متا ۲۸
۲۸
عیسا مورده‌یأنٚ جَا ویریزه
1 شَبّأتٚ پٚسی، یکشنبه روجٚ رِه صُب دٚم، مریم مجدلیه و اویتأ مریم، بوشؤده قبر سٚر.
2 نأخٚوٚرکی ایتأ توندٚ زیمین لرزه بوبوسته، چونکی خوداوندٚ ایتأ جٚه فٚرٚشته‌یأن، آسمأنٚ جَا بأمؤ بیجیر، مقبٚره ور بوشؤ و سنگی کی اونه دهأنه سٚر نٚهأبو‌یَ گٚرأ دأ ایتأ کنأره و اونی سٚر بینیشت. 3 فٚرٚشته دیم توخ توخ زِیی و اونی لیوأس وٚرفٚ مأنستَن سیفید بو. 4 نیگهبأنأن اونی دئنٚ اَمرأ زهله بوکودٚده، بپرکٚستٚد و مٚیّتٚ مأنستَن، بی‌حرکت زیمینٚ سٚر بکفتٚد.
5 فٚرٚشته زنأکأنٚ بوگفته: «نوأترسِئنید! دأنٚم عیسا دونبأل گردیدی کی بوشؤ صلیبٚ سٚر؛ 6 اون اَیَه نئیسأ! هوطؤ کی خودش بوگفته بو، زٚنده بوسته. بأئید او جیگأ کی اونی جسدَ بٚنأ بود، شیمی چومٚ اَمرأ بیدینید. 7 و اَسه توندأ توند بیشید، اونی شأگردأنَ بیگید کی اون زٚنده بوسته و جلیلٚ ور شِه کی اوشأنَ اویَه بیدینه. جٚه خأطرَ ندید اَ پیغأمَ اوشأنَ فأرسأنید.»
8 زنأکأن ترس و ایتأ پیله شأدی اَمرأ قبرٚ جَا بوشؤده بیرون و توندأ توند بوشؤده شأگردأنٚ ورجأ کی فٚرٚشته پیغأمَ اوشأنَ فأدٚد. 9 هوطؤیی کی دووٚستندوبود، ایوأرکی عیسایَ خوشأنَ ور بیدِد!
اون بوگفته: «سلأم!» زنأکأن اونی پأ دکفتد و شورو بوکودٚد پرستٚش کودن.
10 عیسا اوشأنَ بٚفرمأسته: «نوأترسِئنید! بیشید و می برأرأنَ بیگید کی هر چی توندتر بٚشٚد جلیل کی مٚرَه اویَه بیدینٚد.»
نیگهبأنأنٚ گوزأرش
11 زنأکأن هنو فأنرٚسِه بود شهر، کی چنتأ نیگهبأن جٚه قبرٚ سٚر، خوشأنَ فأرٚسأنِد شهر و اَ موضو‌یَ پیله کأهینأن رِه وأگویا بوکودٚده. 12 اوشأنم، پیله کسأنٚ دِئن پٚسی و مشوٚرت اَمرأ، نیگهبأنأنَ خٚیلی پول فأدأده، 13 بوگفتٚده: «کی بیگید، "عیسا شأگردأن شبٚ رِه بأمؤده و او وخت کی اَمٚرَه خأب بٚسٚرَ شؤ، اونی جسدَ بودوزدأنِده." 14 اگه اَ موضو فرمأندأرٚ گوش فأرٚسٚه، اَمأن اونی جوأبَ دیهیم کی شِمِره موشکیل پیش نأیِه.»
15 نیگهبأنأن رشوه‌یَ فأگیفتد و اَ دورُغٚ خٚوٚرَ پٚخشَ کودٚده، جوری کی جٚه او زمأت تأ اَسه، یوهودیأن اَ نقلَ بأوٚر کونٚده.
عیسا پیله فرمأن
16 بأزین عیسا یأزده‌تأ شأگرد بوشؤده جلیل و ایتأ کو جور کی عیسا بوگفته بو، جمَ بوستد. 17 او وخت کی عیسایَ اویَه بیدِده، اونَ پرستٚش بوکودٚد، ولی بعضی جٚه اوشأن شک دأشتیدی کی اون هو عیسا بٚبه.
18 بأزون عیسا بأمؤ جولو و اوشأنَ بٚفرمأسته: «تومأمٚ ایختیأرأن آسمأن و زیمین دورون مٚرَه فأدأ بوبوسته. 19 پس بیشید تومأمٚ قومأنَ می شأگرد چأکونید و اوشأنَ، پئر و پٚسرَ و روح‌القدسٚ ایسمٚ اَمرأ آبٚ جَا تعمید بدید؛ 20 و اوشأنَ بأموجید کی تومأمٚ دستورأنی‌یَ کی شٚمٚره بٚدأم، ایطأعت بوکونٚد. موطمٚین بیبید هر جأ کی بیشید، حتّا اگه دونیأ دورترین جیگأیم بٚبه، من همیشٚک شیمی اَمرأ ایسأم!»
Currently Selected:
متا ۲۸: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org