Luka 3

Ekutazo ya Jowani Omukolobezi

(Mateu3.1-12; Maleka1.1-8; Jowani1.19-28)

1Mu mwaka no likumi ni mutanu mu puzo ya Tibele Sesale, Ponse Pilato abo yooli omubusisi no Judeya, Heloda neli omwendisi no Galileya, minaye Filipi yooli omwendisi no naha ya Ituliya ni Tilakonita, mi Lisanyasi neli omwendisi no Abilene, 2mi Annasi ni Kayafasi ali apulisita akulu, eliywi lya Nyambe sebeli liiya kwa Jowani omwana Zakaliya mu lihalaupa. 3Cwale sebeli ota mu naha yonje eyo ikubapile ni Jodani yo kutaza ekolobezo no kubaka nji eibi ilemenwe. 4Kanyi omo ku n̄olelwe mu buka no maywi a Isaya omunuhi wa Nyambe nji,

“Eliywi no munjili kame likuweleza mu lihalaupa eli lyaamba nji,

mu lukise endila no Mbumu,

mubakenye endila yaye nji yoloke!

5Omusindi onje mba wiyala,

mi akalundu ni lilundu mbei ulululiwa.

mi eyi ibetile mbei oloka,

ni tindila no ku tengama mbati lukisiwa.

6Mi omunu yonje mba mono okuyoyisa kwa Nyambe!’”

7Cwalehe sebeli wambela aanu no kupula awo ana kwiiya ku kukolobeziwa kwa yonyene nji, “Anyi aana no tinyoka! Anyine ona milemusa okucila okutweba oko kwiiya? 8Mu beeke etimbuya eto tifanena nji na mubaka. Mi mulese oku tangisa okwamba mukaci kenu nji, ‘Sitetu ni Abulahama.” Kakuli kame ni myambela nji Nyambe kame atwesa oku shimba amawee aa okwaatenda aana a Abulahama! 9Simba abano esamu kame si beekilwe ba mibisi no itondo, mi cwale esitondo sonje eso suulwa oku beeka embuya no kuwaba kame sitemiwa ni ku siyumbela mu mulilo.”

10Cwale enyangela sebeli imwibanguta nji, “Iikene cwale sa tutende?”

11Jowani sebeli waatambula nji, “Woyo yonje okwite eikumango yiili, aku tabele ni woyo waakwite, ni woyo okwite esilya, atende ngeeso ni yonyene.”

12Atelisi nonyene sebeli aiiya kwa Jowani mu kukolobeziwa, sebeli amwibanguta nji, “Mwiyeti, iikene sa tutende?”

13Cwale sebeli waambela nji, “Mulese okutelisa oku bitelela eso mu nalaelelwe.

14Amasole nonyene sebeli amwibanguta nji, “Cwale aci iikene sa tutende?”

Cwale sebeli waambela nji, “Mulese okwitela omunu mu kukandimeka simba oku mubyangula, mi musepe etituwelo tenu.”

15Aanu atatelele, mi onje kame ano kwibanguta mu micima yoo nji mwendi Jowani yokame Kilesite. 16Jowani sebeli waatambula onje nji, “Mene, kame ni mikolobeza ni meyi, kono woyo onibita ku maata kame akeile, simba etikwele no tinjangwa taye sitwese okuti nungutula, yonyene kame sa mikobeze ni Mebo No Kukena ni mulilo. 17Enumbi yaye kame ili mu lyoko lyaye, mi kame sa fefule oubeke ba patelo niku ungeka ouloto waya mu sishete, kono omuuku kame sa ucin̄iwe mu mulilo no kwaabwa.”

18Cwale mu tindila tinjili no kupula, kame ana ku kutaza amaywi no kuwaba kwaanu. 19Kono Ombumu Heloda, sebeli onyaziwa kwa Jowani mu taba no Helodiyasi omukataa minaye, ni mu inu yonje no kwiiba eyo ana ku tenda. 20Cwale Heloda sebeli oekeza kweyo yonje no kwiiba mu kwingenyeka Jowani mu tolongo.

Ekolobezo ya Jesu

(Mateu3.13-17; Maleka1.9-11)

21Cwale onje aanu aba ana ku kolobeziwa, ni Jesu ni yonyene sebeli okolobeziwa. Yo lapela, eliwilu sebeli liyatuluka, 22mi Emebo No Kukena sebeli ishetumuka beulu yaye mu siumbiwa sikufeka kanyi elikwici, mi eliywi sebeli litunda ku wilu eli lyaamba nji, “Yawene mwanange woyo osingiwa, ni kukatelwa.”

Olusika lwa Jesu

23Jesu aba ana ku tangisa omusebezi waye yoli ni myaka makumi aatu. Yoli omwana, kanyi omo kuna kutendahalela, nji wa Josefa, omwana Heli, 24omwana Matate, omwana Lebi, omwana Meleki, omwana Janai, omwana Josefa, 25omwana Matatiyasi, omwana Amosi, omwana Nahumi, omwana Eseli, omwana Nagayi, 26omwana Maate, omwana Matatiyasi, omwana Semeini, omwana Joseke, omwana Juda 27omwana Joanani, omwana Lesa, omwana Zalubabele, omwana Shealutiele, omwana Neli, 28omwana Meleki, omwana Adi, omwana Kosamu, omwana Elimadamu, omwana Ele, 29omwana Joshuwa, omwana Eliezele, omwana Julimu, omwana Matate, omwana Libi, 30omwana Simioni, omwana Juda mwana Josefa, omwana Jonami, omwana Eliyakimi, 31omwana Meleya, omwana Mena, omwana Matasa, omwana Nasani, omwana Dabida, 32omwana Jese, omwana Obedi, omwana Bowasi, omwana Salumoni, omwana Nashoni, 33omwana Aminadabi, omwana Adamini, omwana Alini, omwana Heziloni, omwana Pelezi, omwana Juda, 34omwana Jakobo, omwana Isaka, omwana Abulahama, omwana Tela, omwana Naholi, 35omwana Selugi, omwana Leu, omwana Paleki, omwana Ebele, omwana Shela, 36omwana Kainani, omwana Alifakasadi, omwana Sema, omwana Nuwe, omwana Lameke, 37omwana Metusela, omwana Enoki, omwana Jalidi, omwana Mahalaele, omwana Kainani 38omwana Enosi, omwana Seta, omwana Adama, omwana Nyambe.

Currently Selected:

Luka 3: lyn

Highlight

Copy