Josvki nahfrpi bami wihfvqawrci ba-biaci wedfamrcki nili, mvmyrdwawi-taha inv ini ucvjrlvhkugi, chena patfvgifi, 34Macimi, Drniwa tvsi ki mahci sagisimrwv inv? isiwa. Dabalamiwatv, birlu macimi namalu, u talrwrli nihki. 35Wihfvqa Jesise. 36Nihki Josvki waciganvhi, Wrpvmahku yasi inv vhqalamrci nili ! iwvki. 37Pvyaqv nrlatv nihki, Kvnhv mvtv yrmv ilani, da-tvwanvmvwrtv nili u sgesaku inv ga-kvgabeqatv, u macpanvtu wvhsi nahfrpi bur napagi yrmv ilani? iwvki. 38Jesise waciganvhi nuhgi bami mvmyrdwawi-tahaci weyrgi ini nabowrlvqi si biawv. Huwa pasiqi wrsrlvqi ini, macimi sekunv usgici vpiwv ini. 39Hvlikv si walahku inv sekunv, isiwa Jesise. Mafa, nili ut iqamvli, inv napakv, Dabalamiwatv, Irqvsi yomv uwa inv weyrnv wiskvlalwv; xvga inv naiahkv ne-nyaku vsanwv, u talrli nili. 40Hv mvtv gi tala nelv, wvhsi, qahqi gelv dapwah-saivna, namaivni ini u wvhfrci-makufewa Mvnatu? u talrli Jesise. 41Waciganvhi nihki vlikv uta si walrwrli nili sekunvli. Macimi Jesise spamagi lrpi u sgesaku, chena, Ufimv, niyrwa yasi gelv notvwivni. 42Macimi ni wrkutv yasi gelv notvwivni mosvtvwi : pvyaqv xvga inv mahsalakv na-nepvwitv gryrukv ni tain ini, wvhsi manvwvhi nihki dapwahsawrci yasi gelv svpkvhi wrwenas-kvwivni, iwv. 43Chena iah mahci vlvini si kvlvwici, ulrmih-simu, Lasulase, biaci luhfrlu. 44Biaci luhfa inv napakv, gijepifu nabowi betanikvnv u lacigi macimi u fitagi; chena tatabeqapifu pfewanahi. Palskunahku, chena pvgfanahku, u talvhi Jesise.

45Maci waciganvhi nihki Josvki ba-bialutvwrcki Maleli macimi ya-lrpvtvgiki ini ya-silvweci inv u dapwahtvwrwrli nili. 46Pvyaqv nrlatv nihki wapfaki nihi Palasihi haki, macimi u wetv-mvwrwvhi nihi nili wiahi Jesise mviahci silvweci.

47Nihki ugimrwi mkvtaukulvyaki waciganvhi chena nihki Palaseki u mrwvtunrnrwv mrwvsgrwa, macimi, Nahiwa silv-wedrku? xvga yrmv ilani maci giginolowanv silvwi. 48Qahqi vlvini si welrni lalamvqa, jrivhki ilaneki wah dapwahsaki nili : chena nihki Lomaneki wah biaki macimi gah mvmrknnrki tv hvpivqa chena ki tfwalowa-nanv, iwvki. 49Pvyaqv nr-nakuti nihki, bami rnospi-makufewi mkvtaukulvyawici ini bami gikvhgi, Mvtv-wiahi ki wiahisi wrkudrnrwv gelvwv, 50mvtv nuhgi ini ki tah mamaginaladrnrwv yasi ini uwasfagi gelvwv si wvhsi nakuti ilani udwrci si napagi nihi lanvwahi, macimi wvhsi ini malsga tfwalowa bur vsagi, u talvhi. 51Huwa yomv iwv inv mvtv pasiqi welv uci : wakv bami rnospi-makufewi mkvtaukulvyawici ini bami gikvhgi, u mosigesqrtutv wvhsi Jesise ini tfwalowa si udwrci napagi; 52chena mvtv ini tfwalowa pahi si, wakv wvhsi inv manvwvhi nahfrpi mrwvtunrci nakudwalanv hisi nihi ut vpaluh-famhi Mvnatu la-lfwasgrlici mafhega. 53Waciganvhi ina grsagigi uci nihki u mvmanrwv tapuwawa wvhsi manvwvhi iqin-vmowa-nagi si bonrwrci nili.

54Jesise waciganvhi mvtv gidani tvwrci brmfa alagenv nihi Josvhi, wakv ini uci srwa ini belasgi-drmqa mrlrqvhi ini ba-psqvhgi, udawa Eflvme sidota hawv; macimi ntvsi nvkvhsinwv weci nihi kvgahgimrfhi. 55Huwa ini u pamfrsiwawanwv nihki Josvki mrlrqvhi vhdawi : chena maci Culosalame si kuqicsinoki ini belasgi-drmqa umoki wihsi bur ini pamfrsiwawigi, wvhsi ufapi Jutvmuwrci weyrwv. 56Nihki waciganvhi u nvtunawhrwrli Jesiseli, macimi ge-kvloladeki, yasi nepvwiwrci ini mvmrtumawi-kvmikugi, Nahiwa ki tas tahapwv? Hv mvtv inv wah biawv ini wihfancigawa-nagi? 57Huwa nihki ugimrwi mkvtaukulvyaki chena nihki Palaseki mahci meliwaki tapigamowa, wvhsi wiyafv ilani wrkutvga tv hvpilici nili, wi hini wrkutasiwa inv, wvhsi nihki manvwvhi masanrwrci nili.

Currently Selected:

YA-SFADOCI JRNE 11: SJW

Highlight

Copy