Joha 4

UJesu ukhuluma lowesifazana womSamariya

1AbaFarisi bezwa ukuba uJesu uyazuza abafundi, ubhaphathiza abanengi kuloJohane, 2lanxa uJesu ngokwakhe wayengabhaphathizi kodwa abafundi bakhe. 3UJesu esezwile lokhu wasuka eJudiya, wabuyela futhi eGalili. 4Kwasweleka ukuba adabule eSamariya. 5Wafika emzini waseSamariya okuthiwa yiSikari, eduze lesiqinti uJakobe asinika indodana yakhe uJosefa.#Gen 33:19; Josh 24:32 6Umthombo kaJakobe wawulapho. UJesu ekhathele yikuhamba wahlala emthonjeni. Kwakusemini. 7Kwafika owesifazana womSamariya ukuba akhe amanzi. UJesu wathi kuye: Nginathisa. 8Ngoba abafundi bakhe babehambile baya emzini ukuba bathenge ukudla. 9Kwang’khona owesifazana womSamariya wathi kuye: Kungani wena ungumJuda ucela ukunathiswa yimi ngingowesifazana womSamariya na? — Ngoba abaJuda kabadlelani lamaSamariya.#Ezra 4:1–5; Neh 4:1–2 10UJesu wathi kuye: Uba ubusazile isiphiwo sikaNkulunkulu lokuthi ungubani othi kuwe: Nginathisa; ubuzakucela kuye, yena ubezakukunika amanzi aphilisayo. 11Wathi kuye: Nkosi, kawulalutho lokukha, lomthombo uyatshona, uwathathaphi pho lamanzi aphilisayo na? 12Wena umkhulu kulokhokho uJakobe owasinika umthombo, wanatha kiwo, yena lamadodana akhe lemihlambi yakhe, na? 13UJesu waphendula, wathi kuye: Ilowo lalowo onatha lamanzi uzakoma futhi; 14kodwa lowo onatha amanzi engizakumnika wona kasayikoma; amanzi engizakumnika wona azakuba ngumthombo ogobhozayo phakathi kwakhe, kube yikuphila okungapheliyo. 15Owesifazana wathi kuye: Nkosi, nginike lawomanzi ukuze ngingomi, ngingabe ngiseza ukukha lapha.

16Wathi kuye: Hamba ubize indoda yakho, uze lapha. 17Owesifazana waphendula wathi kuye: Kangilandoda. UJesu wathi kuye: Utsho kuhle ukuthi kawulandoda; 18ngoba usuke waba lamadoda amahlanu; le olayo khathesi kayisiyo indoda yakho. Lokhu ukutsho uqinisile. 19Owesifazana wathi kuye: Nkosi, ngiyabona ukuthi wena ungumprofethi. 20Okhokho babekhonza kulintaba; kodwa lina lithi eJerusalema yindawo lapho kufanele abantu bakhonze khona. 21UJesu wathi kuye: Mama, kholwa kimi, isikhathi siyeza, lapho lingasayikukhonza uBaba kulintaba ingabe eJerusalema. 22Lina likhonza elingakwaziyo, thina sikhonza esikwaziyo; ngoba ukusiliswa kuvela kubaJuda. 23Kodwa isikhathi siyeza, njalo sesifikile, lapho abakhonzi abaqotho bazakukhonza uBaba ngomoya langeqiniso; ngoba uBaba ufuna abamkhonzayo babe njalo. 24UNkulunkulu unguMoya; labo abamkhonzayo bafanele ukukhonza ngomoya langeqiniso. 25Owesifazana wathi kuye: Ngiyazi ukuthi uMesiya uyeza, yena okuthiwa nguKristu; nxa esefikile, uzakusitshela konke. 26UJesu wathi kuye: Mina engikhuluma lawe nginguye.

27Ngalesosikhathi bafika abafundi bakhe; bamangala ngoba ekhuluma lowesifazana; kodwa kakho owathi: Ufunani na? Ukhulumelani laye na? 28Owesifazana wasetshiya imbiza yakhe, waya emzini, wathi ebantwini: 29Wozani libone umuntu ongitshele konke engikwenzileyo; kungaba nguye uKristu lo, kambe? 30Baphuma emzini beza kuye. 31Kusenjalo abafundi bamncenga besithi: Mfundisi, dlana. 32Kodwa wathi kibo: Ngilakho ukudla engikudlayo elingakwaziyo. 33Basebekhulumisana abafundi, besithi: Ukhona yini omlethele ukudla na? 34UJesu wathi kibo: Ukudla kwami kuyikwenza intando yongithumileyo, lokuqeda umsebenzi wakhe. 35Kalitsho yini ukuthi kusasele inyanga ezine kufike ukuvuna na? Khangelani, ngithi kini: Phakamisani amehlo enu, libone ukuthi amabele asemhlophe, aselungele ukuvunwa. 36Ovunayo wamukela umvuzo, abuthe isithelo esiba yikuphila okungapheliyo ukuze ohlanyelayo lovunayo bathokoze bebonke. 37Ngoba kulokhu ilizwi liqinisile elokuthi: Omunye uyahlanyela, lomunye uyavuna. 38Ngalithuma ukuvuna lokho elingakusebenzelanga; abanye basebenzile, lina selingenile emsebenzini wabo.

39AmaSamariya amanengi akulowomuzi akholwa kuye ngenxa yobufakazi bowesifazana obokuthi: Ungitshele konke engikwenzileyo. 40Kwathi esefikile kuye amaSamariya amcela ukuba ahlale lawo; wahlala khona insuku ezimbili. 41Abanye abanengi bakholwa ngenxa yelizwi lakhe. 42Bathi kowesifazana: Kasisakholwa ngenxa yamazwi akho nje, ngoba sesizizwele thina, siyazi ukuba isibili lo unguMsilisi womhlaba.

Ukusiliswa kwendodana yenduna eKapenawume

43Kwathi ngemva kwensuku ezimbili wasuka lapho waya eGalili. 44Ngoba yena uJesu uqobo wafakaza ukuthi umprofethi kadunyiswa elizweni lakibo.#Mat 13:57; Mark 6:4; Luka 4:24 45Wathi esefikile eGalili, abaseGalili bamamukela bebonile konke akwenzayo eJerusalema emkhosini; ngoba labo babeyile emkhosini.#Joha 2:23

46Wafika futhi eKana elaseGalili, lapho enza khona amanzi aba liwayini. Kwakukhona induna ethile yenkosi eyayilendodana egulayo eKapenawume.#Joha 2:1–11 47Yathi isizwile ukuba uJesu ufikile eGalili evela eJudiya, yaya kuye yamncenga ukuba eze asilise indodana yayo, ngoba yayisiphela. 48Ngakho uJesu wathi kuyo: Uba lingaboni izibonakaliso lezimangaliso, kaliyikukholwa. 49Induna yenkosi yathi kuye: Nkosi, woza engakafi umntanami. 50UJesu wathi kuyo: Hamba, indodana yakho izakusila. Indoda yakholwa ilizwi uJesu alikhuluma kuyo, yasuka yahamba. 51Kwathi iseza, inceku zayo zayihlangabeza, zayitshela ukuthi umntanayo usilile. 52Yasizibuza isikhathi aqale ngaso ukuba ngcono. Zasezisithi kuyo: Izolo ngokwephuka kwelanga umkhuhlane umyekele. 53Ngakho uyise wazi ukuthi yiso lesosikhathi lapho uJesu wathi kuye: Indodana yakho izakusila. Wakholwa yena lendlu yakhe yonke. 54Lesi yisibonakaliso sesibili uJesu asenza efikile eGalili evela eJudiya.

Currently Selected:

Joha 4: BE1978

Highlight

Copy