ARING KELESING 27

Ishak akei asi té' Tuhan men Yakub

1Ishak uh muku aya', matan na' em sayu nyineng, em té' loh nah iha' jam la'an. En na' uvui nah Esau anak una' na' atih dahin kuma' men iha', 2“U anak kui.” Ken Esau nyu'ei, “Nun du amei?” Ken Ishak men iha', “Im nyineng kui ji'ek uh muku nah anih, nusi' kui jam hiran kui seng matei. 3Sayu nah im ala jelut ka' dahin telanga' na', tei nah im alem uro', tei ilau kan men akui. 4Na nah ket aleng heling aleng mega' té' ba kui, dahin geri na' men akui ek kani, ja kui akei asi té' Tuhan men ika' men em payan kui matei.”

5Bi té' Ribka kelenghi dahun Ishak men Esau anak na' atih. Tegu Esau tei alem uro' ilau tulan en na' uk men taman na', 6ken Ribka men Yakub anak na' atih, “Té' kui uh kelenghi dahun tamam men Esau harim aleng dekaya', 7‘Geri nah ji tulan aleng kelam anan men akui, na nah men akui ket aleng heling ek kani, ja akui kahi Tuhan muak asi Na' men ika' em payan kui matei', ken na' dih. 8Avin anan u anak, im kelenghi nah dahuk awi aleng ek nyihu im na anih si'. 9Tei nah im ha' avan kading dahin duba telo' tih, im ala nah dua' anak kading aleng sayu, akui na na' dapi aleng heling men tamam, awi aleng kenep na' atih, 10im geri nah men tamam, en na' kani, ja ha' kahi Tuhan nei muak asi Na' men ika', em payan iha' tei matei uh anih.”

11Ken Yakub men Ribka hinan na', “Bi Esau harik aleng dekaya' atih, iha' ji kelunan aleng bulo', bi akui ji kelunan aleng lanih tua em té' bulo'. 12Mina tamak ngakap-ngakap si' ivit akui, ujung iha' kuma' akui peluvat iha', ujung-ujung akui kah aleng menei parit té' batung kui, nusi' nah akui ala asi.”

13Bi hinan na' kuma' men iha'. “Bei na', akui kah aleng ga' parit atih pah, u anak, ngioh nah im tua dahuk anih, tei nah im ala kading atih.” 14Pelalau Yakub tei ala kading atih tei geri na' men hinan na'. Iha' nah hinan na' na dapi aleng heling awi aleng kurin taman na' anan. 15Uh anan Ribka ala kanan Esau aleng kajau, ketanun anak una' na' anan, kanan na' aleng en na' lo' ha' uma, en na' nyihu nah Yakub meté' na'. 16En na' kelilit nah anit kading pelengep usu na' dahin té' keran na' aleng lanih atih lahuh. 17Pelalau Ribka ma'uk dapi aleng heling anan, dahin luti aleng en na' na atih, ma'uk na' men Yakub anak na'.

18Nunan nah tuk Yakub tei pala ngavan taman na', dahin kuma' men taman na', “Amei!” ken Yakub. Nyu'ei nah taman na', “U anak, ika' hi anan?”

19Ken Yakub men taman na', “Akui nah Esau anak ka' aleng dekaya'. Uh nah akui na men ika' ket aleng hu'em dih. Biti nah im, nei melo' kuman dapi aleng ek na anih, ja ka' masi akui si' amei.”

20Lun ken Ishak men anak na' atih, “Salet lan ka' ala na' anak!” Ken na' men taman na', “Avin Tuhan ka' aleng ma'uk na' men akui anih pa.” 21Ken Ishak men Yakub, “Nei nah im jeleng akui, ja kui ngakap ika' si', hi si' ika', lung si' ika' Esau lan.” 22Tei nah Yakub jeleng Ishak taman na' nan, pelalau na' ngakap nah iha' dahin kuma', “Dahum nih dahun Yakub, bi usu ka' usu Esau.” 23Nusi' nah Ishak jam nelana iha', avin usu na' bulo' awi usu Esau harin na' aleng dekaya' atih. Iha' nah iha' akei Tuhan masi iha'. 24Ken na' pah la'an meteng, “Lan kah ika' anih anak kui Esau ia?”

25Ken na' nyu'ei, “Lan akui kah anih!” Kuma' nah Ishak, “Nei nah dapi anan men akui ja kui kuman dapi ket aleng kelam anan, bang ka' anak kui, ja kui akei asi té' Tuhan men ika'.” En na' uk nah dapi atih men taman na', pelalau iha' kuman na', en na geri pah ata' agun men iha', en na' du'i lahuh. 26Ken Ishak taman na' men iha', “Nei nah jeleng, u anak kui, im marek si' akui.” 27#Ib 11:20 Nei nah Yakub jeleng, pelalau marek taman na'. Tegu Ishak jam bu sayu kanan na', pelalau iha' sebayang kahi asi té' Tuhan men iha', ken na',

“Bu sayu anak kui anih,

awi bu luma' aleng en Tuhan puboh.

28Sayu nah Tuhan Allah menei ep men langit,

dahin tana jemeng té' usun tana,

dahin parei dahin agun nei pi'at-pi'at ngahum men ika'.

29 # Ar Kel 12:3 Sayu nah pahu-pahu nyepida tua té' ika',

dahin bengsa'-bengsa' nyepukun té' ika'.

Sayu nah ika' dekaya' men hang kam aleng peharin,

dahin daha' anak hinam nyepukun té' ika'.

Hi aleng peluvat ika', iha' pah seng ga tulah,

hi aleng masi ika', iha' pah seng ala asi lahuh.”

Esau akei asi lelan té' taman na'

30Uh Ishak kahi asi té' Tuhan nunan men Yakub, ngebaya iha' lap men béh taman na' anan dih, beka' nei nah Esau uli men alem uro'. 31Iha' pah na dapi aleng heling, en na' geri men taman na', dahin kuma', “Biti nah im amei, kuman nah dapi aleng kelan anak ka' anih, ja ka' kahi asi té' Tuhan men akui.”

32Ken Ishak taman na' atih men iha', “Hi ka' anih du?” Ken Esau nyu'ei, “Akui nah Esau anak ka' aleng una' dih.”

33Ngetiwet aya'-aya' nah Ishak dahin kuma', “Hi kah aleng tei ilau kan dahin ma'uk na' men akui men'a dih? Akui pah uh kuman lim ket en na' uk anan, men em payan ika' nei uli anih dih, dahin hu'uh na akui kahi asi té' Tuhan men iha', iha' nah aleng uh ala asi men Tuhan.”

34Tegu Esau kelenghi dahun taman na nutih, nangih nah iha' aya'-aya' dahin kelalau katé' nah kenep na', dahin kuma' men taman na', “Im masi nah akui lahuh amei!”

35Ken taman na', “Harim aleng uh nei pamoh akui nei nyilé' asi Tuhan aleng seng ek uk ika' atih.”

36 # Ar Kel 25:29-34 Ken Esau, “Patut kah daha' na aran na' Yakub. Anih nah dua' hangun iha' uh peluvat akui. Dau arei dih en na' hilé' nah tulan kui, kerei inih pah en na' hilé' lahuh asi aleng en tamak akei té' Tuhan men akui. Nuno' amei, nusi' ka' deng akei té' Tuhan ma'uk sayu men akui la'an lahuh iah?”

37Ken Ishak men Esau, “Lan akui uh meju iha' dekaya' men'uh ika', lim kelo' harin ek nyihu jadi' panyin na', dahin ma'uk besoh pa'en té' parei dahin agun men iha', seng nun la'an ek na men ika', anak?”

38 # Ib 12:17 Ken Esau men taman na', “Ji atih tua asi aleng deng im uk iah? Asi nah akui! U amei, im akei nah asi men akui lahuh.” Esau pah nelahung nangih aya'-aya'. 39#Ib 11:20 Ken Ishak taman na' men iha',

“Lan, ika' seng murip ha' tana aleng mulé' tua,

nusi' pah té' usep nei men langit.

40 # Ar Kel 36:8; 2 Laj 8:20 Ika' seng murip té' malat ka' tua,

ika' seng jadi' panyin harim aleng da'uk.

Bi tegu ika' nengayet lan-lan,

ika' seng mebet kayo' uheng na' atih men tekuk ka'.”

Yakub tei lap ha' daléh Haran

41Esau pa'en heléh té' Yakub, avin tavit asi aleng en taman na' akei té' Tuhan aleng seng anun na' atih aleng uh en Yakub ala. Iha' ha' kuma' alem kenep na' dep, “No' pah tei na', tamak nih, iha' uh jeleng matei kah anih, tegu dau kawa' lumuh patei na' na'a, iha' nah akui lematei Yakub harik aleng da'uk anih.”

42Bi en daha' bara pah dahun Esau anak una' na' atih men Ribka hinan na', iha' nah iha' nyihu daha' tei duan Yakub anak na' aleng da'uk atih, iha' nah hinan na' kuma' men iha', “Esau harim aleng dekaya' atih pa'en heléh seng ngenep lematei ika' puyo'. 43Avin ha' nunan anak, im kelenghi nah dahuk nih lalau-lalau kerei inih. Sayu nah im petmei, tei nah im ji'ek lap pala Laban aleng harik ha' daléh Haran tih, 44dahin na' nah im ji'ek té' melo' jaki bareng, 45tuken-tuken kenep harim aleng dekaya' tei halau heléh na' té' ika', ateng ha' tei hadau té' hadui aleng uh im na dahin na' atih. Baya tih puyo', ek nyihu kah daha' nei duan ika' men inan. Seng nuno' kah tuk akui ji'ek, seng tekep kua' lim tei melek akui alem ji dau tugung tua iah?”

Ishak nyihu Yakub tei pala Laban

46Men'uh ana, ken Ribka nah men Ishak, “Uh hungo' lan nah akui murip kenan daha' doh-doh bengsa' Het nih. Bahi lan kui Yakub nih tei ala ji doh hawan na' men daha' doh Het anih Tana' ha' nunan, nusi' bang kui murip la'an.

Currently Selected:

ARING KELESING 27: TDK1990

Highlight

Copy