Yunus Gudoyahu m’andékehne gukaranku líibárhu Yunus
Gudoyahu m’andékehne gukaranku líibárhu Yunus
Hantaŋ añaañne líibáro inno?
Ñanlabahi ganyéjeyej údiigeeno m'aretuhne Anabila Yunus añaañne líibáro inno, kanda apirenpiren aguy úduk añaañne ho Yunus atifiremne. Na wúur pájiireŋ arenn. Kanda gúlobo ungu imbi Díino gafúruntne.
H'agune a mángáku líibáro inno
Fam, gúduk ungo na Umuyhintor abúuñor m'ayéjuhne anabiyoŋo ba imbi jamanku Israyel. Anabiyoŋoŋo immereŋ abúuñureeniŋbuuñ ba bujellihinku jamanku Israyel ni ámár Díino amíirne ingi n'anñantane andékorum mees imbi ámár Díino. Aji ankaani iniman ámár Díino ásiibane, anguyhuneh a básuum ingi ámár ingi índinenkinin ñanraagofoŋo mees. Anabiyoŋoŋo ambocin antengaheeniŋ a gubaarhu hójondoŋo h'ankaanahne k'anyéjeheeniŋ anñantay ankúbul jamméejenkinin imbi ámár Díino Amunduko. Angu, Yunus, úmár mees anabiyoŋ m'aguyer a didiirahu Israyel. Yunus afútifut díineŋ kemeŋ ingi jamaŋilall jandiŋ Yensa bapútumor.
Inini, túyoreŋ k'ilentinoonuŋ mara Jamanku Israyel, immereŋ angune m'anfúruntne a muhenku Ibrahiima, Siyaka ingi Yankuba. Immereŋ angune a bukooro bu Díino anéereeniŋne, b'aretuhne Israyel. Díino anéneer jamankánam, jamanku Israyel hoŋon hoŋon h'anhajane. Kanda h'afaŋumne n'asúum, hómár agune Díino fankánam agune a binanin. Agida n'atéekineeniŋ mara anñantay anjóonindem búkás burenni, ki nim úmár Díino apiren aguy a jégenenkinin. Agida n'asíiba bujellihinkinin n'amíirne ki nim immereŋ andak antéekin jamanku duniyaŋo nip. Nim ungu duniyaŋo nip anfég ni Díino asúumane ki nim immereŋ mees ampokunom k'ambúuñaham. Anabiyoŋoŋo ambocin anjellihineeniŋ ni Díino Amánduko amíirne, n'ayabne raafo ingi réeŋo.
Angu jamanku Israyel, neeraŋ gankanne? Immereŋ, buru k'ankaan ni Díino ayéjne, anhunam Díino Amunduko k'anŋay buramunku hafaaso ha jamanku akooroŋo adúkoŋo anramunahne. Faka, buru k'ampokun siyeŋo adúkoŋo mees, immereŋ anhaceeniŋ ansebeeniŋ. Angu Díino abúuñbuuñ anabiyoŋ ba butengahánin a nintiku hójondoŋo h'ankaanahne. Jamaŋo jahárindom. Ayéjeeniŋ ankúbul jamméejenkinin k'ankokur imbi úmár Díino Amunduko. Jamaŋo jahárindom faka. Agida Díino atúyeeniŋtuy f'amiñ k'ankaan nim, kanda lókiireŋeŋ. Angu adékiidek, Díino ayehuneeniŋ.
Angu a waato nómár fo Umuyhintor aŋayne butengahu jamanku Israyel, abúuñ Yunus a bukoor b'aŋantin ba imbi mi guyroŋoŋne Jamanku Israyel. Bim gabúuñne Yunus k'adak atengaheeniŋ. Bukooro búmár, Niniwa garetuhne. Agida jamanku Israyel pokundoŋoŋ jamanku Niniwa. Immereŋ anhaceeniŋhac. Ansebeeniŋseb.
Bukooro b'aretuhne Niniwa, neeraŋ gamíirne?
Niniwa bukoor búde. Apirenpiren aguy bukooro b'afaŋunumne n'afuuh akooroŋo nip n'angune a duniyaŋo. Umaasaŋo m'amarahne Niniwa ayikyik sembe dáde a maasayahánam, te armehinem afufuuh. Hafaashánin alabalaba dáde. Angu jamanku duniyaŋo nip ampájul mara jamanku Niniwa ansaŋarisaŋari dáde k'ambénuheeniŋ. Ansíibáásiib ki Díino ayehineeniŋ.
Iyoo! Angu Yunus babúuñaa Niniwa lókiireŋ hadék bim.
H’ayikne Yunus a gubaarhu n’afoyne hadéko ba Niniwa, jamanku duniyaŋo nip anjahalijahali. Fo ukaraŋ líibáro k'upiren úpájul hómár.
Ho kóliibáro inko ajellihinne mintor
A gubaarhu misaalo inno, mintor nip impirenoŋ ímpájuloŋ mara Díino arennrenn. Afoyfoy hójondoŋo. Bankabankánam yikireŋ kammuk. Kasáraŋ buñuumul. Asíibáásiib buyaafunku jamaŋo m'ankúbulne jamméejenkinin k'ankokur imbi ámár Díino. Impirenoŋ ímpájuloŋ a gubaarhu misaalhu Yunus maro Díino apokunpokun jamanku duniyaŋo nip. Guyroŋ jamanku Israyel bareŋ gapokunne. Mintoroŋ nip gapokunne. Asíibáásiib k' ínjooninoŋ bájegenenkintor ingi úmár Umuyhintor.
Currently Selected:
Yunus Gudoyahu m’andékehne gukaranku líibárhu Yunus: GD
Highlight
Share
Copy
Want to have your highlights saved across all your devices? Sign up or sign in
Copyright Vision Intégrale, Senegal