ARING KELESING 32

Yakub petmei seng pepsuk dahin Esau

1Yakub pah pelalau tei pejoh anau na', daha' meliket Allah pah pepsuk dahin na'. 2Tegu iha' jam daha' iha' pah kuma', “Anih nah seladu Allah!” Avin anan en na' na nah aran tinan Mahanaim.

3Men'uh anan en na' nyihu nah daha' aleng hu'en na' atih tei una' té' iha', tei bara Esau harin na' aleng dekaya', aleng té' ha' tana Seir ha' daléh Edom. 4Iha' kuma' men daha' nunih, “Nunih tuk dahun kelo' bara men harik Esau, ‘Nunih dahun panyin ka' Yakub, Akui uh melo' dahin Laban jarun dara anih. 5Akui uh hipun sapi', keledei, kading, duba, nurei pah daha' doh dahin daha' laké' aleng nyam alem amin kui lahuh, akui ngenep bara tuk anih men ika' arin, ja ika' masi akui ji'ek si'.” ’

6Uli nah daha' aleng hu'en Yakub tei bara dahun na' men Esau anan dih. Ken dalo' bara Yakub, “Kalo' uh tei ateng ha' Esau harim dih, beka' iha' pah alem ha' panau té' iung alan nei pejam dahim, iha' geri pat atuh kelunan.” 7Yakub pah pelalau takut, kenep na' ngetiwet tua ngihau, iha' nah iha' petulan daha' aleng dahin na' anan, nurei pah kading, duba, sapi' dahin unta lahuh, en na' na dua' na'an peng daha'. 8Avin iha' pelemana' nunih, awi Esau nei ngayau ji na'an peng, awi daha' alah kenan na', bi té' kah ji na'an peng aleng deng takau.

9Uh anan, ken Yakub men Tuhan, “U Allah sepuk Abraham dahin Allah Ishak aleng tamak, u Tuhan, Ika' aleng uh kuma' men akui dih, ‘Uli nah im ha' daléh ka' dahin ha' daléh daha' harim. Akui pah seng ma'uk sayu men ika',’ Kum men akui dih. 10Bi akui nih, nusi' kui tekep ala nun-nun halam Ka' dahin, tangen kenep Ka' aleng uh Im uak té' panyin Ka' anih. Ji hekun anih dep kah ek geri tegu kui lawat hungei Yordan dih, bi kerei inih uh dua' nah peng amé' anih. 11Im akau nah akui men alem usu Esau harik atih, avin takut lan kui té' iha', bahi iha' nei lematei akui, nurei pah dalo' hinan dalo' nyam anih dahin dalo' anak kui nih. 12#Ar Kel 22:17 Bi ika' aleng kuma' men akui di, ‘Adang Akui seng ma'uk sayu men ika' dahin na pahu ka' awi hit ha' bahé' banget, em deng en ujap,’ Kum di.”

13Iha' pah tudu tinan malem anan. Men'uh anan en na' ala nah ji tulan ket aleng té' té' iha', ja ma'uk na' men Esau harin na' atih. 14Iha' mukéh dua' atuh kading doh, dua'-pulu kading laké', dua' atuh duba doh, dua'-pulu duba laké', 15telo'-pulu unta aleng nganak uk paget anak daha', pat-pulu sapi' doh, pulu sapi' laké', dua-pulu keledei doh, pulu keledei laké'. 16En na' uk nah lim atih men dalo' nyam alem amin na' en daha' puboh, peha'ut na'an-na'an peng daha' hulung atih kah daha' puboh na', iha' nah Yakub kuma' men daha', “Panau nah kelo' una' té' akui, sayu kam panau pehiget su pehiget su dahin ji na'an peng dahin ji na'an peng.” 17En na' na nah daho' men laké' aleng una' loh panau anan, “Tana' Esau harik pepsuk dahim, tana' ha' meteng ika', ‘Hi aleng kelunan aya' ka', hino' ka' tei, hi hipun hulung aleng im geri anih?’ ken na', 18sayu im nyu'ei iha', ‘Ket anun panyin ka' Yakub dih anih, anih nah ket aleng en na' uk, en na' kato' men tamak Esau,’ kum na'a. ‘Yakub té' kah iha' baya té' kamé' nih,’ kum bara iha'.” 19Nunan kah dahun na' men aleng lubun dua', nurei pah aleng ketlo', nunan lim-lim nah dahun na' men daha' aleng panau geri ha'ut na'an peng hulung na' anan. Ken na' pah la'an, “Awi jam tuk dahuk men'a dih dahun kelo' lim bara men Esau tegu kelo' pesuk iha'. 20Sayu kelo' bara tangen-tangen men iha' lahuh bara akui té' ngebaya kelo'.” Avin Yakub pelemana' nunih, “Sayu kui pehalau kenep na' té' tibah aleng una' ek nyihu geri men iha' anih, men'uh anan uréh kui deng pejam dahin na', mina kaséh kah iha' ala akui dahin sayu kenep.” 21Avin anan, en na' tei nah ket aleng en na' uk anan dih una', bi batung na' tudu té' lepau na' kah iha' malem anan.

Yakub petulung ha' Pniel

22Malem anan ma'un nah Yakub en na' geri nah dawa' doh na', dahin dua' doh nyam-amin na' dahin daha' pulu-ji anak na' lahuh en na' geri lawat hungei Yabok, tatah ngavan daha' lawat pa'en. 23Men'uh ha' lawat dalo' doh dahin anak na' anan, en na' lawat nah ketu-ketu ketanun na' lahuh. 24Yakub dep kah aleng melo' la'an. Beka' ji laké' petulung dahin na' ateng dau nei pebekat. 25Kitan laké' atih nah iha' em deng pekalah Yakbu, en na' nyaman nah pa'un hapi Yakub, pelalau kahala nah pa'un hapi Yakub, alem dawa' petulung nunan anan. 26Lun kuma' nah kelunan atih, “En akau nah akui, avin uh malah nah dau anih.” Bi nyu'ei nah Yakub, “Nusi' kui mun mekah ika' iha' ika' em muak asi ka' men akui.”

27En kelunan atih teng nah iha', “Hi aran ka' du?” Nyu'ei nah iha', “Yakub,” ken na'.

28 # Ar Kel 35:10 Ken kelunan atih men iha', “Meng nah na aran ka' Yakub la'an. Israel nah aran ka', avin ika' uh petulung melawan Allah dahin kelunan lahuh, ika' pah uh maneng.”

29Meteng pah Yakub, “Im bara nah aran ka' lahuh.” Bi iha' nyu'ei iha', “Na' nun ka' meteng aran kui?” Pelalau na' uk nah asi na' men Yakub tinan.

30En Yakub na Pniel nah aran tinan, avin ken na', “Akui uh nyineng neng Allah, beluak pah murip!” 31Tegu Yakub uh lalau Pniel anan, tula nah alah dau, Yakub pah kepé', avin pa'un hapi na' kahala. 32Anan nah tavit daha' Israel em kuman uhat aleng té' té' tuman tulang pa'un hapi ateng dau anih, avin Iha' uh nyaman tuman tulang pa'un hapi Yakub tatah uhat aya' hapi na'.

Currently Selected:

ARING KELESING 32: TDK1990

Highlight

Copy