لوقا ۱۰
۱۰
هفتأدتأ دِه شأگردٚ مأموریت فأدأن
1 بأزون، خوداوند عیسا هفتأدتأ دِه نفرَ اینتخأب بوکوده و اوشأنَ دوتأ دوتأ اوسه کوده او شهرأن و جأیأنی کی خأستی بشه 2 و اوشأنَ بٚفرمأسته: «مأصول زیأده، امّا کأرگرآدم نفر کم. پس، صأب مأصول جَا بٚخأیید کی مأصولٚ جمَ کودنٚ وأسی، شٚمٚره ویشتر کأرگر آدم نفرأن اوسه کونه. 3 بیشید و جٚه خأطرنبرید کی من شٚمٚره هچین بٚرّه‌یأنٚ مأنستَن گورگأنٚ میأن اوسه کودم. 4 شیمی اَمرأ نه پولی اوسأنید، نه بوغچه و نه حتّا ایتأ جوفت ایضأفه پأاَفزار. رأ میأنی‌یٚم سلأم کودن و کس‌کسٚ جَا خٚوٚر گیفتن وأسی معطٚلٚ نوکونید.
5 «هرتأ خأنه‌یَ کی بودورون بوشؤئید، پیشتر جٚه هرچی بیگید کی برکت اَ خأنه رِه بٚبه. 6 اگه اینفر اویَه لیأقت هو برکتَ بٚدأره، برکت اونَ فأرٚسِه و اگه لیأقت ندأره هو برکت شٚمٚره وأگرده. 7 پس هو خأنه میأن بئیسید و او خأنه جَا هیتأ دِه خأنه میأن نیشید. هر چی شٚمٚره فأدأد، بوخورید و وأخورید چونکی کأرگر آدم خو دسمزدٚ رِه حق دأره!
8 «او وخت کی ایتأ شهرٚ میأن بوشؤئید و شیمی رأفأ بأمؤده، هر چی شیمی ورجأ بنأده، بوخورید 9 و اویَه نأخوشأنَ شفأ بدید و اوشأنَ بیگید خودا پأدیشأیی شٚمٚره نیزدیکٚ بوسته.
10 «امّا اگه ایتأ شهر شٚمٚره قوبیل نوکوده، بیشید اویَه کوچه‌یأنٚ میأن و بیگید 11 "اَمأن حتّا شیمی شهرٚ گرد و خأکَ کی اَمی پأیأنَ دوچوکسته، پأکٚ کونیم. ولی بدأنید کی خودا پأدیشأیی فأرٚسئندٚره." 12 شٚمٚره گم کی دأوری روج رِه او فأسیدٚ سُدومٚ شهرٚ وضع، اَطؤچی شهرأنٚ وضع جَا خٚیلی بِیتره.
13 «وای بر شومأن اَی خورَزین و ای بیت صیدا! چونکی اگه موجیزه‌یأنی‌یَ کی شیمی میأن بوکودم، او صور و صیدونٚ فأسیدٚ شهرأنٚ میأن انجأم بٚدأبوم، اوشأن خٚیلی پیشتر، خوشأنٚ گونأیأنٚ جَا توبه بوکوده بود، ژندره لیوأس دوکوده بود و خرأبه‌یأنٚ میأن نیشتٚد کی خوشأنٚ نیدأمٚتَ نیشأن بٚدٚد. 14 هطؤیه دأوری روج میأن صور و صیدونٚ وضع، جٚه شیمی وضع خٚیلی بیتٚره 15 و تو اَی کفرناحوم، آیا آسمأنٚ جؤر شی؟ هیوخت! تو مورده‌یأنٚ دونیأیَ بیجیر شی!»
16 بأزین، خو شأگردأنَ بوگفته: «هرکی شیمی پیغأمَ قوبیل بوکوده، ینی مٚرَه قوبیل بوکوده و هرکی شٚمٚره پس بٚزِه، اَنٚ مأنه کی مٚرَه پس بٚزِه و هرکی مٚرَه پس بٚزٚنه، اونی کی مٚرَه اوسه کوده‌یَ پس بٚزِه.»
17 ایپچه بوستنٚ پٚسی، او هفتأدتأ شأگرد وأگردٚستٚده و خوشألی اَمرأ عیسایَ وأخبدأرٚ کودٚد و بوگفتد: «خوداوندا، حتّا پٚلیدٚ روحأنٚم تی ایسم اَمرأ، اَمی جَا ایطأعت کونٚده!»
18 عیسا بٚفرمأسته: «آمین، من شیطانَ بیدِم کی هچین ایتأ برقٚ مأنستَن آسمأنٚ جَا بیجیر بٚکفته! 19 من شٚمٚره اَ قودرتَ فأدأم کی لأنتیأن و عقربأنَ لقد دٚمٚج بوکونید و شیمی قودرت، تومأمٚ شیمی دوشمنٚ قودرت سٚر بٚچربه و هیچی هیوخت نتأنه شٚمٚره آزأر فأرٚسأنه! 20 اَنٚ اَمرأ، فقد جٚه اَنی وأسی خوشألی نوکونید کی پٚلیدٚ روحأن شیمی جَا ایطأعت کونٚد، بلکی اَنٚ وأسی خوشأل بیبید کی شیمی ایسم آسمأنٚ میأن بینیویشته بوبوسته!»
عیسا دوعأ شوکر کودنٚ وأسی
21 بأزون، عیسا دیل، خودا روحٚ خوشألی جَا پورٚ بوسته و بٚفرمأسته: «اَی پئر، آسمأن و زیمینٚ صأب، تٚرَه شوکر کونم کی اَ مأجرأیأنَ جٚه اوشأنی کی خوشأنَ دأنٚستٚن کس و زرنگ دأنده، لأپوشأن بوکودی و اوشأنی‌یَ نیشأن بٚدأیی کی کوجه‌دأنه زأکأنٚ مأنستَنٚده. اَطؤیه اَی پئر، تی خوشألی اَن بو کی اَطؤ انجأم بٚدی.»
22 بأزین خو شأگردأنَ بوگفته: «می پئر همه چی‌یَ می دٚس بیسپأرده. هیکس رأس‌رأسِی، پٚسرَ نشنأسه جغرز پئر و هیکس رأس‌رأسِی پئرَ نشنأسه جغرز پٚسر و هطؤیٚم اوشأنی کی پٚسر بٚخأیٚه اونَ اَشأنَ بٚشنأسأنه.»
23 بأزین او وخت کی او دوأزده‌تأ شأگردٚ اَمرأ تنأ بوبوسته، بٚفرمأسته: «خوشبحألٚ شومأن کی اَ چیأنَ دینید! 24 شٚمٚره گم خٚیلی جٚه پیغمبرأن و پأدیشأیأنٚ رِه آروزو بو اونچی‌یَ کی شومأن دِئندٚرید، بیدینٚد، امّا نیدِ‌ده؛ و اونچی‌یَ کی شومأن ایشتأوید، بشتأوٚد، امّا نشتأوستٚد!»
خودا پیله دستور
25 ایتأ روج ایتأ جٚه دینٚ عألیمأن، کی خأستی عیسا ایعتقاد دأشتٚنَ ایمتحأن بوکونه، اونی جَا وأوٚرسِه: «اوستأد چی بوکونم کی اَبدی زٚندیگی‌یَ بیأفٚم؟»
26 عیسا اونَ بوگفته: «تورأتٚ کیتأبٚ میأن، اَنٚ وأسی چی بینیویشته نٚهأ؟»
27 جوأب بٚدأ: «بینیویشته بوبوسته کی تی خوداوند، خودایَ تومأمٚ تی دیلٚ اَمرأ، تومأمٚ تی جأنٚ اَمرأ، تومأمٚ تی قوّتٚ و فیکرٚ اَمرأ دوس بٚدأر. و تی همسأده‌یَ تی جأنٚ مأنستَن دوس بٚدأر!»
28 عیسا بٚفرمأسته: «خٚیلی خُب، تویٚم هه کأرَ بوکون کی اَبدی زٚندیگی بٚدأری.»
29 امّا اونکی خأستی خو سوألَ موجّه نیشأن بٚده ایوأردِه وأوٚرسِه: «خُب، می همسأده کیسه؟»
خوروم سأمری مأجیرأ
30 عیسا اونی جوأب دٚئنٚ وأسی، ایتأ مأجیرأیَ تعریف بوکوده و بٚفرمأسته: «ایتأ یوهودی اورشلیم جَا شؤئؤندوبو اَریحا. رأ میأن دوزدأنٚ دٚس دکفته. اوشأن اونی پول و لیوأسَ فأگیفتد و اونَ بٚزٚن بیگیر بوکودٚد، زخمٚ زیلی جأده کنأر تأوٚدأده و بوشؤده. 31 هو زمأتٚم، ایتأ یوهودی کأهین جٚه او رأ دٚوأرٚستأندوبو. او وخت کی اونَ جأده کنأر بٚکفته بیدِه، خو رأیَ کجٚ کوده و او ور جأده جَا دٚوأرٚسته. 32 بأزین، ایتأ جٚه خودا خأنه خأدیمأن جٚه رأ فأرٚسِه و اونَ فأندرسته، امّا اونم خو رأیَ بیگیفته و بوشؤ.
33 «بأزون، ایتأ سأمری جٚه رأ فأرٚسِه. او وخت کی او زخمی‌یَ بیدِه اَنی دیل، اونی رِه بوسوج بأمؤ، 34 نیزدیکٚ بوسته و اونی ورجأ بینیشته، اونی زخمأنَ بوشؤسته و زومأت وأسِه و دٚوٚسته. بأزون اونَ خو اولأغٚ سٚر بینیشأنِه و ببرده ایتأ میهمأنخأنه میأن و اونی جَا مورأقبت بوکوده. 35 فردأ روج رِه او وخت کی جٚه اویَه شؤئؤندوبو، ایپچه پول#۱۰:۳۵ متا ۲۰:۲ فأدأ صأب میهمأنخأنه‌یَ و بوگفته: اَ آدم جَا مورأقبت بوکون و اگه ویشتر خرج بوکودی، او وخت کی وأگردستٚم، تٚرَه فأدٚم!
36 «هسأ تی فیکر اَمرأ جٚه اَ سه نفر کویتأ او بیچأره مردأکٚ اَمرأ همسأده بو؟»
37 جوأب بٚدأ: «اونکی اونَ محبت بوکود و اونی یاور بوبوست.»
عیسا بٚفرمأسته: «تویٚم اَ کأرَ بوکون!»
خودا کلامٚ ایشتأوٚستٚنٚ اهمیت
38 اورشلیم رأ میأن، عیسا و اونی شأگردأن فأرٚسِده ایتأ دیهأتَ. اویَه ایتأ زنأی کی مارتا نأم دأشتی اَشأنَ خو خأنه دعوت بوکوده. 39 اون ایتأ خأخور دأشتی کی اونی ایسم مریم بو. او وخت کی عیسا اَشأنَ خأنه بوشؤ، مریم خیأل رأحتی اَمرأ بینیشته کی عیسا گبأنَ بشتأوه.
40 امّا مارتا کی او میهمأنأنَ پذیرأیی کودنٚ وأسی دٚس پأچه بوسته بو و حقٚ سعی زِئی، عیسا ورجأ بأمؤ و بوگفته: «آقأ جأن، اینصأف جَا دؤر نییٚه کی می خأخور اَیَه بینیشینه و من تنأیی همٚتأ کأرأنَ انجأم بدم؟ لوطف بوکون اونَ بفرمأ کی مٚرَه یاور بٚده!»
41 خوداوند عیسا، اونَ بٚفرمأسته: «مارتا، تو هر چی وأسی غورصه دأر و دسپأچه بی، 42 امّا فقد ایچی اهمیت دأره. مریم هونَ اینتخأب بوکوده و من نخأیٚم اَ فیضَ اونی جَا فأگیرٚم!»
Currently Selected:
لوقا ۱۰: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org