یوحنا ۱۳
۱۳
عیسا فروتنی‌یَ خو شأگردأنَ آموجه
1 (پسَح عَیدٚ) شب فأرٚسِه. عیسا دأنستی کی او زمأت فأرٚسِه کی اَ دونیأیَ وأستی بٚنه و بشه پئرٚ ورجأ. اون کی اَ زمأتٚ میأن خو شأگردأنٚ محبتٚ اَمرأ خیدمت بوکوده بو، اَسه خو محبتٚ تومأم و کمأل خو شأگردأنَ نیشأن بٚدأ. 2 شأمٚ زمأت بو و شیطان یوهودأیٚ اسخریوطی "شمعونٚ پٚسرَ" فیتَ دأ بو کی عیسایَ نأرو بٚزٚنه. 3 عیسا دأنستی کی پئر همه چی ایختیأرَ اونَ فأدَه و جٚه خودا ورجأ بأمؤ و وأستی ایوأردِه وأگرده اونٚ ورجأ.
4 پس، جٚه شأمٚ سٚر ویریشته، خو رختَ بٚکنده، ایتأ حوله خو کمرَ دٚوٚسته، 5 ایتأ لگنٚ میأن آب دوکوده و بینأ کودن شأگردأنٚ پأیَ شؤستن و حوله اَمرأ خوشکَ کودن. 6 او وخت کی فأرٚسِه شمعونٚ پطرسٚ ورجأ، پطرس اونَ بوگفته: «اوستأد، تو نوأستی اَمی پأیَ بوشؤری.»
7 عیسا جوأب بٚدأ: «اَسه می اَ کأر منظورَ نفأمی، ولی ایروج فأمی.»
8 پطرس ایوأردِه حقٚ و سعی اَمرأ بوگفته: «نه، هیوخت ولأنم می پأیأنَ بوشؤری.»
عیسا بٚفرمأسته: «اگه تی پأیَ نوشؤرٚم تو می شین نیبی.»
9 پطرس هولَ بوسته و دفأتن بوگفته: «اوستأد، اَسه کی اَطویه، نه فقد می پأیَ، بلکی می دیم و بألم بوشؤر.»
10 عیسا جوأب بٚدأ: «اونی کی خؤرَه بوشؤسته، فقد وأستی خو پأیَ بوشؤره، تأ تومأمٚ اونی جأن پأکَ به. شومأنم پأک ایسیدی امّا نه، همٚتأن.» 11 چونکی عیسا دأنستی، کی اونَ نأرو زٚنِه، هنٚ وأسی بوگفته کی همٚتأن پأک نییٚد.
12 خو شأگردأنٚ پأیَ شؤستنٚ پٚسی، خو رختَ دوکوده و شأمٚ سٚفره سٚر بینیشته و وأوٚرسِه: «بفأمستیدی کی چٚره اَ کأرَ بوکودم؟ 13 شومأن مٚرَه اوستأد و خوداوند دؤخأنیدی و دوروست گیدی چونکی هطؤیٚم ایسه. 14 هسأ، من کی شیمی خوداوند و اوستأد ایسٚم، شیمی پأیأنَ بوشؤستم، شومأنم وأستی کس‌کسٚ پأیأنَ وأشورید. 15 من شٚمٚره ایچی بأمؤختم و شومأنم هطؤ کردکأر بوکونید. 16 چونکی کأرگر خو اربأبٚ جَا بوجؤرتر نییٚه و اونی کی پیغأم اَوٚره جٚه خو اوسه کوده کس موهیمتر نییٚه. 17 زٚندیگی میأن، خوشبختی اَنه کی هر چی‌یَ کی دأنیدی، انجأم بدید.»
عیسا یوهودأ نأرویَ جٚه قبل خٚوٚر دِهه
18 «اَنَ شومأن همٚتأنَ نگم، چونکی شٚمٚره ایتأ ایتأ دؤجین بوکودم، خُب شنأسٚم. امّا اونچی کی موقدسٚ کیتأبأنٚ میأن بأمؤ وأستی انجأم بٚبه کی فٚرمأیه: "اونی کی می نأن و نمکَ خوره، می دوشمن بوبوسته."#۱۳:۱۸ مزمور ۹:۴۱. 19 اَنَ شٚمٚره گم کی او وخت کی ایتفأق دکفته، مٚرَه ایمأن بأوٚرید. 20 اَنَ بدأنید هرکی اونی‌یَ کی مٚرَه اوسه کوده، قوبیل بوکونه، مٚرَه قوبیل بوکوده و اونی کی مٚرَه قوبیل بوکونه می پئر، ینی خودایَ کی مٚرَه اوسه کوده قوبیل بوکوده.»
21 اَ گبأن گفتنٚ پٚسی، عیسا خٚیلی غورصه‌دأر بوبوسته و خو بشکسته دیلٚ اَمرأ بوگفته: «رأستش اَنه کی ایتأ جٚه شومأن مٚرَه نأرو زٚنِه.»
22 شأگردأن قأقَ بوستٚده و کس‌کسٚ فأندرستده و مأتَ بوسته بود کی عیسا اَ گبَ کی جَا گفتن دٚرٚه. 23 ایتأ جٚه او شأگردأن، کی عیسا اونَ دوس دأشتی، اونی ورجأ لَم بدأبو. 24 شمعونٚ پطرس اونَ ایشأره بٚزِه کی وأوٚرسِه اون کیه کی اَ وأشتنأکٚ کأرَ کونه. 25 پس، او شأگرد عیسایَ نیزدیکَ بوسته و وأوٚرسِه: «خوداوندا اون کیسه؟»
26 بٚفرمأسته: «اونیکی ایتأ لوقمه چأکونم و اونَ فأدٚم.» او وخت لوقمه بیگیفته و فأدَه یوهودأیَ، شمعونٚ اسخریوطی پٚسر. 27 هطؤ کی او لوقمه اونی گولی جَا بیجیر بوشؤ، شیطانٚم بوشؤ اونی جٚلدٚ دورون.
پس عیسا اونَ بٚفرمأسته: «او کأری‌یَ کی خأیی بوکونی، زوتر انجأم بٚدٚن!» 28 هیکس شأمٚ سٚفره سٚر نفأمسته کی عیسا منظور چیسه. 29 فقد ای عیده گومأن بوکودٚد چونکی پول، یوهودأ ورجأ نٚهأ بو، عیسا اونَ فرمأن بٚدأ کی بشه خورأکی بیهینه و یا اَنکی ایچی فأدَه فِقِرأنَ.
30 یوهودأ خو لوقمه‌یَ بوخورده و دفأتن شبٚ تأریکی میأن ویریشته بوشؤ بیرون.
عیسا پطرسٚ اینکأرَ جٚه قبل خٚوٚر دِهه
31 هطؤ تأ یوهودأ اوتأقٚ جَا بوشؤ بیرون، عیسا بٚفرمأسته: «او وخت فأرٚسِه کی اینسأنٚ پٚسر خو جلالٚ دورون وأرد بٚبه و خودایٚم اونی اَ کأرٚ اَمرأ جلال بیأفه. 32 خودایٚم پور زمأت نیبه کی خو بوزورگی و جلالَ مٚرَه فأدِه. 33 اَی می جأنٚ دیلٚ زأکأن، اَ لحظه‌یأن چندر کوتأیٚده. اَسه ده وأستی شٚمٚره هَیه بنم و بشم. او وخت هوطؤیی کی یوهودٚ قومٚ پیله کسأنٚ رِه بوگفتم، همه جیگأ می دونبأل وأموجیدی ولی مٚرَه نیأفیدی و نتأنیدی او جیگأیی کی من شٚم، بأیید.»
34 «پس هسأ ایتأ تأزه دستور شٚمٚره فأدَم: کس‌کسٚ دوس بٚدأرید هوطؤ کی من شٚمٚره دوس دأرم. 35 شیمی اَ محبتأنٚ کس‌کسٚ رِه، دونیأیَ نیشأن دِهه کی شومأن می شأگردأن ایسیدی.»
36 شمعونٚ پطرس وأوٚرسِه: «اوستأد، شومأن کؤیَه شوئؤندریدی؟»
عیسا جوأب بٚدأ: «هسأ، می اَمرأ نتأنی بأیی، امّا بأزون می دونبألسر اَیی.»
37 پطرس وأوٚرسِه: «اوستأد، چٚره نتأنٚم هسأ بأیٚم؟ من حتّا می جأنَ تی وأسی فأدٚم.»
38 عیسا جوأب بٚدأ: «تو تی جأنَ مِرِه فأدی؟ هه ایمشٚب پیشتر جٚه اَنکی خوروس بٚخأنه، تو سه وأر مٚرَه اینکأر کونی و گی کی مٚرَه نشنأسی.»
Currently Selected:
یوحنا ۱۳: GLK_NT
Highlight
Share
Copy
Want to have your highlights saved across all your devices? Sign up or sign in
© 2024 Transform Iran