Lke 24

Mvumbukulu ya Yesu na lufwa

(Mat 28.1-10; Mke 16.1-8; Yne 20.1-10)

1Na suka-suka ya kilumbu ya lumingu, bakento kwendaka na ndyamu, mpe nataka mafuta ya nsunga ya mbote yina ba kubikaka. 2Bawu talaka ti ba vindumunaka ditadi yina vwandaka kanga mwelo ya ndyamu. 3Bawu kotaka na ndyamu, kasi bawu talaka ve nzutu ya Mfumu* Yesu. 4Mutindu bawu vwandaka na maketi-keti, babakala zole yina lwataka bilele ya kulezima talanaka na ntwala ya bawu. 5Bawu kumaka na boma, mpe vwandaka tala kaka na ntoto. Babakala yina zabisaka bawu: «Samu na yinki beno ke na kusosa muntu ya moyo na kati ya bantu ya kufwa? 6Yandi kele ve awa, kasi yandi me vumbuka na lufwa. Beno bambuka moyo na mambu yina yandi zabisaka beno ntangu yandi vwandaka ntete na Ngalili: 7“Ba fwana kuyekula Mwana ya Muntu* na maboko ya misumuki. Ba ke koma yandi na kulunsi, mpe yandi ke vumbuka na lufwa na kilumbu ya tatu.”»

8Na yina, bawu bambukaka moyo na mambu yina Yesu tubaka. 9Bawu bikaka ndyamu, mpe kwendaka zabisa mambu nyonso yina na bantumwa* kumi na mosi, mpe na bilandi* nyonso ya nkaka. 10Ya vwandaka Maliya ya mbanza Madala, Zane, mpe Maliya mama ya Zaki. Bakento ya nkaka yina vwandaka na bawu zabisaka mpe mutindu mosi na sika ya bantumwa. 11Bantumwa kanisaka ti mambu yina bakento vwandaka tuba, vwandaka mambu ya buzoba, mpe bawu kwikilaka yawu ve. 12Kasi Pyele telamaka mpe kimaka mbangu na ndyamu. Yandi kondamaka mpe talaka kaka bitende ya lele. Na manima, yandi vutukaka na yinzo ya yandi, mpe yitukaka mingi na mambu yina salamaka.

Na nzila ya bwala Emayuse

(Mke 16.12-13)

13Kaka na kilumbu yina, bilandi* zole vwandaka kwenda na bwala Emayuse. Bwala yina vwandaka ya kukabuka na Yelusalemi keba ve na Basitade#24.13 Sitade ya kele keba ve bametele 185. makumi sambanu. 14Bawu vwandaka zonzila mambu nyonso yina salamaka. 15Ntangu bawu vwandaka zonza mpe solola, yandi mosi Yesu kwizaka pene-pene ya bawu, mpe tambulaka kintwadi na bawu. 16Bawu vwandaka tala yandi. Kasi bawu vwandaka lenda ve na kuzaba yandi. 17Yesu yufulaka bawu: «Wapi dyambu beno ke na kusolola na nzila?» Na kyadi nyonso, bawu telamaka. 18Mosi na kati ya bawu, Kelopase, zabisaka yandi: «Na bantu nyonso ya Yelusalemi, kaka ni nge zaba ve mambu yina me salama na bilumbu yayi?» 19Yandi yufulaka bawu: «Wapi mambu yina?» Bawu vutulaka: «Mambu yina me kumina Yesu ya Nazaleti! Yandi vwandaka mumbikudi* ya ngolo. Yandi me lakisa yawu na ntwala ya Nzambi mpe ya bantu nyonso na bisalu mpe ndongosolo ya yandi. 20Bamfumu ya banganga-Nzambi* mpe bamfumu ya beto yekulaka yandi samu ti ba zengila yandi lufwa, mpe ba komaka yandi na kulunsi. 21Beto vwandaka na kivuvu ti ni yandi fwanaka kuula bantu ya yinsi ya Isayeli. Kasi ya me kuma, bubu yayi, kilumbu ya tatu katuka mambu yina me salama. 22Mwa ndambu ya bakento ya nkaka ya kimvuka ya beto me yitukisa beto. Bubu yayi, bawu kwendaka na ndyamu na suka-suka, 23kasi bawu talaka ve nzutu ya yandi. Bawu vutukaka samu na kuzabisa beto ti bambazi* talanaka na bawu, mpe tubilaka bawu ti Yesu kele moyo. 24Bampangi ya beto ya nkaka kwendaka na ndyamu, mpe talaka mambu nyonso mutindu bakento zabisaka yawu. Bawu talaka ve nzutu ya Yesu.» 25Na yina, Yesu zabisaka bawu: «Beno kele bantu ya mayela ve! Beno ke kwikilaka mbangu ve mambu nyonso yina mimbikudi zabisaka! 26Ya tsyelika, ya fwanaka ti Masiya* tala mpasi ya mutindu yina, ntete yandi kuzwa dyaka nkembo ya yandi.» 27Na manima, Yesu bangulaka bawu mambu nyonso yina sonamaka na Dibuku ya Nzambi samu na yandi, kukatuka mabuku ya Moyize tii na mabuku nyonso ya Mimbikudi.

28Ntangu bawu kumaka pene-pene ya bwala yina bawu vwandaka kwenda, Yesu salaka mutindu ti yandi zolaka luta bwala yina. 29Kasi bawu bondilaka yandi na kutuba: «Vwanda na beto awa. Bwisi me yila, mpe mpimpa me banda.» Na yina, yandi kotaka na yinzo samu na kuvwanda na bawu. 30Yandi vwandaka na mesa kintwadi na bawu. Yandi bakaka dimpa mpe tondaka Nzambi. Na manima, yandi bukunaka yawu mpe pesaka bawu yawu. 31Na yina, meso ya bawu zibukaka, mpe bawu zabaka yandi. Kasi yandi zimbanaka na ntwala ya bawu. 32Bawu vwandaka tuba bawu na bawu: «Ya tsyelika, bantima ya beto vwandaka mutindu bantima yina ke na kuya tiya ntangu yandi vwandaka zonzila mpe bangudila beto mambu ya Dibuku ya Nzambi na nzila.»

33Kaka na ntangu yina, bilandi zole telamaka mpe vutukaka na Yelusalemi. Kuna, bawu kutaka bantumwa* kumi na mosi ya kuvukana na bampangi ya bawu. 34Bawu nyonso zabisaka bilandi zole yina: «Ya tsyelika, Mfumu* me vumbuka na lufwa! Simoni me tala yandi!» 35Bilandi zole yina mpe zabisaka bawu mambu nyonso yina salamaka na nzila, mpe wapi mutindu bawu zabaka Yesu ntangu yandi bukunaka dimpa.

Yesu talanaka na bilandi ya yandi

(Mat 28.16-20; Mke 16.14-18; Yne 20.19-23; Bis 1.6-8)

36Ntangu bawu vwandaka zonzila mambu yina, Yesu yandi mosi talanaka na kati-kati ya bawu, mpe zabisaka bawu: «Kizunu kuvwanda na beno!» 37Bawu kumaka na boma ya kulutila samu ti bawu banzaka ti ya vwandaka mukuyu. 38Kasi Yesu zabisaka bawu: «Samu na yinki bantima ya beno me kuma kidi-kidi? Samu na yinki beno ke na maketi-keti na kati ya bantima ya beno? 39Beno tala maboko mpe makulu ya munu. Ya ke munu! Beno simba munu! Mukuyu kele ve na musuni mpe mikwa. Kasi munu, mu kele na yawu mutindu beno ke na kutala.» 40Na yina, yandi lakisaka bawu maboko mpe makulu ya yandi. 41Kasi mutindu bawu vwandaka kwikila ntete ve, samu ti bawu vwandaka ya kufuluka na kyese, mpe ya kuyituka mingi, Yesu yufulaka bawu: «Beno kele awa na kima ya kudya?» 42Bawu pesaka yandi kibuku ya mbisi ya maza ya kukalinga. 43Yandi bakaka yawu mpe kudyaka yawu na ntwala ya bawu. 44Na manima, yandi zabisaka bawu: «Ntangu mu vwandaka ntete na kati ya beno, mu zabisaka beno mutindu yayi: Mambu yina sonamaka samu na munu na kati ya Misiku* ya Moyize, dibuku ya Mimbikudi*, mpe dibuku ya Mikunga fwana kusalama.» 45Na yina, yandi pesaka bawu mayela ya kubakula mambu yina kele ya kusonama na Dibuku ya Nzambi. 46Yesu zabisaka bawu: «Ba sonikaka mutindu yayi: Masiya* fwana kutala mpasi, mpe ke vumbuka na lufwa na kilumbu ya tatu. 47Kubanda na Yelusalemi tii na bayinsi nyonso, ba ke longisa bantu na Nkumbu ya yandi ti ba fwana kusoba nkadulu samu na kuzwa mulemvo ya masumu. 48Beno kele bambangi ya mambu yayi. 49Munu mosi ke fidisa beno dikabu yina Tata ya munu pesaka nsilulu. Kasi beno fwana kuvwanda na kati ya mbanza tii ntangu lulendo ya mazulu ke kulumuka na beno.»

Yesu nangukaka na zulu

(Mke 16.19-20; Bis 1.9-11)

50Na manima, Yesu nataka bawu pene-pene ya mbanza Betani. Kuna, yandi nangunaka maboko, mpe sakumunaka bawu. 51Ntangu yandi vwandaka sakumuna bawu, yandi bikaka bawu, mpe nangukaka na zulu. 52Bilandi* siikaka yandi, mpe vutukaka na Yelusalemi ya kufuluka na kilengi. 53Ntangu nyonso, bawu vwandaka na Yinzo ya Nzambi*, mpe bawu vwandaka kembila Nzambi.

Currently Selected:

Lke 24: BNT

Highlight

Copy