Mak 7
7
Ni ñanlaameku Ñanyahudo anlinninimehne
1Ayikyik bísiba, m'antohne a dayrahu ñanfarasiyaŋ índukoŋ ingi ñankeekihu Hañaañeno índukoŋ m’anfúrumor Jerusalem andék andak anjóg imbi Yensa. 2Waathu guyaahálaŋo ankoroskoros maro ñantaalibehu Yensa, índukoŋo halakánin rennireŋ. Gúmár ingine laháraŋaŋ salijoŋo maŋ ni immereŋ ammiihulne.
3Úpájuli, immereŋ ñanfarasiyaŋo ingi Ñanyahudo índukoŋo anlahlah gudeemayo gu maamaamankánin ankaanahne fam. Gúmár ingine danfoola hoŋon hoŋon ni yicireŋeŋ halakánin a nintiku gudeemayhánin. Annohunkuneh anyic halaho ininkaman n'aññantane ankaan k'ankir anfoola. 4Angu faka, immereŋ gandéki a marseŋo, gaŋŋúnci aññantay anyica janaabo banfoolam. Anfak anyéjeh maro bihano ingi balandáro ingi haboolo aññantay anyicin a nintiku hadeemayhinin halabahi ha immereŋ anlahne.
5Angu bísibaŋo bímár, ñanfarasiyaŋo immereŋ ingi ñankeekihu Hañaañeno, banjógi imbi Yensa ammiihem, anyéjem:
- Inini ingah! Horaŋ akanne ñantaalibehen gara ambúuñah gudeemayhu maamaamankintor? Ingah! Immereŋ ganfoolafoola ni halakánin anoori, maro gara anlahah salijoŋo ininkaman n'anñantane anlah.
6Banlóbi nim mees, Yensa ayéj:
- Ninkinan! Ho Anabila Esay alóbne gubaarhánan, akankaan ininkaman marigen. Maro ninkinan ñanfilij! Úpájuleŋ, fam Anabila Esay añañaañ ho Díino ayéjeemne a nintiku ninkinan. Díino ayéji:
Jamaŋo immereŋ aji ujanteni balókánin, úyejhineh karo immereŋ ambúuñaheembuuña
Kama immereŋ gúbuuñaŋo gambúuñaheemne, a buruhánin bareŋ gamukne.
Púturoŋ a hafitenkinin. Hafitenkinin arahayrahay k’aŋantin ingi me. #7.6 Esay 29.13
Nim Díino alóbne a gubaarhu ninkinan n’umiireŋne.
7Díino ayéji:
Immi ii, úyejhineh gambúuñahumbuuña kanda búbuuñaŋo búmár nafaaraŋ
Horaŋ akanne k'íyeji nim? Nim gíyejhinehne maro immereŋ ii k’anwonnun luwaŋaŋo k'anyéj me Díino iwonnunne ámáráŋ, agida hómár gireŋ!
Immereŋ anwonnoorane luwaŋankánin.
Gúmár akanne íyeji búbuuñaŋo búmár nafaaraŋ. #7.7 Esay 29.13
Nim Anabila Esay añaañne fam.
8Yensa afak ayéj ñanfarasiyaŋo ingi ñankeekihu Hañaañeno m’ansorne dam:
- Ninkinan! Ningeŋ baŋ! Ufoyeŋfoy gúbuuñahu luwaŋanku Díino. Hodeemayhánan ho fam, hómár gufaŋunumeŋne n'ulahaŋ. 9Hee! Ninkinan! Udabuneŋdabun beŋen luwaŋanku Díino, k’ufaŋánahaŋ n’uliŋuneŋ hadeemayo inha maamaamankánan. H’okaaneŋne na jóndoŋ!
10Eke Musa ayéjyej fam: Búuñaar nunkon ingi bááhán? #7.10 Gúfuro 20.12 Ki wúuro m'atemehne báábám wola nunom, añantay abujaa. #7.10 Gúfuro 21.17
11Kanda ninkinan, neeraŋ gúyejeheŋne jamaŋo? Eke gúyejheŋyej wúuro jandiŋ bakááñiñum ñamboshon, apiren afoy k'afant ayéjeeniŋ: «Inini, dipiren k'íkááñinoonuŋ mara h'elahne ikankáneh jako imbi Díino.» Ninkinan, inini gulininkeeniŋne. 12Agida na gúyejheŋyej wúuro daha akááñinahin ñamboshunom. Agida Díino ayéjyej wúuro añantay akááñinahin ñamboshunom. 13Ingah, a bikaaneno bímár b'ukaaneŋne ukaaneŋkaan ki ho Díino amiihulne yikireŋ sembe a binanan, k'upireneŋ utifilineŋ hodeemayhánan. Angu ufak ukaanaŋ holabahi h'amíir ingi hakaanamo inha.
14Yensa balóbi nim mees, ahuyor barumuno b’aŋantinne hotir. Ayéjeeniŋ:
- Ninkinan, dókulo k’íteekinoonuŋ! Moŋon moŋon akaan na bulaahánam ki nim uyennehin hóbun h'édekehne gúteekinkinan. 15Inini, horaŋ akankánehne ki wúuro rennireŋ imbi Díino? Uraagofoŋo, guyroŋ karo h'aŋanahne a buruhon akankánehne ki Díino ayéjo rennuro a binaanam. Wówo! H’afúruntohne imbi uraagofoŋo, hómár akankánehne ki wúuro darenn a gúbidhu Díino. 16Inini, moŋon moŋon m’ayik ilaaŋo iyennehinumo akaan na bulaahánam.
17Angu balóbi hómár mees, Yensa akeng k’abénn na barumuno adék aŋan a gufaco. Baŋani a gufaco, ñantaalibehinem ankeng ankokálinem ba na. Bampút anyéjem:
- Yensa fi funaareŋo f’úlobne, bonkerer k’ukeekir mint!
18Yensa ayéj:
- Ninkinan ii, íyeji hóge pirendoŋ k’ukeekileŋ funaareŋo f’élobne? Karo pájiiroŋ maro h’aŋanahne a buruŋo guyroŋ karo hómár agune ki uraagofoŋo darenn a gúbidhu Díino? Wówo! Hómár gireŋ! 19Úpájuleŋ, h'aŋanahne a buruŋo hómár dapiren k'aŋan a jamméejo. H'afoolaane, hámár gakucohne a búyeken k'afúror.
Yensa a bíyejeno bímár gayéjne gufoola goŋon goŋon arennrenn, ajónjoon gufoola. 20Afak ayéjeeniŋ:
- Ingah! Hójondoŋo ho wúuro akaanahne, k'afúrumoh a jamméejhinem, hómár gakaanahne ki wúuro úmár darenn a gúbidhu Díino. Guyroŋ a gúbidhu h’aŋankánehne a buruŋo.
21Úpájuleŋ, hójondoŋo h’okankaŋne, a jamméejenkánan gafúruntohne. Hójondoŋo hómár ingine horaŋ? Hómár agune kawoseno kajóndoŋo, kunnungaŋo kúnjondoŋo, hódugo, bubujhu wúur, 22basangooro, kanfaŋunumo, balápuro, bujodhu wúur, bakunariŋo, kenkaareŋo, buteemumo, gufuuhurinooraŋo, kawoseno ka yikireŋne nafa. 23Hómáráŋ nip a jamméejo gafúruntne, te jínuboŋo ámáráŋ tu gakaanahne ki wúuro darenn imbi Díino.
Nim Yensa alóbne.
Da udikaamo mu guyroŋne Uyahud afiyumne Yensa
24Afúrumi na, Yensa ingi ñantaalibehinem ankeng hadéko bi bukooro b'aretuhne Tira. Bampút, Yensa aŋan a díg adúk. Agida síibaaraŋ ki jamaŋo ampájul maro na gakucunaane. Kanda haman nim jamaŋo nip andék ampájul. 25-26Angu ayikyik udikaam m'ayennehin gu Yensa. Agida udikaamo Uyahud gireŋ. A bukooro b’aretuhne Fenesi gabosaane. Agida bámár agune a didiirahu Siri. Angu bágidhinem, fáguh aŋanemne. Angu Yensa bapút, maŋ fam udikaamo úmár adék ba imbi Yensa. Bapút aruŋa a jannokunom k’akiinaham ingi sembe k’amaanenem afúnndurom fáguho imbi bágidhinem. 27Angu udikaamo bakiinay nim, Yensa ajaabiyem ingi funaareŋo unfu ayéjem:
- Ingah! Dajóon idooh guyaahálahu jaraaho íneer jiheŋo. Infant ímbenduroŋ jaraaho k'anyaahála.
28Yensa balóbi nim udikaamo ayéjem:
- Arafaŋ, h'ólobne marigen. Me údeka. Ílokiloki maro me jihi, kanda jiheŋo ganyaahálayaahála ho jaraaho anhupne.
Nim udikaamo alóbne. 29Balóbi nim Yensa ayéjem:
- Inini n'ujaabine nimbun, upiren údek úŋuñ. Fáguho afúnnaafunn.
30Angu Yensa balóbi nim mees, udikaamo akeng aŋúñ adék alahun bágidhinem n'awaana k’aguy a básuumo n'angu fáguho afúrne a binaanam.
Da Yensa ajébunne mumuneŋo
31Afúrumi na, Yensa ingi ñantaalibehinem anfúrum bi bukooro b'aretuhne Tira andék ba a bukooro b'aretuhne Sidon. Anfúrum Sidon andékum resiyoŋo n'ahuyuhne Resiyoŋo no Akooroŋo Haalaŋo k’aŋŋoolin ba a didiirahu Galile. 32Angu f'angune na índiigeen índukoŋ andékiter údiigeen újebireŋ ba imbi Yensa. Údiigeeno úmár ateerilinteerilin, afak anarah balóbo. Angu bampútri ankiina Yensa ingi sembe alóbundutom silakánam ki nim ajéb. 33Banlóbem nim, Yensa adooh údiigeeno anyiirla a barumuno. Banyiirlay aŋan hakununkunom a ilaahu údiigeeno k'afúnn. Alotun gukununkunom k'amapun bulemeeshu údiigeeno.#7.33 Agida Yensa apiren ajébun wúur ingi gúlob bareŋ, kanda karo na n’asíiba bujellihinku uteririlino maro bújebinkinem gaŋane. 34Bakaani nim mees aning a raafo. Anuumul pef. Ayéj:
- Efata!
Nim ingine «Kimbilaar! » 35Yensa balóbi nim údiigeeno atoŋ guyennehino ingi balóbo nimbun. 36Angu Yensa ayéj m'ansorne:
- Inini, ninkinan, biki úduk úteekineŋ haani wúur h'awusunane!
Nim Yensa alóbne, kanda maŋ ni atengaheeniŋne daha anlób, maŋ nim ganlóbohne. 37Jamaŋo anlóboh a gubaarhu tamaseero nómár. Abineeniŋbin tor fo anyéjayeh:
- Údiigeeno úmár, hoŋon hoŋon gaŋane gukaan, akaan hóbun. Haani gújebunku wúuro m'ateerilinne ingi mumuneŋo, hómáráŋ nip akankaan hóbun.
Nim jamaŋo ganlóbohne.
Currently Selected:
Mak 7: GD
Highlight
Share
Copy
Want to have your highlights saved across all your devices? Sign up or sign in
Copyright Vision Intégrale, Senegal
