ARING KELESING 11

Uma bau ha' Daléh Babel

1Té' usun tana anih ji tua dahun daha'. 2Tei nah daha' panau ha' béh matan dau pa'un, pesuk daha' nah ji datah layang ha' tana Sinear, hinan nah daha' murip. 3Tengaran nah daha' ji la'ung dahin ji la'ung, “Sayu tam na bato' bata men tana kalit dahin pahun na' sayu-sayu.” Bato' bata anan itung kalui bato' lan, nunan pah lutung-lutung seleken tana kalit. 4Ken daha', “Sayu nah itam na ji daléh aya', dahin meju ji uma aya' tei ateng ha' langit mubung na', sayu tam ilau aran tam ja itam em petat té' usun tana.”

5Nei nah Tuhan nyineng daléh dahin uma aya' aleng en daha' anak kelunan na atih. 6Ken Tuhan, “Daha' kelunan anih dih ji tua nah pahu daha' dahin dahun daha' pah ji tua lahuh. Anih nah aring daha' tangen matoh na hadui daha', men kerei inih nah daha' meté' petmei na na', nusi' té' aleng seng em deng en daha' na. 7Sayu nah Telo' tei ngiléh pesekdep dahun daha', ja ji la'ung em jam dahun ji bakéh na'.” 8Nunan nah tuk Tuhan tei mutat daha' té' usun tana, iha' nah daha' ngeta' na daléh aya' anan. 9Anan nah tavit daha' na aran daléh anan Babel, avin men inan Tuhan pesekdep daho' té' usun tana anih, men inan nah lahuh Tuhan mutat daha' té' ji usun tana anih.

Pahu Sem

1 Tuk 1:24-27

10Anih nah pahu Sem. Urip Sem uh ji atuh duman, iha' ha' nganak Arpakhsad, dua' duman men'uh lepa aya' atih dih. 11Lima' atuh duman urip Sem men'uh iha' nganak Arpakhsad, iha' pah nganak kuri-kuri anak aké' dahin anak doh la'an lahuh.

12Urip Arpakhsad uh telo'-pulu-lima' duman urip na', iha' ha' nganak Selah. 13Alem pat atuh telo' duman jarun urip na' men'uh iha' uh nganak Selah nan, iha' pah nganak kuri-kuri anak aké' dahin anak doh la'an lahuh.

14Urip Selah uh telo'-pulu duman urip na', iha' ha' nganak Eber. 15Alem jarun urip na' pat atuh telo' duman men'uh iha' nganak Eber, iha' pah nganak kuri-kuri anak aké' dahin anak doh lahuh.

16Urip Eber uh talo'-pulu-pat duman, iha' ha' nganak Peleg. 17Eber té' loh murip alem pat atuh telo'-pulu duman men'uh iha' uh nganak Peleg nan, jarun anan pah iha' nganak kuri-kuri anak aké' dahin anak doh lahuh.

18Urip Peleg uh telo'-pulu duman iha' ha' nganak Rehu. 19Alem Peleg dua' atuh pitan duman urip na' men'uh iha' uh nganak Rehu, iha' pah nganak kuri-kuri anak aké' dahin anak doh lahuh.

20Urip Rehu uh telo'-pulu-dua' duman, iha' ha' nganak Serug. 21Alem urip Rehu dua' atuh tusu duman men'uh iha' uh nganak Serug atih, iha' pah nganak kuri-kuri anak aké' dahin anak doh lahuh.

22Urip Serug uh ateng telo'-pulu duman iha' ha' nganak Nahor. 23Alem urip Serug murip alem dua' atuh duman men'uh iha' uh nganak Nahor, iha' pah té' nganak kuri-kuri anak aké' dahin anak doh lahuh.

24Urip Nahor uh dua'-pulu-pitan duman, iha' ha' nganak Terah. 25Alem urip Nahor murip alem ji atuh pulu-pitan duman men'uh iha' uh nganak Terah tih lahuh, iha' pah té' nganak kuri-kuri anak aké' dahin anak doh lahuh.

26Urip Terah tusu-pulu duman, iha' ha' nganak Abram, Nahor dahin Haran lahuh.

Pahu Terah

27Anih nah pahu Terah, iha' nganak Abram, Nahor, dahin Haran. Haran pah nganak Lot. 28Uh anan matei nah Haran, iha' aleng una' matei té' taman na', ha' Ur-Kasdim daléh avan kanak na' menuna'. 29Ngehawa nah Abram dawa' Nahor lahuh. Aran doh Abram Sarai, aran doh Nahor Milka anak Haran, Haran tih aleng taman Milka dawa' Yiska. 30Sarai atih nyalun ha', nusi' ha' hipun anak.

31Pelalau tei nah Terah geri Abram anak na', dahin Lot sau na', iha' tih anak Haran, dahin Sarai divan na', iha' tih hawan Abram anak na', lim dalo' pah tei bulak men daléh Ur-Kasdim tei ha' Kanaan. Ateng nah dalo' ha' daléh Haran, bi murip nah dalo' hinan. 32Urip Terah dua' atuh lima' duman, matei nah iha' ha' tana Haran nan.

Currently Selected:

ARING KELESING 11: TDK1990

Highlight

Copy