Mak 2

Fo Yensa ajébunne údiigeeno m’afolone mu arino amuusne

1-2Ásibaŋ bawusunay, Yensa aŋoolin ba a saariŋo n’aretuhne Kapáneyum. Jamaŋo banyennehini hómár andék ba a dígo n'akucunaane k’anrumun na tip fo dígo atój fanfaŋ. Haani k'aŋŋanunkunehne a burukumbaano yikireŋ. Yensa n’aŋan a gufaco k'aŋay bukawandinku jamaŋo Gúloku Díino.

3F'aŋane balóbo, índiigeen irenik ampútor n’anyengoror údiigeen úduk a yindayindo. Agida údiigeeno úmár, arinkinem afoyfoy fo pirendeŋ hadék. 4Índiigeeno ansíiba búdekuku újebireŋo imbi Yensa kanda afeereeniŋ maro nanka dampiren k’aŋŋan a gubaarhu barumuno. K’angu anyéj:

- Inini, mintoroŋ k'inkaanoonuŋ neeraŋ? Ingah! Inini, iŋŋafoŋ ba a raafununku teraaso k'innuhoŋ teraaso k’impirenoŋ inkucunoŋ újebireŋo imbi Yensa. K'angu aŋŋaf a raafo k'annuh teraaso anliihayhin ingi ka Yensa agune, k'ankucun mu arinkinem afoyne a yindayindo baman maŋ na a jégenenku jamaŋo. Immereŋ nim gankanne.#2.4 Agida hádigenkinin furiiraa. Akolenaakolen bareŋ.

5Yensa bafégi hómár, apájul maro índiigeeno immereŋ anfiyumemfiyum dáde. Angu ayéj újebireŋo:

- Ingah! Úbákum, jínubonkon tu akafariyaakafari.

6Agida ayikyik dam ñankeekihu Hañaañeno impinam m’annoone na. Banyennehini ho Yensa ayéjne immereŋ tu anlóboora ingi jamméejenkinin, anyéjeh:

7- Jeh! Ummu neeraŋ galóbohne ayéjeh? Agida Díino ba bareŋ apirenne akafari jínubonku wúuro. Eke na budoku palaashu Díino gasíibane?

Nim gammiihoorane a jamméejenkinin. 8Banwoseni nim, Yensa apájul maro nim ganwosenne ni lóburoŋoŋ. Ayéjeeniŋ:

- Ii, ninkinan, horaŋ akanne k'uwoseneŋ nim a jamméejenkánan? 9Ningeŋ baŋ. Na nip ínkánduko. Horaŋ gufaŋumne n’úsiibahaŋ buyennehino? Karo íyejem: «Jínubonkon akafariyaakafari.», karo nuko íyejem: «Kenger k'udooh yindayindhen k'údek!» ? 10Iyoo ninkinan túyoreŋ baŋ! May k’úfegeŋ maro Údiigeeno M'acaabenaane, ayikyik binaal a duniyaŋo inno k'akafari jínubonku jamaŋo.

Balóbi nim, ayéj mu arinkinem afoyne:

11- Inini fi, kenger, k’udooh yindayindhen k'údek k’úŋuñ!

12Údiigeeno akeng maŋ fam a sígihu jamaŋo nip k'adooh yindayindhinem k'aŋay hadéko. Jamaŋo nip alaaleeniŋ dáde n’akanne nim. Anramun Díino k'anyéjayeh:

- Hey mintoroŋ! Ningeŋ baŋ! Fégahadoŋoŋ h'amíirne!

Ka Yensa ahuyne údiigeeno m’ahuyuhne Lefi

13Bísiba Yensa adék aŋoolin a bakaranku jakaamo. Bapúti na jamaŋo anrumun tip andak anlahuntam na k’aŋay bukawandinkinin. 14Bakawandini mees, f’aŋay buŋoolino alahun na ujutiŋo, úbáku Alfiyus, n’anoone a taabálo bujaku jutiŋo. Gurethinem Lefi. Bafégem, ayéjem:

- Dókulo k'utifilineem!

Lefi, bayennehini hómár, akeng k'ankokay ingi Yensa.

15K’angu andék imbi Lefi ingi ñantaalibehinem mees. Bampút bim annéereeniŋ guyaahálaŋo. Baŋŋay guyaahálaŋo ambok na ingi ñanjutiŋo ingi ñantaalibehu Yensa ingi ñanjóndoŋo ñanlabahi m'anlahunne na. Úpájuleŋ, immereŋ gantifetif Yensa anrumun. Agida ñankeekihu Hañaañeno m’antohne a dayraŋo n’ayéjuhne ñanfarasiyaŋo, immereŋ annik ansorne dam. 16Inini immi, f'anfégne ni Yensa aŋane guyaahálaŋo kantíg ínkánduk ingi ñanjóndoŋo ingi mees ñanjutiŋo, angu anyéj ñantaalibehinem:

- Horaŋ akanne k’anyaahála kantíg ínkánduk ingi ñanjutiŋo ingi mees ñanjóndoŋo?

17Agida fo ñankeekihu Hañaañeno anlóbne nim, Yensa n’ayennehin, ayéjeeniŋ:

- Ninkinan! Hóge m’anjébne immereŋ anhaajane gusaajaŋo? Wówo, mi jébireŋeŋne, immereŋ anhaajane gusaajaŋo. Me ii dékuntári buhuyhu m’anyéjne anwúuhwuuh. Ñanjóndoŋo gídekuntne guhuyo.

H’akanne ñantaalibehu Yensa sumuroŋoŋ dam

18Afúrumi na, ayikyik bísiba bi ñantaalibehu Yaya ingi ñanfarasiyaŋo ansum te ñantaalibehu Yensa sumuroŋoŋ. Angu jamaŋo banfégi hómár andék ba imbi Yensa ammiihem anyéj:

- Ingah! Ñantaalibehu Yaya sumo gaŋŋane. Ñanfarasiyaŋo mees ansumsum. Angu horaŋ akanne ki ñantaalibehen ŋayraŋaŋ sumo gub?

Nim gammiihne Yensa. 19Yensa aŋoyin ayéjeeniŋ:

- Iyéji aji ayiki bajah hóge bísibaŋo bímár ñanjéebuno índiigeeno ansumhuneh? Dansum de! Damanta údiigeeno ummo na ingi immereŋ#2.19 Agida, imbi immereŋ údiigeeno usorhuneh d’ankankánehne bajakánam. ankankáneh fet. Dansum. 20Kanda ayikhineh bísiba bi údiigeeno afúnnhunuh a halakánin. Dam gansumhánehne.

21Ingah! Gusolhon gukuuro g’afacaane, hóge údekhineh ugila pis awunkul k'údek uleeŋ a gusolo gudefinno? Wówo! Dukaan nim maro aji ukaani nim píso awunkulo aŋoolinkineh apuñ gusolo gudefinno k'angu gufacaheno afaŋununkuneh n'afuuh. 22Maŋ nim mees gagune a jíbáágo. Aji udoohi jíbáágo adefinno k'urun na baaruku reseŋo bawunkulo k'urok, atoŋdir guboho afilihineh jíbáágo k'ahupa nip. Gúmár gíyejoonuŋne wúuro aji ayiki baaruku reseŋo bawunkulo atibilaháneh jíbáág awunkul k’arun na baaruku reseŋo.

Nim Yensa ajaabiyeeniŋne dam f'ammiihemne a gubaarhu sumo.

Ni Yensa alóbne a nintiku bísibaŋo bi guyohálaŋo

23Afúrumi na, ayikyik bísiba bi guyohálaŋo bi Yensa ingi ñantaalibehinem aŋŋayŋay hadéko andékum a barahaŋo b'anlááfulne buleŋo. Kanda ñantaalibehinem anfatah buleŋo k'ankábáh andékeh. 24Angu ñanfarasiyaŋo índukoŋo m'angune na f'anfégne hómár andék anlahun Yensa k'anyéjem:

- Fi, horaŋ akanne ñantaalibehen ankaan inho a bísibaŋo bi guyohálaŋo, agida adiigumaadiigum#2.24 Guyroŋ maro ñantaalibeŋo hódug gaŋŋane. A luwahánin anyikyik binaal k’anfat hotir a bakaranku guraho. Kanda ñanfarasiyaŋo anyéjyej maro ñantaalibeŋo aŋŋay doho, agida hómár adíigimaadiigum a bísibaŋo bi guyohálaŋo.?

Nim ñanfarasiyaŋo ammiihne Yensa. 25Angu Yensa ayéjeeniŋ:

- Inini, ninkinan, hóge karaŋahadoŋ a Hañaañeno ho Umaasaŋo Dawuda ingi ñankokaykinem ankanne a búkáso burenninno k’antúyohne Díino? A waato no Abiyata agune alimaamo adénno, ayikyik bísiba bi kúugo alaheeniŋne dáde, agida laháraŋaŋ honj. Angu andék 26anŋan a búkáso burenninno. Bampút anlahun úmbuuro n'ambúuñane Díino n’ayéjuhne úmbuuro arenninno. K’angu Dawuda adooh nómár afak anéer ñankokaykinem k'ankáb. Agida anñañaañ a Hañaañeno maro úmbuuro nómár alimaamaŋo ba bareŋ ampirenne ankáb. Kanda dam, haani guyroŋoŋ alimaamaŋ, Dawuda ingi ñankokaykinem ankábkáb úmbuuro nómár.

Nim Yensa ayéjne ñanfarasiyaŋo. 27Abocin ayéjeeniŋ:

- Ingah! Díino ayabyab ñanraagofoŋo jandiŋ bawonnunumne bísibaŋo bi guyohálaŋo. Bayabi ñanraagofoŋo mees awonnun bísibaŋo bi guyohálaŋo ba bajónkánin. Guyroŋ karo anohumnohum awonnun bísibaŋo bi guyohálaŋo k’akir ayab ñanraagofoŋo ba bajónku bísibaŋo bímár. 28Gúmár gíyejoonuŋne Údiigeeno M'acaabenaane agune ulaameku honjoŋo nip, haani ulaameku bísibaŋo bímár.

Nim Yensa alóbne.

Currently Selected:

Mak 2: GD

Highlight

Copy