MARKUS 7

Tuhan Yesus pekatuk daha' Farisi

Mat 15:1-9

1 # Mat 15:1-20 Té' daha' Farisi dahin kuri-kuri daha' aleng puboh surat Tuhan aleng uh nei men Yerusalem, pepeng dahin Na'. 2#Lk 11:38 Daha' nyineng balei anak sekulah Na' kuman luti té' usu aleng masep, iha' atih em payan mayau una'. 3Avin daha' Farisi dahin lim daha' Yahudi em kuman alem daha' em payan mayau lelan usu daha', ngioh tukit daha' aleng dekaya'. 4Nunan pah, tegu daha' uli men pasen, nusi' daha' kuman em payan duh. Kahum pah tukit la'an, aleng en daha' ala dahin ngioh, awi mayau tebuk lim, dahin avan du'i, dahin lajang temaga'. 5Pelalau daha' Farisi dahin daha' aleng puboh surat Tuhan meteng Iha', “Na' nun anak sekulah Ka' mebet tukit daha' aleng dekaya'? Dalo' kuman luti alem dalo' em payan mayau usu dalo'.” 6#Yes 29:13 Ken Yesus men daha', “Teneng lan dahun nabi Yesaya bara pekuna' marung ikam kelunan aleng dua' jela', awi aleng uh kalung,

‘Daha' pahu anih meju Akui té' ba daha',

bi kenep daha' su men Akui.

7Em té' loh bang daha' sebayang té' Akui,

avin tukit kelunan aleng en daha' kuma' katuk lan.’

8Tebara Allah iha' aleng en kam lek, tukit kelunan iha' en kam puboh.”

9Ken Na' men daha', “Lan-lan ikam mebet tebara Allah, ja ikam ngioh tukit daha' aleng dekaya' menuna'. 10#Us 20:12; 21:17; Lewi 20:9; Kel d M 5:16 Avin Musa kuma', ‘Ju nah hinam, tamam,’ ken na'. Té' pah ‘Hi aleng peji'ek taman na' hinan na', tekep iha' seng ukum matei,’ ken Na'. 11Bi ken kam, ‘Iha' té' aleng kuma' men taman na' dahin hinan na', ‘Ket aleng ngavak seng masi ika' dih hu'uh ek tei bara bun usu kui nah,’ (aleng aran daho' atih, iha' uh ma'uk na' men Allah,) 12awi té' aleng kuma' nunan, nusi' nah ikam mun iha' na nun-nun la'an men hinan na' dahin taman na'. 13Nunan nah ikam mebet tebara Allah, avin ikam ngioh tukit daha' aleng dekaya' menuna', aleng uh kam pekatuk. Kahum tuk aleng awi nunan en kam na',” ken Yesus.

Ket aleng na kelunan masep

Mat 15:10-20

14Lun en Na' uvui nah kelunan kahum atih ngelua', dahin kuma' men daha', “Kelenghi nah ikam lim-lim, sayu nah kenep kam nei ateng té' alem Dahuk anih. 15Nusi' té' ket aleng men awang kelunan aleng tei halem na' seng na iha' masep, bi ket aleng nei musang men alem na' atih nah aleng na iha' masep. 16Hi-hi aleng hipun iling ngavan kelenghi, kelenghi nah.”

17Tegu Yesus uh leka' men kelunan lim atih dahin tei halem uma, dalo' anak sekulah Na' pah nei meteng ivun atih té' Iha'. 18Ken Na' men dalo' atih, “Kelo' lahuh, nusi' kelo ateng iah? Nusi' kelo' jam, ket aleng tei halem kelunan aleng men awang, nusi' ket atih na daha' masep keta'? 19Avin nusi' ha' tei alem kenep, bi iha' tei alem butit na', uh anan pebet men batung na' la'an,” ken Na'. Iha' kuma' nunan anan, en Na' na ma'ang ket lim-lim aleng en kelunan kani. 20Ken Na' la'an, “Ket aleng musang men alem kelunan, atih nah aleng na daha' masep. 21Avin men alem kelunan, iha' atih men alem kenep daha', nei musang nah kenep aleng ji'ek, nuyang, 22nakau, lematei kelunan, nyilé' doh, ngivah, barik ji'ek, peluvat, kenep masep, mata' nyelingit, nuten kelunan, bau kenep, kenep palui. 23Lim-lim ket aleng ji'ek anih musang men alem kenep na daha' masep.”

Marung kinah ji doh Yunani bengsa' Siro-Fenisia

Mat 15:21-28

24Leka' nah Yesus men itih, tei ha' daléh Tirus dahin Sidon. Tei nah Iha' alem ji uma, kenep Na' ji kelunan pah seng em jam Iha' kurin Na', bi nusi' Iha' deng nyihuk. 25Té' ji doh nei, doh atih té' anak-doh na' ngavan to' nilung, kitan na' dengah Yesus, pelalau nei nah iha' ngelu'ep té' béh kudek Na'.

26Té' pah doh atih kelunan men daha' Yunani bengsa' Siro-Fenisia. Iha' akei lelan Yesus mesau to' atih men alem anak na' atih. 27Bi ken Na' men doh atih, “Bei nah daha' nyam besoh una', avin nusi' tekep ala luti daha' nyam dahin mesau na' men aso'.” 28Nyu'ei nah doh atih, kuma' men Iha', “Lan kah Dahum anan, Tuhan, bi aso' aleng hida mija' atih pah kuman oh anak atih,” ken na'. 29Ken Na' men iha', “Avin dahum nunan, uli nah im. Uh musang nah to' atih men alem anak ka',” ken Na'. 30Doh atih pah tei ateng uma na', beka' lan kah, anak atih uh tebei miri té' avan tudu, to' atih pah uh musang.

Yesus petagéh laké' aleng madeng dahin ka'a' daho'

31Leka' nah Iha' men daléh Tirus, pelalau té' daléh Sidon, ateng nah Iha' ha' bawang Galilea dahin panau té' hang daléh Dekapolis. 32En daha' geri nah ji laké' aleng madeng, ka'a' pah dahun na' lahuh, pelalau akei Yesus metei usu Na' té' iha'. 33#Mk 8:23 En Na' asan nah laké' atih men béh daha' kahum, en Na' asuk nah jahangau Na' tei alem iling na', uh anan Iha' lemura, dahin ivit jelan na'. 34#Mk 6:41; Yoh 11:41 Neng'o nah Iha' ha' langit, en Na' jat nah hengan Na', ken Na' men laké' atih, “Ipata,” aleng aran na', “Pawang nah.” 35Pelalau iling na' pawang, dahin pebet pah kaput jelan na', pelalau teneng nah dahun na'. 36#Mk 1:43-45 En Yesus nangen nah daha' em mun bara men ji la'ung pah, bi sa' pah Iha' em mun daha' beleka' sa' iha' pah daha' tei pedengah na'. 37#Yes 35:5 Ngeniheng tua nah daha' atih, ken daha', “Lim-lim hadui Na' teneng lim. Iha' haman na kelunan aleng madeng atih nei kelenghi, nurei pah Iha' haman na daha' aleng mameng atih nei la'ung dahun na',” ken daha'.

Currently Selected:

MARKUS 7: TDK1990

Highlight

Copy