زکریأ ۹
۹
ایسرأییلٚ همسأده قومأن موجأزأت
1 خوداوند قومأنٚ موجأزأتَ وأگویا بوکوده، چونکی اون فقد ایسرأییلٚ قومأنَ خو چوم جیر نأرِه، بلکی تومأمٚ دونیأ قومأنم پأیِه. اون حدراخ و حماتَ کی دمشقٚ نیزدیکی نٚهأ موجأزأت کونِه. 2 حتّا صور و صیدونٚم تومأم خوشأنٚ فندأنٚ اَمرأ اونٚ موجأزأتٚ جَا امنیت میأن نِئیسده. 3 هرچن صور خؤرِه موحکمٚ بورج و بأرو چأکوده و اوندر مأل و مینأل جمَ کوده کی نوقره و طلأ اونٚ رِه صأرأیی فورشَ مأنِه، 4 ولی خوداوند تومأمٚ اَ چیأنَ اونٚ جَا فأگیره. اونٚ موحکمٚ سأختمأنأنَ فوکونٚه دریأ میأن و اونَ آتش فأکشِه زیمینٚ اَمرأ ایتأ کونِه.
5 او وخت کی اشقلون اَ مأجیرأیَ فأندرٚه وأشٚت کونِه. غزه دردٚ جَا خؤرَه وأپیچِه و عقرون ترس جَا پٚرکه، چونکی او وخت کی بیدینٚد صور نتأنِه دوشمنأنٚ جولو اَمؤنَ بیگیره، اَشأنٚ اومید بأدٚ اَمرأ شِه. غزه شکست خوره و اونی پأدیشأ بوکوشته بِه و اشقلون آدمأنٚ جَا خألِه بِه.
6 غریبه‌یأن اشدودٚ شهرَ گیرده و من فلسطینٚ آدمأنٚ گولأز کودنَ ایشکنٚم. 7 اوشأن دِه حرأمٚ گوشت و او گوشت کی هنو اونٚ میأن خون درّه، نوخورٚده. او البأقی آدمأن فلسطینٚ شین مٚرَه پرستٚش کونٚده و ایتأ جٚه یوهودأ قومأنٚ مأنستَن می قومأنٚ میأن قوبیل بٚده. عقرونٚ فلسطینیأنٚم می قومأنَ دوچوکده، هوطؤ کی یبوسیأن پیشتر سالأن اَ کأرَ بوکودٚد. 8 من می سرزیمینٚ دؤرٚوٚرَ پأسبأنی کونٚم کی ولأنٚم او سپأهیأن کی فوتورکده، ایسرأییلٚ خأکَ بٚشٚد بودورون. دوشمنٚ کردکأرَ خُب فأندرٚم و ولأنٚم او غریبه‌یأن کی ستم کونٚده ایوأردِه می قومأنٚ سرزیمینٚ سٚر تأختَ گیرد.
ایسرأییلٚ پأدیشأ اَمؤنٚ وعده
9 «اَی صهیونٚ دؤختر، خوشألی بوکون! اَی اورشلیم پیروز بوستنٚ فریأدَ بولندَ کون! اَسه تی پأدیشأ اَیِه تی ورجأ؛ اون عأدیل و پیروز ایسٚه، ولی فروتن و ایتأ اولأغٚ رو سوأر ایسٚه، ایتأ اولأغٚ زأی. 10 جنگی اَرأبه‌یأنَ ایسرأییلٚ جَا و جنگی اسبأنٚ اورشلیمٚ جَا اوسأنم و جنگٚ کمأنأن ایشکفٚده، چونکی شیمی پأدیشأ تومأمٚ قومأنٚ میأن آشتی رأ تأوٚدِه. اونٚ مملکت جٚه دریأ تأ دریأ و جٚه فراتٚ روخأن تأ زیمینٚ دورٚ جیگأیأن درندشت بِه. 11 او عهدٚ وأسی کی شیمی اَمرأ دٚوٚستم و اونَ خونٚ اَمرأ مُهر بوکودم، شیمی اسیرأنَ جٚه هلأک بوستنٚ چأه جیویزأنم. 12 اَی او اسیرأن کی آزأدی رأفأ ایسأیید، وأگردید شیمی شهر میأن کی اَمنیتٚ میأن ایسأبید. ایمرو شٚمٚره قول دٚهٚم او سختیأن کی بٚکشِییدَ دو مرتوه ویشتر تلأفی بوکونٚم! 13 اَی یوهودأ، تو می کمأن و اَی ایسرأییل تو می تیر ایسی. یونأنٚ مردأکأنٚ ضد، اورشلیمَ ایتأ شوجأع سروأزٚ شمشیرٚ مأنستَن حرکت دٚهٚم.»
خودا قومأنٚ پیروزی
14 خوداوند خو قومأنَ جنگٚ زمأت رهبری کونِه. خو تیرأنَ آسمأنٚ برقٚ مأنستَن تأوٚدِه. یهوه خوداوند جنگٚ شیپورَ بٚصدا اَوٚره و ایتأ گردٚبأدٚ مأنستَن کی جونوبٚ صأرأیی جَا ویریزه، شِه دوشمنٚ جنگ کودنٚ رِه. 15 یهوه صبایوت خو قومأنٚ جَا دفأع کونِه و اَشأن خوشأنٚ دوشمنأنَ سنگ‌اندأزٚ اَمرأ شکست دٚهٚده. اَشأن مستٚ مردأکأنٚ مأنستَن، جنگٚ میأن دأد زٚنده و خوشأنٚ دوشمنأنٚ خونَ فوکونٚده، قوربأنی خونٚ مأنستَن کی پیأله جَا فوکونٚده مذبح رو. 16 اوروجٚ میأن، اَشأنٚ خودا یهوه اوشأنَ جیویزأنِه، هوطؤ ایتأ چوپأنٚ مأنستَن کی خو گوسوٚندأنَ جیویزأنِه. اَشأن اونٚ سرزیمینٚ میأن تأجٚ جوأهیرأنٚ مأنستَن شبق زٚنٚده. 17 فأندٚرید چندر قشنگ و عألی ایسٚد! گندم، جوأنٚ مردأکأنَ بوگول اَوٚره و تأزه شرأب، کؤرأنَ.
Currently Selected:
زکریأ ۹: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org