ARING KELESING 44

Tebuk pirek padé'

1Men'uh anan en na' duan nah laké' aleng puboh amin na', “En tuvu nah sut dalo' kelunan anan té' parei, kuri-kuri kahum aleng deng en dalo' geri, tei uli nah ligit dalo' uk anan lahuh, tei ha'ut-ha'ut sut dalo' nan, 2nurei tebuk pirek kui anan lahuh, en tei halem sut anak aleng da'uk anan, nurei pah ligit seng en na' bayen legah parei anan lahuh.” Nutih nah iha' na ngioh awi kurin Yusuf anan. 3Dau uh malah aya' jihima anan, iha' daha' mekoh dalo' tei leka', dahin ma'uk keledei dalo' lahuh. 4Tegu dalo' uh tei musang men daléh anan, nusi' payan nuno' su, kuma' nah Yusuf men laké' kepala' aleng gem uma na' anan, “Petmei nah im tei livoh kelunan anan dih, bi tegu ka' ateng dalo', sayu im kuma' men dalo', ‘Na' nun kelo' na ket aleng ji'ek té' hadui amé' aleng sayu? Na' nun kelo' ala tebuk pirek anan dih? 5Iha' aleng ngavan laké' aya' kui nih du'i, iha' pah aleng avan na' nenung lahuh. Kelo' na ket aleng ji'ek tua kelo' na nunan anan.” ’

6Tegu ha' ateng dalo' en na' bara nah men dalo' dahun Yusuf nan. 7Iha' dalo' nyu'ei iha', “Nuno' ka' na kalo' aleng nunih amei? Nusi' peletu kalo' kelunan aleng ji'ek anih na ket aleng nunan amei! 8Iha' kah kalo nei geri ligit men daléh Kanaan aleng té' alem sut alo' men daléh Kanaan atih dih, ma'uk na' uli men kelo' di. Seng nuno' kalo' ngenep nakau met dahin pirek men alem uma laké' aya' ka' anan du'? 9Iha' té' men kalo' aleng nyam ka' nih ala tebuk anan, pulang sayu ha' matei. Nurei pah kalo' lim lahuh, sayu kalo' nei jadi' nyam alem amin laké' aya' ka' nan.”

10Iha' ha' kuma', “Lan, sayu lan kah dahun kelo' nan, bi hi aleng ala tebuk anan, iha' dep kah aleng nei nyam alem amin kui, bi kelo' aleng ha' béh mukéh kah kelo' té' sala atih.” 11Pelalau petimah nah dalo' muéh sut dalo' té' tana, ha'ut la'ung dalo' kah muvan kaput sut dalo'. 12Iha' nah laké' kepala' uma anan nyineng lim-lim ket anun dalo' anan dih tutok-tutok men harin dalo' aleng dekaya' ateng harin dalo' aleng da'uk, beka' alem sut Benyamin sikah tebuk met anan dih té'. 13Pelalau dalo' mirak basung dalo' pedeng dalo', pelalau dalo' metei ketanun dalo' hujung keledei dalo' la'an, dalo' pah tei uli pala daléh anan la'an.

14Tegu Yehuda dahin dalo' harin na' tei ateng uma Yusuf, té' loh kah Yusuf tinan, nyepukun nah dalo' nukem ateng ha' tana té' unan na'. 15Kuma' nah Yusuf men dalo' atih, “Nuno' kah tuk hadui kelo' nunih? Nusi' kelo' jam kurik, kamé' kelunan aleng awi akui anih deng kah kamé' ngelingei nyineng kelunan.”

16Kuma' nah Yehuda, “Seng nun nah dahun alo' la'an men ika' amei, nun aleng seng hu'ei alo' ji'ek lo, seng té' nun avan kalo' seng bara kalo' seng teneng? Allah aleng uh petula sala alo' aleng panyin ka' anih. Kalo' ji'ek nih bei nah kalo' em nyam alem amin ka' tua amei, lim kalo' ji'ek nih lahuh dahin laké' aleng ala tebuk pirek anan dih lahuh.”

17Bi kuma' nah Yusuf, “Nusi' kui kaséh ha' nunan! Hi aleng ala tebuk pirek anan dih, iha' dep kah aleng nei nyam alem amin kui, bi kelo' lim aleng ha' béh anih, tei nah kelo' uli ha' taman kelo' dahin em té' nun-nun tusah.”

Yehuda akei asi men Benyamin

18Tei nah Yehuda jeleng béh Yusuf, kuma' men iha', “Akei asi kui té' ika' u amei, avin akui ji'ek ngenep na ji li'ap daho' men ika'. Meng im mano' akui ji'ek seng duan, avin ika' nih amei piah Firaun atih loh kah. 19Ika' uh meteng akui ji'ek dau arei dih amei, ‘Té' loh kah taman kelo' dahin harin kelo' la'an iah?’ kum di pa amei. 20Iha' nah kalo' ji'ek nyu'ei ika' dih amei, ‘Té' loh kah taman alo', bi iha' uh muku, té' ji anak na' aleng da'uk loh, aleng na' nganak tegu iha' ji'ek uh muku, harin na' aleng dekaya' pah uh em té' nah iha' ji'ek, iha' dep kah aleng té' la'an men dawa' peharin aleng peji hinan nan, taman na' pah nyalam lelan té' iha' ji'ek nan.’ 21Bi ika' pah aleng duan kalo' ji'ek dau arei dih, ‘En kelo' geri nah iha' ha' akui hinih, ja kui jam iha',’ kum di. 22Iha' nah kalo' ji'ek nyu'ei ika' dih, ‘Nusi' anak atih deng melek taman na'. Tana' ha' melek taman na', adang taman alo' anan matei.’ 23Bi nyu'ei pah ika' kalo' ji'ek dih, ‘Tana' harin kelo' aleng da'uk anan em nei hinih dahin kelo', nusi' kelo' deng nei jam akui la'an,’ kum pah dau arei dih.

24“Tegu kalo' ji'ek tei ateng ha' taman alo', iha' nah kalo' bara aleng dahum dih men iha'. 25Tegu taman alo' nyihu kalo' la'an, ‘Tei nah kelo' nekulah ilau ket en talo' kani,’ 26bi kalo' nyu'ei iha', ‘Nusi' kalo' deng tei la'an hitih. Em harin alo' aleng da'uk anih nei dahin alo', uréh kalo' deng tei, avin nusi' kalo' deng tei jam neng kelunan anan la'an, iha' harin alo', aleng da'uk anih em nei dahin alo'.’ 27Bi kuma' pah taman alo' men kalo', ‘Kelo' pah uh jam, hawak uh nganak dua' anak men akui, 28bi ji uh tei padé' té' akui, iha' kah akui kuma', Iha' uh tulan hatan ala nah anan, nusi' nah akui jam iha' la'an. 29Awi kelo' ala anak anih té' akui lahuh, awi iha' ji'ek tei ga' tusah, kelo' seng lematei akui tua nah anan lahuh,’ ken na' di.

30“Iha' kalo' tei ateng ha' taman alo' na'a, awi anak anan em té' dahin alo', adang nusi' taman alo' ngenep murip la'an, avin kelalau lalé' kenep na' té' iha' anih dih. 31Awi iha' nyineng anak anih em té', adang ha' matei tua nah anih na'a, itung kalo' nah aleng itung tei lematei taman alo' na'a, tavit ji'ek kenep na'. 32Bi akui ji'ek aleng nunih aleng uh akun puboh harik nih dih, iha' taman alo' mun iha' nei anih dih, iha' taman alo' mun iha' nei anih dih, avin akui kuma' men iha', ‘Awi akui em geri iha' uli men ika' amei, akui nah aleng sala ha' unan ka' amei, akui nah aleng sala ha' unan ka' pa'en-pa'en,’ kek di. 33Avin anan, sayu nah iha' akui aleng ji'ek anih nei nyam alem amin ka' kalui harik anih, sayu nah harik anan tei uli dahin dalo' harik nih. 34Avin nusi' kui kaséh tei uli ha' tamak, iha' harik nih em té' nei uli dahik. Nusi' kui kaséh nyineng katé' aleng seng ateng té' tamak na'a.”

Currently Selected:

ARING KELESING 44: TDK1990

Highlight

Copy