لُوقَا 1
1
مَقَدَّمَه
1ناس كُتار اَخَدو عَلى نُفوسُم أن يَكتِبو عَن الحاجات التَّمَّت بينَنا. 2و النّاس الشّافوها بِعُيونُم مِن الأوَّل و كانو خَدّامين الكِلمَه سَلَّموها لينا. 3و بَعَد ما فَتَّشتَ عَلى كُلّو شي مِن الأوَّل، حاجَه بِحاجَه، إفتَكَرتَ إنّو كوَيس أن أكتِب ليك بِتَرتيب، يا ثَاوُفِيلُس العَزيز، 4عَشان تَعرِف بِالتَّمام حَقيقَة الحاجات الخَبَّروك بيها بِالكَلام.
نُبُوَّة وِلادَة يُوحَنَّا
5في زَمَن هِيرُودُس، مَلِك اليَهُودِيَّه، كان في قَسّيس إسمو زَكَرِيَّا مِن قِسم أَبِيَّا، و مَرَتو مِن بَنات هَارُون إسِما أَلِيصَابَات. 6و هُم الإتنين كانو عادِلين قِدّام الله، ماشين حَسَب أوامِر الرَّب كُلَّها و في كُلّو قَوانينو بِدون #1:6 لوم: يَقول عَنّو إنّو عَمَل غَلَط.لوم. 7و ما كان عِندَهُم وَلَد، عَشان أَلِيصَابَات كانَت #1:7 عاقِر: مَرَه الما مُمكِن تَبقى حامِل.عاقِر، و كانو هُم الإتنين كُبار في السِّن.
8و لَمّا زَكَرِيَّا كان يَخدِم زي قَسّيس قِدّام الله في دور قِسمو، 9زي عادَة خِدمَة القَسِّيس، جا دورو عَشان يَدخُل هيكَل الرَّب و يَحرِق البَخور. 10و النّاس كُلُّهُم كانو بِصَلّو بَرَّه ساعَة البَخور. 11و ظَهَر ليهو مَلاك الرَّب واقِف عَلى يَمين مَضبَح البَخور. 12و لَمّا زَكَرِيَّا شافو، إتعَجَّب و خاف. 13و المَلاك قال ليهو: ”ما تَخاف، يا زَكَرِيَّا، عَشان الرَّب سِمِع الصَّلاه بِتاعَك، و مَرَتَك أَلِيصَابَات بِتَلِد ليك وَلَد، و بِتسَمّيهو يُوحَنَّا.
14و إنتَ بِتكون مَبسوط و فَرحان،
و ناس كُتار بِكونو مَبسوطين بِوِلادتو.
15عَشان هو بِكون عَظيم قِدّام الرَّب،
و ما بِشرَب خَمُر ولّا مَريسَه أبَداً،
و بِكون مَليان بِالرّوح القُدُس
و هو لِسَّع في بَطن أُمّو.
16و بِرَجِّع كُتار مِن بَني إِسْرَائِيل
لِلرَّب إلَهُم.
17و بِمشي قِدّامو بِروح إِيلِيَّا و بِقُدرَتو،
عَشان يَرَجِّع قُلوب الوالِدين لِلأولاد،
و النّاس الما بِطيعُو لِحِكمَة البارين،
عَشان يَحَضِّر لِلرَّب ناس جاهِزين.“
18و زَكَرِيَّا قال لِلمَلاك: ”كيف بَعرِف دا؟ و أنا راجِل عَجوز و مَرَتي كَبيرَه في السِّن.“ 19و المَلاك رَدَّ و قال ليهو: ”أنا جِبْرَائِيل الواقِف قِدّام الله، و أنا مُرسَل عَشان أكَلِّمَك و أبَشِّرَك بِدا. 20و شوف، إنتَ بِتكون أبكَم و ما تَقدَر تِتكَلَّم لِغايَة اليوم اليَحصَل فيهو الحاجَه دي، عَشانَك ما صَدَّقتَ كَلامي البِتِم في وَكتو.“ 21و النّاس كانو مُنتَظِرين زَكَرِيَّا، و مِتعَجِّبين عَشان إتأخَّر في الهيكَل. 22و لَمّا مَرَق، ما قِدِر يَكَلِّمُم، و هُم فِهمو إنّو شاف رؤيا في الهيكَل. و كان يَعمِل عَلامَه ليهُم و إستَنّى أبكَم. 23و بَعَد ما تَمَّت أيام خِدمَتو، رَجَع لِبيتو.
24و بَعَد الأيام ديلاك، أَلِيصَابَات مَرَتو حِملَت، و دَسَّت نَفسا خَمسَه شُهور، و قالَت، 25”الرَّب عَمَل لَي كِدا في الوَكِت دا لَمّا عايَن لَي، عَشان يَشيل #1:25 عيب، عُيوب: الحاجَه البِجيب الخَجَل.عيبي مِن بين النّاس.“
نُبُوَّة وِلادَة يَسُوع
26و بَعَد سِتَّه شُهور الله رَسَّل جِبْرَائِيل المَلاك لِمَدينَه في الجَّليل إسِما نَاصِرَه، 27#1:27 عَذراء: بِت ما عِرفَت راجِل.لِعَذراء مَخطوبَه لِراجِل مِن بيت دَاوُد إسمو يُوسِف. و إسم العَذرَاء مَرْيَم. 28و المَلاك دَخَل ليها و قال: ”سَلام ليكي، إنتي مُبارَكَه. الرَّب مَعاكي!“ 29و هي إتحَيَّرَت جِدّاً مِن كَلامو، و فَكَرَت في مَعنى السَّلام دا. 30و المَلاك قال ليها: ”ما تَخافي، يا مَرْيَم، عَشان لِقيتي نِعمَه مَعَ الله. 31و شوفي! إنتي بِتَحمَلي و بِتَلِدي وَلَد، و بِتسَمّيهو يَسُوع.
32و هو بِكون عَظيم، و بِسَمّوهو إبن الله.
و الرَّب الإلَه يَدّيهو كُرسي دَاوُد أبوهو.
33و بِملِك عَلى بيت يَعْقُوب لِلأبَد.
و مُلكو ما بِخلَص.“
34و مَرْيَم قالَت لِلمَلاك: ”كيف يَكون دا، و أنا ما عارفَه راجِل؟“ 35و المَلاك رَدَّ و قال ليها:
”الرّوح القُدُس بِجي عَليكي،
و قُدرَة العالي #1:35 ضَلَّل، يَضَلِّل: يَعمِل غِطاء فوق حاجَه و يَوَرّي إنّو الله قَرَّب لِمَحَل دا.تَضَلِّلِك.
و عَشان كِدا القُدّوس المَولود مِنِّك
بِسَمّوهو إبن الله.
36و شوف! أَلِيصَابَات نَسيبتِك! هي كَمان حِملَت بِوَلَد. و هي كَبيرَه في السِّن. و هَسَّع سِتَّه شُهور لِديك السَّمّوها عاقِر. 37عَشان ما في شي ما مُمكِن عِند الله.“ 38و قالَت مَرْيَم: ”شوف! أنا خَدّامَة الرَّب. الله يَتِم لَي زي كَلامَك.“ و بَعدين المَلاك مَرَق مِن عِندَها.
39و قامَت مَرْيَم في الأيام ديلاك و مَشَت قَوام لِأرض الجِبال لِمَدينَه في يَهُوذَا. 40و دَخَلَت بيت زَكَرِيَّا و سَلَّمَت عَلى أَلِيصَابَات. 41و وَكِت أَلِيصَابَات سِمِعَت سَلام مَرْيَم، الجَّنى إتحَرَّك في بَطنا، و أَلِيصَابَات إتمَلَت بِالرّوح القُدُس. 42و كُورَكَت بِصوت عالي و قالَت: ”مُبارَكَه إنتي في النِّسوان، و مُبارَك هو الجَّنى. 43و كيف أُم رَبّي تَجي لَي؟ 44و وَكِت ما سِمِعتَ صوت سَلامِك، الجَّنى إتحَرَّك في بَطني مِن الفَرَح. 45و مُبارَكَه الصَّدَّقَت، عَلَشان الكَلام القالو ليها الرَّب بِتِم.“ 46و مَرْيَم قالَت:
تَرتيلَة مَرْيَم
”بِنَفسي أحمَد الرَّب.
47و روحي مَبسوطَه بِالله مُخَلِّصي.
48عَشان عايَن لِخَدّامتو المِسكينَه.
و شوف، مِن هَسَّع النّاس كُلُّهُم بِسَمّوني المُبارَكَه.
49عَشان هو العِندو قُدرَه سَوّا لَي حاجات كَبيرَه،
و إسمو قُدّوس.
50و رَحمَتو مِن جيل لِجيل لِلنّاس البِخافوهو.
51و هو وَرّا قُدرَتو بِإيدو القَوّيَّه،
و شَتَّت فِكر المَتكَبِّرين.
52و نَزَّل السَّلاطين مِن كَراسيهُم،
و رَفَع المَساكين.
53و شَبَّع الجَّعانين بِحاجات كوَيسَه،
و رَجَّع الغَنيين بِدون حاجَه.
54و ساعَد خَدّامو إِسْرَائِيل
عَشان يِتذَكَّر رَحمَتو.
55زي ما كَلَّم أبَهاتنا،
لِإِبْرَاهِيم و أولادو لِلأبَد.“
56و مَرْيَم إستَنَّت مَعَ أَلِيصَابَات تلاتَه شُهور تَقريباً، و بَعَد كِدا رَجَعَت لِبيتا.
وِلادَة يُوحَنَّا
57و مُدَّة أَلِيصَابَات تَمَّت عَشان تَلِد، و وِلدَت وَلَد. 58و جيرانا و أقارِبا سِمِعو إنّو الرَّب وَرّاها رَحمَتو الكَبيرَه، و كانو مَبسوطين مَعاها. 59و بَعَد تَمانيَة أيام جو عَشان يَطَهِّرو الوَلَد. و دارو يَسَمّوهو بِإسم أبوهو زَكَرِيَّا. 60و أُمّو رَدَّت و قالَت: ”لا، لَكِن يَسَمّوهو يُوحَنَّا.“ 61و قالو ليها: ”ما في زول مِن أقارِبِك السَّمّوهو بِالإسم دا.“ 62و عَمَلو عَلامَه لِأبوهو يَطلُبو يَسَمّيهو شِنو. 63و هو طَلَب #1:63 لوح، ألواح: حاجَه زول يَكتِب فوقا.لوح الكِتابَه و كَتَب: ”إسمو يُوحَنَّا.“ و كُلَّهُم إتعَجَّبو. 64و طَوّالي خَشمو إنفَتَح و لِسانو إتفَكَّ، و إتكَلَّم و بارَك الله. 65و خوف وَقَع عَلى جيرانُم كُلَّهُم، و الخَبَر عَن الحاجات دي مَشى في كُلّو جِبال اليَهُودِيَّه. 66و كُل السِّمِعو، حَفَظو الكَلام دا في قُلوبُم و قالو: ”الوَلَد دا بِكون شِنو؟“ و إيد الرَّب كانَت مَعاهو.
67و زَكَرِيَّا أبوهو إتمَلا بِالرّوح القُدُس، و إتنَبّأ و قال:
تَرتيلَة زَكَرِيَّا
68”مُبارَك الرَّب إلَه إِسْرَائِيل
عَشان زار #1:68 شَعب: جَمَع مَخصوص مِن النّاس؛ أُمَّه؛ جِنس.شَعبو و عَمَل ليهُم فِداء.
69و قَوَّم لينا قَرن الخَلاص
في بيت دَاوُد خَدّامو.
70زي ما إتكَلَّم بِخَشُم أنبياهو القِدِّسين الكانو مِن زَمان:
71خَلاص مِن عُدوانّا
و مِن إيدين كُل البِكرَهونا.
72عَشان يَعمِل رَحمَه مَعَ أبَهاتنا،
و إتزَكَّر إتِّفاقو المُقَدَّس.
73الحَلَف الحَلَف لِإِبْرَاهِيم أبونا
74إنّو يَخَلِّصنا مِن إيدين عُدوانّا
عَشان نَخدِمو بِدون خوف،
75بِقَداسَه و بِر قِدّامو كُلّو أيام حَياتنا.
76و إنتَ، يا وَلَد، بِسَمّوك نَبي العالي،
عَشان تِتقَدَّم قِدّام الرَّب و يَحَضِّر طُرُقو.
77و تَدّي ناسو مَعرِفَة الخَلاص
# 1:77 غُفران: العَمَل لَمّا يَخَلّي خَطيّة زول و ما يِتذَكَّر. بِغُفران خَطاياهم،
78بِواسِطَة رَحمَة الله
البيها تَطلَع لينا الشَّمِش مِن السَّما
79عَشان يَنَوِّر عَلى القَاعِدين في الضَّلام و في ضُل الموت،
عَشان يَسوق كِرعينّا في طَريق السَّلام.“
80و الوَلَد كِبِر، و بِقى قَوّي في الرّوح. و كان في الخَلا لِغايَة يوم ظُهورو لِإِسْرَائِيل.
Currently Selected:
لُوقَا 1: APD2024
Highlight
Share
Copy
Want to have your highlights saved across all your devices? Sign up or sign in
© 1978 SIM, adapted in 2024 by Pioneer Bible Translators
