پیدأیش ۳
۳
اینسأنٚ سوقوط
1 لأنتی تومأمٚ یهوه خودا چأکوده حیوأنأنٚ جَا، زرنگ‌تر بو. ایتأ روج لأنتی بأمؤ زنأکٚ ورجأ، اونَ بوگفته: «ینی حِئقت دأره خودا ولأشته کی شومأن تومأمٚ بأغٚ دأرأنٚ مِیوه جَا بوخورید؟»
2 زنأی جوأب بٚدأ: «اَمٚرَه وئأشته تومأمٚ دأرأنٚ مِیوه جَا بوخوریم، 3 جغرز او دأرٚ مِیوه کی بأغٚ وسطٚ میأن نٚهأ. خودا بٚفرمأسته کی او دأرٚ مِیوه جَا نوخوریم و حتّا اونَ دٚس نٚزٚنیم اگه اَطؤ نٚبه میریمی.»
4 لأنتی بوگفته: «حتم بٚدأر نیمیریدی! 5 بلکی خودا خُب دأنه جٚه او دأرٚ مِیوه خوردنٚ پٚسی، شیمی چومأن وأزَ بِه و خودا مأنستَن بیدی و تأنید خُبی‌یَ جٚه بدی تشخیص بٚدید.»
6 زنأکٚ فیکرٚ میأن، او دأر خورومٚ چی بأمؤ و خو اَمرأ گومأن بوکوده: «اَ دأرٚ مِیوه کی دیلَ چسبه، اَنٚ مٚزه تأنه خُب بٚبه و مٚرَه دأنأ چأکونه.» پٚس دأرٚ مِیوه جَا وأچه و بوخورده و خو مردأکم فأدأ کی اونی اَمرأ ایسأ بو و اونم بوخورد. 7 بأزون هردوتأنٚ چومأن وأزَ بوسته نأخٚوٚرکی وأخبدأرَ بوستد کی برأنده ایسٚد و هیچی دوکوده نأرٚده، خجألت بٚکشِده. پٚس خوشأنٚ لأ دٚئنٚ وأسی اَنجیل دأرٚ ولگأنٚ اَمرأ ایچی چأکودٚد کی دوکونٚد.
8 هو روجٚ میأن غروب دٚمٚ رِه او وخت کی بینأ بوکوده خونٚکٚ نرمٚ بأد اَمؤن، آدم و اونی زنأی، یهوه خودا صدایَ بٚشتأوٚستٚد کی بأغٚ دورون رأ شؤئی؛ خوشأنَ دأرأنٚ میأن جیگأ بٚدأده. 9 یهوه خودا آدمَ دؤخأده: «اَی آدم، کؤیَه ایسأیی؟»
10 آدم جوأب بٚدأ: «بأغٚ دورون تی صدایَ بٚشتأوٚستم، چونکی برأنده بوم بٚترسِئم، پٚس مٚرَه جیگأ بٚدأم.»
11 یهوه خودا بٚفرمأسته: «کی تٚرَه بوگفته کی برأنده ایسی؟ ینی او دأرٚ مِیوه جَا کی تٚرَه بوگفته بوم نوخوری، بوخوردی؟»
12 آدم جوأب بٚدأ: «او مِیوه‌یَ اَ زنأی مٚرَه فأدأ کی می یأر و همدم چأکودی، و منم بوخوردم.»
13 بأزون یهوَه خودا، زنأکٚ جَا وأوٚرسِه: «اَ کأر چی بو کی بوکودی؟» زنأی بوگفته: «لأنتی مٚرَه فیتَ دأ.»
14 پٚس یهوه خودا لأنتی‌یَ بٚفرمأسته: «اَ کأرٚ کودنٚ وأسی، زیمینٚ میأن تومأمٚ اهلی و وأشی حیوأنأنٚ جَا ملعون‌تر بی. تأ زٚنده ایسی تی شکمٚ سٚر تٚرَه فوسینی و خأک خوری. 15 تی میأن و زنأکٚ میأن و هطؤیم تی نتأج و زنأکٚ نتأجٚ میأن، دوشمنی نٚهٚم. زنأکٚ نتأج تی سٚرَ کؤبأنه و تو اونی پأ بوزَ گزی.»
16 بأزون زنأکَ بٚفرمأسته: «تی زأئأنٚ دردَ زیأدَ کونٚم و تو زأکأنَ دردٚ اَمرأ زأیی. تی مردٚ رِه شوق دأری و اون تی رو بأش بِه.»
17 بأزون خوداوند آدمَ بٚفرمأسته: «چونکی تی زنأکٚ گبَ قوبیل بوکودی و او دأرٚ مِیوه جَا کی تٚرَه بوگفته بوم نوخوری، بوخوردی، زیمین شِه لعنتٚ جیر و تی روزی‌یَ تومأمٚ تی عُمرٚ روجأنٚ میأن رنج و حقٚ سعی زِئنٚ اَمرأ اونی جَا فأگیری. 18 زیمینٚ جَا تٚمٚش و وأش تِرِه بیرون اَیِه و بیأبأنٚ گیأیأنَ خوری. 19 تأ زٚنده ایسی تی پیشأنی عرق فوکودنٚ اَمرأ جَا نأن خوری و آخرپٚسی وأگردی هو خأکٚ میأن کی اونی جَا بیگیفته بوبوستی؛ چونکی تو خأکٚ جَا چأکوده بوبوستی و خأکٚ میأنم وأگردی.»
20 آدم، خو زنأکَ حَوّا (ینی «زٚندیگی») نأم بٚنأ، چونکی وأستی اون تومأمٚ زٚنده‌یأنٚ مأر بٚبه.
21 یهوه خودا، حیوأنٚ پوستٚ جَا چنتأ رخت آدم و اونی زنأکٚ دوکودنٚ رِه چأکود. 22 بأزون یهوه خودا بٚفرمأسته: «هسأ کی اینسأن اَمی مأنستَن بوبوسته و خُب و بدَ فأمه، نوکونه کی خو دٚسَ رأستَ کونه و "حیأتٚ دأرٚ" مِیوه جَایٚم فأگیره، بوخوره و اَبدٚ رِه زٚنده بِئیسه.» 23 پٚس یهوه خودا اوشأنَ عدنٚ بأغٚ جَا تأوٚدأ بیرون، کی آدم بٚشه و هو زیمینٚ میأن کی اونی خأکٚ جَا چأکوده بوبوسته بو، کأر بوکونه. 24 یهوه خودا اوشأنٚ بیرونٚ تأوٚدأنٚ پٚسی، «حیأتٚ دأرٚ» رأیَ حیفأظت کودنٚ رِه فٚرٚشته‌یأنَ بٚنأ عدنٚ بأغٚ شرقٚ ور و ایتأ آتشی شمشیرم اویَه بٚنأ کی هرتأ ورَ چرخستی.
Currently Selected:
پیدأیش ۳: GCB
Highlight
Share
Copy
Want to have your highlights saved across all your devices? Sign up or sign in
The Gilaki Contemporary Bible is a Product of Transform Iran © 2024. All rights reserved. www.kelisayejame.org