Lke 19

Yesu mpe Zase

1Yesu kotaka na mbanza Yeliko, mpe vwandaka luta mbanza yina. 2Na kati ya mbanza yina vwandaka na muntu mosi na nkumbu Zase. Yandi vwandaka mfumu ya bilokoti-mpaku, mpe mvwama ya nene. 3Yandi vwandaka sosa kutala nani kele Yesu. Kasi mutindu bantu lutilaka mingi, yandi lendaka tala ve Yesu samu ti yandi vwandaka na ntela ya nkufi. 4Na yina, yandi kimaka mbangu na mantwala, mpe yulukaka na yinti yina ba ke bokilaka sikomole samu na kutala Yesu yina fwanaka luta kuna. 5Ntangu Yesu kumaka na kisika yina, yandi talaka na zulu mpe tubaka na Zase: «Zase, kulumuka mbangu samu ti bubu yayi mu fwana kulala na yinzo ya nge.» 6Zase kulumukaka mbangu, mpe yambaka Yesu na kyese nyonso. 7Na kutala mutindu yina, bantu nyonso nyungutaka mpe tubaka: «Muntu yayi me kwenda kulala na yinzo ya musumuki!»

8Zase telamaka na ntwala ya Mfumu*, mpe tubaka: «Mulongisi, mu ke pesa ndambu ya bimvwama ya munu na bamputu, mu ke kabula yawu na kati-kati, mpe kana mu vunaka muntu na kubaka mbongo ya yandi, mu ke vutula yandi yawu bambala yiya.» 9Yesu zabisa yandi: «Bubu yayi, dikanda yayi me kuzwa mpulusu samu ti muntu yayi kele mpe mwana ya Abalayami. 10Ya tsyelika, Mwana ya Muntu* me kwiza samu na kusosa mpe kuvuukisa bayina zimbanaka.»

Kingana ya Mine

(Mat 25.14-30)

11Mutindu bantu vwandaka kuwa mambu ya yandi, Yesu tubaka dyaka kingana ya nkaka samu ti bawu vwandaka me kuma pene-pene ya Yelusalemi, mpe ti bantu vwandaka banza ti Kimfumu ya Nzambi* zolaka talana na ntangu yina. 12Na yina, Yesu tubilaka bawu: «Muntu mosi ya dikanda ya buzitu kwendaka na yinsi ya ntama samu ti ba byeka* yandi ntinu. Na manima, yandi fwanaka vutuka na yinsi ya yandi. 13Ntete na kukwenda, yandi bokilaka bisadi kumi na kati ya bisadi ya yandi. Yandi pesaka konso muntu Bamine#1Bt 10.17 kumi, mpe zabisaka bawu: “Beno sala mumbungu na yawu tii ntangu mu ke vutuka.” 14Kasi bantu ya yinsi ya yandi vwandaka zola yandi ve. Bawu fidisaka bantu na manima ya yandi na kwenda kutuba kuna: “Beto zola ve ti muntu yayi vwanda ntinu ya beto.” 15Ba byekaka yandi ntinu, mpe yandi vutukaka na yinsi ya yandi. Na yina, yandi bokilaka bisadi yina yandi pesaka mbongo samu na kuzaba ndandu yina bawu kuzwaka. 16Kisadi ya ntete kwizaka mpe tubaka: “Mfumu, Mine#1Bt 10.17 mosi ya nge me buta Bamine kumi.” 17Ntinu zabisaka yandi: “Ya kele mbote! Nge kele kisadi ya mbote. Mutindu nge me vwanda ya kukwikama na bima ya fyoti, mu me tula nge mfumu ya bambanza kumi.” 18Kisadi ya zole kwizaka mpe tubaka: “Mfumu, Mine#1Bt 10.17 mosi ya nge me buta Bamine tanu.” 19Ntinu zabisaka yandi: “Mu me tula mpe nge mfumu ya bambanza tanu.” 20Kisadi ya nkaka kwizaka mpe tubaka: “Mfumu, Mine#1Bt 10.17 ya nge yawu yayi. Mu bumbaka yawu na kati ya kitambala. 21Mu vwandaka na boma ya nge samu ti nge kele muntu ya ntima ngolo. Nge ke bakaka bima yina kele ya nge ve, mpe nge ke yonzikaka bambuma yina nge kunaka ve.” 22Ntinu zabisaka yandi: “Nge kele kisadi ya yimbi! Mu ke fundisa nge na mambu yina nge mosi me zonza. Nge zabaka ti mu kele muntu ya ntima ngolo yina ke bakaka bima yina kele ya munu ve, mpe ke yonzikaka bambuma yina mu ke kunaka ve. 23Na yina, samu na yinki nge tulaka ve mbongo ya munu na banki? Ntangu mu me vutuka, mu zolaka kuzwa ndandu na zulu ya yawu.” 24Na manima, ntinu tubaka na bayina vwandaka kuna: “Beno baka yandi Mine#1Bt 10.17 mosi yina ke na yandi, mpe beno pesa yawu na kisadi yina ke na Bamine kumi.” 25Bawu zabisaka ntinu: “Mfumu, yandi ke na Bamine#1Bt 10.17 kumi!” 26Ntinu vutulaka: “Ya tsyelika, mu ke na kuzabisa beno, na muntu yina ke na bima, ba ke bwela yandi bima ya nkaka. Kasi na muntu yina ke na kima ve, ba ke katula yandi ndambu ya bima yina ke na yandi. 27Na yina me tadila bambeni ya munu yina zolaka ve ti mu vwanda ntinu ya bawu, beno nata bawu awa, mpe beno kufwa bawu na ntwala ya munu.”»

Nkotolo ya Yesu na Yelusalemi

(Mat 21.1-11; Mke 11.1-11; Yne 12.12-19)

28Na manima ya kuzonza mutindu yina, Yesu tambulaka na mantwala ya nkonga samu na kukwenda na Yelusalemi. 29Ntangu yandi kumaka na bizunga ya bwala ya Betefaze mpe bwala Betani, pene-pene na mongo ya bayinti ya olive, yandi fidisaka bilandi* zole na ntwala, 30mpe zabisaka bawu: «Beno kwenda na bwala yina kele na mantwala. Ntangu beno ke kuma, beno ke tala mbuluku ya fyoti yina ba me kanga na yinti, mpe yina ata muntu me yulukaka ntete. Beno nyangula yawu, mpe beno nata yawu awa. 31Kana muntu yufula beno: “Samu na yinki beno ke na kunyangula yawu”, beno zabisa yandi: “Mfumu* ke na yawu nsatu.”»

32Bantu yina Yesu fidisaka, kwendaka mpe talaka mambu nyonso mutindu Yesu zabisaka bawu. 33Ntangu bawu vwandaka nyangula mbuluku yina, bantu ya yawu yufulaka bawu: «Samu na yinki beno ke na kunyangula yawu?» 34Bawu vutulaka: «Mfumu ke na yawu nsatu.» 35Na yina, bawu nataka yawu na sika ya Yesu. Bawu tulaka binkuti ya bawu na zulu ya mbuluku, mpe bawu yulukisaka Yesu na zulu ya yawu. 36Ntangu Yesu vwandaka kwenda, bantu vwandaka tanda binkuti ya bawu na nzila. 37Ntangu yandi vwandaka kuma pene-pene ya mbanza Yelusalemi, na nzila ya mongo ya bayinti ya olive, nkonga nyonso ya bilandi fulukaka na kyese. Bawu bandaka na kukembila Nzambi na ndinga ya ngolo samu na bimangu nyonso yina bawu talaka. 38Bawu vwandaka tuba:

«Bika Mfumu Nzambi kusakumuna ntinu yina me kwiza na Nkumbu ya yandi!

Kizunu vwanda na zulu, mpe nkembo vwanda na Nzambi!»

39Mwa ndambu ya ba-Falisye* yina vwandaka na kati ya nkonga, tubaka na Yesu: «Mulongisi, tuba na bilandi ya nge na kuvwanda swi.» 40Yesu vutulaka: «Mu ke na kuzabisa beno, kana bawu vwanda swi, matadi ke looka!»

Yesu dilaka samu na bantu ya Yelusalemi

41Ntangu Yesu kumaka pene-pene ya Yelusalemi, mpe talaka yawu, yandi dilaka samu na mbanza yina 42na kutuba: «Yelusalemi! Kana nge mpe, nge bakulaka mambu yina zolaka pesa nge kizunu na kilumbu yayi! Kasi ntangu yayi, yawu kele ya kubumbama, mpe nge lenda kutala yawu ve! 43Ya tsyelika, bilumbu ke kwiza, bambeni ya nge ke tunga kikaku samu na kunwanisa nge. Bawu ke zunga nge, mpe ke fyeta nge na balweka nyonso. 44Bawu ke mwangisa nge, mpe ke kufwa bantu nyonso ya nge. Bawu ke bika ata ditadi na zulu ya ditadi ya nkaka, samu ti nge me zaba ve ntangu yina Nzambi me kwiza kusadisa nge!»

Yesu na kati Yinzo ya Nzambi

(Mat 21.12-17; Mke 11.15-19; Yne 2.13-22)

45Yesu kotaka na Yinzo ya Nzambi*, mpe bandaka na kubingisa bayina vwandaka tekisa. 46Yandi vwandaka tuba na bawu: «Dibuku ya Nzambi ke tubaka: “Yinzo ya munu ke vwanda yinzo ya lusambulu#Esa 56.7; Yel 7.11!” Kasi beno me kitula yawu kisika yina miyibi ke bumbamaka!»

47Bilumbu nyonso, Yesu vwandaka longisa na Yinzo ya Nzambi*. Bamfumu ya banganga-Nzambi*, milongisi ya Misiku*, mpe bantu ya mfunu ya dikanda ya ba-Zwife vwandaka sosa mayela ya kufwa yandi. 48Kasi bawu vwandaka zaba ve wapi mutindu bawu lendaka sala, samu ti bantu nyonso vwandaka kuwa yandi na nkebolo nyonso.

Currently Selected:

Lke 19: BNT

Highlight

Copy