أعمال الرُّسُل 3

بُطْرُس يَشفي الرّاجِل الأعرَج

1و بُطْرُس و يُوحَنَّا كانو يَطلَعو لِلهيكَل لِصَلاه السّاعَه تلاتَه بَعَد الضُّهر. 2و ناس كانو يَشيلو راجِل أعرَج مِن بَطُن أُمّو. و كُلّو يوم كانو بِخُتّوهو عِند باب الهيكَل الإسمو الجَّميل، عَلَشان يَسأل صَدَقَه مِن الداخلين الهيكَل. 3و لَمّا شاف بُطْرُس و يُوحَنَّا دايرين يدخُلو الهيكَل، هو طَلَب مِنَّهُم صَدَقَه. 4و بُطْرُس و يُوحَنَّا عايَنو ليهو، و بُطْرُس قال ليهو: ”عايِن لينا.“ 5و الرّاجِل خَتَّ بالو ليهُم و إفتَكَر بياخُد مِنَّهُم حاجَه. 6و بُطْرُس قال: ”ما عِندي فِضَّه ولّا دَهَب، لَكِن العِندي بَدّيهو ليك. بِإسم يَسُوع النّاصِري، قوم و أمشي.“ 7و مَسَكو بِإيدو اليَمين، و رَفَعو. و طَوّالي رِجلينو و كَعبينو إتشَدَّدو. 8و هو نَطَّ و قام و بَدا يَمشي، و دَخَل مَعاهُم لِلهيكَل، و هو يَمشي و يَنوط و يَحمِد الله. 9و كُل النّاس شافوهو و هو ماشي و يَحمِد الله. 10و عِرفوهو زات الرّاجِل دا الكان بِقعُد في الباب الجَّميل بِتاعَت الهيكَل، و بِطلُب الصَّدَقَه. و هُم إستَغرَبو و إتعَجَّبو عَلَشان الحاجَه الحَصَلَت ليهو.

11وَكِت هو كان بِمسِك بُطْرُس و يُوحَنَّا، كُل النّاس جَرو ليهُم لِلبَراندَه الإسِما بَراندات سُلَيْمَان، و هُم مُستَغرِبين. 12و لَمّا بُطْرُس شاف دا، قال لِلنّاس: ”يا رُجال إِسْرَائِيل، مالكُم تِستَغرَبو مِن دا؟ و لِشِنو تَعاينو لينا زي نِحنا عَمَلنا الرّاجِل دا يَمشي بِقُوَّتنا ولّا عَشان نِحنا قِدِّيسين؟ 13عَشان إله إِبْرَاهِيم و إِسْحَاق و يَعْقُوب، إله أبَهاتنا مَجَّد إبنو يَسُوع. إنتو سَلَّمتوهو و نَكَرتوهو قِدّام بِيلاطُس لَمّا هو كان داير يَفِكّو. 14و لَكِن إنتو نَكَرتو القُدّوس البار، و طَلَبتو مِن بِيلاطُس أن يَدّيكُم راجِل كاتِل النّاس. 15و كَتَلتو رَئيس الحَياة القَوَّمو الله مِن بين المَيِّتين. و نِحنا شاهِدين لِداك. 16و الرّاجِل دا بِقى شَديد بِالإيمان بِإسم يَسُوع. و إنتو بِتشوفو و بِتَعرِفوهو. و الإيمان بِيَسُوع أدّا الرّاجِل دا العافيَه التّامَّه قِدّام كُلُّكُم.

17و هَسَّع، يا أخوان، أنا بَعرِف إنتو عَمَلتو دا بِدون فَهم زي رؤساكُم سَوّو كَمان. 18و كِدا الله عَمَل الهو كَلَّمنا بيهو مِن قُبّال بِخَشم كُل الأنبياء إنّو مَسيحو لازِم يَتعَب. 19عَلَشان كِدا، توبو و أرجَعو لِلَّه، فِشان الله يَشيل خَطاياكُم مِنَّكُم، و عَلَشان وَكِت الرّاحَه بِجي مِن قِدّام الرَّب. 20و هو يَرَسِّل المَسيح يَسُوع المُعَيَّن ليكُم مِن قُبّال. 21و هو لازِم يِستَنّى في السَّما لِغايَة الوَكِت بِجي، لَمّا الله يَرَجِّع كُلّو شي. و هو إتكَلَّم عَن دا بِخَشم كُلّو أنبياهو مِن زَمان. 22عَشان مُوسَى قال: الله رَبّكُم بِقَوِّم ليكُم مِن أخوانكُم نَبي مِتلي. لازِم تَسمَعو ليهو في كُل البِكَلِّمكُم بيهو. 23و كُلّو واحِد ما يَسمَع لِلنَّبي داك، يَكتُلوهو. 24و كِدا كُل الأنبياء مِن صَمُوئِيل و النّاس الإتكَلَّمو بَعدو، إتنَبّو بِالأيام دي. 25و إنتو أولاد الأنبياء و أولاد الإتِّفاق. و الله أدّى أبَهاتنا الإتِّفاق دا. هو قال لِإِبْرَاهِيم: بِأولادَك كُلّو قَبايل الأرض بِكونو مُبارَكين. 26عَشان الله بَعَد ما قَوَّم خَدّامو، رَسَّلو ليكُم في الأوَّل، فِشان يَبارِكُم و يَرَجِّع كُلّو واحِد مِنَّكُم مِن خَطاياهو.“

Currently Selected:

أعمال الرُّسُل 3: APD2024

Highlight

Copy