Gen 34

UDina woniwa nguShekema

1UDina indodakazi kaLeya, ayizalela uJakobe, waphuma ukuyabona abesifazana balelolizwe. 2UShekema indodana kaHamori umHivi, inkosi yelizwe, wambona, wambamba, walala laye, wamona. 3Inhliziyo yakhe yabambelela kuDina indodakazi kaJakobe, wayithanda intombi, wasezikhombisela yona. 4UShekema wasekhuluma loyise uHamori esithi: Ngicelela lintombi ibe ngumkami. 5UJakobe wezwa ukuthi usemonile uDina indodakazi yakhe; amadodana akhe ayesegangeni esezinkomeni, uJakobe wathula aze afika. 6UHamori uyise kaShekema waya kuJakobe ukuba akhulumisane laye. 7Amadodana kaJakobe afika evela egangeni esezwile lokhu; adabuka, athukuthela kakhulu ngoba uShekema enze ihlazo koIsrayeli ngokulala lendodakazi kaJakobe, into engafanele ukwenziwa.

8UHamori wakhulumisana labo esithi: Inhliziyo yendodana yami uShekema iyayithanda indodakazi yakho; ngakho akumnike yona ibe ngumkakhe. 9Yendiselanani lathi lisiphe amadodakazi enu, lani lithathe amadodakazi ethu. 10Yakhani phakathi kwethu, ilizwe lizakuba ngelenu; yakhani lithengiselane, lifuye kulo. 11UShekema wasesithi kuyise wentombi lakubanewabo: Ake ngifumane umusa kini; lokho elizakukutsho kimi ngizakukwenza. 12Bizani kimi amalobolo lesipho loba kungakanani, ngizalipha njengokutsho kwenu kimi; kodwa ngiphani intombi ibe ngumkami.

13Amadodana kaJakobe aphendula uShekema loHamori uyise ngobuqili, ngenxa yokuthi ubesemonile uDina udadewabo, 14athi kubo: Asilakuwenza lokho, ukunika udadewethu umuntu ongasokwanga, ngoba lokho kulihlazo kithi. 15Kodwa singalivumela ngalokhu kodwa, uba bonke abesilisa bakini besokwa, libe njengathi, 16sizalinika amadodakazi ethu, lathi sithathe amadodakazi enu, sakhelane lani sibe yisizwe sinye. 17Kodwa uba lingasilaleli lisokwe, sizathatha indodakazi yethu, sihambe.

18Lamazwi abo aba mahle kuHamori loShekema indodana yakhe. 19Insizwa kayiphuzanga ukwenza lokhu ngoba yayiyithanda indodakazi kaJakobe; yayilodumo kulabo bonke abendlu kayise. 20UHamori loShekema indodana yakhe bafika esangweni lomuzi wabo, bakhulumisana lamadoda omuzi wabo, 21bathi: Lamadoda ahlalisene kuhle lathi; ngakho kabahlale elizweni bathengiselane; ngoba khangelani, ilizwe likhulu; asithathe amadodakazi abo abe ngomkethu, lathi sibendisele amadodakazi ethu. 22Lamadoda azakuvuma ukuhlala lathi sibe yisizwe sinye lawo ngalokhu kuphela, ukuba basokwe bonke abesilisa phakathi kwethu, njengalokhu besokiwe bona. 23Inkomo zabo lempahla yabo layo yonke imfuyo yabo kayizukuba ngeyethu na? Asibavumele ukuba bakhe phakathi kwethu. 24Bonke abaphuma ngesango lomuzi wakhe balalela uHamori loShekema indodana yakhe; basokwa bonke abesilisa abaphuma ngesango lomuzi wakhe.

25Kwathi ngosuku lwesithathu beselobuhlungu, amadodana amabili kaJakobe, oSimeyoni loLevi, abanewabo bakaDina, athatha imikhonto yawo, awujuma umuzi, abulala bonke abesilisa. 26Ababulala oHamori loShekema indodana yakhe ngomkhonto, amkhupha uDina endlini kaShekema, ahamba. 27Amanye amadodana kaJakobe afica sebebulewe, awuphanga umuzi, ngoba babemonile udadewabo. 28Athatha imihlambi yabo lezinkomo zabo labobabhemi babo lalokho okwakusemzini lokwakusegangeni, 29lempahla yabo yonke; athumba abantwana babo labomkabo, aphanga lakho konke okwakusezindlini. 30UJakobe wasesithi kuSimeyoni loLevi: Lingihluphile, lingenze ukuba ngibe ngonengekayo phakathi kwabantu belizwe, phakathi kwamaKanani lamaPerizi; njengoba siyingcosana, bazakungihlanganyela bangibulale, ngichitheke mina lendlu yami. 31Bathi: Kuhle yini ukuthi udadewethu aphathwe njengesifebe na?

Currently Selected:

Gen 34: BE1978

Highlight

Copy