Gen 37

Amaphupho kaJosefa

1UJakobe wakha elizweni ayehlala kilo uyise, ilizwe laseKanani. 2Le yindaba yezizukulwana zikaJakobe.

Kwathi uJosefa eseleminyaka elitshumi lesikhombisa wayengumfana nje esalusa umhlambi kanye labafowabo, amadodana kaBiliha loZilipa omkayise; uJosefa waletha kuyise imibiko emibi ngabo. 3UIsrayeli wayemthanda uJosefa kakhulu kulabo bonke abantwana bakhe, ngoba wayeyindodana yobudala bakhe; wamenzela isigqoko esilemikhono emide. 4Kwathi abafowabo sebebonile ukuthi uyise uyamthanda kakhulu kulabo bonke abafowabo, bamzonda uJosefa, kabaze besakhuluma kuhle laye. 5UJosefa waphupha iphupho, wabatshela abafowabo ngalo; kwang’khona bemzonda ngamandla. 6Wathi kibo: Ake lizwe leliphupho engiliphuphileyo. 7Khangelani, besibopha izithungo ensimini; isithungo sami sema saqonda, izithungo zenu zaphahla esami, zasikhothamela. 8Abafowabo bathi kuye: Kanti wena uzakuba yinkosi yini, usibuse na? Bamzonda kakhulu ngenxa yamaphupho akhe lamazwi akhe. 9Wabuya waphupha elinye iphupho. Wabatshela ngalo abafowabo wathi: Khangelani, ngiphuphe elinye iphupho; ilanga lenyanga lenkanyezi ezilitshumi lanye zingikhothamela. 10Wabalandisela lona oyise labafowabo. Uyise wamsola wathi kuye: Liyini leliphupho oliphuphileyo na? Mina lonyoko labafowenu sizakhothamela emhlabathini phambi kwakho na? 11Abafowabo baba lomona ngaye, kodwa uyise wawagcina amazwi akhe enhliziyweni yakhe.#Seb 7:9

Ukuthengiswa kukaJosefa

12Abafowabo basebehamba ukuyalagisa umhlambi kayise eShekema. 13UIsrayeli wathi kuJosefa: Abafowenu kabalagisi umhlambi eShekema na? Woza, ngikuthume kibo. Wathi kuye: Ngilapha. 14UIsrayeli wathi kuye: Hambake khathesi, ubone ukuthi bayaphila yini abafowenu, lokuba umhlambi ulungile, ubuye ungibikele. Wasemthuma esuka esigodini saseHebroni wayafika eShekema. 15Umuntu othile wamfumana ezula egangeni, wambuza wathi: Ufunani? 16Wathi: Ngifuna abafowethu; ake ungitshele ukuthi balagisele ngaphi. 17Lowomuntu wathi: Basukile lapha, ngoba ngabezwa besithi: Asiyeni eDothani. UJosefa wabalandela abafowabo, wabafumana eDothani. 18Bambona esekhatshana. Engakafiki kubo, bamenzela icebo lokuba bambulale. 19Bakhulumisana besithi: Nanguya umphuphi uyeza; 20wozani simbulale, simphosele komunye wemigodi, sithi: Isilo esibi simdlile. Kung’khona sizakubona ukuthi amaphupho akhe azakuba yini. 21URubeni wakuzwa, wamophula ezandleni zabo, wathi: Asingambulali. 22URubeni wathi kubo: Lingachithi gazi, kodwa mphoseleni kulumgodi osenkangala, lingabeki sandla kuye. Watsho lokhu ukuba amkhulule ezandleni zabo, ambuyisele kuyise. 23Kwathi uJosefa esefikile kubafowabo, bamhlubula isigqoko sakhe, isigqoko esilemikhono emide ayesigqokile; 24bamthatha, bamphosela emgodini; umgodi wawungelalutho ungelamanzi.

25Basebehlala phansi ukuba badle. Baphakamisa amehlo abo, babona ixuku lamaIshmayeli livela eGileyadi, lisiya eGibithe, lilamakamela alo ethwele inhlaka lamakha lemure. 26UJuda wasesithi kubafowabo: Kuzasisizani uba simbulala umfowethu sifihle igazi lakhe na? 27Wozani, simthengise kumaIshmayeli, singabeki zandla zethu kuye, ngoba umgumfowethu, uligazi lethu. Abafowabo bavumelana laye. 28Kwasekudlula amaMidiyani angabathengi; bamkhupha uJosefa emgodini, bamthengisa kumaIshmayeli ngenhlamvu zesiliva ezingamatshumi amabili. Laboke bamusa eGibithe.#Seb 7:9

29URubeni wabuyela emgodini, wabona ukuthi uJosefa kasekho emgodini, wadabula ingubo zakhe. 30Wasebuyela kubafowabo wathi: Umfana kasekho; minake ngizakwenza njani? 31Basebethatha isigqoko sikaJosefa, bahlaba impongo, bacwilisa isigqoko egazini. 32Basithumela kuyise lesosigqoko esilemikhono emide, bathi: Sisidobhile lesisigqoko; akubone ukuba singesendodana yakho yini loba kayisiso. 33Wasibona wathi: Yiso isigqoko sendodana yami; isilo esibi simdlile, impela uJosefa udliwe. 34UJakobe wadabula ingubo zakhe, wagqoka izambatho zokulila, wayililela indodana yakhe insuku ezinengi. 35Wonke amadodana akhe lamadodakazi akhe eza ukumduduza, kodwa wala ukududuzwa, ngoba wathi: Ngizakwehlela endaweni yabafileyo endodaneni yami ngilila. Uyise wamlilela. 36AmaMidiyani amthengisa uJosefa eGibithe kuPotifa, inceku kaFaro lenduna yabalindi bakhe.

Currently Selected:

Gen 37: BE1978

Highlight

Copy